1-2. Fa waut motten Gott siene Deena oppaussen? (See de Bilda aum Aunfank.)

VÄL Doktasch un Nursen schaufen mank Menschen, waut Krankheiten haben, waut äwaschlapen. Dee kjemren sikj om dee, wäajen dee dee halpen wellen, oba dee motten uk oppaussen, daut see sikj nich dee äare Krankheit oppschlapen. Soo es daut uk bie väle von ons. Wie läwen un schaufen mank Menschen, waut soone Jesennunk un Ieejenschoften haben, waut Gott nich jefaulen. Daut kaun schwoa sennen fa ons.

² Nu en de latste Tiet hoolen väl Menschen sikj nich aun daut, waut Gott fa goot un schlajcht talt. En sienen tweeden Breef aun Timotäus säd de Apostel Paulus, woo soone Menschen sennen wudden un daut et met dee emma wudd oaja woaren (läs 2. Timotäus 3:1-5, 13). Wan wie ons uk tieren, woo schlajcht de Menschen sent, kunn daut oba doawäajen opp ons äwaschlonen, woo dee denkjen, räden un haundlen (Spr. 13:20). En disen Artikjel woa wie seenen, woo de Menschen en de latste Tiet sent un woo aundasch Gott siene Deena sent. Wie woaren uk seenen, waut wie doonen kjennen, daut wie ons nich schlajchte Ieejenschoften oppschlapen, wan wie wäm em jeisteljen halpen.

3. Von woone Menschen rät daut en 2. Timotäus 3:2-5?

 ³ De Apostel Paulus schreef: “En de latste Doag [woaren] jreslich schwoare Tieden sennen.” Dan rieejd hee 19 schlajchte Ieejenschoften opp, waut bie de Menschen en de latste Tiet wudden to seenen sennen. Dise Ieejenschoften sent biejlikj soo aus dee en Reema 1:29-31, oba de List von dän Breef aun Timotäus haft Wieed bennen, waut sest noanich en de Christelje Griechische Schreften sent. Paulus räd en siene List doavon, woo de Menschen em Derchschnett sennen wudden. Oba nich aule wudden dise Ieejenschoften haben. Christen wudden gaunz aundasch sennen (läs Maleachi 3:18).

4. Woo sent soone Menschen, waut stolt sent met daut, waut see sikj enbillen?

⁴ Nodäm daut Paulus doavon räd, daut väle wudden väl von sikj selfst hoolen un nom Jelt hinjaraun sennen, schreef hee uk, daut de Menschen sikj selfst huachhoolen wudden, jäajenaun sennen [“puchrich”, Reimerbibel] un stolt sennen met daut, waut see sikj enbillen. Soone Menschen denkjen foaken, see sent bäta aus aundre wäajen daut, waut see kjennen, woo dee lat, waut see aules haben ooda wäa see sent. Dee wellen bloos, daut aundre an bewundren un ieren. Een Jelieeda schreef äwa soonen Mensch, waut sea stolt es: “Dee haft en sien Hoat eenen kjlienen Aultoa, wua hee sikj ver sikj selfst bekjt.” Eenje haben jesajcht, daut stolt sennen soo wadalich es, daut mau rajcht de Stolte daut nich jleichen, wan aundre soo sent.

5. Woo sent mau rajcht eenje von Gott siene true Deena stolt jeworden?

⁵ Jehova kaun daut sea schlajcht lieden, wan wäa stolt es. Am sent “stolte Uagen” jäajenaun (Spr. 6:16-17). Stolt sennen moakt eenem daut schwoa, Gott noda to komen (Psa. 10:4). De beesa Fient es stolt (1. Tim. 3:6). Daut es truarich, daut mau rajcht eenje von Jehova siene true Deena stolt jeworden sent. Usija, een Kjennich von Juda, wia joarenlank tru. “Aus hee oba sea majchtich jeworden wia, deed sien Hoat sikj to sien vedoawen äwahäwen. Hee vejinkj sikj jäajen däm HARN, sienen Gott, un jinkj en dän Tempel, om selfst opp dän Ruakopfa Aultoa Weiruak to brennen.” Eene Tiet lota wort uk de Kjennich Hiskia huachmootich, oba mau fa een Stootje (2. Chr. 26:16; 32:25-26).

6. Wuaderch haud David kunt stolt woaren, oba wuarom deed hee nich?

⁶ Eenje Menschen woaren stolt, wäajen dee schmock lat, bekaunt sent, fein sinjen ooda spälen kjennen, väl Krauft haben ooda een huaget Aumt haben. David haud aul daut, oba hee bleef sien Läwen lank deemootich. Nodäm daut hee Goliat dootjemoakt haud un sikj met Saul siene Dochta befrieen sull, säd hee: “Wäa sie ekj, un wäa sent mien Frintschoft? Wäa sent mien Voda siene Famielje, daut ekj sull däm Kjennich sien Schwieesän woaren?” (1. Sam. 18:18). Waut holp David, deemootich to bliewen? David wist, daut aulet goode, waut hee haud, von Jehova kjeem (see uk 1. Korinta 4:7). Gott wia soo to sajen raufjestäajen, ooda haud sikj jedeemooticht, wiels hee om David todoonen wia. Doawäajen kunn David soo väl volbrinjen un haud goode Ieejenschoften un besondre Amta (Psa. 113:5-8).

7. Waut kaun ons halpen, deemootich to sennen?

⁷ Soo aus David schaufen Gott siene Deena vondoag dän Dach uk doaropp, deemootich to sennen. Daut jeit ons sea to Hoaten, daut Jehova, de Aulahechsta, deemootich es (Psa. 18:35, NW). Wie nämen Gott sienen Rot iernst, waut doa sajcht: “Kjleet junt met deepet Erboarme, Frintlichkjeit, Deemuet,  Saunftmoot, Jedult” (Kol. 3:12, Reimerbibel). Wie weeten uk: De Leew “pucht sikj nich, es nich stollt” (1. Kor. 13:4, Reimerbibel). Wan aundre seenen, daut wie deemootich sent, dan kaun dee daut no Jehova trakjen. Soo aus een Ehemaun onen väl to sajen kaun jewonnen woaren derch dän Waundel von siene Fru, soo kjennen uk aundre sikj fa Jehova intressieren, wan dee seenen, woo deemootich siene Deena sent (1. Pet. 3:1).

8. (a) Woo denkjen vondoag dän Dach eenje doaräwa, ojjehuarsom to sennen? (b) Waut velangt de Schreft von de Kjinja?

⁸ Paulus schreef, woo de Menschen en de latste Tiet wudden to aundre sennen. Hee schreef, daut de Kjinja de Elren nich jehorchen wudden. En väl Bieekja, Films un Programs em Tellewizhen woat daut fa rajcht jetalt, wan de Kjinja nich jehorchen ooda dee woat mau rajcht toojerot doatoo. Oba daut es sea toom Schoden, wiels daut brinjt de Famieljes uteneen un wan de Famieljes nich veeent sent, dan es de Menschheit uk nich veeent. Dit es aul lang bekaunt. Biejlikj veluaren ieeschtemma en Griechenlaunt soone Menschen, waut äare Elren vekjielden, aul äare Rajchten. Un en Room worden dee, waut äaren Voda schluagen, fa krakjt soo schlemm jetalt aus een Merda. En de Hebräische Schreften un en de Christelje Griechische Schreften sajcht daut, daut de Kjinja äare Elren ieren motten (2. Mo. 20:12; Efs. 6:1-3).

9. Waut woat Kjinja halpen, äare Elren to jehorchen?

⁹ Wan Kjinja doaräwa nodenkjen, waut de Elren aules fa an jedonen haben, un dankboa doafäa sent, dan woaren dee jehorchen wellen, wan aundre daut uk nich doonen. Dee motten uk vestonen, daut Gott, de Voda äwa ons aula, daut von an velangt. Wan junge Menschen goot von äare Elren räden, dan woaren dee aundre Kjinja halpen, äare ieejne Elren uk to achten. Oba wan de Elren äare Kjinja nich goot sent, dan kaun dee daut schwoa faulen, dee wellich to jehorchen. Wan de Kjinja oba moakjen, daut de Elren an werkjlich leewen, dan woat dee daut halpen, jehuarsom to sennen, wan daut uk schwoa es. Austin sajcht: “Foaken wull ekj daut doonen, waut mie jankad. Oba miene Elren hauden Räajlen oppjestalt, waut nich too strenj wieren, un see säden mie uk dän Grunt doafäa. See wieren emma op toom met mie räden. Daut aules holp mie, dee to jehorchen. Ekj sach, daut dee mie väl räakjenden, un doawäajen wull ekj an jefaulen.”

10-11. (a) Woone schlajchte Ieejenschoften wiesen, daut de Menschen nich Leew unjarenaunda haben? (b) Woo wiet rieekjt de woare Christen äare Leew?

¹⁰ Paulus räd uk noch von aundre schlajchte Ieejenschoften, waut wiesen, daut de Menschen sikj nich unjarenaunda leewen. Nodäm daut hee säd, dee wudden “de Elren nich jehorchen”, säd hee, dee wudden ondankboa sennen. Daut paust toop, wiels Menschen, waut ondankboa sent, räakjnen daut nich väl, waut aundre fa an doonen. De Menschen wudden uk onheilich, ooda ontru, sennen. Dee wudden sikj nich veseenen loten toom met aundre Fräd moaken. Dee wudden sikj unjarenaunda spotten un veachten un sikj veroden, aulsoo soo räden, daut aundre Menschen ooda mau rajcht Gott daut wee deed un beleidicht. Un dee wudden uk lastren; daut bediet, soont vetalen, waut aundre schoden deed toom dee eenen schlajchten Nomen moaken. *

¹¹ Jehova siene Deena sent gaunz  aundasch aus de mieeschte Menschen en de Welt, wiels dee haben woare Leew fa aundre. Daut wia aul emma soo. Jesus säd, daut de Leew fa dän Näakjsten, eene Oat agápē-Leew, daut tweede von daut jratste Jeboot en daut Jesaz Moses wia; bloos Gott leewen wia noch jrata (Mat. 22:38-39). Jesus säd uk, de woare Christen wudden doaraun to kjanen sennen, daut dee Leew unjarenaunda hauden (läs Johanes 13:34-35). Dee wudden mau rajcht äare Fiend leewen (Mat. 5:43-44).

12. Woo wees Jesus aundre siene Leew?

¹² Jesus wees aundre groote Leew. Hee jinkj von Staut to Staut un vetald de Menschen de goode Norecht von Gott sien Kjennichrikj. Hee heeld de Blinje, de Lome, de Leprakranke un de Doowe. Hee wuak uk de Doodes opp (Luk. 7:22). Jesus jeef mau rajcht sien Läwen han fa de Menschen, wan väle am uk schlajcht lieden kunnen. Hee haud deeselwje Leew fa aundre, aus sien Voda haud. Oppe gaunze Welt wiesen Jehova siene Zeijen aundre uk de woare Leew.

13. Woo kaun onse Leew aundre no Jehova trakjen?

¹³ Wan wie aundre Leew wiesen, dan woat dee daut no onsen himlischen Voda trakjen. Aus biejlikj een Maun en Tailaunt opp eenen dreedoagschen Kongress wia un de Leew manke Breeda sach, jinkj am daut sea to Hoaten. Aus hee ieescht wada tus wia, fruach hee, aus hee twee Mol de Wäakj studieren kunn. Hee deed aul sien Frintschoft prädjen, un mau sas Moonat no dän Kongress haud hee siene ieeschte Bibelläsunk enne Vesaumlunk. Woo steit et met onse Leew fa aundre? Wie wudden kjennen äwalajen: “Strenj ekj mie aun, miene Famielje, aundre en de Vesaumlunk ooda de Menschen em Deenst to halpen? Vesieekj ekj, soo äwa aundre to denkjen, aus Jehova deit?”

14-15. (a) Waut vonne schlajchte Ieejenschoften haben väle? (b) Woo haben eenje sikj jeendat?

¹⁴ De Menschen en de latste Tiet haben uk noch aundre schlajchte Ieejenschoften, von dee wie wajchbliewen sellen. Soone, waut  Gott nich deenen, wudden biejlikj daut goode nich lieden kjennen ooda “daut goode haussen” ooda “jäajen aulet goode sennen”, soo aus aundre Äwasata daut sajen. Dee wudden sikj nich beharschen un onbandich sennen. Eenje wudden uk ruchloos sennen un eefach daut doonen, waut an enkjeem, onen aun de aundre to denkjen.

¹⁵ Väle, waut ea soo wieren aus jefäadelje Tieren, haben sikj jeendat. Dise Veendrunk wia en eene scheene Profezeiunk aul verutjesajcht (läs Jesaja 11:6-7). Doa rät daut von wille Tieren, soo aus Wilw un Leiws, waut met tome Tieren en Fräd läwen, biejlikj met Lama un Kjalwa. Woo es daut mäajlich? De Bibel sajcht, doa “woat en daut gaunze Launt Vestentnis fa däm HARN sennen” (Jes. 11:9). Wiels Tieren nich von Jehova lieren kjennen, erfelt dise Profezeiunk sikj em jeisteljen aun Menschen, waut sikj endren.

16. Woo haft de Bibel Menschen jeholpen, äa Läwen to endren?

¹⁶ Väle, waut ea soo jefäadlich wieren aus Wilw, läwen nu met aundre en Fräd. Eenje von soone Erfoarungen kaust du en de Artikjels läsen “Die Bibel hat ihr Leben verändert”, waut opp jw.org to finjen sent. Dee, waut Jehova haben kjanen jelieet un am deenen, sent nich soo aus dee, waut noch väajäwen, gottesferchtich to sennen, oba nich aun siene Krauft jleewen. Soone Menschen sajen, see deenen Gott, oba äare Woakjen wiesen waut aundret. Oba väle, waut jefäadlich wieren, sent “niee Menschen . . . [jeworden], dee no Gott sienem Bilt en Jerajchtichkjeit un Heilichkjeit jeschaufen sent” (Efs. 4:23-24). De Menschen, waut Gott kjanen lieren, woaren en, daut see soo läwen motten, aus Gott daut jefelt, un endren dan äaren Gloowen, äare Jesennunk un äa Vehoolen. Daut es nich leicht, oba daut es mäajlich, wiels Gott sien Jeist deejanje halpt, waut am werkjlich jefaulen wellen.

17. Woo kjenn wie doafäa oppaussen, daut wie nich soo woaren aus dee, waut schlajchte Ieejenschoften haben?

¹⁷ De Unjascheet tweschen dee, waut Gott deenen, un dee, waut am nich deenen, es emma kloara to seenen. Wie motten oppaussen, daut wie ons nich de schlajchte Ieejenschoften oppschlapen von dee, waut Gott nich deenen. Wie wellen Jehova sienen weisen Rot nokomen un von dee Menschen wajchbliewen, wua 2. Timotäus 3:2-5 von rät. Wie kjennen soone nich gaunz utem Stich gonen. Veleicht mott wie met dee toop schaufen, no School gonen ooda met dee toop wonen. Oba wie kjennen doafäa oppaussen, daut wie nich soo denkjen ooda haundlen aus dee. Daut wie daut kjennen, mott wie onsen Gloowen doaderch stoakjen, daut wie de Bibel studieren un väl met soone toop sent, waut sikj gaunz eenich sent, Jehova to deenen.

18. Woo kaun ons räden un Benämen aundre em jeisteljen halpen?

¹⁸ Wie sellen uk doaropp schaufen, aundre em jeisteljen to halpen. Sieekjt no Jeläajenheiten, aundre Zeichnis to jäwen un bät Jehova om Help, daut jie kjennen to de rajchte Tiet daut rajchte sajen. Wie sellen aundre weeten loten, daut wie Jehova siene Zeijen sent, wiels dan woa wie Gott met ons goodet Benämen ieren un nich ons selfst. Jehova haft ons jelieet, “de gottloose un weltliche Liedenschoften auftosajen, ons to beharschen un opprechtich un gottesferchtich en dise Welt to läwen” (Tit. 2:11-14). Wan wie ons soo oppstalen, aus Gott daut haben well, dan woaren aundre daut seenen un eenje woaren veleicht sajen: “Wie wellen met junt gonen. Wie haben jehieet, daut Gott met junt es!” (Sach. 8:23).