1. Waut deed Jehova fuaz nodäm, daut Adam un Eva jesindicht hauden? (1. Mose 3:15).

 FUAZ nodäm daut Adam un Eva jesindicht hauden, jeef Jehova äare Nokomen eene Hopninj derch eene besondre Profezeiunk. Dee steit en 1. Mose 3:15 (läs).

2. Wuarom es dise Profezeiunk soo wichtich?

² De Profezeiunk steit en daut ieeschte Bibelbuak, oba opp irjenteene Wajch es dee uk met aule aundre Bibelbieekja vebungen. Krakjt soo aus een Heiwä derch eene Staut jeit un met väl aundre Wäaj vebungen es, soo jeit de Profezeiunk en 1. Mose 3:15 aus eene Norecht derch aule Bibelbieekja. Un dise Norecht es, daut doa wudd een Rada jeschekjt woaren, waut dän Soton un aul siene Helpa wudd venichten. * Waut fa een Säajen daut nich woat fa deejanje sennen, waut Jehova leewen!

3. Waut woa wie en disen Artikjel lieren?

³ En disen Artikjel woa wie eenje Froagen beauntwuaten von de Profezeiunk en 1. Mose 3:15. Biejlikj: Wäa sent deejanje, von dee daut doa rät? Woo erfelt dise Profezeiunk sikj? Un woo kjemt ons dee togood?

4. Wäa es “de Schlang”, un woo weet wie daut?

⁴ En 1. Mose 3:14-15 rät daut von eene “Schlang” un dee äare “Nokomen”, un eene “Fru” un dee äare “Nokomen”. De Schreft halpt ons to vestonen, wäa aul dise sent. * Fang wie mol met “de Schlang” aun. Eene werkjelje  Schlang wudd nich haben kunt vestonen, waut Jehova doa em Goaden Eden säd. Soo, deejanja, äwa dän Jehova daut Uadeel spruak, mott wäa jewast sennen, waut am vestonen kunn. Oba wäa wia daut? Openboarunk 12:9 halpt ons, daut to vestonen. Doa rät daut von de “oole Schlang”, un dee woat jetalt aus de Soton un Beesa Fient. Oba wäa es dan de Nokomen von de Schlang?

5. Wäa es de Nokomen von de Schlang?

⁵ Wan de Bibel em bilteljen Senn von Nokomen rät, dan meent dee soone, waut wäm em denkjen un haundlen nodoonen, soo aus Kjinja äaren Voda. Soo, to dän Nokomen von de Schlang jehieren de ontrue Enjel un Menschen, waut sikj jäajen Gott stalen un siene Deena vefoljen, soo aus de Soton deit. Doa wudden uk de Enjel met en sennen, waut en Noah siene Tiet äare Oppgowen em Himmel veleeten un schlajchte Menschen, waut soo sent aus äa Voda, de Beesa Fient (1. Mo. 6:1-2; Joh. 8:44; 1. Joh. 5:19; Jud. 6).

6. Wuarom kaun met “de Fru” nich Eva jemeent sennen?

⁶ Wäa es dan “de Fru” en de Profezeiunk? See kaun nich Eva jewast sennen. Wuarom nich? See wie bloos mol eenen Grunt. De Profezeiunk säd, daut de Nokomen von de Fru dän Soton wudd dän Kopp “vewunden”, ooda dän Kopp vekjwatschen. Soo aus wie jroz jeseenen haben, es de Schlang een beesa Enjel, aulsoo de Soton, un kjeen onvolkomna Nokomen von Eva wudd de Macht haben, am dän Kopp to vekjwatschen. Wäa wudd daut dan sennen?

7. Wäa es de Fru en 1. Mose 3:15, soo aus Openboarunk 12:1-2, 5, 10 sajcht?

⁷ En daut latste Bibelbuak woat ons jesajcht, wäa dise Fru en 1. Mose 3:15 es  (läs Openboarunk 12:1-2, 5, 10). Dit es nich eene jeweenelje Fru, wiels see haft de Mon unja äare Feet un haft eene Kroon von 12 Stierns opp äaren Kopp. See kjricht een butajeweeneljet Kjint; daut es Gott sien Kjennichrikj. Daut Kjennichrikj es em Himmel, doawäajen mott de Fru uk em Himmel sennen. See stalt daut himlische Poat von Jehova siene Organisazion väa, aulsoo de true Enjel (Gal. 4:26).

8. Wäa es de wichtichsta Nokomen von de Fru, un wanea wort hee daut? (1. Mose 22:15-18).

⁸ Gott sien Wuat halpt ons uk to vestonen, wäa de wichtichsta Nokomen von de Fru es. Dis Nokomen mott een Nokomen von Abraham sennen (läs 1. Mose 22:15-18). Un soo aus de Profezeiunk verutsäd, wia Jesus een Nokomen von disen truen Maun (Luk. 3:23, 34). Oba de Nokomen von de Fru wudd motten mea Macht haben aus een Mensch, wiels hee wudd je dän Beesen Fient venichten. Aus Jesus dan rom 30 Joa wia, wort hee von Gott met heiljen Jeist jesaulft. Un aus daut passieed, wort hee de wichtichsta Nokomen von de Fru (Gal. 3:16). Nodäm daut Jesus vom Doot oppjestonen wia, sajcht daut, daut Gott “am met Iea un Harlichkjeit” kjreend un am “aule Jewault … em Himmel uk oppe Ieed” jeef, un mau rajcht de Macht, “dän beesen Fient siene Woakjen kaputt to moaken” (Heb. 2:7; Mat. 28:18; 1. Joh. 3:8).

9-10. (a) Wäa jehieet noch to dän Nokomen, un wanea woaren dee Poat von dän? (b) Äwa waut woa wie nu räden?

⁹ Oba doa wudden noch aundre sennen, waut to de Fru äaren Nokomen jehieren wudden. De Apostel Paulus muak dietlich, wäa daut wia, aus hee to de jesaulwde Christen von de Juden un Griechen säd: “Wan wie Christus aunjehieren, dan sent wie Abraham siene Nokomen un Oawen, soo aus Gott vesproaken haft” (Gal. 3:28-29). Wan Jehova eenen Christ met heiljen Jeist saulwen deit, dan woat dee Poat von de Fru äaren Nokomen. Soo, to dän Nokomen jehieren Jesus Christus un de 144 000, waut met am toop rejieren woaren (Opb. 14:1). Aul dise proowen soo to denkjen un to haundlen aus äa Voda Jehova Gott.

¹⁰ Nu weet wie, wäa deejanje sent, wua 1. Mose 3:15 von rät. Well wie nu noch een bät doaräwa räden, woo Jehova dise Profezeiunk soo bie sacht erfelt un woo ons dee vondoag dän Dach halpt.

11. En waut fa eenen Senn wort dän Nokomen von de Fru “de Hak” vewunt?

¹¹ Soo aus de Profezeiunk en 1. Mose 3:15 säd, wudd de Schlang dän Nokomen von de Fru “de Hak vewunden”. Daut erfeld sikj, aus de Soton de Juden un de Reema bat doa brocht, Gott sienen Sän doottomoaken (Luk. 23:13, 20-24). Krakjt soo aus soona, waut sikj siene Hak vewunt haft, fa een Stootje nich gonen kaun, soo kunn Jesus fa dree Doag nuscht doonen, aus hee doot em Grauf wia (Mat. 16:21).

12. Woo un wanea woat de Schlang äa Kopp vekjwatscht woaren?

¹² No 1. Mose 3:15 no wudd Jesus nich em Grauf bliewen. Wuarom nich? Wiels de Profezeiunk säd je, daut de Nokomen von de Fru de Schlang wudd dän Kopp vekjwatschen. Daut bediet, daut Jesus wudd motten vom Doot oppstonen. Un hee deed uk. Hee wort aum dredden Dach aus een onstoafelja Jeist oppjewakjt. Un wan daut fa Gott ieescht woat de rajchte Tiet sennen, dan woat Jesus dän Soton  fa emma venichten (Heb. 2:14). Deejanje, waut met Christus toop rejieren woaren, woaren methalpen, Gott siene Fiend oppe Ieed aula to venichten, aulsoo de Schlang äare Nokomen (Opb. 17:14; 20:4, 10). *

13. Woo kjemt ons daut togood, daut dise Profezeiunk sikj erfelt?

¹³ Wan du die Gott hanjejäft hast, dan kjemt die dise Profezeiunk togood. Jesus kjeem aus Mensch no de Ieed. Hee wia krakjt soo aus sien Voda (Joh. 14:9). Soo, derch am hab wie Jehova Gott kjanen un leewen jelieet. Ons komen uk Jesus siene Lieren togood un woo hee de Christenvesaumlunk vondoag dän Dach leiden deit. Hee haft ons uk jelieet, woo wie soo läwen kjennen, daut Jehova aun ons eenen Jefaulen haft. Un ons aula kjemt daut togood, daut Jesus fa ons jestorwen es, aulsoo daut siene Hak vewunt wort. Woo? Aus Jesus oppjewakjt wort, neem Jehova sien volkomnet Opfa aun, waut “ons rein von aule Sind” moakt (1. Joh. 1:7).

14. Woo weet wie, daut de Profezeiunk em Goaden Eden sikj nich fuaz erfeld?

¹⁴ Daut, waut Jehova em Goaden Eden säd, jeef auntovestonen, daut doa wudd eene jewesse Tiet vegonen, bat de Profezeiunk sikj erfellen wudd. Daut wudd Tiet brucken, bat de Fru äaren Nokomen wudd verendach brinjen, bat de Fient siene Nofolja wudd toopsaumlen un daut doa kunn Fientschoft, ooda Hauss, oppkomen tweschen dise twee Gruppen. Dise Profezeiunk to vestonen halpt ons, wiels dee woarnt ons doafäa, daut de Welt, waut vom Soton beharscht woat, Gott siene Deena haussen woat. Jesus woarnd siene Nofolja lota uk doafäa (Mar. 13:13; Joh. 17:14). Wie haben gaunz kloa jeseenen, daut dit Poat von de Profezeiunk sikj aul erfelt haft, besonda de latste 100 Joa. Wuarom saj wie daut?

15. Wuarom haust de Welt ons nu soo sea aus noch kjeenmol ea, un wuarom bruck wie nich Angst haben fa dän Soton?

¹⁵ Kort nodäm daut Jesus aune 1914 de Kjennich von daut messianische Kjennichrikj wort, schmeet hee dän Soton utem Himmel rut. Nu kaun dee bloos noch hia oppe Ieed rom sennen, bat dee venicht woat (Opb. 12:9, 12). Oba dee es sea omhäa. De Soton es vetwiewelt un sea wuttich un jript Gott siene Deena aun (Opb. 12:13, 17). Doawäajen haust de Welt ons soo sea aus noch kjeenmol ea. Oba wie brucken doawäajen nich Angst haben fa dän Soton un dän siene Nofolja. Wie kjennen krakjt daut Vetruen haben aus de Apostel Paulus. Hee schreef: “Wan Gott opp onse Sied es, wäa kaun dan jäajen ons sennen?” (Reem. 8:31). Wie kjennen ons gaunz opp Jehova veloten, wiels soo aus wie jeseenen haben, haft sikj daut mieeschte von de Profezeiunk en 1. Mose 3:15 aul erfelt.

16-18. Woo es Curtis, Ursula un Jessica daut togood jekomen, daut see de Profezeiunk en 1. Mose 3:15 vestonen kjennen?

¹⁶ De Profezeiunk en 1. Mose 3:15 halpt ons met jieda Schwierichkjeit foadich to woaren, waut doa oppkomen kunn. Curtis, waut aus Missionoa en Guam deent, sajcht: “Doa passieeden Sachen en mien Läwen, waut mie daut sea schwoa muaken, Jehova tru to bliewen. Oba äwa de Profezeiunk en 1. Mose 3:15 notodenkjen holp mie, gaunz opp mienen himlischen Voda to vetruen.” Curtis freit sikj aul to dän  Dach, wan Jehova aulet schwoare von dise Ieed wajchnämen woat.

¹⁷ Eene Sesta en Bayern, waut Ursula heet, sajcht, daut ar 1. Mose 3:15 halpt to vestonen, daut de Bibel werkjlich von Gott es. See kunn seenen, woo aule aundre Profezeiungen met dise Profezeiunk vebungen wieren, un daut deed sea väl aun ar. See sajcht uk: “Mie jinkj daut sea to Hoaten, aus ekj sach, daut Jehova em Goaden Eden fuaz waut deed, daut de Menschheit nich wudd onen Hopninj bliewen.”

¹⁸ Jessica von Mikroneesien sajcht: “Ekj weet noch krakjt, woo daut fa mie wia, aus ekj enwort, daut ekj de Woarheit jefungen haud! De Profezeiunk en 1. Mose 3:15 deed sikj erfellen. Daut haft mie jeholpen, doaraun to denkjen, daut daut Läwen, waut wie nu haben, nich daut Läwen es, waut Jehova fa ons well. Dise Profezeiunk wiest mie uk gaunz dietlich, daut wie nu aul kjennen een goodet Läwen haben, wan wie Jehova deenen, un lota noch mol daut woare Läwen.”

19. Wuarom kjenn wie ons secha sennen, daut sikj uk daut äwaje von de Profezeiunk erfellen woat?

¹⁹ Soo aus wie jeseenen haben, deit sikj 1. Mose 3:15 erfellen. Wie kjennen nu vestonen, wäa de Nokomen von de Fru es un uk de Nokomen von de Schlang. Jesus es daut wichtichste Poat von de Fru äaren Nokomen un es utjeheelt von de Wund aun siene Hak un es nu een majchtja, onstoafelja Kjennich. De aundre, waut to dän Nokomen von de Fru jehieren, sent uk aul meist aula utjewält. Wäajen sikj daut ieeschte Poat von de Profezeiunk aul erfelt haft, sent wie ons gaunz secha, daut sikj uk daut erfellen woat, daut de Schlang äa Kopp woat vekjwatscht woaren. Woo froo woaren Gott siene Deena nich sennen, wan de Soton ieescht woat venicht sennen! Oba soo lang daut noch nich bat doa es, well wie nich oppjäwen. Wie kjennen opp onsen Gott vetruen. Derch dän Nokomen von de Fru “woaren aule Velkja oppe Ieed [sea] jesäajent woaren” (1. Mo. 22:18).