6. ARTIKJEL FA DAUT STUDIUM
LEET 18 Dankboa fa daut Leesjelt
Jehowa vejeft onse Sinden – Wuarom räakjen wie daut väl?
“Gott leewd de Menschen oppe Welt soo sea, daut hee sienen eensich jemoakten Sän jeef” (JOH. 3:16)
OM WAUT DAUT JEIT
Wie woaren seenen, waut Jehowa jedonen haft, daut onse Sinden kjennen vejäft woaren. Doaderch woa wie daut noch mea räakjnen, waut hee fa ons deed.
1-2. En waut fa Stekjen es onse Loag soo aus dän Jung siene en Varsch 1?
STAL die eenen Jung väa, waut en eene rikje Famielje oppjewossen es. Eenen Dach passieet doa waut Schlemmet: Dän siene Elren kjielen en een Ekjsident doot. Hee es sea truarich; oba dauts noch nich aules. Hee woat en, daut siene Elren äa Jelt vekwost un eene groote Schult hinjaloten haben. Soo, enne Städ daut hee von siene Elren Jelt oaft, mott hee dee äare Schult betolen; un de Menschen wellen, daut hee äant daut fuaz betolt. Oba hee kaun dise Schult opp kjeene Wajch betolen.
2 Wie sent en biejlikj soone Loag aus dis Jung. Onse ieeschte Elren, Adam un Eva, wieren volkomen un läwden en een schmocket Paradies (1. Mo. 1:27; 2:7-9). Dee wudden haben kunt fa emma een scheenet Läwen haben. Oba doa passieed waut Schlemmet: Dee sindijden jäajen Jehowa, un doawäajen schekjt hee äant utem Goaden Eden rut un dee vespälden daut, fa emma to läwen. Waut haben dee äare Kjinja hinjaloten? De Bibel sajcht: “De Sind kjeem derch eenen Maun [Adam] enne Welt nenn un derch de Sind uk de Doot, soo haft de Doot sikj äwa aule Menschen jespreet, wäajen dee aula jesindicht haben” (Reem. 5:12). Adam haft ons de Sind hinjaloten, un derch dee kjemt de Doot. De Sind, waut wie metjeorwen haben, es soo aus eene groote Schult, waut kjeena betolen kaun (Psa. 49:9).
3. Met waut gonen onse Sinden to vejlikjen?
3 De Bibel sajcht, daut de Sinden soo sent aus eene Schult (Mat. 18:32-35). Wan wie sindjen, dan es daut soo, aus wan wie ons bie Jehowa eene Schult moaken. Ut ons selfst kjenn wie dise Schult nich betolen, buta met onsen Doot (Reem. 6:7, 23).
4. (a) Woo wudd daut met ons Sinda utkomen, wan Jehowa ons nich holp? (Psalm 49:8-10). (b) Waut bediet daut Wuat “Sind” enne Bibel? (See uk daut Hock “ Sind”.)
4 Kjenn wie aules trigjkjrieen, waut Adam un Eva veloaren haben? Nich ut ons selfst (läs Psalm 49:8-10). Onen Jehowa siene Help wudd wie nich de Hopninj haben, fa emma to läwen ooda vom Doot opptostonen. Met ons wudd daut krakjt soo sennen, aus wan een Tia dootjeit (Liera 3:19; 2. Pet. 2:12).
5. Woo haft ons leeftolja Voda ons jeholpen, onse Sinden to betolen? (See daut Bilt .)
5 Denkj wie noch eemol aun dän Jung, wua wie aum Aunfank von räden. Woo wudd dän daut gonen, wan een rikja Maun dän aunboot, aul siene Schult to betolen? Secha wudd dis Jung sea dankboa sennen un wellich de Help aunnämen. Krakjt soo haft ons himlischa Voda ons uk een Jeschenkj jejäft, waut de Sind betolt, dee wie von Adam metjeorwen haben. Waut es daut fa een Jeschenkj? Jesus säd: “Gott leewd de Menschen oppe Welt soo sea, daut hee sienen eensich jemoakten Sän jeef, soo daut jieda eena, dee doa wiest, daut hee Gloowen aun dän haft, nich venicht woat, oba daut eewje Läwen haben kaun” (Joh. 3:16). Dit Jeschenkj kjemt ons noch opp eene aundre Wajch togood: Wie kjennen goode Frind sennen met Jehowa.
Jesus muak de goode Norecht bekaunt, daut Jehowa onse Sinden vejäwen well derch daut Leesjelt (Joh. 3: 16). Dan jeef hee sien Läwen wellich han, om daut Leesjelt to betolen (See Varsch 5)
6. Von waut woa wie en disen Artikjel räden, un wuarom?
6 Waut mott wie doonen, daut ons dit wundascheene Jeschenkj kaun togood komen un daut onse Sinden, ooda Schulden, kjennen utjestrikjt woaren? Doatoo woa wie ons eenje Wieed ut de Bibel unjastonen un seenen, waut dee krakjt bedieden. Wan wie doaräwa räden, waut Jehowa aules jedonen haft, om ons to vejäwen, woa wie dän noch väl dankboara woaren.
JEHOWA WELL, DAUT WIE MET AM GOODE FRIND SENT
7. (a) Waut veluaren Adam un Eva noch? (b) Waut fält ons needich, wiels wie Adam un Eva äare Kjinja sent? (Reema 5:10-11).
7 Aus Adam un Eva sindijden, veluaren dee nich bloos daut eewje Läwen, oba uk daut Frind-Sennen met Jehowa. Ea dee jesindicht hauden, wieren dee Poat von Gott siene Famielje (Luk. 3:38). Oba wiels see ojjehuarsom wieren, leet Jehowa daut nich mea too, daut see kunnen Poat von siene Famielje sennen. Dit passieed noch ea dee Kjinja hauden (1. Mo. 3:23-24; 4:1). Soo, kjeena von dee äare Kjinja es Poat von Jehowa siene Famielje – en Werkjlichkjeit sent wie Jehowa siene Fiend. Doawäajen mott wie wada toopjebrocht woaren met am (läs Reema 5:10-11). Daut bediet, wie motten ons aunstrenjen, met am Frind to woaren. Dauts sea toom bewundren, daut Jehowa daut ieeschte waut deed, daut dit mäajlich wia. Waut deed hee krakjt?
GOTT RECHT DAUT SOO EN, DAUT WIE KJENNEN SIENE FRIND SENNEN
8. Wuafäa haft Jehowa jesorcht?
8 Jehowa haft fa eenen Wajch jesorcht, wuaderch sindje Menschen de Mäajlichkjeit haben, met am goode Frind to woaren. Waut deed hee, daut wie daut trigjkjrieen kunnen, waut Adam vespält haud? Hee jeef waut, waut krakjt soo väl wieet wia, aus daut, waut Adam vespäld. Reema 3:25 sajcht: “Gott schekjt … een Opfa toom de Menschen wada met sikj toopbrinjen”. Doaderch kaun jieda eena Frind sennen met am.
9. Waut deed Jehowa, daut de Israeliten äare Sinden vejäft worden?
9 Fa de Israeliten haud Jehowa waut enjerecht, wuaderch dee kunnen goode Frind woaren met am un Sinden-Vejäwunk kjrieen. De Israeliten musten een Mol daut Joa een besondret Fast fieren, waut Äwareenmoakungs-Dach heet. Aun dän Dach brocht de Huaga Priesta Tierenopfa fa daut Volkj. Oba kunnen dise Tierenopfa de Israeliten äare Sinden gaunz wajchnämen? Secha nich, wiels Menschen sent je väl mea wieet aus Tieren. Oba Jehowa wia reed, de Israeliten äare Sinden to vejäwen, wan dee een Leetsennen hauden un de Opfa brochten, waut hee von äant velangd (Heb. 10:1-4). De Opfa, waut de Israeliten aum Äwareenmoakungs-Dach un aundre Doag brochten, holpen dee to vestonen, daut see Sinda wieren un daut see noch waut aundret brukten, waut äare Sinden gaunz wajchnämen kunn.
10. Waut deed Jehowa, daut de Menschen äare Sinden kunnen vejäft woaren?
10 Jehowa recht waut aundret en, waut fa emma bliewen wudd, wuaderch de Menschen äare Sinden kunnen vejäft woaren. Hee schekjt sienen leewen Sän, waut “bloos een Mol jeopfat [wort], om de Sinden von väle to droagen” (Heb. 9:28). Jesus “jeef sien Läwen aus Leesjelt han, om väle trigjtokjeepen” (Mat. 20:28). Oba wuarom kunn Jesus daut Leesjelt betolen?
DE PRIES, DAUT WIE KJENNEN GOTT SIENE FRIND SENNEN
11. (a) Wuarom must doa een Leesjelt betolt no de Schreft no? (b) Wäa wia de Eensja, waut daut Leesjelt betolen kunn?
11 No de Schreft no entscheid Jehowa, daut doa een Leesjelt a betolt must, soo daut onse Sinden kunnen vejäft woaren un daut wie kunnen met am Frind sennen. Waut wia dit Leesjelt, waut doa betolt must, daut de Menschen daut trigjkjrieejen, waut Adam veloaren haud? Soo aus wie aul sagen, veluaren Adam un Eva äa volkomnet Läwen un uk de Mäajlichkjeit, fa emma to läwen. Daut Leesjelt must aulsoo waut sennen, waut krakjt soo wieetvoll wia aus daut, waut dee veluaren (1. Tim. 2:6). Daut Leesjelt kunn bloos een utjewosna Maun betolen, (1) waut volkomen wia, (2) waut de Mäajlichkjeit haud, fa emma oppe Ieed to läwen, un (3) waut doa reed wia, dit Läwen fa de Menschheit opptojäwen. Disen Maun sien Läwen wudd daut dan betolen, waut Adam veloaren haud.
12. Wuarom kunn Jesus daut Leesjelt betolen?
12 See wie mol dree Jrind, wuarom Jesus daut Leesjelt betolen kunn: (1) Hee wia volkomen – “Jesus haud kjeene Sind jedonen” (1. Pet. 2:22). (2) Wäajen hee kjeene Sind jedonen haud, haud hee de Mäajlichkjeit, fa emma oppe Ieed to läwen. Un (3) hee wia reed to stoawen un sien Läwen fa ons hantojäwen (Heb. 10:9-10). Jesus wia een volkomna Maun, krakjt soo aus Adam wia, ea dee sindijd (1. Kor. 15:45). Soo, derch sienen Doot betold Jesus Adam siene Sind un soo kunn hee daut trigjkjrieen, waut Adam veloaren haud (Reem. 5:19). Soo wort Jesus “de latsta A̱dam”. Doa brukt kjeen aundra volkomna Mensch fa daut betolen, waut Adam veloaren haud, wiels Jesus storf “bloos een Mol, . . . un daut rieekjt fa emma too” (Heb. 7:27; 10:12).
13. Wuaderch es daut mäajlich, daut wie kjennen goode Frind met Jehowa sennen?
13 Bat nu hab wie jeseenen, daut Jehowa fa eenen Wajch sorjd, daut onse Sinden kunnen vejäft woaren un daut wie kunnen goode Frind woaren met am. Oba daut dit mäajlich wia, must daut Leesjelt ieescht betolt woaren. Daut Leesjelt wort doamet betolt, daut Jesus sien Bloot fa ons utgoot (Efs. 1:7; Heb. 9:14). Waut fa Goodet kjeem doabie rut?
JEHOWA MOAKT ONS VON SIND UN DOOT FRIE UN TALT ONS FA JERAJCHT
14. Waut woa wie nu seenen?
14 Woo kjemt ons daut togood, waut Jehowa fa ons jedonen haft? Well wie ons twee Sachen unjastonen, waut wiesen, woo ons daut perseenlich togood kjemt, daut Jehowa onse Sinden vejeft.
15-16. (a) Waut es mäajlich wäajen daut Leesjelt? (b) Waut deit daut aun die to weeten, daut du friejemoakt best?
15 De Bibel sajcht, daut wie friejemoakt sent derch daut Leesjelt. De Apostel Petrus säd doaräwa: “Gott haft dän Pries jetolt junt von de doodje Wäaj rauf to raden [ooda frietomoaken], dee jie von june Väaelren metjeorwen hauden. Un jie weeten daut wia nich met Selwa ooda Golt passieet. Oba hee betold daut fa junt met Christus sien Bloot un Läwen, daut Gotteslaum, aun daut kjeene Sind ooda ojjeschekjtet wia” (1. Pet. 1:18-19).
16 Derch daut Leesjelt kjenn wie von de Sind un dän Doot friekomen, waut aul väl Lieden veuasoakt haben (Reem. 5:21). Wie sent Jehowa un Jesus sea dankboa, daut wie derch Jesus sien wieetvollet Bloot sent friejemoakt worden (1. Kor. 15:22).
17-18. (a) Waut bediet daut, daut Jehowa ons fa jerajcht talt? (b) Woo kjemt ons daut togood, daut Jehowa ons fa jerajcht talt?
17 De Bibel sajcht, daut Jehowa siene Deena fa jerajcht talt. Daut bediet, daut hee nich velangt, daut see dän Pries fa äare Sinden betolen motten. Meent daut dan nu, daut Jehowa sikj nich aun siene Jerajchtichkjeit helt, wäajen hee dit deit? Nä. Hee talt je ons nich fa jerajcht, wäajen wie daut vedeent haben, un hee talt daut uk nich fa goot, wan wie sindjen. Oba Jehowa vejeft onse Sinden, wan wie aun daut Gloowen haben, waut hee un Jesus deeden toom daut Leesjelt betolen (Reem. 3:24; Gal. 2:16).
18 Woo kjemt ons daut togood, daut Jehowa ons fa jerajcht talt? Eenje sent aul utjewält, met Jesus toop em Himmel to rejieren, un sent aul Gott siene Kjinja (Tit. 3:7; 1. Joh. 3:1). Dee äare Sinden sent aul vejäft. Dauts soo, aus wan see dise Sinden nich mol jedonen hauden. Doawäajen kjennen dee en daut Kjennichrikj nennkomen (Reem. 8:1-2, 30). Aundre, waut Gott uk fa jerajcht talt, woaren fa emma oppe Ieed läwen. Jehowa haft dee äare Sinden uk vejäft un sent siene Frind (Jak. 2:21-23). De groote Häad, waut Harmagedon äwaläwen woaren, woaren verheipts nienich stoawen motten (Joh. 11:26). “De Jerajchte uk … de Ojjerajchte”, waut jestorwen sent, woaren wada oppstonen (Apj. 24:15; Joh. 5:28-29). Met de Tiet woaren aule jehuarsome Deena von Jehowa, waut oppe Ieed sent, “de harliche Frieheit haben, Gott siene Kjinja to sennen” (Reem. 8:21). Frei wie ons nich aul sea to dee Tiet, wan wie soon wundascheenet Veheltnis met onsen himlischen Voda haben woaren?
19. Wuarom hab wie nu Hopninj? (See uk daut Hock “ Jehowa vejeft onse Sinden”.)
19 Aum Aunfank räd wie von eenen Jung, waut aules velua un eene groote Schult haud, waut hee kjeenmol wudd betolen kjennen. Onse Loag wia mol soo hopninjsloos aus dän siene. Oba nu hab wie Hopninj, wiels Jehowa fa eenen Wajch sorjd, onse Sinden to vejäwen, un wäajen Jesus daut Leesjelt betold. Derch onsen Gloowen aun Jesus Christus kjenn wie friejemoakt woaren von Sind un Doot. Wan Jehowa onse Sinden vejeft, dan es daut soo, aus wudd wie kjeenmol jesindicht haben. Oba daut Wichtichste es, daut wie nu kjennen goode Frind sennen met onsen leeftoljen, himlischen Voda, Jehowa.
20. Waut woa wie en dän näakjsten Artikjel seenen?
20 Sent wie nich sea dankboa, wan wie äwa aul daut nodenkjen, waut Jehowa un Jesus fa ons jedonen haben? (2. Kor. 5:15). Wan dee ons nich jeholpen hauden, wudd wie gaunz hopninjsloos sennen! En dän näakjsten Artikjel woa wie von eenje Jlikjnisen enne Bibel räden, waut ons halpen to vestonen, daut wie ons nich brucken lenja schlajcht feelen, wan Jehowa ons ieescht vejäft haft.
LEET 10 Loft Jehowa, onsen Gott!
a Opp eenje Sproaken woat daut Wuat “Leesjelt” soo äwasat: “de Pries fa daut Läwen” ooda “de Tolinj”.
