YOMARA un äare Breeda, Marcelo un Hiver, wonen en eene kjliene Staut en Guatemala. Yomara funk aun, de Bibel to studieren met Jehova siene Zeijen, un irjentwanea wieren äare Breeda doa uk met bie. Oba daut jeef eenen Trubbel: Aule dree sent blint un kunnen nich de Blinjeschreft läsen. Doawäajen deed äa Bibelliera de Varzhen fa daut Buak uk de Bibelvarzhen fa an läsen.

Daut wia uk schwoa fa dee, bie de Toopkomes to sennen. Dee kunnen nich selfst no daut notste Vesaumlungshus komen, waut 40 Minuten auf wia. Oba de Breeda vonne Vesaumlunk holpen dee, no aule Toopkomes to komen. Aus dee aunfungen, selfst Oppgowen en de Vesaumlunk to haben, holpen de Breeda, daut dee sikj daut kunnen utwendich lieren.

En Mei aune 2019 fungen dee aun, en dee kjliene Staut Vesaumlungen auftohoolen. Dan wieren aul eene Pionia-Lied no de Staut jetrocken. Dee wullen dise dree daut lieren, de Blinjeschreft to läsen un to schriewen, wan see daut selfst uk nich vestunden. See jinjen dan no een Stua, wua see soone Bieekja kjrieejen toom aundre daut lieren, de Blinjeschreft to läsen.

Een poa Moonat lota kunnen dee aul fein de Blinjeschreft läsen un doaderch kjeemen dee em jeisteljen goot wieda. Nu sent Yomara, Marcelo un Hiver Pionieren, un Marcelo es uk een Deenstaumthelpa. Dee sent de Wäakj äwa drock em Deenst fa Jehova. Daut see soo flietich sent, schlapt mau rajcht äwa.

Aule dree sent sea dankboa, daut de Vesaumlunk an soo jeholpen haft. Yomara sajcht: “Von daut ieeschte Mol, aus wie met Jehova siene Zeijen räden, hab wie dee äare true christelje Leew jeseenen.” Un Marcelo sajcht: “Wie haben sea goode Frind en onse Vesaumlunk, un wie sent Poat von de groote Famielje, waut äwa de gaunze Welt veeent es.” Yomara un äare Breeda freien sikj aul to dee Tiet, wan see daut seenen woaren, daut de gaunze Ieed to een Paradies jemoakt woat (Psa. 37:10-11; Jes. 35:5).