1-2. Wuarom es daut fa aule Christen intressaunt, daut eenje em Himmel komen?

DE MIEESCHTE von Jehova siene Deena vondoag dän Dach haben de Hopninj fa emma oppe Ieed to läwen. Oba eenje jesaulwde Christen hopen, daut see em Himmel komen woaren. Dee wellen jieren weeten, woo daut doa sennen woat. Oba wuarom es daut uk fa dee intressaunt, waut doa hopen fa emma oppe Ieed to läwen? Wie woaren seenen, daut daut oppstonen von de Jesaulwde uk väl goodet fa dee brinjen woat, waut doa hopen fa emma oppe Ieed to läwen. Doawäajen sell wie ons aula doafäa intressieren, endoont waut vonne Hopninj wie haben.

² Gott sach doano, daut eenje von Jesus siene Jinja waut äwa de himlische Hopninj oppschreewen. De Apostel Johanes säd biejlikj: “Wie sent nu aul Gott siene Kjinja. Daut es oba noch nich verendach jekomen waut wie nohäa sennen woaren. Wie weeten oba, wan hee komen woat, dan woa wie soo sennen, aus hee es” (1. Joh. 3:2). De Jesaulwde weeten daut noch nich krakjt, woo daut sennen woat, wan dee em Himmel läwen woaren. Oba dee woaren dan werkjlich Jehova seenen kjennen. De Schreft erkjläat nich jieda Eenselheit äwa daut oppstonen von de Jesaulwde, oba de Apostel Paulus schreef een bät doavon. Hee wees, daut de Jesaulwde met Christus toop sennen wudden, wan hee “aule Harschoften un Rejierungen un Jewaulten” tonuscht moaken wudd. Un doa es uk “de latsta Fient, . . . de Doot” met en. Dan woaren Jesus un siene Metharscha Jehova aules äwajäwen un am wieda unjadon sennen  (1. Kor. 15:24-28). Daut woat eene besonda scheene Tiet sennen! *

3. Waut kunn Paulus, wiels hee aun daut oppstonen jleewd, soo aus 1. Korinta 15:30-32 sajcht?

³ Paulus kunn bäta met veschiedne Schwierichkjeiten foadich woaren, wäajen hee aun daut oppstonen vom Doot jleewd (läs 1. Korinta 15:30-32). Hee säd to de Korinta: “Ekj [hab] dän Doot aule Dach ver mie.” Un hee schreef uk: “Ekj [hab] en Efesus . . . met wille Tieren jekjamft”. Veleicht haben se am en Efesus werkjlich bemust met wille Tieren to kjamfen (2. Kor. 1:8; 4:10; 11:23). Ooda doa wieren Juden un aundre, waut jäajen am wieren un sikj soo oppstalden aus “wille Tieren” (Apj. 19:26-34; 1. Kor. 16:9). Endoont woo daut wia, Paulus wia aulmols en groote Jefoa. Un doch kunn hee mootich no väaren kjikjen (2. Kor. 4:16-18).

4. Woo haft de Breeda daut vondoag dän Dach Moot jejäft, daut dee aun daut oppstonen jleewen? (See daut Bilt oppe väaschte Sied.)

⁴ Wie läwen uk en jefäadelje Tieden. Eenje von onse Breeda motten wäajen schlajchte Menschen lieden. Aundre sent en Jefoa, wiels dee wua läwen, wua Kjrich es. Un noch aundre deenen Jehova en Lenda, wua ons Prädichtwoakj veboden ooda nich en aule Stekjen frie es, un dee wudden kjennen enjestopt ooda dootjemoakt woaren. Dee sent aula een goodet Biespel fa ons, wiels dee deenen Jehova wieda. Dee sent sikj gaunz secha, daut Jehova an sea beloonen woat, wan dee nu veleicht uk äa Läwen jäwen motten.

5. Fa waut vonne faulsche Enstalunk woarnt Paulus ons, un wuarom?

⁵ Paulus woarnd de Breeda, wäajen eenje eene faulsche Enstalunk hauden. Dee säden: “Wan de Doodes doch nich oppstonen, dan ‘well wie äten un drinkjen, wiels morjen sent wie doot.’” Mau rajcht ver Paulus siene Tiet jeef daut aul eenje, waut soo dochten. Veleicht docht Paulus aun daut, waut et en Jesaja 22:13 äwa de Israeliten säd. Dee wieren bloos no daut Scheengonen hinjaraun, enne Städ Gott noda to komen. Un dee dochten uk, daut eena nu eenen scheenen Dach läwen sull, wäajen daut Läwen boolt een Enj haben wudd, krakjt soo aus väle vondoag dän Dach denkjen. Oba wie weeten je, woo schlajcht daut met daut Volkj Israel utkjeem (2. Chr. 36:15-20).

6. Waut haft daut oppstonen vom Doot doamet to doonen, waut vonne Frind wie ons utsieekjen?

⁶ Waut haft daut oppstonen vom Doot doamet to doonen, waut vonne Frind wie haben? De Breeda en Korint sullen nich soone Frind haben, waut nich aun daut oppstonen jleewden. Waut kjenn wie doavon lieren? Wan wie väl met Frind toop sent, waut nich aun lota denkjen un bloos eenen scheenen Dach läwen wellen, dan woat daut schlajcht utkomen. Daut kaun onse goode Enstalunk un onse goode Jewanheiten vedoawen. Soone Frind to haben kaun ons mau rajcht bat doa brinjen, waut to doonen, waut Gott haust. Doawäajen jeef Paulus dän Rot: “Komt doch emol to Besennunk, un hieet opp met sindjen” (1. Kor. 15:33-34).

7. Waut fruagen eenje woomäajlich, soo aus 1. Korinta 15:35-38 wiest?

⁷ Läs 1. Korinta 15:35-38. Soone, waut aundre oppem Twiewel brinjen wullen, fruagen woomäajlich: “Woo woaren de  Doodje oppstonen”? Daut es goot, wan wie unjasieekjen, waut Paulus doatoo säd, wäajen vondoag dän Dach uk väle äare ieejne Iedeeen haben äwa daut oppstonen vom Doot. Oba waut sajcht de Schreft doaräwa?

8. Waut von Jlikjnis wiest ons, woo daut met daut oppstonen von de Jesaulwde es?

⁸ Wan doa wäa stoaft, dan vewäst dän sien Kjarpa. Oba Jehova, waut aules em Himmel un oppe Ieed jemoakt haft, kaun dänjanjen vom Doot oppwakjen un dän wada soonen Kjarpa jäwen, aus dän fält (1. Mo. 1:1; 2:7). Paulus wiest derch een Jlikjnis, daut Gott nich dän Kjarpa oppwakjen mott, waut de Vestorwna ea haud. Daut es biejlikj soo aus bie “een Kuarn”, waut jeseit woat. Daut kjient en un dan woat daut eene Plaunt. De Plaunt es gaunz aundasch aus daut kjliene Kuarn. Dit Jlikjnis wiest, daut ons Schepfa ons soonen Kjarpa jäwen kaun, “aus hee daut well”.

9. Waut sajcht 1. Korinta 15:39-41 von de veschiedne Kjarpasch?

⁹ Läs 1. Korinta 15:39-41. Paulus muak daut dietlich, daut Gott nich aule Kjarpasch äwareen muak. Daut Vee haft biejlikj eenen gaunz aundren Kjarpa aus de Väajel ooda de Fesch. Un de Sonn es uk gaunz aundasch aus de Mon. Paulus säd: “De Stierns unjascheeden sikj noch vonenaunda met äa Glaunz.” Veleicht kjenn wie daut bloos met onse Uagen nich seenen, oba de Forscha sajen, daut et veschiedne Sorten Stierns jeft. Daut jeft jratre, kjlandre, roode, witte un jäle Stierns, soo aus de Sonn. Paulus säd uk: “Doa sent himlische Kjarpa un irdische Kjarpa.” Waut bediet daut? Na, de Menschen oppe Ieed haben fleeschelje Kjarpasch, oba dee, waut em Himmel sent, haben jeistelje Kjarpasch, soo aus de Enjel.

10. Waut fa eenen Kjarpa kjrieen deejanje, waut em Himmel komen?

¹⁰ Dan säd Paulus: “Soo woat daut uk  sennen, wan de Doodes oppstonen. De Kjarpa, dee jeseit woat, mott vegonen. Oba dee vom Doot oppsteit, woat bestonen.” Wan een Mensch stoaft, dan vewäst dän sien Kjarpa un woat wada to Ieed (1. Mo. 3:19). Woo kaun een Kjarpa, waut vom Doot oppsteit, dan “bestonen”, soo aus Paulus sajcht? Paulus rät hia nich von de Menschen, waut vom Doot oppjewakjt woaren un wada oppe Ieed läwen, soo aus dee, waut von Elia, Elisa un Jesus oppjewakjt worden. Hee rät von deejanje, waut oppjewakjt woaren toom em Himmel läwen un “eenen jeistlichen Kjarpa” kjrieen (1. Kor. 15:42-44).

11-12. Met waut fa eenen Kjarpa stunt Jesus opp, un woo woat daut bie de Jesaulwde sennen?

¹¹ Aus Jesus oppe Ieed wia, haud hee eenen fleescheljen Kjarpa. Oba aus hee vom Doot oppstunt, wort hee een “Jeist, dee läwendich moakt”, un fua trigj nom Himmel. Krakjt soo kjrieen de Jesaulwde eenen jeisteljen Kjarpa, wan dee vom Doot oppjewakjt woaren. Paulus säd: “Soo aus wie däm, dee von de Ieed es, likjnen, soo woa wie uk däm, dee vom Himmel es, likjnen” (1. Kor. 15:45-49).

¹² Daut es wichtich, daut wie daut em Denkj hoolen, daut Jesus nich met eenen fleescheljen Kjarpa vom Doot oppstunt. Wuarom? Daut säd Paulus meist opp Enj von Kapitel 15. Doa sajcht daut: “Fleesch un Bloot kjennen Gott sien Rikj nich oawen”, waut em Himmel es (1. Kor. 15:50). De Apostel un de aundre Jesaulwde wudden nich met fleeschelje Kjarpasch em Himmel komen kjennen, waut vewäsen kunnen. Wanea wudden dee dan oppstonen? Paulus wees, daut dee lota oppstonen wudden un nich fuaz no äaren Doot. Aus Paulus 1. Korinta schreef, wieren eenje Jinja aul jestorwen, biejlikj de Apostel Jakobus (Apj. 12:1-2). Un aundre Apostel un Jesaulwde wudden lota noch stoawen (1. Kor. 15:6).

13. Waut wudd doa woaren, wan Christus wudd aunfangen aus Kjennich to harschen?

¹³ Jesus un Paulus säden eene gaunz besondre Tiet verut: Christus wudd aunfangen aus Kjennich to harschen. En dise Tiet wudd daut oppe Welt väl Kjrich un Ieedbäbens un Krankheiten un aundre Trubbels jäwen. Daut es kloa to seenen, daut dise biblische Profezeiunk sikj vonne 1914 aun erfelt. Oba doa wia noch waut verutjesajcht. Jesus säd, de goode Norecht, daut Gott sien Kjennichrikj aul harscht, wudd “en de gaunze Welt jeprädicht woaren, soo daut aule Velkja daut hieren, un dan . . . [wudd] daut Enj komen” (Mat. 24:3, 7-14). Paulus räd uk von dise Tiet, wua de Har wadakomen wudd, om aus Kjennich to harschen. Hee säd, daut en dise Tiet de jesaulwde Christen vom Doot oppstonen wudden, waut ea aul “enjeschlopen” wieren (1. Tess. 4:14-16; 1. Kor. 15:23).

14. Waut passieet, wan een Jesaulwda vondoag dän Dach stoaft?

¹⁴ Wan vondoag dän Dach eenen Jesaulwden sien Läwen hia oppe Ieed to Enj es, dan steit dee fuaz opp toom em Himmel läwen. Daut kjenn wie aun daut seenen, waut Paulus en 1. Korinta 15:51-52 schreef. Doa sajcht daut: “Wie woaren nich aula stoawen, wie woaren oba aula veendat woaren. Daut woat plazlich komen, en eenem Uagenblekj, wan de latste Trompeet blosen woat.” Un dit erfelt sikj en onse Tiet! Wan dise oppstonen, waut Christus siene Breeda sent, dan freien dee sikj sea, wiels dee woaren fa “emma bie am sennen” kjennen (1. Tess. 4:17).

15. Waut vonne Oppgow kjrieen deejanje, waut “en eenem Uagenblekj” veendat woaren?

 ¹⁵ De Schreft wiest ons, waut vonne Oppgow deejanje kjrieen woaren, waut “en eenem Uagenblekj” veendat woaren un em Himmel komen. Jesus vesprakjt dee: “De jewennende, dee bat aum Enj mienen Wellen doonen, woa ekj Volmacht äwa de Velkja jäwen. Dee sellen met eene Iesastang äwa an harschen, un soo aus een Leemtopp to Bieta schlonen, soo aus mie daut von mienem Voda jejäft es” (Opb. 2:26-27). Jesus woat de Velkja soo aus met eene Iesastang rejieren un de Jesaulwde woaren am doabie unjastetten (Opb. 19:11-15).

16. Woo woaren väle dän Doot jewennen kjennen?

¹⁶ De Doot woat de Jesaulwde gaunz secha nuscht mea aundoonen kjennen (1. Kor. 15:54-57). Un wiels dee oppjestonen sent, woaren dee en dän Kjrich von Harmagedon halpen kjennen, aul daut schlajchte opptoriemen. Millionende aundre Christen woaren de “groote Triebsaul” äwaläwen un en de niee Welt nenkomen (Opb. 7:14, Reimerbibel). Dee woaren daut seenen, woo uk noch aundre dän Doot jewennen woaren. Dan woaren millionende Menschen wada toom Läwen komen, waut doa jestorwen wieren. Stal die mol väa, waut vonne groote Freid daut jäwen woat! (Apj. 24:15). Aul dee, waut Jehova tru bliewen woaren, woaren dan uk äwa dän Doot jewennen, waut see von Adam metjeorwen haben, un woaren fa emma läwen kjennen.

17. Waut sell wie no 1. Korinta 15:58 no doonen?

¹⁷ Daut, waut Paulus de Korinta äwa daut oppstonen schreef, kaun aule väl Moot jäwen un jieda Christ saul doafäa dankboa sennen. Wie haben goode Uasoak, daut wie Paulus sienen Rot nokomen un emma drock sent en onse “Oabeit fa dän Harn” (läs 1. Korinta 15:58). Wan wie en dit Woakj ons bastet doonen, dan kjenn wie ons to eene groote Beloonunk freien. Daut woat noch scheena sennen, aus wie ons väastalen kjennen! Dan woa wie daut seenen, daut onse Oabeit fa dän Harn nich vejäfs wia.