1. Waut säd David von Jehova siene Deemoot?

KJENN wie werkjlich sajen, daut Jehova deemootich es? Jo, wiels David säd: “Du best aus een Schilt fa mie jewast, derch diene Help [“Deemoot”, NW] sie ekj groot jeworden” (2. Sam. 22:36). Aus David dit schreef, docht am veleicht noch von dän Dach, aus de Profeet Samuel no sienen Voda sien Hus kjeem. Samuel wull doa dän näakjsten Kjennich äwa Israel ensaulwen. David wia de jinjsta von acht Junges, un doch wull Jehova haben, daut hee sull Kjennich sennen enne Städ Saul (1. Sam. 16:1, 10-13).

2. Waut woa wie en disen Artikjel lieren?

² David docht secha krakjt soo aus een Psalmenschriewa, waut äwa Jehova säd, daut “dee rauf sticht om to seenen waut em Himmel un opp de Ieed es . . . Hee häft de oame utem Stoff, . . . daut hee dee met de väaschte em Volkj toop opp eene Benkj sat” (Psa. 113:6-8). En disen Artikjel woa wie seenen, woo deemootich Jehova es un waut wie doavon lieren kjennen. Un wie woaren uk seenen, waut wie von dän Kjennich Saul un von dän Profeet Daniel un von Jesus äwa Deemoot lieren kjennen.

3. Woo jeit Jehova met ons onvolkomne Menschen om, un waut wiest daut?

³ Wan wie seenen, woo Jehova met onvolkomne Menschen omjeit, dan weet wie, daut hee deemootich es. Wie kjennen am deenen un hee talt ons aus siene Frind un haft een grootet Vetruen opp ons (Psa. 25:14). Jehova muak daut mäajlich, daut wie kunnen siene Frind sennen. Doatoo jeef hee sienen Sän aus Opfa fa onse Sinden. Daut wiest, woo väl Metjefeel Jehova fa ons haft!

4. Waut haft Jehova ons jejäft, un wuarom?

 ⁴ Aun waut es daut noch to seenen, daut Jehova deemootich es? Hee haft ons daut Läwen jejäft un haft ons soo jemoakt, daut wie selfst entscheiden kjennen, waut wie doonen wellen. Daut wudd nich sennen needich jewast, oba hee muak ons soo, daut wie am likjnen, un jeef ons eenen frieen Wellen. Hee bemott ons kjliene Menschen nich, daut wie am deenen un no am horchen. Hee well väl leewa, daut wie daut ut Leew fa am doonen un wiels wie uk weeten, daut daut väl bäta fa ons es (5. Mo. 10:12; Jes. 48:17-18). Sent wie nich sea dankboa, daut Jehova soo deemootich es?

5. Woo lieet Jehova ons, deemootich to sennen? (See daut Bilt oppe väaschte Sied.)

⁵ Jehova lieet ons deemootich to sennen derch sien ieejnet Biespel. Kjeen aundra haft soo väl Weisheit aus Jehova. Un doch es hee wellich reed, no aundre äare Meeninj to horchen. Jehova brukt biejlikj sienen Sän, daut dee am holp aules to moaken (Spr. 8:27-30; Kol. 1:15-16). Un Jehova es je uk de Aulmajchtja un doch jeft hee aundre uk von siene Macht. Hee stald biejlikj Jesus aun aus Kjennich. Un de 144 000, waut met Jesus toop rejieren woaren, haft hee uk eene jewesse Macht jejäft (Luk. 12:32). Secha haft Jehova Jesus aules jelieet, waut am fält toom Kjennich un Huaga Priesta sennen (Heb. 5:8-9). Un hee moakt uk deejanje fa äare Oppgow reed, waut met Jesus toop harschen woaren. Oba hee prooft nich, dee en aules väatosajen. Un hee vetrut dee, daut dee sienen Wellen doonen woaren (Opb. 5:10).

6-7. Waut kjenn wie von Jehova doaräwa lieren, aundre Veauntwuatunk to jäwen?

⁶ Ons himlischa Voda brukt daut nich, daut am wäa halpt, oba hee jeft aundre  doawäajen Veauntwuatunk. Wan Jehova daut aul deit, woo väl mea sull wie daut dan nich doonen! Best du biejlikj een Haupt äwa eene Famielje ooda een Eltesta? Dan nemm die Jehova toom Väabilt un lot die von aundre bie diene Oabeit halpen un proow nich, dee en aules väatosajen. Wan du daut soo deist, dan kjrichst du nich mau bloos de Oabeit jedonen, oba du kaust uk aundre utlieren un dee kjrieen een jratret Vetruen opp sikj selfst (Jes. 41:10). Waut kjennen dee, waut Veauntwuatunk äwa aundre haben, noch von Jehova lieren?

⁷ De Schreft wiest, daut Jehova uk aun de Enjel äare Meeninj intressieet es (1. Kjen. 22:19-22). Woo kjenn jie Elren junt Jehova toom Väabilt nämen? Froacht doch mol june Kjinja, wan daut paussent es, woo see eene Oabeit doonen wudden. Un wan daut schauft, dan horcht uk no dee.

8. Woo wees Jehova daut bie Abraham un siene Fru, daut hee jeduldich wia?

⁸ Daut Jehova deemootich es, es uk aun siene Jedult to seenen. Jehova es biejlikj jeduldich met siene Deena, wan dee opprechtich sajen, daut see aun siene Entscheidunk twiewlen. Doawäajen horcht Jehova Abraham too, aus dee doarom besorcht wia, daut Jehova Sodom un Gomorra venichten wull (1. Mo. 18:22-33). Ooda woo behaundeld Jehova Abraham siene Fru, aus see doaräwa lacht, daut see bie oolt noch sull een Kjlienet haben? Jehova wort nich kortnatuarich ooda beleidicht (1. Mo. 18:10-14). Hee behaundeld ar leeftolich un met Respakjt.

9. Waut kjennen Elren un uk Eltestasch von Jehova lieren?

⁹ Waut kjennen Elren un Eltestasch von Jehova lieren? Waut deist du biejlikj, wan doa wäa von de Vesaumlunk ooda eent von diene Kjinja nich met diene Entscheidunk envestonen es? West du dee daut dan fuaz wiesen, daut du em rajchten best? Ooda proofst du daut to vestonen, wuarom dee soo denkjen? Wan dee, waut de Veauntwuatunk haben, Jehova nodoonen, dan woat de Vesaumlunk un de Famielje daut toom gooden sennen. Bat nu hab wie jeseenen, waut wie von Jehova äwa Deemoot lieren kjennen. Nu woa wie noch seenen, waut wie von biblische Biespels lieren kjennen.

10. Woo lieet Jehova ons derch Biespels?

¹⁰ Jehova es ons “groota Liera” un lieet ons derch de Biespels en sien Wuat (Jes. 30:20-21, NW). Wan wie äwa dee nodenkjen, dan lia wie von Menschen, waut deemootich wieren ooda aundre goode Ieejenschoften hauden. Un wie lieren uk von soone, waut nich goode Ieejenschoften hauden, un woo daut met dee utkjeem (Psa. 37:37; 1. Kor. 10:11).

11. Waut kjenn wie ut Saul sien schlajchtet Biespel lieren?

¹¹ Denkj mol aun dän Kjennich Saul. Aus hee noch junk wia, wia hee deemootich. Un hee haud daut gaunz kloa, daut hee nich to aules Frieheit haud. Doawäajen wull hee sikj nich mea Veauntwuatunk äwanämen (1. Sam. 9:21; 10:20-22). Oba met de Tiet wort Saul stolt un deed soont, wua hee kjeen Rajcht too haud. Daut wia meist fuaz nodäm to seenen, aus hee Kjennich wort. Opp eene Sauz luad hee no dän Profeet Samuel un haud kjeene Jedult mea. Doawäajen muak hee daut Brauntopfa selfst, wan hee doatoo uk kjeene Frieheit haud. Hee haud kjeen Vetruen  doaropp, daut Jehova waut fa sien Volkj doonen wudd. Doawäajen säajend Jehova Saul nich mea un met de Tiet kunn hee nich mea de Kjennich sennen (1. Sam. 13:8-14). Waut kjenn wie ut dit Biespel lieren? Daut es bäta, daut wie nuscht doonen, wuatoo wie kjeen Rajcht haben.

12. Woo wia daut to seenen, daut Daniel deemootich wia?

¹² De Profeet Daniel wia gaunz aundasch aus Saul. Daniel bleef sien Läwen lank deemootich un fruach Jehova emma no Rot. Biejlikj brukt Jehova Daniel, om Nebukadnezar eenen Droom uttolajen. Oba Daniel säd, daut hee dit nich ut sikj selfst utlajen kunn. Hee wia deemootich un jeef Jehova aul de Iea doafäa (Dan. 2:26-28). Waut lieet ons daut? Wan Breeda daut jleichen, daut wie eene Räd haben, ooda wan wie em Deenst waut scheenet beläft haben, dan well wie emma doaraun denkjen, daut wie Jehova aul de Iea jäwen sellen. Wie sellen deemootich sennen un aunerkjanen, daut wie daut onen siene Help nich wudden doonen kjennen (Filip. 4:13, NW). Opp dee Wajch doo wie uk Jesus sien Biespel no. Wuarom kjenn wie daut sajen?

13. Waut lia wie von Jesus siene Wieed en Johanes 5:19, 30 äwa Deemoot?

¹³ Jesus wia Gott sien volkomna Sän, un doch veleet hee sikj gaunz opp sienen Voda (läs Johanes 5:19, 30). Hee proowd kjeenmol, waut von sienen Voda siene Macht to kjrieen. En Filippa 2:6 (NW) sajcht daut, Jesus docht nich mol doaräwa no, “daut hee wull waut en siene Macht kjrieen, waut am nich toostunt, un daut wia, Gott jlikj to sennen”. Jesus wist, daut hee nich aules doonen kunn, un wia Jehova wellich unjadon.

14. Waut deed Jesus, aus se am no waut fruagen, waut nich siene Sach wia?

¹⁴ Eenen Dach kjeemen Jakobus un Johanes un dee äare Mutta no Jesus. Dee fruagen Jesus no waut, waut hee an nich jäwen kunn, wiels daut nich siene Sach wia. Waut deed Jesus dan? Hee säd an fuaz, daut bloos sien Voda daut bestemmen kunn, wäa en daut Kjennichrikj aun siene rajchte ooda linkje Sied setten kunn (Mat. 20:20-23). Jesus wia deemootich un wist, waut hee doonen kunn un waut nich. Hee neem sikj kjeenmol mea Frieheit, aus waut Jehova am jejäft haud (Joh. 12:49). Woo kjenn wie Jesus sien goodet Biespel nodoonen?

15-16. Woo kjenn wie dän Rot ut 1. Korinta 4:6 nokomen?

 ¹⁵ Wan wie daut doonen, waut 1. Korinta 4:6 sajcht, dan doo wie Jesus no. Doa sajcht daut, “daut kjeena wieda gonen saul aus jeschräwen steit”. Saj wie mol, ons fruach wäa no Rot. Waut wudd wie dan doonen? Wie wellen kjeenmol wäm bemotten, bloos no onse Iedeeen to horchen, ooda dän bloos daut sajen, waut ons dan jroz enkjemt. Daut wudd väl bäta sennen, dänjanjen dän Rot ut de Schreft ooda ut onse Bieekja to wiesen. Soo wies wie, daut wie deemootich sent un uk nich aules weeten un daut Jehova siene “jerajchte Uadeelungen” hecha sent (Opb. 15:3-4).

¹⁶ Wan wie deemootich sent, dan iea wie Jehova. Oba nu woa wie seenen, daut wie uk kjennen mea Freid haben un met aundre bäta foadich woaren, wan wie deemootich sent.

17. Wuarom haben deemootje Menschen mea Freid?

¹⁷ Wuarom hab wie mea Freid, wan wie deemootich sent? Wan wie weeten, daut wie nich aules selfst doonen kjennen, dan woa wie dankboa sennen un ons doaräwa freien, daut aundre ons halpen. Soo wia daut uk, aus Jesus tieen Mana heelen deed, waut de Leprakrankheit hauden. Bloos eena von dee kjeem trigj, om sikj bie Jesus to bedanken. Dis Maun wia deemootich un wist, daut hee nich selfst wudd sennen von siene schlemme Krankheit loosjekomen. Dee wia dankboa un lowd Gott doafäa (Luk. 17:11-19).

18. Wuarom kjenn wie met aundre bäta foadich woaren, wan wie deemootich sent? (Reema 12:10).

¹⁸ Deemootje Menschen kjennen leichta met aundre foadich woaren un haben foaken  mea goode Frind. Wuarom? Dee weeten, daut aundre uk feine Menschen sent, un haben een Vetruen opp dee. Wäa deemootich es, woat sikj äwa eenen aundren siene goode Oabeit freien un dän daut wellich sajen un dän ieren (läs Reema 12:10).

19. Wuarom well wie nich stolt woaren?

¹⁹ Woo es daut bie stolte Menschen? Dee kjrieen sikj meist nich bat doa, aundre to lowen, un wellen de Iea fa sikj selfst haben. Dee wellen sikj foaken met aundre vejlikjen un bäta sennen aus dee. Dee felt daut uk schwoa, aundre uttolieren un dee mea Veauntwuatunk to jäwen. Dee denkjen: “Wan du west eene Sach soo jemoakt haben, aus die daut jefelt, dan es daut bäta, du deist daut selfst.” Een stolta Mensch well foaken selfst aunjeseenen sennen un es aufjenstich, wan een aundra waut bäta kaun (Gal. 5:26). Wäa wudd wellen met soonen Mensch Frint sennen? Wan wie enwoaren, daut wie een bät stolt sent, dan sell wie sea to Jehova bäden. Hee kaun ons halpen, eene “niee Jesennunk” to kjrieen, daut dise schlajchte Ieejenschoft sikj nich en ons enwartlen kaun (Reem. 12:2).

20. Wuarom sell wie deemootich sennen?

²⁰ Sent wie nich sea dankboa fa Jehova sien Biespel? Wan wie seenen, woo deemootich hee met siene Deena omjeit, dan well wie am nodoonen. Wie wellen uk de Biespels ut de Bibeltiet nodoonen, waut Gott deemootich deenden. Well wie Jehova emma de Iea jäwen, waut am traft! (Opb. 4:11). Dan woa wie fa emma kjennen siene Frind sennen, wiels hee leeft dee, waut deemootich sent.