De Vesaumlunk wudd daut soo seenen, daut et met de ieeschte Ehe derch wia, wan de Maun sikj fresch befried un de fresche Ehe verem Jesaz jeltich wia. Om daut noch kloara to vestonen, well wie mol seenen, waut Jesus äwa de Scheedunk un äwa fresch befrieen säd.

Soo aus Matäus 19:9 wiest, säd Jesus, daut et bloos eenen biblischen Grunt jeef, om sikj scheeden to loten. Hee säd: “Wäa sikj von siene Fru scheeden deit, wan see am nich es ontru jewast, un eene aundre friet, dee brakjt de Ehe” (Von ons schroz jemoakt). Von Jesus siene Wieed lia wie, (1) daut bloos Huararie een biblischa Grunt es, sikj scheeden to loten. (2) Wie lieren uk, wan een Maun sikj onen eenen biblischen Grunt scheeden lat un sikj met eene aundre befriet, Huararie bejeit. *

Meenen Jesus siene Wieed, daut een Maun, waut Huararie begonen haft un sikj von siene Fru scheeden lat, no de Schreft no frie es sikj wada to befrieen? Nich onbedinjt. Wan een Maun Huararie bejeit, dan kaun siene Fru, waut doa nich Schult aun haft, sikj entscheiden, aus see am vejäwen well ooda nich. Un wan see am nich vejeft un dee sikj verem Jesaz scheeden loten, dan sent see beid frie, sikj fresch to befrieen.

Oba daut kaun uk sennen, daut de Fru, met am befriet bliewen well un to am sajcht, daut see reed es, am to vejäwen. Oba waut, wan de Maun, waut Huararie begonen haft, daut nich aunnemt, daut siene Fru am vejäwen well un hee sikj verem Jesaz scheeden loten well un see daut oba nich unjaschrift? No de Schreft no wudd hee nich frie sennen, sikj fresch to befrieen, wiels see reed wia, am to vejäwen. Wan hee sikj oba met eene aundre befriet, wan hee no de Schreft no nich frie es, brakjt hee wada de Ehe. De Eltestasch vonne Vesaumlunk wudden dan wada motten een Rechtkommitee moaken (1. Kor. 5:1-2; 6:9-10).

Woo sitt de Vesaumlunk dän ieeschten Ehestaunt un dän freschen, wan de Maun no de Schreft no noch nich frie wia, sikj wada to befrieen? Es de ieeschta Ehestaunt no de Schreft no doawäajen noch jeltich? Kaun de Fru, waut doa nich Schult aun haud, sikj noch emma entscheiden, dän Maun to vejäwen, met dän see ea befriet wia? Wudd de Vesaumlunk de fresche Ehe fa wieda doafäa aunseenen, daut dee en Huararie läwden?

Ieeschtemma sach de Vesaumlunk daut doafäa aun, daut de Freschbefriede soo lang Huararie bejinjen, aus de Fru, waut doa nich Schult aun haud, noch läwd, onbefriet bleef un selfst nich Huararie bejinkj. Oba aus Jesus von de Scheedunk un fresch befrieen räd, räd hee nich von dän Poatna, waut doa nich Schult aun haud. Hee säd eefach, daut de Maun, waut sikj von siene Fru onen eenen biblischen Grunt scheeden leet un sikj fresch befried, Ehebruch bejinkj. Soo aus Jesus säd, sikj scheeden loten un fresch befrieen es krakjt soo aus Ehebruch, un daut bediet, daut et met de ieeschte Ehe derch es.

 Wan een Maun sikj aulsoo von siene Fru scheeden lat un sikj met eene aundre befriet, dan kaun de Fru, waut doa nich Schult aun haft, nich mea entscheiden, aus see met am toopbliewen well ooda nich. Wiels hee daut aul soo entschieden haft, brukt see nich mea dise schwoare Entscheidunk moaken. Aus de Vesaumlunk dän freschen Ehestaunt verem Jesaz aus jeltich talt, henjt nich doavon auf, aus de Poatna, waut doa nich Schult aun haud, stoaft, sikj fresch befriet ooda selfst Huararie bejeit. *

Bat nu hab wie een Biespel jeseenen, wan een Maun Ehebruch bejeit un daut to de Scheedunk fieet. Oba waut, wan de Maun nich Huararie bejeit un sikj oba scheeden lat un fresch befriet? Ooda waut, wan de Maun nich Huararie bejeit un sikj oba von siene Fru scheeden lat un doahinja Huararie bejeit un sikj dan fresch befriet un siene ieeschte Fru oba reed es, am to vejäwen? Aul dise Biespels von sikj scheeden loten un fresch befrieen, aulsoo Ehebruch, moaken een Enj met dän ieeschten Ehestaunt. De niea Ehestaunt es verem Jesaz jeltich un dee motten sikj doaraun hoolen. En dän Wachtturm vom 15. Feebawoa 1980, Sied 31 woat jewäsen, “daut hee nu Poat es von dän nieen Ehestaunt un nich bloos wada kaun een Enj moaken doamet un trigj no siene ieeschte Fru gonen. De ieeschta Ehestaunt wia to Enj met de Scheedunk, Huararie un fresch befrieen.”

Daut wie daut nu aundasch vestonen kjennen, bediet nich, daut de Ehe nich heilich es ooda daut et nich soone groote Sind es, de Ehe to bräakjen. Wan een Maun onen eenen biblischen Grunt sikj scheeden lat un sikj met eene aundre befriet, wan hee no de Schreft no uk nich frie es, dan kaun hee wada een Kommitee kjrieen, wäajen hee de Ehe brakjt. (Wan de Poatna von dän nieen Ehestaunt eene Sesta es, dan wudd see uk een Kommitee kjrieen, wäajen see de Ehe brakjt.) Soo, wan de Freschbefriede uk nich wudden doafäa aunjeseenen woaren, daut dee en Huararie läwden, wudd de Maun oba fa väle Joaren kjeene Väarajchten enne Vesaumlunk kjrieen, bat de aundre nich mea doll sent äwa daut schlajchte, waut hee jedonen haft, ooda nich mea denkjen, daut hee daut nich wieet es. Ea de Eltestasch dän een Väarajcht jäwen, woaren dee uk doaräwa nodenkjen, woo de väaje Fru sikj feelt, waut doa veleicht von äaren Maun unjagonen wort un aun de Kjinja, waut von dän Voda auleen jeloten worden, aus dee noch nich voljoarich wieren (Mal. 2:14-16).

Wan, wie doaräwa nodenkjen waut vonne schlemme Foljen daut haft, sikj onen eenen biblischen Grunt scheeden to loten, dan es daut sea weis, daut Christen de Ehe uk fa soo heilich talen, aus Jehova daut deit (Liera 5:3-4; Heb. 13:4).