WENSCHT du die een jewesset Aumt en de Vesaumlunk, waut du nu nich haben kaust? Veleicht haft sestwäa daut jekjräajen. Ooda veleicht wenschst du die wada de Oppgow en Jehova sien Volkj, waut du ea mol hautst. Oba nu best du veleicht aul ella ooda nich mea soo jesunt ooda die jeit daut knaup ooda du motst die om diene Famielje kjemren, un du kaust dee nich mea doonen. Ooda doa haft sikj en de Organisazion waut jeendat un du must eene Oppgow oppjäwen, waut du aul lang emma hautst. Veleicht späat sikj die daut soo, daut du nu jroz em Deenst fa Jehova nich soo väl doonen kaust, aus du wurscht wellen, endoont wäajen waut daut es. Dan wurscht du die leicht mol kjennen truarich feelen. Waut kaust du dan doonen, daut du daut doa nich dän Tiet äwa met schwoa hast un gaunz ommootich, vebettat ooda doll woascht? Woo kaust du de Freid hoolen?

Johanes dän Deepa sien Biespel wiest ons, woo wie kjennen onse Freid hoolen. Johanes haud besondre Oppgowen, oba secha haud hee sikj sien Läwen em Deenst fa Jehova gaunz aundasch väajestalt. Woomäajlich wia am daut nich mol enjekomen, daut hee wudd lenja enjestopt sennen aus prädjen. Un doch velua Johanes de Freid nich un hilt dee batem Enj. Waut holp am doabie? Un woo kjenn wie mau rajcht dan onse Freid hoolen, wan nich aules soo utkjemt, aus wie ons daut äwatalen?

Johanes kjrieech de Oppgow, de Menschen doafäa reedtomoaken, daut de Messias komen wudd. Hee funk ojjefäa en Aprell aune 29 doamet aun un säd to de Menschen: “Kjieet om, daut Himmelrikj es dicht bie!” (Mat. 3:2; Luk. 1:12-17). Väle horchten no am. Un een deel kjeemen von wiet auf, om siene Norecht to hieren, un väle kjieeden om un leeten sikj deepen. Johanes wia uk äwanäment un säd to de stolte Gloowesleidasch, daut een Jerecht äwa an komen wudd, wan see sikj nich endren wudden (Mat. 3:5-12). Ojjefäa en Oktooba aune 29 deept hee Jesus un daut wia daut wichtichste, waut hee en sienen Deenst deed. Von doa aun holp hee de Menschen Jesus notofoljen, waut de vesproakna Messias wia (Joh. 1:32-37).

Wäajen Johanes soone besondre Oppgow haud, säd Jesus: “Doa es nich een Mensch  jebuaren, dee doa jrata es aus Johanes de Deepa” (Mat. 11:11). Johanes freid sikj secha, daut hee soo jesäajent wort. Krakjt soo aus Johanes woaren uk vondoag dän Dach väle sea von Gott jesäajent. Eent von dee es een Brooda, waut Terry heet. Hee un siene Fru Sandra sent aul äwa 50 Joa em Voltietdeenst. Terry sajcht: “Ekj haud een deel wundascheene Oppgowen. Ekj wia Pionia, schauft em Betel, wia Sondapionia, Kjreisoppsechta, Distrikjtoppsechta un nu sie ekj wada Sondapionia.” Daut jeft väl Freid, wan wie eene Oppgow em Deenst fa Jehova kjrieen. Oba soo aus wie von Johanes siene Jeschicht lieren woaren, mott wie ons uk bemieejen, de Freid to hoolen, wan onse Omstend sikj endren.

Johanes de Deepa kunn siene Freid hoolen, wiels hee emma dankboa fa daut wia, waut hee fa Jehova doonen kunn. Well wie mol een Biespel seenen. No Jesus siene Doop worden Johanes siene Jinja emma weinja un Jesus siene emma mea. Johanes siene Jinja muaken sikj doa Sorjen äwa un säden to am: “Kjikj emol, dee deept doa, un aule gonen no am” (Joh. 3:26). Johanes säd to an: “Wäa de Brut haft, es de Briegaum. Oba däm Briegaum sien Frint steit un horcht, waut de Briegaum sajcht, un freit sikj, däm Briegaum siene Stemm to hieren. Doawäajen es dise Freid nu voll un gaunz miene” (Joh. 3:29). Johanes wull sikj nich äwa Jesus erhäwen. Un hee docht uk nich, daut sien Woakj nu nuscht mea enhilt, wäajen Jesus eene wichtjere Oppgow haud aus hee. Hee velua nich de Freid, wäajen hee dankboa wia, daut hee “däm Briegaum sien Frint” sennen kunn.

Johanes siene goode Enstalunk holp am tofräd to sennen, wan siene Oppgow uk nich leicht wia. Biejlikj wia hee aus een Nazara jebuaren un kunn kjeenmol Wien drinkjen (Luk. 1:15). Jesus räd von Johanes sien eefachet Läwen un säd: “Johanes kjeem un eet un drunk nich”. Jesus un siene Jinja wada wieren kjeene Nazara un kunnen soo läwen, aus de aundre Menschen (Mat. 11:18-19). Un Johanes deed uk kjeene Wunda, oba hee wist, daut eenje von Jesus siene Jinja de Krauft kjrieejen, Wunda to doonen, mau rajcht eenje, waut ieeschtemma siene Jinja wieren (Mat. 10:1; Joh. 10:41). Johanes leet sikj von aul daut nich auflenkjen un muak flietich wieda met daut, waut Jehova am oppjejäft haud.

Wan wie krakjt soo dankboa fa de Oppgow sent, waut wie nu en Jehova sien Volkj haben, dan kjenn wie uk onse Freid hoolen. Terry, wua wie ea aul von räden, säd: “Bie jieda Oppgow, waut ekj en Gott sien Volkj kjrieech, strenjd ekj mie sea aun.” Aus hee aun aul daut trigjdocht, waut hee en de Joaren em Voltietdeenst beläwd, säd hee: “Ekj beschod nuscht. Daut wia bloos wundascheen.”

Onse Freid kaun jrata woaren, wan wie doaräwa nodenkjen, wuarom jieda Oppgow ooda Aumt en Jehova sien Volkj soo väl wieet es. Daut es, wiels wie kjennen “Gott siene Metoabeida” sennen (1. Kor. 3:9). Wan wie waut sea wieetvollet haben, dan mott wie doa emma goot no oppaussen, daut et uk schmock blift. Krakjt soo es daut met de Freid. Toom dee hoolen mott wie emma em Denkj hoolen, waut vonne groote Iea daut es, met Jehova tooptoschaufen. Daut woat ons halpen, daut wie nich daut, waut wie fa Jehova doonen kjennen, met daut vejlikjen, waut aundre doonen kjennen. Un wie woaren dan uk nich onse Oppgow fa weinja wieet talen aus de Oppgow, waut sestwäa haft (Gal. 6:4).

Johanes wist veleicht, daut hee sien Woakj nich sea lang doonen wudd, oba secha haud hee sikj daut nich väajestalt, woo haustich daut wudd een Enj haben (Joh. 3:30). Aune 30 stopt de Kjennich Herodes am en; daut wia ojjefäa sas Moonat no Jesus siene Doop. Un doch vesocht Johanes, soo goot aus mäajlich wiedatoprädjen (Mar. 6:17-20). Waut holp am, en dise schwoare Tiet de Freid nich to velieren? Hee hilt daut jeistelje em Uag.

Aus Johanes em Jefenkjnis wia, hieed hee, daut Jesus emma mea volbrocht (Mat. 11:2; Luk. 7:18). Johanes wia sikj secha, daut Jesus de Messias wia, oba woomäajlich wundad hee, woo Jesus aul daut erfellen wudd, waut de Schreft von dän Messias verutsäd. De Messias sull je de Kjennich woaren. Wudd Jesus dan boolt aunfangen to rejieren?  Wudd Johanes dan boolt utem Jefenkjnis rutkjennen? Johanes wull mea von daut weeten, waut Jesus doonen wudd, un schekjt twee von siene Jinja no Jesus “un leet am froagen, auf hee dee wia, dee doa komen sull: Ooda sell wie no een aundren luaren?” (Luk. 7:19). Secha hieed Johanes oppmoakjsom too, aus dee trigjkjeemen un von de Wunda vetalden, waut Jesus deed toom de Menschen heelen. Jesus leet Johanes sajen: “De blinje seenen, de lome gonen, de Lepra woaren rein, de doowe hieren, de Doodes stonen opp, un de oame woat daut Evangelium jeprädicht” (Luk. 7:20-22).

Daut, waut de Jinja vetalden, jeef Johanes secha väl Moot. Daut wia een Bewies doafäa, daut Jesus daut erfelt, waut äwa dän Messias verutjesajcht wia. Johanes wist nu, daut sien Deenst nich vejäfs wia, wan Jesus am uk nich utem Jefenkjnis friemoaken wudd. Wan hee uk en eene schwoare Loag wia, kunn hee doch schaftich sennen.

Wan wie daut jeistelje em Uag hoolen, soo aus Johanes deed, dan woa wie kjennen jeduldich un met Freid uthoolen (Kol. 1:9-11). Om daut wie daut kjennen, mott wie de Bibel läsen un doaräwa nodenkjen un uk em Denkj hoolen, daut daut, waut wie fa Jehova doonen, kjeenmol vejäfs es (1. Kor. 15:58). Sandra sajcht: “Jieda Dach een Kapitel von de Bibel läsen haft mie jeholpen Jehova noda to komen. Daut halpt mie, dolla aun Jehova to denkjen enne Städ aun mie selfst.” Wie kjennen uk äwa daut nodenkjen, waut onse Breeda un Sestren fa Jehova doonen, un daut kaun ons halpen, nich bloos aun onse ieejne Loag to denkjen. Sandra sajcht uk: “De Moonatsprograms opp JW Broadcasting^® halpen ons, daut wie ons noch dolla met de Organisazion vebungen feelen un daut wie bie onse Oppgow nich de Freid velieren.”

Johanes de Deepa prädijd nich fa lang, oba hee deed daut met “de Krauft un Jeist, dee Elia haud”. Un soo aus wie un Elia wia hee uk “een schwaka Mensch” (Luk. 1:17; Jak. 5:17). Wan wie krakjt soo dankboa sent aus Johanes un daut jeistelje em Uag hoolen, dan kjenn wie Jehova uk met Freid deenen, endoont waut doa oppkjemt.