6. ARTIKJEL FA DAUT STUDIUM
Bliew tru!
“Bat ekj stoaw, woa ekj tru bliewen!” (HIOB 27:5, NW)
LEET 129 Well wie wieda tru uthoolen
WAUT WIE SEENEN WOAREN *
1. Woo stunden dree von Jehova siene Zeijen, wua dis Varsch von rät, fa Jehova en?
STAL die mol dree Loagen väa, waut Jehova siene Zeijen muchten beläwen. 1. Eene junge Mejal es en de School, un de Liera sajcht, daut aule Schoolkjinja sellen bie eenen Heljedach metmoaken. De Mejal weet, daut Gott disen Heljedach nich jleicht, doawäajen sajcht see leeftolich, daut see doa nich woat metmoaken. 2. Een bleeda Jung prädicht von Hus to Hus. Hee woat en, daut eena von siene Schoolpoatna bie daut näakjste Hus wont, waut sikj ea aul haft äwa Jehova siene Zeijen domm jehaut. Oba de Jung jeit doawäajen no daut Hus un puttat aune Däa. 3. Een Maun schauft sea, daut hee fa siene Famielje sorjen kaun. Oba eenen Dach sajcht sien Wieet to am, daut hee waut doonen saul, waut onopprechtich ooda jäajen daut Jesaz es. Wan hee uk siene Oabeit velieren kunn, lajcht hee sienen Wieet daut ut, daut hee mott opprechtich sennen un daut Jesaz jehorchen, wiels daut es, waut Gott von siene Deena velangt (Reem. 13:1-4; Heb. 13:18).
2. (a) Äwa woone Froagen woa wie räden? (b) Wuarom woa wie von dee räden?
2 Waut vonne Ieejenschoft see wie bie dee dree? Veleicht see wie mea aus eene. Dee sent biejlikj opprechtich un haben Moot. Oba eene Ieejenschoft, waut sea wichtich es, wiesen see aula – daut es, daut see aula Jehova tru sent. Dee sent sikj aula eenich, nich jäajen Gott siene Jesazen un Gruntsauzen to gonen. Tru sennen brinjt an bat doa, daut rajchte to doonen. Jehova freit sikj secha doaräwa, wan see aula dise Ieejenschoft wiesen. Wie wellen, daut ons Voda em Himmel sikj uk äwa ons freit. Doawäajen well wie mol äwa de Froagen räden: Waut es met tru sennen jemeent? Wuarom sell wie tru sennen? Un woo kjenn wie ons stoakjen, daut wie ons eenich sent en dise schwoare Tieden tru to bliewen?
WAUT ES MET TRU SENNEN JEMEENT?
3. (a) Waut bediet tru sennen fa ons? (b) Waut fa Biespels wiesen, daut et fa ons wichtich es, daut Sachen gaunz un foadich un onen Fäla sent?
3 Woo wiesen Gott siene Deena, daut see tru sent? Wan see volstendich un von gaunzen Hoaten äare Leew fa Jehova wiesen un emma daut doonen, waut am jefelt. Well wie mol seenen, waut eene Bediedunk fa daut Wuat “tru” en de Bibel es. Daut meent “gaunz”, “jesunt”, “volstendich” ooda “onen Fäla”. De Israeliten opfaden toom Biespel Tieren fa Jehova, oba daut Jesaz säd, dee musten onen Fäla * sennen (3. Mo. 22:21-22). Gott sien Volkj haud nich de Frieheit een Tia to opfren, waut een Been ooda een Ua ooda een Uag fäld un uk nich eent, waut eene Krankheit haud. Fa Jehova wia daut wichtich, daut daut gaunz jesunt wia (Mal. 1:6-9). Wie kjennen vestonen, wuarom daut fa Jehova wichtich wia, daut et gaunz un onen Fäla wia. Wiels wan wie ons waut kjeepen, endoont aus daut Frucht ooda een Buak ooda Jereetschoft es, dan well wie nich, daut daut Lajcha haft ooda daut doa waut Bieta fälen. Wie wellen waut gaunz foadjet un onen Fäla. Jehova denkjt uk soo, wan daut om onse Leew fa am un ons tru sennen jeit. Daut mott gaunz un volstendich sennen.
4. (a) Wuarom kaun een onvolkomna Mensch tru sennen? (b) Waut velangt Jehova no Psalm 103:12-14 no von ons?
4 Sell wie denkjen, daut wie motten volkomen sennen, daut wie kjennen tru sennen? Veleicht feel wie ons sea fälahauft. Well wie mol twee Uasoaken seenen, wuarom wie ons nich ferchten brucken. Ieeschtens kjikjt Jehova nich bloos no onse Fäla. Sien Wuat sajcht: “Wan du, oo HAR, Räakjnunk hilst von onse Sinden, oo HAR, wäa wudd dan bestonen?” (Psa. 130:3). Hee weet, daut wie onvolkomne un sindje Menschen sent, un hee vejeft ons jieren (Psa. 86:5). Tweedens: Jehova kjant onse Jrensen un hee velangt nich mea von ons, aus wie doonen kjennen (läs Psalm 103:12-14). Woo kjenn wie dan en Jehova siene Uagen gaunz, jesunt, volstendich un onen Fäla sennen?
5. Wuarom motten Jehova siene Deena Leew haben toom tru bliewen?
5 Jehova siene Deena motten Leew haben, daut dee kjennen tru bliewen. Jehova es ons himlischa Voda, un onse Leew fa am un ons trua Deenst motten gaunz un volstendich bliewen. Wan onse Leew mau rajcht dan, wan wie vesocht woaren, volstendich blift, dan sent wie tru (1. Chr. 28:9; Mat. 22:37). Denkj noch mol aun de dree von Jehova siene Zeijen, wua wie aum Aunfank von räden. Wuarom haundelden dee soo, aus dee deeden? Jleicht de junge Mejal nich een Scheengonen to haben bie de School? Wull de Jung, daut se sikj bie een Hus äwa am domm hauden? Wull de Maun siene Oabeit looswoaren? Secha nich. Oba dee wisten, daut Jehova jerajchte Jesazen un Gruntsauzen haud, un dee dochten doaraun, waut äaren himlischen Voda jefoll. Dee äare Leew fa Jehova brocht an bat doa, am opp de ieeschte Städ to stalen, wan dee waut entscheiden. Soo beweesen dee, daut see tru wieren.
WUAROM WIE TRU SENNEN MOTTEN
6. (a) Wuarom es daut needich tru to bliewen? (b) Woo weesen Adam un Eva, daut see nich tru wieren?
6 Wuarom es daut soo needich, daut wie aula tru sent? Wiels de Soton stald sikj jäajen Gott un uk jäajen ons. En dän Goaden Eden wort dis aufjefolna Enjel jäajenaun un muak sikj selfst toom Soton ooda Fient. Dee muak Jehova eenen schlajchten Nomen un jeef auntovestonen, daut dee schlajcht wia un bloos aun sikj docht un nich een jerajchta Harscha wia. Adam un Eva stalden sikj opp dän Soton siene Sied un doaderch worden dee uk jäajen Jehova (1. Mo. 3:1-6). Daut Läwen en dän Goaden Eden wudd dee haben väl Jeläajenheiten jejäft äare Leew fa Jehova to stoakjen. Oba to dee Tiet, aus de Soton an vesocht, wia äare Leew nich volstendich. Un doa kjeem noch waut opp: Wudd irjenteen Mensch Jehova ut Leew tru bliewen? Ooda kaun een Mensch verheipts tru sennen? Dise Froag kjeem bie Hiob opp.
7. (a) Woo docht Jehova no Hiob 1:8-11 no doaräwa, daut Hiob tru wia? (b) Woo docht de Soton doaräwa?
7 Hiob läwd to de Tiet, aus de Israeliten en Ägipten wieren. Sien tru sennen wia besonda. Hee wia uk onvolkomen un muak Fäla, krakjt soo aus wie. Oba Jehova leewd Hiob, wäajen dee am tru wia. Daut späat sikj soo, daut de Soton Jehova daut aul ea väajeschmäten haud, daut de Menschen am nich wudden tru sennen. Dan wees Jehova dän Soton, woo Hiob wia. Hiob bewees met sien Läwen, daut de Soton een Läajna wia. De Soton velangd, daut Hiob wort oppe Proow jestalt. Jehova vetrud opp sienen Frint Hiob un leet daut too, daut de Soton am aufproowd (läs Hiob 1:8-11).
8. Waut deed de Soton Hiob aun?
8 De Soton es grausom un een Merda. Dee neem Hiob sien Hab un Goot fuat, sienen Rikjtum, siene Deena un sienen gooden Nomen. Dee jreep uk Hiob siene Famielje aun un neem am siene tieen leewe Kjinja wajch. Dan neem dee uk noch siene Jesuntheit wajch un leet schlajchte Schwäaren opp am komen von oppem Kopp bat unjare Feet. Hiob siene Fru wia daut soo schwoa un wia soo truarich, daut see to Hiob säd, hee sull oppjäwen, Gott flieekjen un stoawen. Hiob selfst wenscht sikj to stoawen, oba hee bleef tru. Oba dan proowd de Soton noch waut; dee brukt dree Mana, waut Hiob siene Poatna wieren. Dee kjeemen Hiob fa väl Doag besieekjen, oba dee jeewen am kjeenen Troost. Onen Metjefeel neemen see am väa un grunzten am ut. Dee jeewen nuscht om Hiob sien tru sennen rom un säden, daut Gott am de Trubbels schekjt. Dee jeewen mau rajcht auntovestonen, daut Hiob een schlajchta Mensch wia un daut hee aul daut schlajchte vedeent haud, waut am passieed (Hiob 1:13-22; 2:7-11; 15:4-5; 22:3-6; 25:4-6).
9. Waut deed Hiob en aul siene schwoare Tieden nich?
9 Woo jinkj Hiob met aul dise Schwierichkjeiten om? Hee wia nich volkomen. Hiob wort doll un wees siene faulsche Treesta trajcht un säd soont, waut hee lota selfst toostunt, daut et onbedocht wia. Hee stunt dolla fa siene ieejne Jerajchtichkjeit en aus fa Gott siene (Hiob 6:3; 13:4-5; 32:2; 34:5). Oba mau rajcht en siene schwanste Tieden stald Hiob sikj nich jäajen Jehova Gott. Hee jleewd de Läajes nich von siene faulsche Frind. Hee säd: “Daut kjemt mie nich mol en, daut ekj wudd sajen, daut jie Mana rajcht wieren! Bat ekj stoaw, woa ekj tru bliewen!” (Hiob 27:5, NW). Daut, waut Hiob säd, es sea wichtich. Hee jeef nich no, un wie brucken uk nich.
10. Waut haft de Sach, waut de Soton bie Hiob oppbrocht, met ons to doonen?
10 De Soton schmitt eenen jiedrem eenen von ons dautselwje väa, waut hee Hiob deed. Woosoo? Wiels dee sajcht, daut wie nich opp iernst Jehova Gott leewen un daut wie wudden opphieren am to deenen toom ons selfst raden un daut wie am nich opprechtich tru sent (Hiob 2:4-5; Opb. 12:10). Woo feel wie ons doaräwa? Daut deit wee, nich soo? Oba denkj mol doaräwa no: Jehova jeft ons eene besondre Jeläajenheit, wiels hee opp ons vetrut. Hee lat daut too, daut de Soton ons kaun aufproowen. Jehova vetrut doaropp, daut wie kjennen tru bliewen un bewiesen, daut de Soton een Läajna es. Un hee vesprakjt, ons doabie to halpen (Heb. 13:6). Waut vonne Iea daut nich es, daut de Hechsta äwa Himmel un Ieed soon Vetruen opp ons haft! Sitst du, wuarom tru sennen soo wichtich es? Doamet bewies wie, daut daut nich soo es, waut de Soton sajcht, un wie kjennen onsen Voda sienen Nomen huachhoolen un am aus Harscha unjastetten. Woo kjenn wie tru bliewen?
WOO WIE KJENNEN EN DISE TIET TRU BLIEWEN
11. Waut kjenn wie von Hiob lieren?
11 De Soton jript ons emma stoakja aun en dise schlemme “latste Doag” (2. Tim. 3:1). Woo kjenn wie en soone schlemme Tieden tru bliewen? Wie kjennen väl von Hiob lieren. Hee haud aul foaken bewäsen, daut hee tru wia, ea hee aufjeprooft wort. Wie kjennen dreeatlei von am lieren, woo wie ons stoakjen kjennen, tru to bliewen.
Woo kjenn wie ons stoakjen, tru to bliewen? (See Varsch 12) *
12. (a) Waut holp Hiob no Hiob 26:7-8, 14 no, Jehova noch dolla to bewundren un to respakjten? (b) Woo kjenn wie daut uk doonen?
12 Wäajen Hiob soo vewundat wia äwa aul daut goode, waut Jehova deed, wort siene Leew fa am stoakja. Hiob neem sikj Tiet toom Jehova siene wundascheene Schepfunk betrachten (läs Hiob 26:7-8, 14). Hee must sikj sea wundren, wan hee äwa de Ieed, dän Himmel, de Wolkjen un daut rumlen nodocht. Oba hee stunt too, daut hee mau sea weinich äwa de gaunze Schepfunk wist. Hee räakjend daut, waut Jehova säd, uk sea väl. Hiob säd äwa Gott siene Wieed: “Waut hee jesajcht haft, oppbewoa ekj” (Hiob 23:12). Daut Hiob Jehova soo bewundad un respakjt, deed väl aun am. Hee leewd sienen Voda un wull am jefaulen. Doawäajen bleef hee emma dolla doaropp stonen, daut hee wull tru bliewen. Wie motten daut uk soo doonen. Wie weeten väl mea äwa de wundascheene Schepfunk aus de Menschen en Hiob siene Tiet. Un wie haben de gaunze Schreft von Jehova jekjräajen, waut ons halpt, am soo kjanen to lieren, aus hee werkjlich es. Aules, waut wie lieren, kaun ons halpen to seenen, woo besonda Jehova es. Wan wie am huach achten un respakjten, dan woa wie am leewen un jehorchen un wie woaren uk eenen jratren Wunsch kjrieen, am tru to bliewen (Hiob 28:28).
Daut es leichta tru to bliewen, wan wie nich schwiensche Bilda kjikjen (See Varsch 13) *
13-14. (a) Woo bewees Hiob, daut hee tru wia, soo aus daut en Hiob 31:1 sajcht? (b) Woo kjenn wie Hiob sien Biespel nodoonen?
13 Daut Hiob en aules jehuarsom wia, holp am tru to bliewen. Hiob wist, daut eena must jehuarsom sennen toom tru bliewen. Jiedatsmol, wan wie jehuarsom sent, woa wie ons noch eenja tru to bliewen. Hiob strenjd sikj sea aun, jieda Dach Gott to jehorchen. Biejlikj paust hee sea opp, woo hee to aundre Frues wia (läs Hiob 31:1). Aus een befrieda Maun wist hee, daut et orrajcht wia, sikj met eene aundre Fru auftojäwen. Vondoag dän Dach es de Welt voll von soone Vesieekjungen. Woa wie ons, krakjt soo aus Hiob, nich met wäm aufjäwen, met dän wie nich befriet sent? Woa wie uk nich no irjent schlajchte ooda schwiensche Bilda kjikjen? (Mat. 5:28). Wan wie ons jieda Dach selfst beharschen, dan woa wie stoakja woaren un tru bliewen kjennen.
Daut es leichta tru to bliewen, wan wie utjejlikjt äwa daut tietelje denkjen (See Varsch 14) *
14 Hiob wia Jehova uk doarenn jehuarsom, woo hee äwa daut tietelje docht. Hee wist, wan hee sikj wudd opp sien Hab un Goot veloten, wudd hee eenen grooten Fäla moaken un sikj eene Strof vedeenen (Hiob 31:24-25, 28). Wie läwen nu en eene Welt, waut sea no daut tietelje hinjaraun es. Wan wie lieren, utjejlikjt äwa daut Jelt un äwa daut tietelje to denkjen, woat ons daut stoakjen tru to bliewen (Spr. 30:8-9; Mat. 6:19-21).
Daut es leichta tru to bliewen, wan wie onse Hopninj läwendich hoolen (See Varsch 15) *
15. (a) Waut holp Hiob tru to bliewen? (b) Wuarom kaun ons daut halpen, aun de Hopninj to denkjen, waut Jehova vesproaken haft?
15 Hiob bleef tru, wäajen hee de Hopninj em Uag hilt, daut Gott am beloonen wudd. Hee jleewd daut, daut Gott sikj freid, wan hee tru wia (Hiob 31:6). Wan Hiob uk Schwierichkjeiten haud, vetrud hee doaropp, daut Jehova am tolatst beloonen wudd. Dit Vetruen holp am secha tru to bliewen. Jehova wia sea schaftich, daut Hiob tru wia, un doawäajen beloond hee am rikjlich, wan hee uk noch een onvolkomna Mensch wia (Hiob 42:12-17; Jak. 5:11). Lota woat Hiob noch dolla beloont woaren. Best du die secha, daut Jehova dien tru sennen beloonen woat? Ons Gott haft sikj nich jeendat (Mal. 3:6). Wan wie em Denkj hoolen, daut hee daut väl räakjent, wan wie tru sent, dan kjenn wie onse scheene Hopninj läwendich hoolen (1. Tess. 5:8-9).
16. To waut sell wie ons gaunz eenich sennen?
16 Sie die gaunz eenich, emma tru to sennen! Eenjemol woascht du die doabie veleicht auleen feelen, oba du woascht nienich auleen sennen. Du woascht mank millionende Menschen oppe Welt sennen, waut gaunz tru bliewen. Du woascht mank de Gloowesmana un Frues jetalt woaren, waut tru bleewen, wan äa Läwen uk enne Jefoa wia (Heb. 11:36-38; 12:1). Doawäajen well wie ons gaunz eenich sennen, no Hiob siene Wieed to läwen, aus hee säd: “Ekj [woa] tru bliewen!” Well wie Jehova emma doaderch ieren, daut wie am tru sent!
LEET 128 Bat aum Enj uthoolen
^ Varsch 5 Waut es met tru sennen jemeent? Wuarom räakjent Jehova daut väl, wan siene Deena am tru sent? Wuarom es tru sennen wichtich fa ons? Dis Artikjel woat ons halpen, de Auntwuaten fa dise Froagen en de Schreft to finjen. Dee woat ons uk halpen, kloa to seenen, woo wie ons stoakjen kjennen, om jieda Dach tru to bliewen. Wan wie daut doonen, woat ons daut väl Säajnungen brinjen.
^ Varsch 3 Daut hebräische Wuat, waut bie Tieren met “onen Fäla” äwasat woat, likjent sikj met daut Wuat, waut bie Menschen met “tru sennen” äwasat woat.
^ Varsch 50 BILTBESCHRIEWUNK: Hiob lieet eenje von siene Kjinja äwa de wundascheene Schepfunk, aus hee een junga Voda es.
^ Varsch 52 BILTBESCHRIEWUNK: Een Brooda sajcht daut auf, met siene Oabeitspoatna toop schwiensche Bilda to kjikjen.
^ Varsch 54 BILTBESCHRIEWUNK: Een Brooda lat sikj em Stua nich beräden, een grootet, dieret Tellewizhen to kjeepen, waut am nich fält un uk nich betolen kaun, wan am daut uk jankat.
^ Varsch 56 BILTBESCHRIEWUNK: Een Brooda nemt sikj Tiet, om to bäden un äwa de Hopninj vom Paradies notodenkjen.
