Ekj wort aune 1935 en Darlaston jebuaren, waut Poat von de Black Country (schwoatet Launt) es. Dise Jäajent en Enjlaunt haud disen Nomen wäajen aul dän Ruak, waut doa emma wia, waut von de Fabrikjen doa rom kjeem. Aus ekj rom vea Joa wia, fungen Jehova siene Zeijen aun, met miene Elren de Bibel to studieren. Aus ekj soo tweschen 14 un 15 wia, wia ekj mie gaunz secha, daut ekj de Woarheit jefungen haud un leet mie dan aune 1952 deepen, aus ekj 16 wia.

Ojjefäa en deeselwje Tiet funk ekj aun, eene Oabeit to lieren en eene groote Fabrikj, waut Hauntjereetschoft un Poats von Mootasch muak. Ekj lieed eene wichtje Oabeit en de Offiz, waut mie sea scheen jinkj.

Ekj must waut wichtjet entscheiden, aus een Kjreisoppsechta no mie kjeem un mie fruach, aus ekj wull daut Buakstudium von de Vesaumlunk leiden en onse Vesaumlunk en Willenhall. Oba de Trubbel wia, daut ekj to dee Tiet emma no de Toopkomes von twee Vesaumlungen jinkj. Enne Wäakj jinkj ekj emma no daut Toopkomen von de Vesaumlunk, waut daut notste von miene Oabeit wia, en Bromsgrove, rom 32 Kilomeeta (20 Miel) auf von tus. Un Utgangswäakj, wan ekj dan wada bie miene Elren wia, jinkj ekj no daut Toopkomen von de Vesaumlunk en Willenhall.

Wäajen ekj em Deenst fa Jehova mea doonen wull, deed ekj daut, wua de Kjreisoppsechta mie no fruach, wan doa uk met en wia, daut ekj miene Oabeit oppjeef, waut ekj soo sea jleicht. Ekj woa daut kjeenmol beschoden, daut ekj Jehova leet mie dän Wajch wiesen, wiels doaderch kjrieech ekj noch väl mea Mäajlichkjeiten, woo ekj Jehova deenen kunn.

Aus ekj emma no de Toopkomes en de Bromsgrove-Vesaumlunk jinkj, lieed ekj doa eene sea schmocke Sesta kjanen, waut uk jeistlich jesonnen wia, un daut wia Anne. Wie befrieden ons aune 1957, un toop kunn wie dan em Pioniadeenst, Sondavoltietdeenst un em Kjreisdeenst sennen un em Betel schaufen. Mie haft daut met ar emma sea scheen jegonen.

Wie wieren sea schaftich, aus wie kunnen aune 1966 no de 42. Klauss von de Gilead-School gonen.  Wie worden dan no Malawi jeschekjt, waut bekaunt es aus daut Hoat von Afrika, wäajen de Menschen doa soo leeftolich un oppnäment sent. Oba waut wie nich wisten, daut wie doa nich wudden kjennen lang bliewen.

Wie kjeemen dän 1. Feebawoa aune 1967 no Malawi. Nodäm daut wie eene Moonat sea de Sproak jelieet hauden, wort ekj Distrikjt Oppsechta. Wie hauden eenen Jeep un de Menschen säden, met dän kunn eena aulawäajen foaren, mau rajcht derch Riefasch. Oba daut wia nich soo, wäajen wie kunnen mau jroz derch flaket Wota foaren. Eenjemol bleew wie uk en Stroohiesa Nacht, wua wie dan uk musten eenen Plon methaben, daut wie en de Räajentiet nich naut worden. Daut wia nich de basta Aunfank en onsen Missionoadeenst, oba wie wieren schaftich!

En Aprell wort ekj en, daut wie wudden Trubbels met de Rejierunk kjrieen. Ekj hieed dän Präsident Dr. Hastings Banda von Malawi äwa Rädio räden. Hee säd, daut Jehova siene Zeijen nich Taks tolden un daut dee de Rejierunk Trubbel muaken. Oba daut wia gaunz plaut jeloagen. Wie aula wisten, daut daut doawäajen wia, wäajen wie ons nich en de Politikj nenmischten, un besonda, wäajen wie nich daut Koatje koften toom wiesen, daut eena to eene polietische Partei jehieet.

En Septamba stunt enne Post, daut de Präsident de Breeda beschuljen deed, daut dee aulawäajen Trubbel muaken. Hee muak bie een grootet Toopkomen bekaunt, daut se doamet schauften, Jehova siene Zeijen boolt to vebeeden. Un soo kjeem daut dan uk dän 20. Oktooba aune 1967. Nich lang no daut kjeemen dan de Poliezen un aundre Beaumte no daut Betel un muaken daut too un schekjten de Missionoaren utem Launt rut.

 Nodäm daut wie dree Doag em Jefenkjnis wieren, schekjten se ons dan no Maurizius, waut to Enjlaunt jehieed. Oba de Beaumte en Maurizius leeten daut nich, daut wie doa kunnen aus Missionoaren deenen. Doawäajen schekjt de Organisazion ons no Rhodesien (nu Simbabwe). Aus wie doa aunkjeemen, räd een dolla Beaumta met ons un wull ons nich em Launt nenloten. Hee säd: “Junt haben se von Malawi fuatjeschekjt, un en Maurizius wullen se junt uk nich, un nu kom jie hiahan, wäajen jie jleewen, junt kjemt daut ut.” Anne funk fuaz aun to roaren. Daut späad sikj soo, daut wie noanich welkom wieren. Ekj docht bie mie soo: “Ekj wudd jleichen fuaz trigj no Enjlaunt to reisen!” Oba irjentwanea leeten de Beaumte ons dan eene Nacht em Betel bliewen, met de Bedinjunk, daut wie näakjsten Dach wudden nu äare Offiz komen. Wie wieren sea meed, oba wie vetruden wieda opp Jehova siene Help. Dän näakjsten Dach no Meddach wia wie sea äwarauscht, aus wie de Frieheit kjrieejen, daut wie en Simbabwe kunnen aus Jast bliewen. Ekj woa nienich vejäten, woo ekj mie dän Dach feeld, wiels ekj wia mie gaunz secha, daut Jehova ons dän Wajch jewäsen haud.

En daut Betel von Simbabwe kjrieech ekj de Oppgow, en de Deenstaufdeelunk to schaufen, waut sikj om Malawi un Mosambik kjemmad. De Breeda en Malawi worden sea vefolcht. Poat von miene Oabeit wia, de Berechten to äwasaten, waut de Kjreisoppsechtasch von Malawi schekjten. Aus ekj eenen Owent bat lot schauft, om dän Berecht foadich to moaken, läsd ekj, woo grausom onse Breeda doa behaundelt worden, un ekj must eefach aunfangen to roaren. * Oba to seenen, woo tru un staunthauft onse Breeda doa wieren, jinkj mie sea to Hoaten (2. Kor. 6:4-5).

Wie deeden aules, waut wie kunnen, om de Breeda, waut noch en Malawi wieren, met jeisteljet Äten to vesorjen uk dee, waut sikj fuatjebrocht hauden no Mosambik. De Äwasata, waut opp Chichewa äwasaten deeden, dee Sproak, waut en Malawi daut mieeschte jerät wort, trocken om no Simbabwe, no eenen Brooda sienen Foarm. Hee wia soo leeftolich, daut hee fa de Breeda Hiesa bud un uk eene Offiz, wua dee schaufen kunnen. Doa kunnen dee dan wieda biblische Bieekja äwasaten, waut soo needich fälden.

Wie rechten daut soo en, daut de Kjreisoppsechtasch von Malawi jieda Joa no Simbabwe komen kunnen fa dän Bezirkskongress opp Chichewa. Doa kjrieejen dee dan de Rädplons fa dän Kongress. Soo kunnen dee de Breeda en Malawi soo goot aus mäajlich von dän Kongress vetalen, wan dee wada trigj doahan reisden. Opp eene Sauz, aus de Kjreisoppsechtasch wada no Simbabwe kjeemen, plond wie eene Kjennichrikjsdeenst-School, om dise äwanämende Kjreisoppsechtasch Moot tootospräakjen.

En Feebawoa aune 1975 reisd ekj no de Loagasch fa Flichtlinja en Mosambik, wua Breeda von Malawi wieren. De Breeda doa rechten sikj no de nieste Aunwiesungen von de Organisazion, biejlikj uk de niee Aunwiesunk, daut jieda Vesaumlunk miere Eltestasch haft. De niee Eltestasch doa hauden väl Sachen jeplont. Doa wia met en, daut doa Räden jehoolen worden, daut dee daut Woaktorm-Studium hauden, sikj äwa dän Varsch fa dän Dach unjahilden, un dee hauden mau rajcht Kongressen. Dee hauden daut doa bie de Loagasch krakjt soo, aus wie daut opp de Kongressen haben. Biejlikj hauden dee doa de Reinjunks-Aufdeelunk, deelden doa Äten ut, un uk de Aufdeelunk fa de Sechaheit. Dise true Breeda kunnen soo väl tostaund brinjen met Jehova siene Help. Aus ekj doa veleet, haud ekj bloos sea väl Moot jekjräajen.

Meist aum Enj von de 1970ja Joaren kjemmad sikj daut Betel von Sambia dan om daut Woakj en Malawi. Oba ekj docht doawäajen noch foaken äwa de Breeda en Malawi no un bäd fa dee, soo aus väle aundre daut uk deeden. Aus Brooda von daut Betelkommitee en Simbabwe troff ekj mie foaken met veauntwuatliche Breeda von de Hauptoffiz, von Malawi, Sied-Afrika un Sambia, un jiedatsmol räd wie emma doaräwa, waut wie noch fa de Breeda un Sestren en Malawi doonen kunnen.

Met de Tiet leet daut dan dolla no met de Vefoljunk. Breeda, waut sikj von Malawi fuatjebrocht  hauden, trocken soo bie sacht wada trigj, un dee, waut en Malawi wieren soo grausom behaundelt worden, hauden nich mea soo väl Vefoljunk. Eenje Nobalenda leeten daut wada, daut Jehova siene Zeijen doa prädjen un sikj vesaumlen kunnen. Mosambik deed daut uk aune 1991. Oba wie wundaden emma: “Wanea woaren Jehova siene Zeijen en Malawi frie sennen?”

Met de Tiet endat sikj daut en Malawi uk, un aune 1993 jeef de Rejierunk Jehova siene Zeijen wada de Frieheit. Fuaz no daut räd ekj met eenen Missionoa, un dee fruach mie: “Woa jie nu wada trigj no Malawi?” Ekj wia to dee Tiet aul 59 Joa, soo ekj säd to dän: “No, ekj sie too oolt!” Oba noch aun dänselwjen Dach kjrieej wie eene Norecht vom Väastaunt, un dee fruagen ons, aus wie wada wudden jleichen trigjtogonen.

Wie jleichten onse Oppgow en Simbabwe sea, un doawäajen wia daut fa ons nich eene leichte Entscheidunk. Wie hauden ons doa aul sea hanjewant un hauden doa goode Frind, waut wie aul lang kjanden. De Väastaunt wia sea leeftolich to ons un säd, daut wie uk kunnen en Simbabwe bliewen, wan wie wullen. Soo, wie wudden goot haben kunt onsen ieejnen Wajch wälen un doa bliewen. Oba ekj docht dan aun daut Biespel von Abraham un Sara, waut äa jemieteljet Tus veleeten, aus see aul oolt wieren un sikj von Jehova leiden leeten (1. Mo. 12:1-5).

Wie leeten ons dan von Jehova siene Organisazion leiden un dän 1. Feebawoa aune 1995 jinj wie wada trigj no Malawi. Daut wieren rein krakjt 28 Joa von don, aus wie doa mol toom ieeschte Mol hankjeemen. Doa wort dan een Betelkommitee oppjestalt, wua ekj un twee aundre Breeda met en wieren, un wie fungen aun, daut Woakj von Jehova siene Zeijen doa wada em dreien to kjrieen.

Daut wia werkjlich scheen to seenen, woo Jehova daut Woakj doa waussen leet. Daut jeef bosich mea Vekjindja! Aune 1993 wieren doa ojjefäa 30 000 Vekjindja, un aune 1998 wieren daut aul äwa 42 000. * De Väastaunt jeef de Frieheit, daut doa kunn een nieet Betel jebut woaren, wäajen daut Woakj soo groot wia. Wie koften 12 Hekta (30 Aka) Launt en Lilongwe, un ekj wort Poat von daut Kommitee fa dit Buwoakj.

Daut Betel doa wort en Mei aune 2001 enjesäajent, un Brooda Guy Pierce vom Väastaunt hilt de Räd. Doa wieren äwa 2 000 Breeda un Sestren von Malawi, un de mieeschte wieren aul äwa 40 Joa  jedeept. Dise true Breeda un Sestren hauden en aul dise Joaren sea schwoaret beläft, aus daut Woakj doa veboden wia. Em tieteljen wieren dee oam, oba sea rikj em jeisteljen. Un nu freiden dee sikj, daut dee kunnen äa nieet Betel beseenen! Aulawäajen wua dee em Betel hanjinjen, wieren Kjennichrikjsleeda to hieren, oba dee worden soo jesungen, aus daut en Afrika Mood es. Daut wia daut scheenste, waut ekj jeemols beläft hab. Daut wia een kloara Bewies doafäa, woo Jehova deejanje säajent, waut am en schwoare Tieden tru bliewen.

Aus daut Betel foadich wia, wort ekj foaken enjelot, de Räd to hoolen, wan een Vesaumlungshus enjesäajent wort. De Vesaumlungen en Malawi kjeem daut sea togood, aus de Organisazion daut Program oppstald, en oame Lenda bosich Vesaumlungshiesa to buen. Ea muaken eenje Vesaumlungen Däakja von Eukalyptus-Beem. Fa daut Dak neemen dee Dakjen von jeflochtnet Grauss, un de lange Benkjen muaken se von Blott. Oba nu brennen de Breeda flietich Tieejlen met äare Owes, waut see selfst jemoakt haben, un doamet moaken see schmocke Vesaumlungshiesa. Oba see jleichten daut doawäajen noch emma dolla, Benkjen to haben, wiels soo aus se sajen: “Opp eene Benkj haft emma noch eena mea Rum!”

Daut es fa mie uk sea scheen jewast to seenen, woo Jehova Menschen halpt, em jeisteljen verauntokomen. Ekj wia besonda vewundat, woo junge afrikaunische Breeda wellich reed wieren mea to doonen, un woo bosich dee veraunkjeemen, doaderch daut dee von de Organisazion utjelieet worden. Dee neemen dan em Betel un enne Vesaumlungen mea Veauntwuatunk opp sikj. De Vesaumlungen worden em jeisteljen uk jestoakjt, doaderch daut en Malawi mea Kjreisoppsechtasch aunjestalt worden, un väle von dee wieren befriet. Soone Lied aus daut worden sikj eenich, nich Kjinja to haben, om mea fa Jehova to doonen, wan de mieeschte Menschen, un mau rajcht dee äare Famieljes, doamet räakjnen, daut Ehelied Kjinja haben.

Nodäm daut wie 52 Joa en Afrika wieren, kjrieech ekj Trubbel met de Jesuntheit. Daut Betelkommitee säd, daut daut wudd goot sennen, wan wie wudden trigj no daut Betel en Enjlaunt gonen, un de Väastaunt wia doamet envestonen. Wie wieren een bät mootloos doaräwa, wäajen wie jleichten daut doa sea, oba de Betelfamielje en Enjlaunt kjemmat sikj sea goot om ons, nu daut wie aul oolt sent.

Ekj sie mie secha, daut daut de baste Entscheidunk en mien Läwen wia, mie von Jehova leiden to loten. Wan ekj mie bloos haud opp mie selfst veloten, dan wudd mien Läwen nu gaunz aundasch sennen. Jehova wist emma, woo hee mie kunn “dän rajchten Wajch wiesen” (Spr. 3:5-6). Aus een junga Maun wia ekj sea hinjaraun doano, daut ekj mie wull en eene Oabeit krakjt utlieren loten en eene groote Fabrikj. Oba Jehova siene Organisazion haud eene jeistelje Oabeit fa mie, waut mie väl tofrädna muak. Jehova to deenen wia fa mie – un es noch emma – daut wichtichste en mien Läwen jewast!