1-2. Waut woa wie en disen Artikjel seenen?

WOO jeit die daut, wan du waut bestalt hast, waut die opp iernst fält, un daut kjemt lota aun, aus du jedocht hast? Feelst du die dan aunjeschmäat? Spricha 13:12 sajcht: “Eene Hopninj dee sikj vetrakjt, moakt eenem krank”. Oba woo jeit die daut, wan du enwoascht, daut daut goode Uasoak haft, daut daut lota kjemt? Dan best du secha wellich reed jeduldich to luaren.

² En disen Artikjel woa wie ons een poa biblische Gruntsauzen unjastonen, waut ons halpen kjennen “no Gott [to] luaren” (Micha 7:7). Dan woa wie tweeatlei seenen, wua wie jeduldich wachten sellen, bat Jehova waut deit. Un tolatst woa wie seenen, waut fa goodet deejanje kjrieen woaren, waut wellich no Jehova luaren.

3. Waut lia wie von Spricha 13:11?

³ Spricha 13:11 wiest ons, wuarom wie jeduldich sennen sellen. Doa sajcht daut: “Onopprechtjet Jelt veschwinjt leicht; wäa daut oba Stekjwies [soo bie sacht] vedeent, bie däm woat daut waussen.” Waut lia wie doavon? Een weisa Mensch es jeduldich un deit eent no daut aundre.

4. Waut kjenn wie von Spricha 4:18 lieren?

⁴ Spricha 4:18 sajcht: “De jerajchte äa Wajch es soo aus de Sonnen Oppgank, dee doa emma dacha woat bat daut aum hechsten es.” Dis Varsch wiest, daut Jehova soo bie sacht siene Deena halpt to vestonen, waut hee sikj väajenomen haft. Oba dee wiest ons uk, woo wie eenen stoakjren Gloowen kjrieen kjennen. Daut brukt siene Tiet un jeit nich von  eenen Dach nom aundren. Oba wan wie flietich studieren un dän Rot nokomen, waut wie derch Gott sien Wuat un derch siene Organisazion kjrieen, dan woa wie emma dolla soo woaren aus Jesus Christus. Wie woaren uk Gott emma bäta kjanen lieren. Daut wees Jesus ons derch een Jlikjnis.

5. Waut fa een Jlikjnis wiest, daut et Tiet brukt, bat een Mensch sikj endat?

⁵ Jesus brukt een Jlikjnis, om uttolajen, daut de Norecht von daut Kjennichrikj, waut wie prädjen, soo aus kjliene Sot es, waut soo bie sacht en de opprechtje Menschen äa Hoat waust. Hee säd: “De Sot [kjient] un waust, wan hee [waut daut seit] uk nich weet woo. Wiels de Ieed brinjt ut sikj selfst ieescht dän Haulm, dan de Oaren, un dan dän vollen Weit en de Oaren verendach” (Mar. 4:27-28). Waut wull Jesus doamet sajen? Soo aus eene Plaunt bie sacht emma jrata woat, soo woat een Mensch, waut de goode Norecht aunnemt, soo bie sacht eenen stoakjren Gloowen kjrieen. Wan biejlikj de opprechtje Bibelstudiums Jehova noda komen, dan woa wie seenen kjennen, daut dee sikj en väl Stekjen endren (Efs. 4:22-24). Oba wie motten em Denkj hoolen, daut Jehova deejanja es, waut daut waussen lat (1. Kor. 3:7).

6-7. Waut lia wie doavon, woo Jehova de Ieed muak?

⁶ Jehova es emma jeduldich un nemt sikj soo väl Tiet, aus doa needich es, om siene Oabeit foadich to moaken. Daut deit hee, daut sien Nomen jeieet woat un daut aundre daut doaderch goot haben. Daut es biejlikj doaraun to seenen, woo Jehova soo bie sacht dän Ieedbaul fa de Menschen reedmuak.

⁷ De Schreft rät doavon, woo Jehova de Ieed muak, un sajcht, daut hee “plond woo groot dee sull sennen”, un daut hee soo to sajen “dän Foot” un “dän Akjsteen” sad (Hiob 38:5-6). Hee neem sikj mau rajcht Tiet, äwa daut notodenkjen, waut hee  jemoakt haud (1. Mo. 1:10, 12). Woo feelden de Enjel sikj, aus dee sagen, woo Jehova eent no daut aundre muak? Secha wieren dee gaunz oppjebrocht! Daut sajcht mau rajcht, daut dee Jehova lowden (Hiob 38:7). Waut lia wie doavon? Daut dieed dusende Joaren, bat Jehova aules em Himmel un oppe Ieed jemoakt haud, oba aus hee sikj daut unjasocht, säd hee, daut daut “sea goot” wia (1. Mo. 1:31).

8. Waut woa wie nu seenen?

⁸ Bat nu hab wie jeseenen, daut en Gott sien Wuat väl Gruntsauzen bennen sent, waut ons wiesen, daut wie jeduldich sennen sellen. Nu woa wie tweeatlei seenen, wua wie no Jehova luaren sellen.

9. Waut es eenatlei, wua wie no Jehova luaren motten?

⁹Veleicht mott wie doano luaren, daut onse Jebäda beauntwuat woaren. Wan wie Jehova no Krauft froagen toom met eenen Trubbel ooda met eene Schwakheit foadich woaren, dan kjemt sikj ons daut eenjemol lang väa, bat hee no onse Jebäda horcht. Wuarom horcht Jehova nich fuaz no aul onse Jebäda?

10. Wuarom mott wie jeduldich sennen, wan wie bäden?

¹⁰ Jehova horcht goot too, wan wie von Hoaten bäden (Psa. 65:3). Fa am bewiest daut, daut wie Gloowen haben (Heb. 11:6). Wan wie Jehova no Help froagen, om am to jefaulen, dan well hee uk seenen, daut wie ons aunstrenjen sienen Wellen to doonen (1. Joh. 3:22). Doawäajen mott wie jeduldich sennen un aules doonen, waut wie kjennen, wan wie doarom bäden, met eene Schwakheit ooda met eene schlajchte Jewanheit foadich to woaren. Jesus jeef auntovestonen, daut eenje von onse Jebäda nich fuaz wudden beauntwuat woaren. Hee säd: “Froacht [“emma wada”, NW], un junt woat jejäft woaren. Sieekjt, un jie woaren finjen. Klopt aun, un junt woat opjemoakt woaren. Wiels wäa doa frajcht, kjricht; un wäa doa sieekjt, finjt; un wäa aunklopt, fa däm woat opjemoakt” (Mat. 7:7-8). Wan wie sienen Rot nokomen un aunhoolent bäden, dan kjenn wie ons secha sennen, daut ons himlischa Voda daut hieet un onse Jebäda beauntwuat (Kol. 4:2).

11. Woo halpt Hebräa 4:16 ons, wan sikj ons daut soo späat, daut Gott nich fuaz no een Jebäd horcht?

¹¹ Eenjemol späat sikj ons daut soo, daut een Jebäd nich fuaz beauntwuat woat. Oba Jehova haft vesproaken, daut hee daut krakjt “to de rajchte Tiet” doonen woat (läs Hebräa 4:16). Doawäajen sell wie Jehova daut kjeenmol väaschmieten, wan doa waut lenja dieet, aus wie ons daut jewenscht haben. Eenje haben biejlikj aul Joaren jebät, daut Gott sien Kjennichrikj een Enj moaken saul met dise schlajchte Welt. Un Jesus säd je uk, daut wie doarom bäden sullen (Mat. 6:10). Oba wudd daut nich sea onkluak sennen, wan wie wudden em Gloowen schwak woaren, bloos wiels daut Enj nich krakjt dan kjeem, aus wie ons daut wudden jedocht haben? (Hab. 2:3; Mat. 24:44). Daut baste es, daut wie wieda bäden un doano luaren, daut Jehova waut deit, un ons opp am veloten. Daut Enj woat krakjt to de rajchte Tiet komen, wiels Jehova dän “Dach ooda dee Stund” aul faustjesat haft. Un daut woat fa aulem de baste Tiet sennen (Mat. 24:36; 2. Pet. 3:15).

12. En waut vonne Loag mott wie besonda jeduldich sennen?

¹²Veleicht mott wie jeduldich luaren, bat de Ojjerajchtichkjeit trajchtjestalt woat. De Menschen en dise Welt moaken foaken  eenen Unjascheet tweschen Mana un Frues un behaundlen soone schlajcht, waut von eene aundre Rauss, Volkj, Staum ooda Launt sent. Aundre woaren schlajcht behaundelt, wiels dee krank ooda behindat sent. Un väl von Jehova siene Deena sent wäajen äaren Gloowen ojjerajcht behaundelt worden. Wan ons soont passieet, dan sell wie aun Jesus siene Wieed denkjen. Hee säd: “Wäa bat aum Enj uthelt, woat jerat woaren” (Mat. 24:13). Oba waut sell wie doonen, wan wie enwoaren, daut wäa von de Vesaumlunk eene schwoare Sind begonen haft? Wan de Eltestasch doa aul omweeten, woa wie dan jeduldich sennen un doaropp vetruen, daut dee soo doamet omgonen woaren, aus Jehova daut fa rajcht talt? See wie mol, waut de Eltestasch met soont doonen.

13. Waut well Jehova von de Eltestasch haben, wan doa wäa eene schwoare Sind begonen haft?

¹³ Wan de Eltestasch enwoaren, daut doa wäa von de Vesaumlunk eene schwoare Sind begonen haft, dan bäden dee om “de Weisheit von bowen”, daut see de Sach soo seenen kjennen, aus Jehova daut deit (Jak. 3:17). Wan daut sest schauft, dan wellen dee dän Sinda halpen, “von sienem Errwajch” omtokjieren (Jak. 5:19-20). Dee wellen uk aules doonen, waut dee kjennen, om de Vesaumlunk to beschitzen un om deejanje to treesten, waut unja dise Sind lieden musten (2. Kor. 1:3-4). Wan doa wäa eene schwoare Sind begonen haft, dan motten de Eltestasch sikj ieescht unjastonen, waut doa werkjlich aunjegonen wia, un daut kaun siene Tiet dieren. Dan bäden dee un jäwen met de Schreft Rot un wiesen dänjanjen soo trajcht, “aus [daut] rajcht es” (Jer. 30:11). De Eltestasch schuwen daut nich opp, oba dee gonen uk nich too schwind aun de Sach naun. Wan dee aules soo doonen, aus Jehova daut haben well, dan woat de Vesaumlunk seenen, daut daut aulem toom gooden es. Oba mau rajcht dan, wan de Eltestasch aules rajcht doonen, kjennen deejanje, waut unja de Sind lieden musten, sikj doa noch lang schlajcht äwa feelen. Waut kaust du doonen, wan daut bie die soo es?

14. Waut fa een Biespel ut de Schreft kaun die halpen, wan een Gloowesbrooda die sea toojesat haft?

¹⁴ Haft die mol wäa sea toojesat, veleicht  soogoa een Gloowesbrooda? Dan kaust du goode Biespels en de Schreft finjen. Dee woaren die wiesen, woo du doano luaren kaust, daut Jehova aules trajchtstalen woat. Josef biejlikj wort von siene ieejne Breeda ojjerajcht behaundelt, oba hee vebettat sikj nich aun dee äare Sinden. Enne Städ daut schauft hee doaropp Jehova to deenen un Jehova beloond am sea doafäa, daut hee soo jeduldich uthilt (1. Mo. 39:21). Met de Tiet kunn Josef deejanje togoodhoolen, waut am schlajcht behaundelt hauden, un hee beläwd, woo Jehova am säajend (1. Mo. 45:5). Wie kjennen krakjt soo aus Josef Troost kjrieen, wan wie Jehova noda komen un ons doaropp veloten, daut hee to de rajchte Tiet aules trajchtstalen woat (Psa. 7:18; 73:28).

15. Waut holp eene Sesta, aus see ojjerajcht behaundelt wort?

¹⁵ Secha woa wie nich aula soo ojjerajcht behaundelt aus Josef. Un doch sat ons daut too, wan ons wäa schlajcht behaundelt. Wan wie met wäm Trubbel haben, dan es daut emma goot, wan wie ons no de biblische Gruntsauzen rechten, endoont aus deejanja Jehova deent ooda nich (Filip. 2:3-4). See wie mol, waut eene Sesta beläwd. Ar deed daut sea wee, aus see enwort, daut eene Oabeitspoatna schlajcht äwa ar jerät un Läajes vetalt haud. Enne Städ doa fuaz waut met to doonen, neem see sikj Tiet un docht äwa Jesus sien Biespel no. Jesus deed sikj nich aufrajchnen, aus se am beleidijden (1. Pet. 2:21, 23). Doawäajen wort see sikj eenich, de Sach tochtoloten. Lota wort see dan en, daut äare Oabeitspoatna groote Trubbels met de Jesuntheit un väl Sorjen jehaut haud. Un see docht bie sikj soo, daut dee daut secha nich soo jemeent haud. See wia sea froo, daut see daut jeduldich utjehoolen haud, un haud wada ennalich Fräd.

16. Waut kaun ons treesten, wan wie ojjerajcht behaundelt woaren? (1. Petrus 3:12).

¹⁶ Wan du ojjerajcht behaundelt woascht ooda wäajen sestwaut lieden motst, dan denkj doaraun, daut Jehova deejanje no aun es, “dee een jebroaknet Hoat haben” (Psa. 34:19). Hee leeft die, wiels du jeduldich best un diene Laust opp am lajchst (Psa. 55:23). Hee es de Rechta äwa de  gaunze Ieed un woat aules en (läs 1. Petrus 3:12). Best du reed no am to luaren, wan du Trubbels hast, waut du selfst nich fiksen kaust?

17. Waut vesprakjt Jehova ons no Jesaja 30:18 no?

¹⁷ Boolt woat ons himlischa Voda ons derch daut Kjennichrikj sea säajnen. Jesaja 30:18 sajcht: “Doaropp, daut hee junt Jnod bewiesen kaun, luat de HAR no junt; hee moakt sikj reed, daut hee junt kaun jenstich sennen. De HAR es een Gott, dee nom rajcht kjikjt; seelich sent dee, dee äare Hopninj opp am haben.” Deejanje, waut äare Hopninj opp Jehova saten, woaren nu aul sea jesäajent woaren un uk lota en de niee Welt.

18. Waut fa scheenet woa wie beläwen kjennen?

¹⁸ Wan Gott siene Deena en de niee Welt nenkomen, dan woaren dee kjeenmol mea de Sorjen un Schwierichkjeiten haben, waut daut vondoag dän Dach jeft. Doa woat daut kjeene Ojjerajchtichkjeit un kjeene Weedoag mea jäwen (Opb. 21:4). Wie woaren ons nich sorjen derwen, aus wie jenuach toom läwen haben woaren, wiels daut von aules äwajenuach jäwen woat (Psa. 72:16; Jes. 54:13). Woo wundascheen woat daut nich sennen!

19. Fa waut moakt Jehova ons nu aul soo bie sacht reed?

¹⁹ Jehova moakt ons nu aul reed fa daut Läwen unja siene Harschoft. Hee halpt ons, schlajchte Jewanheiten tochtoloten un soone Ieejenschoften to haben, waut am jefaulen. Woa nich mootloos un jeff nich opp! Daut baste steit noch ver ons! Wie freien ons to dise wundascheene Tiet un wellen schaftich sennen un jeduldich doano luaren, bat Jehova aules deit, waut hee vesproaken haft.