1. Woo lieren eenje Mana daut, woo see äare Fru un Kjinja behaundlen sellen?

AUN waut denkjst du, wan du daut Wuat “Haupt” hieescht? Eenje Mana behaundlen äare Fru un äare Kjinja soo, aus see daut tus jelieet haben, ooda soo, aus de Menschen daut en äare Jäajent jeweenlich doonen. Yanita, eene Sesta, waut en Europa wont, sajcht: “Doa, wua ekj won, sent de Menschen sikj gaunz secha, daut Frues weinja wieet sent aus Mana un daut dee de Mana bloos bedeenen sellen.” Un een Brooda, waut Luke heet un en de Stäts wont, sajcht: “Eenje Vodasch lieren äare Junges, daut daut nuscht enhelt, wan Frues waut sajen, un daut eena doa goanich no horchen doaf.” Oba Jehova well nich, daut een Maun siene Fru soo aus dit behaundelt (see uk Markus 7:13). Woo kaun een Maun daut lieren, een feinet Haupt to sennen?

2. Waut mott daut Haupt von de Famielje weeten, un wuarom?

² Daut een Maun een feinet Haupt sennen kaun, mott dee weeten, waut Jehova von am velangt. Hee mott uk weeten, wuarom Jehova dän Maun aus Haupt aunjestalt haft un woo hee Jehova un Jesus nodoonen kaun. Wuarom mott de Maun daut weeten? Wäajen Jehova am aus Haupt von de Famielje eene jewesse Macht jejäft haft un well, daut hee dee rajcht brukt (Luk. 12:48b).

3. Waut lia wie von 1. Korinta 11:3?

³ Läs 1. Korinta 11:3. Dis Varsch wiest ons, woo Jehova daut en siene Famielje em Himmel un oppe Ieed enjerecht haft. Hee es daut Haupt un haft aule Macht. Hee haft uk aundre jewesse Macht jejäft, oba hee kjikjt doano, aus dee dee rajcht brucken (Reem. 14:10; Efs. 3:14-15, NW). Jehova haft Jesus äwa de Vesaumlunk aunjestalt un kjikjt doano, woo Jesus  ons behaundelt (1. Kor. 15:27). Jehova haft uk dän Ehemaun aus Haupt äwa siene Fru un siene Kjinja aunjestalt, un hee un Jesus kjikjen doano, woo dee met siene Famielje omjeit (1. Pet. 3:7).

4. To waut haben Jehova un Jesus daut Rajcht?

⁴ Wäajen Jehova daut Haupt von siene groote Famielje es, haft hee daut Rajcht, Räajlen opptostalen un doano to seenen, daut siene Kjinja dee uk nokomen (Jes. 33:22). Un Jesus es daut Haupt von de Christenvesaumlunk un haft uk daut Rajcht, fa dee Räajlen opptostalen un doano to seenen, daut dee sikj uk doaraun hoolen (Gal. 6:2; Kol. 1:18-20).

5. To waut haft een Famieljenhaupt daut Rajcht un to waut nich?

⁵ Soo aus Jehova un Jesus haft uk daut Haupt von eene Famielje daut Rajcht, fa siene Famielje waut to entscheiden (Reem. 7:2; Efs. 6:4). Oba hee haft nich to aules daut Rajcht. Wan hee biejlikj Räajlen oppstalt, dan saul hee doano seenen, daut dee met Gott sien Wuat toopstemmen (Spr. 3:5-6). Un een Famieljenhaupt haft nich daut Rajcht, fa deejanje Räajlen to moaken, waut nich to siene Famielje jehieren (Reem. 14:4). Un wan siene Säns un Dajchta groot woaren un von tus gonen, dan woaren dee am wieda respakjten, oba hee es nich mea daut Haupt äwa dee (Mat. 19:5).

6. Wuarom stald Jehova eenje aus Haupt aun?

⁶ Jehova stald eenje aus Haupt aun, wiels hee siene groote Famielje leewd. Daut es een Jeschenkj von am un moakt daut mäajlich, daut aule frädlich un ordentlich toopschaufen kjennen (1. Kor. 14:33, 40). Wan daut nich kloa wia, wäa daut Haupt wia, dan wudd en Jehova siene Famielje aules derchenaunda dreien un kjeena wudd schaftich sennen. Doa wudd dan biejlikj kjeena weeten, wäa waut wichtjet entscheiden sull un wäa doano seenen sull, daut daut uk jedonen wort.

7. Wull Jehova no Efeesa 5:25, 28 no, daut Mana äare Fru en aules väasajen sullen?

⁷ Daut es waut sea goodet, daut Jehova een Haupt aunjestalt haft. Wuarom behaundlen dan vondoag dän Dach soo väl Mana äare Fru schlajcht un wellen dee en aules väasajen? Daut es, wiels väl Mana nuscht om Jehova siene Jebooten fa de Famielje romjäwen un leewa daut doonen wellen, waut de aundre Menschen doonen. Ooda dee behaundlen äare Fru schlajcht, daut see sikj selfst bäta feelen. Dee wellen dee biejlikj en aules väasajen, daut see sikj selfst mea wieet feelen ooda daut aundre seenen kjennen, daut see werkjlich Mana sent. Ooda see denkjen, see kjennen äare Fru nich bemotten an to leewen, oba see kjennen dee engrulen. Un wan dee Angst haft, dan kjennen see ar kontrollen. * Wäa soo denkjt ooda soont deit, jeft Frues nich de Iea, waut dee traft, un daut es gaunz jäajen daut, waut Jehova haben well (läs Efeesa 5:25, 28).

8. Woo kaun een Maun een feinet Famieljenhaupt woaren?

⁸ Een Maun kaun een feinet Famieljenhaupt woaren, wan dee siene Macht soo brukt, aus Jehova un Jesus daut doonen. Well wie mol twee Ieejenschoften seenen, waut Jehova un Jesus haben. Dan woa wie  vestonen, woo een Famieljenhaupt dee nodoonen kaun, wan hee met siene Fru un Kjinja omjeit.

9. Aun waut es daut to seenen, daut Jehova deemootich es?

⁹ Deemoot. Kjeena haft mea Weisheit aus Jehova un doch horcht hee no siene Deena (1. Mo. 18:23-24, 32). Hee frajcht soogoa deejanje no Rot, wua hee de Macht äwa haft (1. Kjen. 22:19-22). Jehova es volkomen, oba hee velangt nu noch nich, daut wie uk sellen volkomen sennen. Hee halpt siene onvolkomne Deena, daut dee fein wiedakomen (Psa. 113:6-7). De Schreft sajcht mau rajcht, daut Jehova ons “Helpa” es (Psa. 27:9; Heb. 13:6). De Kjennich David säd, daut hee aul daut, waut hee deed, bloos doonen kunn, wäajen Jehova deemootich wia un am holp (2. Sam. 22:36).

10. Woo wees Jesus Deemoot?

¹⁰ Jesus wia uk deemootich. Hee wia de Har un Liera von siene Deena un doch wosch hee an de Feet. Waut es een Grunt, wuarom Jehova dit en de Schreft oppschriewen leet? Secha wull hee daut Haupt von de Famielje un aule aundre wiesen, waut dee doonen sullen. Jesus säd je: “Ekj hab junt een Biespel jejäft, daut jie uk soo doonen, aus ekj junt jedonen hab” (Joh. 13:12-17). Jesus haud groote Macht, oba hee velangd nich, daut aundre am bedeenen sullen. Enne Städ daut deend hee aundre (Mat. 20:28).

11. Waut kaun een Famieljenhaupt von Jehova un Jesus äwa Deemoot lieren?

¹¹ De Lia fa ons. Een Famieljenhaupt kaun veschiednet doonen toom Deemoot wiesen. Hee woat biejlikj nich velangen, daut siene Fru un siene Kjinja sellen volkomen sennen. Hee horcht siene Famielje too, wan dee uk nich soo denkjen aus hee. Marley wont en de Stäts un sajcht: “Ekj un mien Maun denkjen nich emma äwareen. Oba ekj weet, daut dee mie väl räakjent un respakjten deit, wiels hee no miene Meenunk frajcht un goot doaräwa nodenkjt, ea dee sikj to waut eenich woat.” Een deemootja Ehemaun es uk wellich reed tus mettohalpen, wan se en siene Omjäajent uk denkjen, daut soont Fruesoabeit es. Daut es eenjemol goanich soo leicht. Wuarom nich? Eene Sesta, waut Rachel heet, sajcht: “Wan een Maun siene Fru halpt opptowauschen  ooda daut Hus to besorjen, dan denkjen de Nobasch un daut Frintschoft en miene Jäajent, daut sikj soont fa eenen Maun nich jehieet. Dee denkjen dan, daut hee nich de Wieet em Hus es.” Waut, wan de Menschen en june Omjäajent krakjt soo denkjen? Dan denkj doaraun, daut Jesus siene Jinja de Feet wosch, wan daut uk eene Sklowenoabeit wia. Een feinet Famieljenhaupt well leewa, daut siene Fru un Kjinja schaftich sent, aus daut hee bloos bie aundre huach aunjeseenen es. Oba waut es noch needich toom een feinet Famieljenhaupt sennen?

12. Waut doonen Jehova un Jesus ut Leew?

¹² Leew. Jehova deit aules ut Leew (1. Joh. 4:7-8). Hee es leeftolich un jeft ons derch sien Wuat un derch siene Organisazion daut, waut ons em jeisteljen fält. Hee es uk sea om ons bekjemmat un wiest ons siene Leew. Un woo steit daut met daut tietelje? Jehova es dee, “dee ons rikjlich aules schenkjt, om daut met Freid to brucken” (1. Tim. 6:17). Wan wie Fäla moaken, dan wiest hee ons trajcht, oba hee hieet doawäajen nich opp ons to leewen. Ut Leew sorjd Jehova fa daut Leesjelt. Un Jesus leeft ons soo sea, daut hee sien Läwen fa ons jeef (Joh. 3:16; 15:13). Nuscht kaun Jehova un Jesus doavon aufhoolen, deejanje to leewen, waut an tru sent (Joh. 13:1; Reem. 8:35, 38-39).

13. Wuarom saul een Famieljenhaupt siene Famielje Leew wiesen? (See uk dän Kausten “ Waut kaun een Maun doonen, waut sikj korz befriet haft, daut siene Fru am respakjten deit?”)

¹³ De Lia fa ons. Een Famieljenhaupt saul aules ut Leew doonen. Wuarom? De Apostel Johanes sajcht: “Wäa sienen Brooda [ooda siene Famielje] nich goot es, dän hee sitt, dee kaun Gott nich goot sennen, dän hee nich sitt” (1. Joh. 4:11, 20). Een Maun, waut siene Famielje leeft un Jehova un Jesus nodoonen well, woat em tieteljen un em jeisteljen fa siene Famielje sorjen un uk, daut dee sikj kjennen jeleeft feelen (1. Tim. 5:8). Hee woat de Kjinja lieren un trajchtwiesen. Hee woat emma doano sträwen, soo to entscheiden, daut Jehova jeieet woat un daut siene Famielje daut  toom gooden es. Nu well wie ons aul dise Sachen eent no daut aundre unjastonen un seenen, woo een Famieljenhaupt Jehova un Jesus nodoonen kaun.

14. Woo sorcht daut Haupt em jeisteljen fa de Famielje?

¹⁴ Sorj fa diene Famielje em jeisteljen. Jesus wia krakjt soo aus sien Voda doarom todoonen, daut siene Nofolja em jeisteljen aules hauden, waut dee fäld (Mat. 5:3, NW; 5:6; Mar. 6:34). Daut Haupt von de Famielje saul uk daut ieeschte doarom bedocht sennen, daut siene Famielje Jehova noda kjemt (5. Mo. 6:6-9). Woo kaun dee daut doonen? Wan dee doano sitt, daut hee met siene Famielje toop Gott sien Wuat läst un studieet, no de Toopkomes wankt, de goode Norecht prädicht un dee halpt, Frind met Jehova to woaren un uk to bliewen.

15. Woo kaun daut Haupt siene Famielje wiesen, daut hee om an bekjemmat es?

¹⁵ Wies diene Famielje, daut du om an bekjemmat best. Jehova säd Jesus daut gaunz dietlich, daut hee am leewd (Mat. 3:17). Un Jesus wees derch siene Wieed un derch siene Woakjen, daut hee siene Nofolja väl räakjend. Un dee säden, daut see am uk jleichten (Joh. 15:9, 12-13; 21:16). Daut Haupt von de Famielje kaun siene Fru un siene Kjinja daut uk derch Woakjen wiesen, daut hee an leeft, wan hee biejlikj met an toop de Bibel studieet. Oba hee saul dee uk sajen, daut hee an leeft un väl räakjent un an ver aundre lowen, wan daut paussent es (Spr. 31:28-29).

16. Waut saul daut Haupt von de Famielje noch doonen, un woo kaun dee utjejlikjt bliewen?

¹⁶ Sorj fa diene Famielje em tieteljen. Jehova sorjd emma fa de Israeliten – mau rajcht dan, aus hee dee bestroft, wäajen dee ojjehuarsom jewast wieren (5. Mo. 2:7; 29:4). Hee sorcht uk vondoag dän Dach fa daut, waut ons em tieteljen fält (Mat. 6:31-33; 7:11). Jesus jeef siene Nofolja uk to äten (Mat. 14:17-20). Un hee muak uk väle jesunt, waut krank wieren (Mat. 4:24). Daut een Famieljenhaupt Jehova jefaulen kaun, mott dee em tieteljen fa siene Famielje sorjen. Oba dee mott uk utjejlikjt bliewen. Hee saul nich soo väl schaufen, daut hee em jeisteljen nich mea rajcht fa siene Famielje sorjen kaun un dee nich mea wiesen kaun, daut hee om dee bekjemmat es.

17. Woo doonen Jehova un Jesus ons lieren un trajchtwiesen?

¹⁷ Lia dee. Jehova lieet ons un wiest ons trajcht, wiels hee ons halpen well (Heb. 12:7-9). Jesus lieet de Menschen, wua hee äwa aunjestalt es, krakjt soo leeftolich aus sien Voda (Joh. 15:14-15). Jesus jeft strenjen Rot, oba hee deit daut met Leew (Mat. 20:24-28). Hee weet, daut wie onvolkomen sent un foaken Fäla moaken (Mat. 26:41).

18. Waut helt een feinet Famieljenhaupt em Denkj?

¹⁸ Een Famieljenhaupt, waut Jehova un  Jesus nodeit, helt em Denkj, daut siene Famielje onvolkomen es. Hee es nich hoat ooda doll to siene Fru ooda to de Kjinja (Kol. 3:19). Enne Städ daut kjemt hee daut no, waut Galata 6:1 sajcht, un prooft dee “frintlich un leeftolich” to belieren. Hee denkjt doaraun, daut hee selfst uk onvolkomen es un daut eena aundre daut baste lieren kaun, wan eena dee een goodet Biespel jeft, soo aus Jesus daut deed (1. Pet. 2:21).

19-20. Woo kaun een Famieljenhaupt Jehova un Jesus nodoonen, wan dee waut entscheiden deit?

¹⁹ Denkj aun de Famielje, wan du waut entscheiden deist. Jehova deit soo entscheiden, daut et fa aundre goot es. Hee muak biejlikj de Menschen nich, wäajen daut fa am goot wia, oba daut wie ons to daut Läwen freien kunnen. Un kjeena kunn am bemotten sienen Sän fa onse Sinden to jäwen. Hee wia wellich reed, daut to doonen, wiels hee ons halpen wull. Jesus docht uk emma aun aundre, wan dee waut entscheiden deed (Reem. 15:3). Opp eene Sauz wia hee biejlikj sea meed, oba hee wort sikj eenich eene Häad Menschen to lieren enne Städ sikj to vereiwen (Mar. 6:31-34).

²⁰ Een feinet Famieljenhaupt weet, daut et sea schwoa es, goode Entscheidungen fa siene Famielje to moaken, un hee nemt daut sea iernst. Hee woat sikj nich eefach to soont eenich, waut goot fa am es ooda waut am dan jroz jankat. Enne Städ daut lat hee sikj von Jehova utlieren (Spr. 2:6-7). * Hee denkjt dolla aun de aundre aus aun sikj selfst (Filip. 2:4).

21. Waut woa wie en dän näakjsten Artikjel seenen?

²¹ Jehova haft daut Haupt von de Famielje eene schwieeje Oppgow jejäft un hee kjikjt doano, woo dee dise Oppgow nokjemt. Oba wan een Ehemaun sikj aunstrenjt Jehova un Jesus notodoonen, dan woat dee een feinet Haupt sennen. Un wan siene Fru daut deit, waut Jehova haben well, dan woaren dee eenen gooden Ehestaunt haben. Woo saul eene Fru äwa äa Haupt denkjen, un waut fa Schwierichkjeiten kjennen doa oppkomen? Daut woa wie en dän näakjsten Artikjel seenen.