1-2. Waut fa een Jlikjnis halpt ons, 1. Petrus 2:21 to vestonen?

DENKJ mol han, daut haft jeschniet un du jeist met aundre toop derch eene jefäadelje Wiltnis. Jie haben eenen erfoarnen Leida, waut junt veroppjeit, un du kaust dän siene Spoaren en daut wieekje Schnee seenen. Irjentwanea kaust du dän Leida nich mea seenen, oba du grulst die nich. Du un de aundre gonen eefach soo krakjt aus mäajlich en dän siene Footspoaren.

² Aus Christen go wie soo to sajen uk derch eene jefäadelje Wiltnis un daut es dise schlajchte Welt. Jehova haft ons dän basten Leida jejäft – sienen Sän Jesus Christus – un wie kjennen en dän siene Footspoaren gonen (1. Pet. 2:21). En een Buak toom nosieekjen sajcht daut, daut Petrus en disen Bibelvarsch een Jlikjnis brukt von eenen Leida, waut Footspoaren hinjalat. Krakjt soo haft Jesus ons uk Footspoaren hinjaloten, en dee wie gonen kjennen. Nu woa wie mol seenen, waut dit fa Footspoaren sent, wuarom wie en dee gonen sellen un woo wie daut kjennen.

3. Waut bediet daut, en wäm siene Footspoaren to gonen?

³ Waut meent daut, en wäm siene Footspoaren to gonen? De Bibel brukt de Wieed “waundlen” un “gonen” eenjemol fa daut, waut een Mensch deit (1. Mo. 17:1; Spr. 4:26). Daut Läwen, waut een Mensch fieet, kaun eena met dän siene Footspoaren vejlikjen, waut dee hinjalat. En dän siene  Footspoaren gonen meent, daut wie dän nodoonen un ons dän toom Väabilt nämen.

4. Waut bediet daut, en Jesus siene Footspoaren to gonen?

⁴ Waut bediet daut dan, en Jesus siene Footspoaren to gonen? Eefach jesajcht, sien Biespel nodoonen. En onsen Teemavarsch räd Petrus doavon, daut Jesus en schwoare Tieden jeduldich uthilt. Oba wie kjennen Jesus noch en väl mea Stekjen nodoonen (1. Pet. 2:18-25). En Werkjlichkjeit kjenn wie Jesus en aules nodoonen, waut hee säd un waut hee deed.

5. Kjennen onvolkomne Menschen Jesus sien volkomnet Biespel werkjlich nodoonen? Laj daut ut.

⁵ Kjenn wie aus onvolkomne Menschen Jesus werkjlich nodoonen? Jo, wiels Petrus säd nich, daut wie Jesus volkomen nodoonen sullen, oba “en siene Footspoaren gonen”. Wan wie aus onvolkomne Menschen daut soo goot aus mäajlich doonen, dan jehorch wie dän Apostel Johanes siene Wieed, daut wie “soo läwen [sellen] aus Christus jeläft haft” (1. Joh. 2:6).

6-7. Wuarom kom wie Jehova noda, wan wie en Jesus siene Footspoaren gonen?

⁶ Wan wie en Jesus siene Footspoaren gonen, woa wie Jehova noda komen. Wuarom? Ieeschtlich jeef Jesus een sea goodet Biespel, woo eena fa Gott läwen kunn (Joh. 8:29). Wan wie en Jesus siene Footspoaren gonen, woa wie Jehova jefaulen. Un wie kjennen ons secha sennen, daut ons himlischa Voda aul dee noda komen woat, waut sikj aunstrenjen siene Frind to sennen (Jak. 4:8).

⁷ Tweedens deed Jesus sienen Voda volkomen no. Daut es, wuarom Jesus sajen kunn: “Wäa mie jeseenen haft, haft uk dän  Voda jeseenen” (Joh. 14:9). Jesus haud biejlikj Metjefeel met eenen Leprakranken, met eene Fru, waut eene schwoare Krankheit haud, un met soone, wua wäa jestorwen wia. Un wan wie Jesus siene Ieejenschoften nodoonen un met aundre krakjt soo omgonen aus hee, dan doo wie uk Jehova no (Mar. 1:40-41; 5:25-34; Joh. 11:33-35). Je dolla wie soo woaren aus Jehova, je noda woa wie am komen.

8. Wuarom woa wie leichta kjennen “jäajen de Welt” jewennen, wan wie en Jesus siene Footspoaren gonen?

⁸ Wan wie en Jesus siene Footspoaren gonen, woa wie von dise schlajchte Welt nich soo leicht aufjelenkjt woaren. Dän Owent ea se Jesus dootmuaken, kunn hee sajen: “Ekj hab jäajen dise Welt jewonnen” (Joh. 16:33). Daut meent, daut dise Welt nuscht aun Jesus sien denkjen, aun siene Woakjen un aun daut, wua hee no sträwd, doonen kunn. Jesus hilt daut emma em Denkj, daut hee no de Ieed jekomen wia toom fa Jehova enstonen. Waut lia wie doavon? En dise Welt jeft daut een deel, waut ons auflenkjen kaun. Oba wan wie krakjt soo aus Jesus doaropp schaufen, Jehova sienen Wellen to doonen, woa wie uk “jäajen de Welt” jewennen (1. Joh. 5:5).

9. Waut mott wie doonen, daut wie opp dän Wajch no daut eewje Läwen bliewen?

⁹ Wan wie en Jesus siene Footspoaren gonen, kjrie wie daut eewje Läwen. Aus een rikja junga Maun Jesus fruach, waut hee doonen sull toom daut eewje Läwen kjrieen, säd Jesus: “Folj mie no” (Mat. 19:16-21). To eenje Juden, waut nich jleewden, daut Jesus de Christus wia, säd hee: “Miene Schop . . . komen mie hinjaraun. Un ekj jäw an eewjet Läwen” (Joh. 10:24-29). Un to Nikodemus, waut eena von daut hechste Jerecht wia un mea von Jesus lieren wull, säd Jesus, daut dee, “dee aun am jleewen” wudden, “daut eewje Läwen haben” wudden (Joh. 3:16). Wie jleewen aun Jesus, wan wie daut nokomen, waut hee lieed, un am nodoonen. Wan wie daut doonen, dan woa wie opp dän Wajch no daut eewje Läwen bliewen (Mat. 7:14).

10. Waut es doa aules met en, Jesus bäta “kjanen [to] lieren”? (Johanes 17:3).

¹⁰ Ea wie krakjt en Jesus siene Footspoaren gonen kjennen, mott wie am kjanen lieren (läs Johanes 17:3). Wie motten Jesus emmawajch bäta “kjanen lieren”, biejlikj woo hee daut haft, waut hee denkjt un waut hee fa rajcht talt. Krakjt endoont, woo lang wie aul en de Woarheit sent, wie motten emma doaropp schaufen, Jehova un sienen Sän bäta “kjanen [to] lieren”.

11. Waut finj wie en de vea Evangelien?

 ¹¹ Jehova haft doano jeseenen, daut de vea Evangelien Poat von de Bibel sent, daut wie Jesus bäta kjanen lieren kjennen. Doabennen finj wie een deel von Jesus sien Läwen, von sienen Deenst, waut hee säd un waut hee deed un woo hee sikj feeld. Dise vea Bibelbieekja halpen ons, daut wie ons Jesus sien Läwen väastalen kjennen (Heb. 12:3). Doa sent soo to sajen Jesus siene Footspoaren bennen. Wan wie ons dise vea Evangelien unjastonen, dan kjenn wie Jesus emma bäta kjanen lieren un krakjt en siene Footspoaren gonen.

12. Woo kjenn wie noch mea von de Evangelien lieren?

¹² Daut wie väl von de Evangelien lieren kjennen, mott wie dee nich bloos läsen. Wie motten ons uk de Tiet nämen, dee deep to studieren un doaräwa notodenkjen (Josua 1:8). Well wie mol tweeatlei seenen, waut ons doabie halpen kaun, äwa de Evangelien notodenkjen un daut uk notokomen.

13. Woo kjenn wie ons daut bäta väastalen, waut wie en de Evangelien läsen?

¹³ Ieeschtens: Stal die daut väa, waut du doa en de Evangelien läst. Waut wia doa to seenen, to hieren ooda to späaren? Daut ons daut leichta es, kjenn wie waut von daut brucken, waut Jehova siene Organisazion ons toom nosieekjen jeft. Wan du eene Jeschicht studieescht, dan unjasto die uk de Varzhen doaver un doahinja. Sieekj die uk mea von de Menschen un von de Städa no, von dee daut doa rät. Läs die de Jeschicht uk en de aundre Evangelien no. Eenjemol woascht du doa noch aundre intressaunte Eenselheiten finjen.

14-15. Woo kjenn wie daut brucken, waut wie en de Evangelien lieren?

¹⁴ Tweedens: Bruck daut, waut du jelieet hast (Joh. 13:17). Nodäm daut du eene Jeschicht von de Evangelien studieet hast, denkj doaräwa no: “Es doa  irjenteene Lia bennen, dee ekj mie doa fa mie rutnämen kaun? Woo kaun ekj dise Jeschicht brucken, om aundre to halpen?” Äwalaj die krakjt, wäm du halpen west, un vetal dän leeftolich un to eene paussende Tiet, waut du jelieet hast.

¹⁵ Well wie mol seenen, woo wie dise beid Sachen nokomen kjennen. Doatoo bruck wie de Jeschicht von de oame Wätfru, waut Jesus em Tempel sach.

16. Woo stalst du die daut väa, wua Markus 12:41 von rät?

¹⁶ Stal die daut väa, waut du läst (läs Markus 12:41). Daut es de 11. Nissan aune 33 un om een poa Doag woaren se Jesus dootmoaken. Jesus haud aul meist dän Dach äwa em Tempel jelieet. Siene Jäajna muaken am daut schwoa. Eenje beduaden, wäa am de Macht jejäft haud toom lieren, un aundre proowden am met äare Froagen fausttokjrieen (Mar. 11:27-33; 12:13-34). Nu es Jesus opp eene aundre Städ em Tempel, woomäajlich en dän Väahoff von de Frues. Von doa kaun hee de Gowenkaustes aun de Waunt seenen. Hee sat sikj doa dol un sitt, woo de Menschen äa Jelt enlajen. Doa sent uk een deel Rikje, waut doa een deel Jeltstekja nenschmieten. Veleicht es hee doa soo dicht bie, daut hee daut hieet, woo daut Jelt doa nenschett.

17. Waut deed de oame Wätfru, wua Markus 12:42 von rät?

¹⁷ Läs Markus 12:42. Een Stootje wieda sitt Jesus doa eene Fru. See es “eene oame Wätfru”. Fa ar es daut sea schwoa, un see mott sea doano seenen, daut see waut toom Läwen haft. Oba see jeit doawäajen no eenen Gowenkausten un schmitt doa twee kjliene Jeltstekja nenn, waut woomäajlich nich mol to hieren sent, wan dee doa nenfaulen. Jesus weet, daut see doa twee Koppasch, ooda Leptasch, nenjeschmäten haft, waut to jane Tiet de kjlanste Zenten wieren. Daut wia nich mol soo väl, daut see sikj een Spoalinkj kjeepen kunn, waut don de billichste Väajel toom äten wieren.

18. Waut säd Jesus no Markus 12:43-44 no äwa daut, waut de Wätfru enlajen deed?

¹⁸ Läs Markus 12:43-44. Fa Jesus es daut waut gaunz besondret, waut dise Wätfru deit. Hee roopt siene Jinja un wiest an de Wätfru un sajcht to dee: “Dise oame Wätfru haft mea . . . nenjelajcht aus aul de aundre.” Un hee sajcht uk: “De aundre, dee doa jeewen, [besonda de Rikje] hauden aula mea aus jenuach; oba dise, dee weinja haud aus see brukt, jeef aules waut see toom läwen haud.” Aus dise true Wätfru äa latstet bät Jelt fa disen Dach jeef, veleet see sikj gaunz opp Jehova, daut dee fa ar sorjen wudd (Psa. 26:3).

19. Waut fa wichtjet kjenn wie von daut lieren, waut Jesus von de Wätfru säd?

¹⁹ Bruck daut, waut du jelieet hast. Denkj mol doaräwa no: “Waut kaun ekj doavon lieren, waut Jesus von de oame Wätfru säd?” Denkj mol äwa de Wätfru no. Secha haft see sikj jewenscht, daut see Jehova mea jäwen kunn. Oba see deed aules, waut see kunn, un jeef Jehova äa bastet. Jesus wist, daut Jehova äare Gow väl räakjend. Doavon kjenn wie waut wichtjet lieren: Jehova es sea schaftich, wan wie am ons bastet jäwen un am von gaunzen Hoaten un met onse gaunze Seel deenen (Mat. 22:37; Kol. 3:23). Jehova freit sikj, wan hee sitt, daut wie ons bastet doonen. Daut es nich bloos bie onse Gowen soo, oba uk bie onse Tiet un Krauft, waut wie fa jeisteljet  brucken, biejlikj fa dän Deenst un fa de Toopkomes.

20. Woo kjenn wie daut brucken, waut wie von de Wätfru lieren? Jeff een Biespel.

²⁰ Woo kaust du daut brucken, waut du von de Wätfru jelieet hast? Denkj mol doaräwa no, wäm daut wudd togood komen, wan du an sätst, daut Jehova met an tofräd es. Kjanst du biejlikj eene elre Sesta, waut doa mootloos es, wiels see wäajen äare Krauft ooda Jesuntheit nich mea soo väl em Deenst doonen kaun aus ea? Ooda weetst du von eenen Brooda, waut truarich es, wäajen hee krank es un nich no jieda Toopkomen kaun? Du wurscht dee doaderch halpen kjennen, daut du dee Moot toospruakst (Efs. 4:29). Vetal dee von daut goode, waut du von de oame Wätfru jelieet hast. Daut kaun dee sea treesten, wan dee seenen, daut Jehova met ons tofräd es, wan wie am ons bastet jäwen (Spr. 15:23; 1. Tess. 5:11). Wan du aundre lofst, daut dee Jehova äa bastet jäwen, krakjt endoont woo weinich daut mau es, dan jeist du krakjt en Jesus siene Footspoaren.

21. To waut best du die eenich jeworden?

²¹ Kjenn wie nich dankboa sennen fa de Evangelien, wua soo väl von Jesus sien Läwen bennen es? Doaderch kjenn wie am nodoonen un en siene Footspoaren gonen. Wudd wie ons mol kjennen waut von daut unjastonen, wan wie fa ons perseenlich studieeden ooda en ons Famieljenstudium? Daut ons daut studieren daut mieeschte halpt, mott wie ons de Jeschicht väastalen un daut en ons Läwen brucken. Wie motten daut nodoonen, waut Jesus deed, un no daut horchen, waut hee säd. En dän näakjsten Artikjel woa wie seenen, waut wie von daut lieren kjennen, waut Jesus ver sienen Doot säd.