Hast du dit Joa de Woaktorms oppmoakjsom jeläst? See mol, aus du de Froagen hia beauntwuaten kaust:

Waut von Biespel jeft Jehowa doarenn, woo eena Frues behaundlen saul?

Hee moakt kjeenen Unjascheet, wiels fa am sent de Mana nich bäta aus de Frues. Gott horcht de Frues too un hee es doarom bekjemmat, woo dee sikj feelen un waut vonne Trubbels dee haben. Un hee vetrut doaropp, daut dee methalpen, sien Woakj derchtofieren (w24.01, S. 15-16).

Woo halpt Efeesa 5:7 ons, wua daut sajcht: “Siet nich dee äare Poatna”?

De Apostel Paulus woarnt ons, daut wie nich sellen met soone toop sennen, waut ons daut schwoa moaken, ons aun Jehowa siene Jesazen to hoolen. Met soone well wie nich perseenlich toop sennen, oba uk nich äwa Social Media (w24.03, S. 22-23).

Fa waut vonne oppjemoakte Jeschichten mott wie oppaussen?

Wie motten oppaussen fa Jeschichten, waut Frind ons vetalen, wua wie oba nich weeten, aus daut soo es. Krakjt soo es daut bie E-Mails von Onbekaunde un uk, wan sikj Aufjefolne soo doonen, daut dee sikj fa de Woarheit intressieren (w24.04, S. 12).

Waut weet wie un waut weet wie nich doaräwa, woo Jehowa dän Kjennich Salomo rechten woat ooda dee, waut en Sodom un Gomorra ooda bie de Sintflut todood kjeemen?

Wie weeten nich, aus Jehowa entschieden haft, daut dee woaren fa emma doot sennen. Oba wie weeten, daut Jehowa om jiedrem eenen krakjt omweet un daut hee grootet Metleet haft (w24.05, S. 3-4).

Waut fa eene Sechaheit jeft ons daut, daut Jehowa “Groota Steen” jenant woat? (5. Mo. 32:4).

Wie kjennen bie Jehowa Schutz sieekjen. Hee es opp to veloten un woat emma siene Vespräakjungen hoolen. Un hee endat daut uk nich, woo hee daut haft un waut hee sikj väajenomen haft (w24.06, S. 26-28).

Waut kaun die halpen, die en eene fresche Vesaumlunk tus to feelen?

Velot die opp Jehowa. Hee haft siene Deena ieeschtemma jeholpen, un hee woat die uk halpen. Vejlikj nich dise Vesaumlunk met diene väaje. Moak enne niee Vesaumlunk met un moak die doa uk goode Frind (w24.07, S. 26-28).

Waut lia wie von de dree Jlikjnisen en Matäus, Kapitel 25?

Daut Jlikjnis von de Schop un de Kosen lieet ons to wiesen, daut wie tru sent. Daut Jlikjnis von de väabedochte Mejalen un dee, waut nich kluak wieren, moakt dietlich, woo wichtich daut es, reed to sennen. Un daut Jlikjnis von de Talenten lieet ons, woo wichtich daut es, flietich to sennen (w24.09, S. 20-24).

Woo huach wia de väaschte Stow von Salomo sienen Tempel?

En 2. Chronik 3:4 steit en eenje oole Aufschreften, dee wia 120 Ellen huach, aulsoo 53 Meeta (175 Schoo). Oba en aundre Aufschreften, waut von de Jelieede fa goot jetalt woaren, steit, dee wia 20 Ellen huach, aulsoo 9 Meeta (30 Schoo). Dit paust dolla met daut toop, woo dikj de Mieren von dän Tempel wieren (w24.10, S. 31).

Waut meent daut, daut een Vesaumlungshelpa “bloos eene Ehefru haben” saul? (1. Tim. 3:12).

Daut meent, daut hee bloos met eene Fru saul befriet sennen un daut hee kjeene Huararie bejeit. Hee saul uk nich no eene aundre Fru schmeichlen (w24.11, S. 19).

Wuarom kjenn wie sajen, daut Johanes 6:53 nuscht met daut Owentmol to doonen haft?

Johanes 6:53 rät doavon, daut wie Jesus sien Fleesch äten un sien Bloot drinkjen sellen. Dise Wieed säd Jesus aune 32 n.Chr. en Galiläa to de Juden, waut noch nich Gloowen aun am hauden. Oba daut Owentmol wort een Joa lota en Jerusalem enjefieet. Doa räd Jesus to soone, waut met am toop wudden em Himmel rejieren (w24.12, S. 10-11).