De Apostel Paulus schreef aun de Christen en Tessalonich: “Wan sikj irjentwäa nich doaraun helt, waut wie en disen Breef jeschräwen haben, dan betieekjent dän” (2. Tes. 3:14). Ea kunn wie daut soo vestonen, daut dise Aunwiesunk fa de Eltestasch wia. Wan doa eena wia, waut nich no de biblische Gruntsauzen horcht, wan see dän uk aul mieremol Rot jejäft hauden, hilden dee eenjemol eene Räd, wua see de Vesaumlunk woarnen deeden. Doahinja hauden de Breeda nich mea Tietvedrief met soonen toop, waut betieekjent wort.

Oba nu haft sikj waut jeendat. Wie kjennen daut nu vestonen, daut Paulus hia meent, daut daut Betieekjnen waut es, waut jieda Christ en jewesse Loagen doonen saul. Doawäajen es daut nich needich, daut de Eltestasch eene Räd hoolen, om de Vesaumlunk to woarnen. Wuarom kjenn wie dit nu aundasch vestonen? Well wie mol seenen, von waut Paulus räd, aus hee disen Rot jeef.

Paulus säd, daut eenje enne Vesaumlunk “sikj onordentlich benämen” deeden. Hee haud dee Rot jejäft ut Gott sien Wuat, oba dee hilden sikj doa nich aun. Een Mol ea, aus hee dee besocht, säd hee to äant: “Wan doa irjentwäa nich schaufen well, dan saul dee uk nich äten.” Oba eenje wullen dan noch nich schaufen, om fa sikj selfst to sorjen, wan dee daut oba sea goot kunnen. Un dan mischten dee sikj uk noch mank aundre äare Sachen. Woo sullen de Christen met soone omgonen, waut sikj onordentlich beneemen? (2. Tes. 3:6, 10-12).

Paulus säd: “Betieekjent dän”. Daut griechische Wuat jeft auntovestonen, daut eena fa soone oppaussen mott, wiels dee eenem met eemol bat doa brinjen kunnen, waut Orrajchtet to doonen. Paulus jeef de gaunze Vesaumlunk dise Aunwiesunk – nich bloos de Eltestasch (2. Tes. 1:1; 3:6). Soo, wan de Breeda ooda Sestren enne Vesaumlunk daut enworden, daut een Gloowesbrooda sikj nich aun daut hilt, waut Gott sien Wuat sajcht, dan sullen dee “opphieren, met dän toop to sennen”, waut sikj onordentlich beneem.

Bediet daut nu, daut de Breeda dän soo behaundlen sullen aus eena, waut ut de Vesaumlunk rutjesat wia? Nä, Paulus säd je: “Jäft dän wieda Rot aus eenen Brooda.” Soo, de Breeda wudden doawäajen wieda enne Vesaumlunk un em Deenst met dän toop sennen, oba dee wudden nich met dän toop Tietvedrief haben. Wuarom nich? Paulus säd, “soo daut dee sikj schämen mott”. Doaderch, daut de Brooda opp dise Wajch betieekjent wort, kjrieech dee sikj veleicht to seenen un hieed opp, daut Orrajchte to doonen (2. Tes. 3:14-15).

Woo kjenn wie dise Aunwiesunk vondoag dän Dach nokomen? Daut ieeschte well wie ons secha sennen, daut deejanja sikj werkjlich “onordentlich benämen” deit, soo aus Paulus säd. Paulus räd nich von soone, waut äwa eenje Jewessens-Entscheidungen aundasch denkjen aus wie. Hee räd uk nich von soone, dee bloos waut aundret jleichen aus wie ooda dee ons beleidicht haben. Enne Städ daut räd hee von soone, waut Orrajchtet doonen un met Fliet dän Rot nich aunnämen, waut von Gott kjemt.

Wan wie enwoaren, daut een Gloowesbrooda sikj doa bloos nich aun hoolen well, waut Gott sien Wuat sajcht, a dan woa wie de perseenelje Entscheidunk moaken, nich met dän toop Tietvedrief to haben. Wäajen dit eene perseenelje Entscheidunk es, woa wie met sestkjeenem doaräwa räden aus met onse Famielje, met dee wie toop em Hus wonen. Oba wie woaren met dänjanjen bie de Toopkomes un em Deenst doawäajen wieda toop sennen. Un wan dee sikj ieescht jeendat haft, dan woa wie wada met dän toop Tietvedrief haben.