1-2. Wuarom sent wie jieda Joa bie daut Owentmol?

 MEIST 2000 Joa trigj jeef Jesus sien Läwen fa ons han. Doaderch muak hee daut mäajlich fa ons, daut eewje Läwen to kjrieen. Dän Owent ea Jesus storf, säd hee to siene Nofolja, daut see dit Opfa sullen em Denkj hoolen un daut gaunz eefach fieren, met Broot un Wien (1. Kor. 11:23-26).

² Wie komen Jesus sien Jeboot no, wiels wie am sea leewen (Joh. 14:15). Jieda Joa en de Wäakjen ver un no daut Owentmol wies wie, woo väl wie daut räakjnen, wan wie bäden un doaräwa nodenkjen, waut Jesus sien Doot fa ons bediet. Wie sent uk schaftich, mea em Deenst to doonen un soo väl Menschen aus mäajlich entoloden, dit besondre Owentmol met ons toop to fieren. Un wie sent ons uk gaunz eenich, daut wie ons nuscht wellen doa mankkomen loten, bie dit Owentmol to sennen.

3. Waut woa wie en disen Artikjel seenen?

³ En disen Artikjel woa wie dreeatlei seenen, woo Jehova siene Deena sikj sea aunjestrenjt haben, om aun Jesus sienen Doot to denkjen. 1. Dee doonen daut wada soo, aus Jesus daut väajesajcht haft. 2. Dee loden aundre to daut Owentmol en. Un 3. dee sent bie daut Owentmol, wan daut uk schwoa es.

4. Waut fa Sachen woaren jieda Joa bie daut Owentmol kloa jemoakt, un wuarom sell wie daut nich fa selfstvestentlich nämen? (Lukas 22:19-20).

⁴ Jieda Joa opp daut Owentmol horch wie no eene biblische Räd, wua väl Froagen beauntwuat woaren. Wie lieren  doa uk, wuarom de Menschen daut aun een Leesjelt fält un woo de Doot von eenen Mensch väle äare Sinden betolen kaun. Ons woat uk doaraun denkjen jeholpen, waut daut Broot un de Wien bedieden un wäa doavon nämen saul (läs Lukas 22:19-20, NW b). Wie denkjen uk äwa de Säajnungen no, waut deejanje haben, waut de Hopninj haben, oppe Ieed to läwen (Jes. 35:5-6; 65:17, 21-23). Wie wudden dise Woarheit kjeenmol sellen fa selfstvestentlich nämen, wiels dusende Millionen Menschen kjennen daut nich vestonen un dee räakjnen daut wieetvolle Opfa von Jesus uk nuscht. Dee fieren daut Owentmol uk nich soo, aus Jesus daut väajesajcht haft. Wuarom es daut soo?

5. Woo fungen Menschen aun, Jesus sienen Doot to fieren, meist fuaz nodäm de Apostel storwen?

⁵ Meist fuaz nodäm aus Jesus siene Apostel storwen, kjeemen faulsche Christen en de Vesaumlungen opp (Mat. 13:24-27, 37-39). “Dee [vedreiden] de Woarheit …, om Aunhenja fa sikj to kjrieen” (Apj. 20:29-30). Eent, woo dise faulsche Christen de Woarheit vedreiden, wia, daut dee aunfungen to lieren, daut Jesus sienen Kjarpa nich “bloos eemol jeopfat [haft], om väle äare Sinden opp sikj to nämen” – soo aus de Bibel sajcht – oba daut dee emma un emma wada jeopfat mott (Heb. 9:27-28, NW). Vondoag dän Dach jleewen väl gootmeenende Menschen aun dise Läajes. Dee wanken jieda Wäakj un eenjemol jieda Dach no de Kjoakj, om dit Opfa von Jesus to fieren, soo aus daut biejlikj en dän katoolschen Gloowen Mood es. Dise Menschen jleewen, daut daut Broot un de Wien sikj wäarent daut Owentmol werkjlich veendat to Christus sien Bloot un sienen Kjarpa. Dee jleewen, daut Jesus sien Bloot un sien Kjarpa jiedatsmol jeopfat woaren, wan dit derchjefieet woat. Aundre Gloowes fieren Jesus sienen Doot nich soo foaken, oba de mieeschte von dee äare Menschen weeten mau weinich doavon, waut Jesus sien Doot to bedieden haft. Väle wundren veleicht: “Bediet Jesus sien Doot werkjlich, daut miene Sinden kjennen vejäft woaren?” Wuarom denkjen dee soo? Bie eenje es daut veleicht soo, daut aundre dee haben oppem Twiewel jebrocht, aus daut derch Jesus sienen Doot mäajlich es, Sinden to vejäwen. Woo sent Jesus siene true Deena met dit omjegonen?

6. Waut wist eene Grupp Bibelforscha bat aune 1872?

⁶ Aune 1870 funk eene Grupp Bibelforscha, waut von Charles Taze Russell jeleit wort, aun, de Bibel sea deep to studieren. Dee wullen de Woarheit doaräwa weeten, waut Jesus sien Doot fa eenen Senn haud, un woo daut Aundenkjen aun sienen Doot jefieet sull. Bat de 1872 hauden dee de Bibel soo wiet studieet, daut dee wisten, daut Jesus sien Doot werkjlich een Leesjelt wia fa aule Menschen. Dee hilden daut nich bloos fa sikj, oba muaken daut bekaunt derch Bieekja, derch de Post un derch Tietschreften. Un meist fuaz nodäm fungen dee uk aun, sikj soo aus de ieeschtemmasche Christen bloos eemol daut Joa to vesaumlen, om daut Owentmol to fieren.

7. Woo kjemt ons daut togood, waut de Bibelforscha lang trigj studieet haben?

⁷ Vondoag dän Dach kjemt ons daut sea togood, waut de true Christen lang trigj studieet haben. Wuarom? Doaderch haft Jehova ons jeholpen, to vestonen, waut  Jesus sien Opfa bediet un waut daut fa jiedrem eenen deit (1. Joh. 2:1-2). Wie haben uk jelieet, daut de Bibel von twee veschiedne Hopninjen rät. Eenje von dee Menschen, waut Gott deenen, woaren onstoafeljet Läwen em Himmel kjrieen un Millionende eewjet Läwen oppe Ieed. Wie komen Jehova emma noda, wan wie doaräwa nodenkjen, woo sea Jehova ons leeft un woo sea jiedrem eenen Jesus sien Opfa togood kjemt (1. Pet. 3:18, NW; 1. Joh. 4:9). Krakjt soo aus de true Christen don lod wie uk aundre en, daut Owentmol met ons toop soo to fieren, aus Jesus daut väajesajcht haft.

8. Waut haben Jehova siene Deena aules jedonen, om aundre entoloden? (See daut Bilt.)

⁸ Jehova siene Deena haben aul lang emma aundre enjelot fa daut Owentmol. Vonne 1881 aun worden Breeda en de Stäts enjelot, en een Brooda sien Hus en Allegheny, Pennsylvanien, tooptokomen fa dit besondre Aundenkjen. Lota haud jieda Vesaumlunk fa sikj selfst daut Owentmol. Von Moaz 1940 aun wort de Vekjindja jesajcht, daut jieda eena uk kunn soone enloden, waut sikj doafäa intressieren. Un aune 1960 wia daut daut ieeschte Mol, daut daut Betel de Vesaumlungen met jeprinte Enlodungszadels vesorjd. Von dan aun sent aul dusende Millionen Enlodungszadels jemoakt worden. Wuarom strenj wie ons soo sea aun un brucken soo väl Tiet, om aundre entoloden?

9-10. Wäm kjemt daut togood, daut wie ons aunstrenjen, aundre entoloden fa daut Owentmol? (Johanes 3:16).

⁹ Wie wellen, daut dee, waut no daut Owentmol komen, toom ieeschte Mol de  Woarheit doaräwa hieren sellen, waut Jehova un Jesus fa ons aula jedonen haben. Daut es een Grunt, wuarom wie aundre enloden fa daut Owentmol (läs Johanes 3:16). Wie hopen, daut daut, waut dee bie daut Owentmol seenen un hieren, dee bat doa brinjt, Jehova siene Deena to woaren. Oba aundre haben uk eenen Nutzen doavon.

¹⁰ Wie loden uk soone en, waut nich mea prädjen doonen, wiels wie wellen dee denkjen halpen, daut Jehova dee noch emma leeft. Väle nämen de Enlodunk wellich aun, un wie sent sea froo, dee wada to seenen. Wan dee biem Owentmol sent, halpt dee daut doaraun denkjen, woo scheen dee daut ea jinkj, Jehova to deenen. See wie mol, waut Monica beläwd. c See funk enne Tiet von de COVID-19-Krankheit wada aun to prädjen. Von daut Owentmol aune 2021 säd see: “Dit Owentmol wia gaunz besonda fa mie. Daut ieeschte Mol no 20 Joa funk ekj wada aun to prädjen un de Menschen to daut Owentmol entoloden. Ekj doo daut gaunz von Hoaten, wiels ekj soo schaftich doaräwa sie, waut Jehova un Jesus fa mie jedonen haben” (Psa. 103:1-4). Aus de Menschen de Enlodunk nu aunnämen ooda nich, wie bliewen iewrich un loden aundre en, wiels wie weeten, daut Jehova onse Aunstrenjunk väl räakjent.

11. Woo haft Jehova daut jesäajent, daut wie ons aunstrenjen, Menschen fa daut Owentmol entoloden? (Hagai 2:7).

¹¹ Jehova haft daut sea jesäajent, daut wie de Menschen to daut Owentmol enloden. Wan wie wäajen de COVID-19-Krankheit aune 2021 uk nich aules doonen kunnen, wieren bie daut Owentmol oba 21 367 603. Daut es mea aus twee Mol sooväl, aus daut Jehova siene Zeijen oppe Welt jeft! Wie weeten, daut Jehova nich soo sea om de Zolen bedocht es, oba om jiedren eenselnen (Luk. 15:7; 1. Tim. 2:3-4). Wie sent ons gaunz secha, daut Jehova ons derch daut enloden brukt, om opprechtje Menschen to finjen (läs Hagai 2:7).

12. Waut kaun daut eenjemol schwoa moaken, daut Aundenkjen aun Jesus sienen Doot to fieren? (See daut Bilt.)

¹² Jesus säd, daut en de latste Doag wudden veschiedne Sorten schwoare Tieden sennen, soo aus Jäajenstaunt enne Famielje, Vefoljunk, Kjrieej, Krankheiten un veschiednet aundret (Mat. 10:36; Mar. 13:9; Luk. 21:10-11). Eenjemol kjennen krakjt soone Sachen daut schwoa moaken, daut Aundenkjen aun Jesus sienen Doot to fieren. Waut haben onse Breeda un Sestren jedonen, om soone Sachen to äwakomen, un woo haft Jehova dee jeholpen?

13. Woo säajent Jehova daut, daut Artem soo äwanäment un sikj soo eenich wia, daut Owentmol em Jefenkjnis to fieren?

¹³ Em Jefenkjnis. Onse Breeda, waut wäajen äaren Gloowen em Jefenkjnis sent, doonen aules, waut see kjennen, om daut Aundenkjen aun Jesus sienen Doot to fieren. See wie mol, waut Artem beläwd. Aus daut Owentmol aune 2020 wia, wia hee en eene Stow enjestopt von 17 Meeta em Veakaunt (183 Schoo em Veakaunt) un eenjemol wieren doa bat fief Stekj tojlikj bennen. Wan hee uk enjestopt wia, kunn hee sikj oba waut Sachen doa nennholen, dee hee fa daut Owentmol brucken kunn, un hee wort sikj eenich, de Owentmolsräd fa sikj selfst to hoolen. Oba de aundre, waut doa enjestopt wieren, flieekjten un schmiekjten sea. Waut deed hee dan? Hee fruach dee, aus see wudden bloos fa eene Stund opphieren  met schmieekjen un flieekjen. Artem wia vewundat, daut dee doamet opphieeden en dee Tiet, waut hee daut Owentmol haud. Artem sajcht: “Ekj vesocht, dee uk noch waut von daut Owentmol to vetalen”. Wan dee doa uk nuscht hauden wult von hieren, hauden dee oba veschiedne Froagen doaräwa, aus see daut ieescht jehieed un jeseenen hauden, woo Artem daut Owentmol fieed.

14. Waut wort doa enjerecht, om daut Owentmol en de Tiet von de COVID-19-Krankheit to fieren?

¹⁴ COVID-19-Krankheit. Aus daut met dise Krankheit aunfunk, kunn Jehova sien Volkj daut Owentmol nich perseenlich haben. Oba daut hilt dee nich doavon auf, daut to fieren. d Eenje Vesaumlungen fieeden daut Owentmol äwa Internet, wan daut mäajlich wia. Fa de Millionende, waut nich Internet hauden, wort daut en eenje Lenda soo enjerecht, daut de Owentmolsräd äwa Tellewizhen to seenen ooda äwa Rädio to hieren wia. Un dan uk noch deeden de Betels de Räden opp äwa 500 Sproaken oppschnaken. Soone Breeda, waut wiet auf wonden un daut doaraun fäld, kjrieejen  dise Räden dan von aundre Breeda jebrocht.

15. Waut kjenn wie von eenen Bibelschiela lieren, waut Sue heet?

¹⁵ Jäajenstaunt enne Famielje. Waut fa eenje daut schwanste es, daut Owentmol to fieren, es de Jäajenstaunt enne Famielje. See wie mol, waut een Bibelschiela, waut Sue heet, beläwd. Aune 2021, dän latsten Dach ver daut Owentmol, säd Sue to äaren Bibelliera, daut see nich wudd kjennen daut Owentmol haben wäajen dän Jäajenstaunt en äare Famielje. Dan läsd äa Bibelliera Lukas 22:44 un vetald ar, waut eena doonen kaun, wan eena en eene schwieeje Loag es. See säd, daut eena daut dan soo doonen mott, aus Jesus daut deed: to Jehova bäden un gaunz opp am vetruen. Dän näakjsten Dach muak Sue daut Broot un dän Wien reed fa daut Owentmol, un dan kjikjt see de besondre Morjenaundacht opp jw.org. Dän Zeowes, aus Sue dan gaunz auleen en äare Stow wia, knekjt see sikj met äa Fon aun un haud soo daut Owentmol. No daut schreef see äaren Bibelliera: “Du hast mie jistren soo väl Moot jemoakt, daut ekj aules deed, waut ekj kunn toom daut Owentmol haben, un daut äwaje deed Jehova. Ekj kaun daut nich utspräakjen, woo schaftich un dankboa ekj sie!” Jleefst du, daut Jehova die uk halpen kaun, wan du en biejlikj soone Loag best?

16. Wuarom kjenn wie ons secha sennen, daut Jehova onse Aunstrenjunk säajnen woat toom bie daut Owentmol sennen? (Reema 8:31-32).

¹⁶ Jehova räakjent daut sea väl, wan wie ons aunstrenjen, daut Aundenkjen von Jesus sienen Doot to fieren. Wie kjennen ons uk secha sennen, daut hee daut säajnen woat, wan wie wiesen, daut wie daut waut räakjnen, waut hee fa ons jedonen haft (läs Reema 8:31-32). Doawäajen well wie ons eenich sennen, dit Joa bie daut Owentmol to sennen un aules to doonen, waut wie kjennen, om mea fa Jehova to doonen en de Tiet von daut Owentmol.