EN DE Bibeltiet wort de Brutpries de Famielje von de Brut betolt. Daut kunnen wieetvolle Sachen, Tieren ooda Jelt sennen. Eenjemol wort daut uk aufjeoabeit, soo aus daut bie Jakob wia. Hee wia reed, säwen Joa fa Rahel äaren Voda to schaufen, daut hee sikj met ar befrieen kunn (1. Mo. 29:17-18, 20). Wuarom hauden dee dise Mood?

De Bibeljelieede Carol Meyers sajcht: “Veleicht wort de Famielje von de Brut dän Brutpries betolt, wäajen de Dochta dan nich mea en de Famielje metschaufen wudd. Daut wia besonda wichtich fa Famieljes, waut [oppem Launt schauften].” De Brutpries holp woomäajlich uk, daut de Eenichkjeit kunn stoakja woaren, waut nu tweschen de beid Famieljes wia wäajen de Befriede. Dee kunnen sikj dan unjarenaunda halpen, wan doa schwoare Tieden wieren. De Brutpries wia uk een Bewies doafäa, daut eene Fru de Ehe vesproaken wia un daut dee nu nich mea wudd unja de Oppsecht von dän Voda sennen, oba von äaren Maun.

Dän Brutpries betolen bedied nich, daut de Fru soo aus een Dinkj wia, waut eena kjeepen un vekjeepen kunn. Daut Buak Ancient Israel—Its Life and Institutions, sajcht: “Doaderch, daut se de Famielje von de Mejal musten eene Somm Jelt tolen ooda waut aundret jäwen ooda doonen, sach daut soo, aus wan daut met daut niee Poa Lied een Haundel wia. Oba daut späat sikj soo, daut de [Brutpries] nich soo sea de Pries fa de Fru wia, oba daut et mea eene Unjastettunk fa de Famielje wia, wäajen see von tus jinkj.”

En eenje Lenda woat vondoag dän Dach noch emma eenen Brutpries betolt. Wan christelje Elren eenen Brutpries velangen, dan woaren dee de aundre entjäajen komen un nich mea velangen, aus aunjebrocht es (Filip. 4:5; 1. Kor. 10:32-33). Opp dise Wajch wiesen dee, daut dee nich “nom Jelt hinjaraun” sent ooda bejierich sent (2. Tim. 3:2). Un wan de christelje Elren Vestentnis haben un nich too eenen huagen Brutpries velangen, dan kjemt daut nich doaropp aun, daut de Jung de Kjast oppschuwen mott, wäajen hee noch nich daut Jelt haft. Ooda de Jung woat sikj dan nich jedwungen feelen, met dän Pioniadeenst opptohieren un fa voll to schaufen, om daut Jelt fa dän sea huagen Brutpries to vedeenen.

Opp eenje Städen enne Welt es daut mau rajcht jesazlich, eenen Brutpries to betolen. Doa, wua daut soo es, woaren christelje Elren sikj aun daut Jesaz hoolen. Wuarom? Gott sien Wuat velangt von Christen, daut dee “de Rejierunk unjadon sennen” sellen un de Jesazen jehorchen, soo lang daut nich jäajen Gott siene Jesazen es (Reem. 13:1; Apj. 5:29).