1. Waut vonne Schwierichkjeiten moaken väl von Jehova siene true Deena derch?

OPPE gaunze Welt moaken väl von Jehova siene Deena sikj Sorjen ooda sent truarich, wiels dee groote Schwierichkjeiten derchmoaken. Es daut en june Vesaumlunk uk soo? Eenje haben eene schlemme Krankheit ooda doa es wäa jestorwen, wäm see väl jeräakjent haben. Aundre sent sea truarich, wäajen doa wäa von äare Famielje ooda een gooda Frint de Woarheit veloten haft. Un noch aundre motten biejlikj wäajen een Ieedbäben ooda Owwada lieden. Aul dee fält daut aun Troost. Woo kjenn wie soone Breeda un Sestren halpen?

2. Wuarom fäld dän Apostel Paulus daut eenjemol aun Troost?

² Dän Apostel Paulus sien Läwen wia foaken en Jefoa (2. Kor. 11:23-28). Hee must uk met “een[en] Stachel en daut Fleesch” foadich woaren; woomäajlich wia daut eene Krankheit (2. Kor. 12:7). Un hee feeld sikj uk aunjeschmäat, aus sien Metoabeida Demas am veleet, wiels dee “dise Welt soo goot jeworden [wia]” (2. Tim. 4:10). Paulus wia een jesaulwda Christ, waut sea äwanäment wia un aundre wellich holp, un doch wia hee eenjemol mootloos (Reem. 9:1-2).

3. Wäa deed Paulus treesten un halpen?

³ Woo kjrieech Paulus dän Troost un de Help, waut am fäld? Secha stoakjt Jehova am derch sienen heiljen Jeist (2. Kor. 4:7; Filip. 4:13, NW). Un Jehova treest am uk derch de Gloowesbreeda. Paulus säd, daut eenje von siene Metoabeida fa am “een Troost jewast” wieren (Kol. 4:11). Mank dee, wua hee von räd, wieren Aristarch, Tiechikus un Markus. Dee stoakjten Paulus un holpen am, daut hee  uthoolen kunn. Wuarom kunnen dee am soo fein treesten? Woo kjenn wie ons unjarenaunda krakjt soo treesten un Moot toospräakjen?

4. Woo wia daut to seenen, daut Aristarch Paulus sien trua Frint wia?

⁴ Aristarch bewees, daut hee Paulus sien trua Frint wia. Hee wia een Christ von Tessalonich en Mazedonien, un de Schreft rät daut ieeschte Mol von am, aus Paulus opp siene dredde Missionsreis no Efesus kjeem. Aristarch wia doa met Paulus toop un wort von eene Grupp dolle Menschen faustjenomen (Apj. 19:29). Aus hee ieescht friekjeem, proowd hee sikj nich fuattobrinjen, oba bleef doa bie Paulus. Eenje Moonaten lota wia Paulus en Griechenlaunt un Aristarch wia noch emma tru bie am, wan doa uk Jäajna wieren, waut Paulus ombrinjen wullen (Apj. 20:2-4). Aus Paulus dan ojjefäa aune 58 n. Chr. aus Jefangna no Room jeschekjt wort, muak Aristarch de lange Reis met am toop, wua uk dee äa Schepp veojjlekjt (Apj. 27:1-2, 41). Aus dee dan ieescht en Room wieren, wia Aristarch woomäajlich eene Tiet met Paulus toop enjestopt (Kol. 4:10). Daut es nich toom wundren, daut dis trua Frint Paulus väl Moot un Troost jeef!

5. Woo kjenn wie no Spricha 17:17 no true Frind sennen?

⁵ Wie kjennen krakjt soone true Frind sennen aus Aristarch, wan wie nich bloos en goode Tieden met onse Breeda un Sestren toop sent, oba dee uk “em Trubbel biestonen” (läs Spricha 17:17). Un woomäajlich fält dee noch lang Troost, nodäm daut dee waut schwoaret derchjemoakt haben. Frances * äare Elren storwen aulebeid benna dree Moonat aun Kjräft. See sajcht: “Mie späat sikj soo, daut soone groote Schwierichkjeiten eenem lang toosaten. Un ekj sie sea dankboa, daut ekj true Frind hab, waut em Denkj hoolen, daut ekj noch emma truarich sie, wan miene Elren uk aul een Stoot trigj jestorwen sent.”

6. Waut woa wie doonen, wan wie true Frind sent?

 ⁶ True Frind brucken äare Tiet un Krauft, om äare Breeda un Sestren bietostonen. Een Brooda, waut Peter heet, haud biejlikj eene sea schlemme Krankheit, wua hee boolt aun stoawen wudd. Siene Fru Kathryn sajcht: “Eene Lied von onse Vesaumlunk fuaren met ons toop nom Dokta, un dee säd ons, woo krank Peter wia. Dan worden dee sikj fuaz oppe Städ eenich, daut see ons en dise schwoare Loag wullen biestonen. Un von doa aun wieren dee emma fa ons doa, wan daut fäld.” Es daut nich een groota Troost, wan wie woare Frind haben, waut ons halpen, en schwoare Tieden nich dän Moot to velieren?

7-8. Woo wiest Kolossa 4:7-9, daut Tiechikus opp to veloten wia?

⁷ Tiechikus wia een Frint von Paulus. Hee wia een Christ von de reemische Prowins Asien, un Paulus kunn sikj sea opp am veloten (Apj. 20:4). Ojjefäa aune 55 n. Chr. muak Paulus Plons, om Jelt tooptokollakjten fa de Christen en Judäa, un woomäajlich stald hee Tiechikus aun toom bie dise wichtje Oppgow methalpen (2. Kor. 8:18-20). Un aus Paulus dan lota toom ieeschte Mol en Room enjestopt wia, holp Tiechikus am. Hee brocht de Breew un uk de Norechten von Paulus no de Vesaumlungen en Asien, daut de Breeda doa Moot kjrieejen (Kol. 4:7-9).

⁸ Tiechikus bleef Paulus sien trua Frint (Tit. 3:12). Nich aule Christen ieeschtemma wieren soo opp to veloten aus hee. Aus Paulus ojjefäa aune 65 n. Chr. toom tweede Mol faust wia, schreef hee, daut een deel Christen en Asien nich wullen met am toop sennen, wiels dee fa Jäajna Angst hauden (2. Tim. 1:15). Oba opp Tiechikus kunn Paulus sikj veloten un hee jeef am eene fresche Oppgow (2. Tim. 4:12). Secha wia Paulus daut sea väl wieet, daut hee soonen gooden Frint haud.

9. Woo kjenn wie Tiechikus nodoonen?

⁹ Wie kjennen Tiechikus nodoonen, wan onse Frind sikj opp ons veloten kjennen.  Dan woa wie onse Breeda un Sestren nich bloos vespräakjen, daut wie an halpen, wan daut fält, oba daut uk werkjlich doonen (Mat. 5:37; Luk. 16:10). Daut es een Troost fa deejanje, waut Help fält, wan dee weeten, daut dee sikj opp ons veloten kjennen. Eene Sesta sajcht, wuarom daut soo es: “Eena haft daut dan nich noch doamet schwoa, aus deejanja, waut daut vesproaken haft, uk enne Tiet komen woat toom halpen.”

10. Wäa kaun deejanje treesten, waut Priefungen derchmoaken ooda sikj aunjeschmäat feelen, soo aus Spricha 18:24 sajcht?

¹⁰ Wan deejanje, waut Priefungen derchmoaken ooda sikj aunjeschmäat feelen, met eenen gooden Frint doaräwa räden kjennen, dan treest dee daut foaken sea (läs Spricha 18:24). Bijay feeld sikj sea aunjeschmäat, aus sien Sän utjeschloten wort. Hee säd: “Ekj must met wäm, wua ekj mie opp veloten kunn, doaräwa räden, woo ekj mie feeld.” Carlos muak eenen Fäla un doawäajen kunn hee nich mea soo en de Vesaumlunk deenen aus ea. Hee sajcht: “Mie fält wäm toom räden, bie dän ekj mie utschedden kunn, onen daut dee mie rechten wudd.” Carlos räd dan met de Eltestasch un dee holpen am, met sienen Trubbel foadich to woaren. Un fa am wia daut uk een Troost to weeten, daut de Eltestasch daut nich wiedasajen wudden, waut hee to an säd.

11. Woo kjenn wie goode Frind sennen?

¹¹ Wan wie goode Frind sennen wellen, wua aundre sikj utschedden kjennen, dan mott wie jeduldich sennen. Aus Zhanna äa Maun ar veleet, jeef ar daut Troost, wan see äare goode Frind vetalen kunn, woo see sikj feeld. See sajcht: “Dee horchten mie jeduldich too, wan ekj dee woomäajlich uk emma wada dautselwje säd.” Du kaust uk een gooda Frint sennen, wan du aundre goot toohorchst.

12. Wäa wia Markus, un woo wia daut to seenen, daut hee aundre wellich holp?

¹² Markus wia een judischa Christ von Jerusalem. Sien Vada Barnabas wia een bekaunda Missionoa (Kol. 4:10). Daut sitt soo, daut Markus siene Famielje em tieteljen sea goot auf wia, oba fa am wia daut tietelje nich daut ieeschte. Markus wia sien Läwen lank reed, aundre to halpen. Am jinkj daut scheen, waut fa aundre to doonen. Hee unjastett biejlikj mieremol dän Apostel Paulus un dän Apostel Petrus bie äare Oppgowen. Veleicht koft hee fa dee Äten ooda socht eene Städ, wua dee Nacht bliewen kunnen, ooda aundret (Apj. 13:2-5; 1. Pet. 5:13). Paulus säd, daut Markus mank dee wia, “dee met . . . [am] toop fa Gott sien Rikj oabeiden” deeden un am stoakjten (Kol. 4:10-11).

13. Woo wiest 2. Timotäus 4:11, daut Paulus Markus sienen truen Deenst väl räakjend?

¹³ Markus wort eent von Paulus siene groote Frind. Aus Paulus biejlikj ojjefäa aune 65 n. Chr. toom latste Mol en Room enjestopt wia, schreef hee sienen tweeden Breef no Timotäus. Doa säd hee, daut Timotäus no Room komen sull un Markus metbrinjen (2. Tim. 4:11). Secha räakjend Paulus daut sea väl, daut Markus am ea soo tru jeholpen haud, un doawäajen wull hee, daut Markus en dise wichtje Tiet sull bie am sennen. Markus deed veschiednet fa Paulus; veleicht brocht hee dän Äten ooda Sachen toom schriewen. Secha kunn Paulus en de latste Doag, ea hee dootjemoakt wort, bäta uthoolen, wäajen hee Help un Moot kjrieech.

14-15. Waut lieet Matäus 7:12 ons, woo wie aundre halpen kjennen?

 ¹⁴ Läs Matäus 7:12. Sent wie nich sea dankboa, wan ons wäa en schwoare Tieden halpen well? Ryan sien Voda storf onverhofs bie een schlemmet Ojjlekj. Hee sajcht: “Wan eena truaren deit, dan schienen eenem de eefachste Sachen em Läwen schwierich. Daut es een groota Troost, wan eenem dan wäa halpt, wan daut uk mau een bät es.”

¹⁵ Wan wie oppmoakjsom sent, dan woa wie leicht enwoaren, woo wie aundre halpen kjennen. Eene Sesta biejlikj deed waut, om Peter un Kathryn to halpen, wua wie ea von räden. Wiels dee beid nich mea foaren kunnen, muak de Sesta eenen Plon, daut veschiedne von de Vesaumlunk an emma omzajcht nom Dokta fieren kunnen. Wia daut eene Help fa dee? Kathryn sajcht: “Ons foll een groota Steen vom Hoat.” Well wie emma doaraun denkjen, woo väl wieet daut fa aundre sennen kaun, wan wie dee met waut kjlienet halpen!

16. Waut fa eene wichtje Lia kjenn wie ut Markus sien Biespel rutnämen?

¹⁶ De Jinja Markus haud secha väl to doonen. Hee wia em Deenst fa Jehova drock un must biejlikj daut Markus-Evangelium schriewen. Un doch neem Markus sikj de Tiet, om Paulus bietostonen, un Paulus fruach am wellich no Help. Angela wia deejanje sea dankboa, waut ar biestunden, aus doa wäa von äare Famielje dootjemoakt wort. See sajcht: “Wan Frind opp iernst halpen wellen, dan woacht eena sikj leichta, met dee to räden. Dee hoolen sikj nich ut Angst trigj.” Wie wudden kjennen nodenkjen: “Sie ekj doafäa bekaunt, daut ekj wellich waut doo, om miene Gloowesbreeda to treesten?”

17. Woo kaun 2. Korinta 1:3-4 ons halpen, daut wie aundre treesten?

¹⁷ Daut es nich schwoa, soone Breeda un Sestren to finjen, waut Troost fält. Veleicht kjenn wie dee krakjt opp dee Wajch Moot toospräakjen, aus aundre ons haben.  Nodäm daut äare Groosmame jestorwen wia, säd eene Sesta, waut Nino heet: “Jehova kaun aundre derch ons treesten, wan wie reed sent, daut uk to doonen” (läs 2. Korinta 1:3-4). Frances, wua wie ea aul von räden, sajcht: “Daut es werkjlich soo, waut 2. Korinta 1:4 sajcht. Wie kjennen aundre met dänselwjen Troost treesten, waut wie jekjräajen haben.”

18. (a) Wuarom felt eenje daut woomäajlich schwoa, aundre to treesten? (b) Woo kjenn wie aundre fein treesten? Jeff een Biespel.

¹⁸ Wie motten no Jeläajenheiten sieekjen aundre to treesten, wan ons daut uk schwoa felt. Woomäajlich sent wie doarom beduat, waut wie sajen ooda doonen kjennen, wan doa wäm Troost fält. Een Eltesta, waut Paul heet, weet noch, woo se am treesten wullen, aus sien Voda storf. Hee sajcht: “Ekj moakjt, daut dee daut nich leicht wia, met mie to räden. Dee wisten nich, waut see sajen sullen. Oba ekj freid mie doawäajen, daut dee mie treesten un biestonen wullen.” Een Brooda, waut Tajon heet un een grootet Ieedbäben beläwd, säd: “Ekj weet goanich mea, waut de Menschen mie no dit Ieedbäben aules schreewen, oba ekj weet noch, daut dee soo om mie bekjemmat wieren, daut dee weeten wullen, woo mie daut jinkj.” Wie kjennen aundre fein treesten, wan wie dee weeten loten, daut wie om an bekjemmat sent.

19. Wuarom west du fa aundre “een Troost” sennen?

¹⁹ Je noda wie no daut Enj komen, je schlemma woat dise Welt woaren un je schwanda woat ons Läwen woaren (2. Tim. 3:13). Un ons woat daut uk fa wieda aun Troost fälen, wäajen wie onvolkomen sent un Fäla moaken. Eent, waut dän Apostel Paulus holp, batem Enj von sien Läwen tru to bliewen, wia de Troost, waut hee von siene Gloowesbreeda kjrieech. Well wie uk soo tru sennen aus Aristarch un soo opp to veloten sennen aus Tiechikus un soo behelplich sennen aus Markus. Dan kjenn wie onse Breeda un Sestren halpen, Jehova wieda tru to deenen (1. Tess. 3:2-3).