1. Woo kjenn wie met Jehova toopschaufen?

JEHOVA muak de Menschen, un hee wull haben, daut dee sullen met am toop doaropp schaufen, daut sien Väanämen sikj erfeld. Vondoag dän Dach sent wie aula onvolkomen, oba doawäajen kjenn wie Jehova tru deenen un jieda Dach met am toopschaufen. Wie kjennen “Gott siene Metoabeida” sennen, wan wie biejlikj de goode Norecht von daut Kjennichrikj prädjen un Jinja moaken (1. Kor. 3:5-9). Denkj mol han, waut vonne Iea daut es! Wie kjennen bie dit wichtje Woakj met dän aulmajchtjen Gott toopschaufen, waut Himmel un Ieed jemoakt haft. Oba wie kjennen uk noch woo met dän toopschaufen. En disen Artikjel woa wie lieren, daut wie daut doaderch doonen kjennen, wan wie onse Famielje un Gloowesbreeda halpen, wan wie gaustfrie sent, wan wie friewellich waut fa aundre doonen ooda mea em Deenst fa Jehova doonen (Kol. 3:23).

2. Wuarom es daut nich goot, wan wie ons met aundre vejlikjen?

² Wan wie disen Artikjel studieren, dan sell wie no daut kjikjen, waut wie fa Jehova doonen kjennen, un nich no daut, waut aundre kjennen. Wie sent aula veschieden un wäajen ons Ella, onse Jesuntheit, onse Omstend ooda aundre Uasoaken kjenn wie  nich aula jlikjen väl doonen. Gott leet dän Apostel Paulus oppschriewen: “Lot eenem jiedren sien ieejnet Woakj unjasieekjen, un seenen, auf hee doa waut finjt sikj to lowen, un sikj nich aun sienen Noba mäten” (Gal. 6:4).

3. Wuarom schauft jieda eena met Jehova toop, waut fa siene Famielje sorcht?

³ Jehova well haben, daut siene Deena sikj om äare Famielje kjemren. Veleicht mott wie utschaufen toom em tieteljen fa dee sorjen. Väl Mames motten tus bliewen toom sikj om äare kjliene Kjinja kjemren. Un wan onse Elren nich mea auleen foadich woaren, dan mott wie dee veleicht halpen. Dit es soont, waut jedonen mott, wiels Gott sien Wuat sajcht: “Wan oba wäa nich fa sien ieejnet Frintschoft sorcht, un besondasch fa dee von siene ieejne Famielje, dee haft doamet sienen Christengloowen aufjesajcht un es oaja aus eena, dee nich jleewen deit” (1. Tim. 5:8). Wan wie fa wäm von de Famielje sorjen motten, dan kjenn wie veleicht nich soo väl fa Jehova doonen, aus wie wudden wellen. Oba woa nich mootloos! Jehova freit sikj, wan wie fa onse Famielje sorjen (1. Kor. 10:31).

4. (a) Woo kjennen Elren daut Kjennichrikj aun de ieeschte Städ stalen? (b) Waut kaun doabie rutkomen, wan Elren met Jehova toopschaufen?

⁴ Christelje Elren schaufen met Jehova toop, wan dee äare Kjinja halpen, no jeistelje Sachen to sträwen. Väl Elren haben daut jedonen un äare Kjinja haben lota met dän Voltietdeenst aunjefongen un sent veleicht wiet wajchjetrocken. Eenje sent Missionoaren, aundre sent doa em Pioniadeenst, wua mea Help fält, un wada aundre deenen em Betel. Veleicht sent dee soo wiet auf, daut de Famielje sikj nich soo foaken seenen kaun, aus dee wudden wellen. Oba de Elren spräakjen äare Kjinja doawäajen Moot too, äaren Deenst wiedatomoaken, wan daut fa an uk nich leicht es. Wuarom? Dee freien sikj sea, daut de Kjinja Jehova aun de ieeschte Städ stalen (3. Joh. 4). Een deel von dise Elren denkjen soo aus Hana, waut säd, daut äa Sän Samuel Jehova jehieed. Fa dee es daut eene Iea, daut see opp soone Wajch kjennen met Jehova toopschaufen, un dee sent wellich reed doatoo (1. Sam. 1:28).

5. Woo kjenn wie de Breeda un Sestren von onse Vesaumlunk halpen? (See daut Bilt aum Aunfank.)

⁵ Wudd daut wäajen onse ieejne Famielje mäajlich sennen, daut wie Breeda ooda Sestren halpen kunnen, waut krank ooda ella sent ooda waut sest Help fält? Ooda kunn wie soone halpen, waut wäm besorjen motten? Es doa wäa en onse Vesaumlunk, waut soone Help fält? Veleicht es doa eene Sesta, waut äare Elren besorcht. Dan kunn wie veleicht een Stootje bie äare Elren bliewen, daut see waut aundret doonen kunn. Veleicht kunn wie uk wäm halpen, no de Toopkomes to komen, entokjeepen, aundre Jeschaften to doonen ooda wäm em Hospitol to besieekjen. Soo kaun Jehova ons brucken toom deejanje biestonen, waut am no Help jefroacht haben (läs 1. Korinta 10:24).

6. Woo kjenn wie gaustfrie sennen?

⁶ Gott siene Metoabeida sent doafäa bekaunt, daut see gaustfrie sent. Daut Wuat, waut en de Christelje Griechische Schreften met “gaustfrie sennen” äwasat es, bediet “met Framde leeftolich sennen” (Heb. 13:2). En Gott sien Wuat finj wie goode Biespels, woo wie kjennen oppnäment sennen (1. Mo. 18:1-5). Wie kjennen aundre pinkjlich halpen, wan daut sest mäajlich es, un wie sellen daut uk doonen, endoont aus dee  “met ons toop em Gloowen stonen” ooda nich (Gal. 6:10).

7. Wuarom es daut goot, Voltietdeena opptonämen?

⁷ Kjenn wie met Gott toopschaufen un Voltietdeena oppnämen, waut eene Städ toom Nacht bliewen fält? (Läs 3. Johanes 5, 8.) Wan wie daut doonen, dan kjenn wie un uk dee “mootja woaren” (Reem. 1:11-12). Well wie mol seenen, waut Olaf beläwd. Joaren trigj kjeem een onbefrieda Kjreisoppsechta no siene Vesaumlunk un kjeena haud eene Stow fa dän. Dan fruach de junga Olaf siene Elren, waut nich Jehova siene Zeijen wieren, aus de Kjreisoppsechta bie an kunn to Nacht bliewen. Dee leeten daut, wan Olaf reed wia, oppe Rubenkj to schlopen. Daut deed hee wellich un daut wort am uk nich leet. Hee sajcht: “Daut wia eene wundascheene Wäakj! Ekj un de Kjreisoppsechta stunden jieda Dach tiedich opp un hauden emma goode Unjahoolungen aum Freestikjsdesch. Dee muntad mie sea opp un daut holp mie, daut ekj lota uk met dän Voltietdeenst aunfangen wull.” De latste 40 Joa wia Olaf aus Missionoa en veschiedne Lenda.

8. Wuarom sell wie uk dan leeftolich sennen, wan aundre doa nich dankboa fäa sent? Jeff een Biespel.

⁸ Eena kaun Framde opp veschiedne Wäaj Leew wiesen, wan daut aum Aunfank veleicht uk soo lat, daut dee daut nich väl räakjnen. Eene Sesta en Spaunien studieed de Bibel met Yesica, waut von Ekuador wia. Eenen Dach road Yesica un kunn nich mea opphieren. De Sesta fruach ar, waut loos wia. Yesica vetald, daut see sea oam wia, ea see no Spaunien trock. Eemol bäd see Gott om Help, wäajen see nuscht mea to äten haud fa äare kjliene Mejal; see kunn ar bloos noch Wota jäwen un dee proowen em Schlop to moaken. Nich lang nodäm kjeemen Jehova siene Zeijen no Yesica, oba see wia nich fein to dee un vereet de Tietschreft, waut de Sestren ar jeewen. See fruach dee: “Kaun mien Kjint dit äten?” De Sestren wullen ar Moot toospräakjen, oba daut holp nuscht. Lota kjeemen de Sestren dan un saden eenen Korf met Äten vere Däa. Daut jinkj Yesica to Hoaten, woo leeftolich dee wieren, un nu road see, wiels see doaraun docht, daut Gott äa Jebäd beauntwuat haud un daut see sikj doa nuscht om jekjemmat haud. Oba nu wia see sikj gaunz eenich, Jehova to deenen. Woo goot daut doch utkjeem, daut de beid Sestren soo leeftolich un friejäwrich wieren! (Liera 11:1, 6).

9-10. (a) Bie waut kunnen de Israeliten ieeschtemma methalpen? (b) Bie waut kjennen de Breeda vondoag dän Dach en de Vesaumlunk methalpen?

⁹ De ieeschtemmasche Israeliten kunnen meamol friewellich wua methalpen (2. Mo. 36:2; 1. Chr. 29:5; Neh. 11:2). Vondoag dän Dach kjenn wie uk foaken onse Tiet, ons Hab un Goot ooda daut, waut wie jelieet haben, brucken, om onse Breeda un Sestren to halpen. Daut woat ons väl Freid un Säajen brinjen, wan wie friewellich waut fa aundre doonen.

¹⁰ Gott sien Wuat rot de Mana von de Vesaumlunk too, met Jehova tooptoschaufen un aus Deenstaumthelpa un Eltestasch to deenen (1. Tim. 3:1, 8-9; 1. Pet. 5:2-3). Dee, waut daut doonen, wellen aundre em jeisteljen un uk äwajens halpen (Apj. 6:1-4). Haben de Eltestasch die jefroacht, aus du wurscht kjennen Ordnungsdeena sennen ooda biejlikj biem Bieekjaschaup, biem besorjen un oppfiksen ooda bie de Jebieten fa dän Prädichtdeenst halpen? De Breeda, waut daut doonen, woaren die secha sajen, daut an daut sea scheen jeit, doa mettohalpen.

11. Waut fa goodet beläwd eene Sesta, waut biem buen metholp?

 ¹¹ Wan eena bie daut Buwoakj von de Organisazion metmoakt, kaun eena foaken fresche Frind finjen. Soo wia daut biejlikj bie Margie, eene Sesta, waut 18 Joa biem Vesaumlungshiesa buen metholp. En aul de Joaren wort see met een deel jinjre Sestren Frint un lieed dee en de Oabeit nenn. Doabie kunnen dee sikj omzajcht em Gloowen stoakjen (Reem. 1:12). Un aus Margie schwoare Tieden derchjinkj, spruaken ar de Frind Moot too, waut see biem buen haud kjanen jelieet. Hast du mol bie daut Buwoakj metjeholpen? Doa kjennen uk soone methalpen, waut nich besonda utjelieet sent doatoo.

12. Woo wudd wie kjennen no een grootet Owwada halpen?

¹² Wie kjennen uk met Jehova toopschaufen, wan wie de Breeda halpen, waut derch grootet Owwada Schoden jekjräajen haben. Wie wudden dee biejlikj kjennen met Jelt halpen (Joh. 13:34-35; Apj. 11:27-30). Ooda wie kunnen dee uk halpen biem reinmoaken ooda biem fresch oppbuen. Gabriela, eene Sesta von Poolen, freid sikj sea, aus de Breeda von de Vesaumlungen doa rom halpen kjeemen, wäajen äa Hus bie eene Äwaschwamunk väl Schoden jekjräajen haud. See sajcht: “Ekj well nich von daut räden, waut ekj veloaren hab. Daut wieren bloos tietelje Sachen. Ekj well leewa doavon räden, woo väl goodet ekj doaderch beläft hab. Ekj hab biejlikj beläft, woo besonda daut es, daut ekj to de Christenvesaumlunk jehieren kaun un woo väl Freid eena doaderch kjricht.” Un soo jeit väl aundre daut uk, waut no een Owwada Help kjrieen. Un dee, waut met Jehova toopschaufen toom soone Breeda halpen, feelen sikj uk sea schaftich un tofräd (läs Aposteljeschicht 20:35; 2. Korinta 9:6-7).

13. Wuarom woat onse Leew fa Jehova stoakja, wan wie aundre halpen? Jeff een Biespel.

¹³ Stephanie un aundre Vekjindja kunnen doaderch met Gott toopschaufen, daut see Gloowesbreeda biestunden, waut no de Stäts flichten musten, wäajen en äa Launt Kjrich wia. Dee holpen dee, daut see eene  Woninj uk Meeblen fungen. See sajcht: “Daut jinkj ons to Hoaten, woo froo un dankboa dee fa de Leew wieren, waut äare Gloowesbreeda oppe gaunze Welt fa an hauden. De Famieljes denkjen, daut wie an jeholpen haben, oba en Werkjlichkjeit haben dee ons väl dolla jeholpen. De Leew, Eenichkjeit, Gloowen un daut Vetruen opp Jehova, waut wie jeseenen haben, haft ons jeholpen, Jehova noch dolla to leewen un noch dankboara to sennen fa aul daut, waut wie derch siene Organisazion kjrieen.”

14-15. (a) Waut vonne Enstalunk haud de Profeet Jesaja? (b) Woo kjennen Christen vondoag dän Dach Jesaja nodoonen?

¹⁴ West du noch mea fa Jehova doonen? Wurscht du reed sennen, wua hantotrakjen, wua mea Help toom prädjen fäld? Eena mott nich onbedinjt wiet wajchtrakjen toom Jehova deenen, oba eenje Breeda un Sestren haben de Mäajlichkjeit, daut to doonen. Dee sent biejlikj soo enjestalt aus de Profeet Jesaja. Aus Jehova fruach: “Wäm saul ekj schekjen? Wäa woat fa ons gonen?”, säd hee: “Ekj sie hia. Du kaust mie schekjen” (Jes. 6:8). Kjenn wie Jehova siene Organisazion uk opp soone Wajch halpen un well wie daut uk? Bie waut wudd wie methalpen kjennen?

¹⁵ Aus Jesus von daut prädjen un Jinja moaken räd, säd hee: “Doa es eene groote Arnt, oba doa sent mau weinich Oabeida. Froacht doch däm Harn, dän de Arnt jehieet, daut hee Oabeida schekjt, de Arnt entobrinjen” (Mat. 9:37-38). Wudd wie kjennen opp soone Städ Pionia sennen, wua mea Help fäld? Ooda wudd wie sestwäm halpen kjennen, daut to doonen? Een deel Breeda un Sestren jleewen, daut see äare Leew fa Gott un dän Näakjsten daut baste wiesen kjennen, wan see doa Pionia sent, wua mea Help bie de jeistelje Arnt fält. Du wurscht uk kjennen äwalajen, woo du sest noch kust mea fa Jehova doonen. Wäa mea fa Jehova deit, woat väl Freid haben!

16-17. Woo wudd eena kjennen noch mea fa Jehova doonen?

¹⁶ Wurscht du wellen em Betel ooda bie daut Buwoakj halpen? Eena wudd daut kjennen fa eene jewesse Tiet doonen ooda jieda Wäakj eenen Dach ooda mea. Daut fält emma aun Breeda un Sestren, waut opp irjenteene Städ deenen kjennen, wua dee hanjeschekjt woaren, un waut reed sent, jieda Oppgow auntonämen, waut doa fält, wan dee uk fa sestwaut utjelieet sent. Jehova räakjent daut sea väl, wan eena wellich reed es, irjentwua to deenen, wua daut needich es (Psa. 110:3).

¹⁷ Wurscht du wellen noch mea lieren, daut du Jehova noch bäta deenen kust? Veleicht wurscht du die kjennen aunjäwen fa de School fa Kjennichrikjsvekjindja. Doa woaren Breeda un Sestren utjelieet, waut jeistlich jesonnen un em Voltietdeenst sent, daut dee Jehova lota noch bäta deenen kjennen. Dee, waut no dise School gonen wellen, motten reed sennen, irjentwua mettohalpen, wua see lota hanjeschekjt woaren. Wurscht du wellen opp dee Wajch noch mea fa Jehova doonen? (1. Kor. 9:23).

18. Waut fa goodet kjrie wie, wan wie jieda Dach met Jehova toopschaufen?

¹⁸ Jehova lieet siene Deena, friejäwrich, goot, frintlich un leeftolich to sennen un uk jieda Dach om aundre bekjemmat to sennen. Daut brinjt ons Freid, Fräd un moakt ons schaftich (Gal. 5:22-23). Endoont waut wie fa Omstend haben, wie woaren schaftich sennen, wan wie soo om aundre todoonen sent aus Jehova un wieda flietich met am toopschaufen (Spr. 3:9-10).