1. Waut es Gottesforcht, un wuarom sell wie dee haben, wan wie Jehova leewen?

WIE leewen Gott, oba wie ferchten dän uk. Paust daut toop? Daut wie Gott ferchten, meent nich, daut wie fa dän Angst haben. Wie woaren nu von eene besondre Sort Forcht räden. Deejanje, waut Gottesforcht haben, haben Ieaforcht un Respakjt fa am. Dee wellen nuscht doonen, waut äa Voda em Himmel nich jleicht, wäajen dee met am Frind bliewen wellen (Psa. 111:10; Spr. 8:13).

2. Woone twee Sachen woa wie ons unjastonen, waut met David siene Wieed en Psalm 86:11 to doonen haben?

² Läs Psalm 86:11. Wiesen dise Wieed nich, daut de trua Kjennich David wist, daut eena Gottesforcht haben must? Well wie mol seenen, woo wie daut nokomen kjennen, waut dee en sien Jebäd säd. Ieeschtlich woa wie ons een bät unjastonen, wuarom wie Ieaforcht fa Gott sienen Nomen haben sellen, un tweedens, woo wie en ons Läwen wiesen kjennen, daut wie Gott sienen Nomen respakjten.

3. Waut holp Moses woomäajlich, daut hee emma Ieaforcht fa Gott sienen Nomen haud?

³ Stal die mol väa, woo Moses sikj feeld, aus hee en eene Heel wia un en eene Vision sach, woo harlich Jehova wia. Secha wia daut waut gaunz butajeweeneljet fa am! Jehova räd woomäajlich derch eenen Enjel to Moses un  säd: “De HAR. De HAR es Gott, metliedent, voll Jnod, nich leicht doll, un sea leeftolich un truhoatich. Ekj hab truhoatje Leew fa dusende Jennerazionen, daut ekj june Sind, jun beeset benämen, un jun wadaspanstjet vejäw” (2. Mo. 33:17-23; 34:5-7). Secha must Moses aun dise Vision denkjen, wan hee Jehova sienen Nomen brukt. Doawäajen es daut nich toom wundren, daut hee lota to Gott sien Volkj säd, daut see “disen wundavollen un furchtboaren Nomen . . . ieren” sullen (5. Mo. 28:58).

4. Waut kaun ons halpen, noch mea Ieaforcht fa Jehova to haben?

⁴ Wan wie aun Jehova sienen Nomen denkjen, dan sell wie uk doaräwa nodenkjen, woo Jehova es. Wie kjennen äwa siene Macht, Weisheit, Jerajchtichkjeit un Leew nodenkjen un uk äwa siene aundre Ieejenschoften. Dan woa wie noch mea Ieaforcht fa am haben (Psa. 77:12-16).

5-6. (a) Waut bediet Gott sien Nomen? (b) Waut deit Jehova no 2. Mose 3:13-14 un Jesaja 64:7 no, daut sien Wellen derchjefieet woat?

⁵ Waut weet wie von Gott sienen Nomen? No daut no, waut väl Jelieede sajen, bediet de Nomen Jehova “Hee lat woaren”. Daut paust met daut toop, daut Jehova aules doonen kaun, waut hee well, un daut am doa nuscht von aufhoolen kaun. Woo schauft daut?

⁶ Daut es mäajlich, wäajen Jehova to aules woaren kaun, waut doa needich es, daut sien Wellen sikj erfelt (läs 2. Mose 3:13; 3:14, NW *). Es daut nich sea intressaunt? Doawäajen sajcht daut en onse Bieekja foaken, daut wie doaräwa nodenkjen sellen, woo besonda Gott es. Jehova kaun daut uk bat doa brinjen, daut onvolkomne Menschen to aules woaren, waut doa needich es, om am to deenen un sienen Wellen to doonen (läs Jesaja 64:7). Soo kjemt Jehova doafäa opp, daut sien Wellen jedonen woat, un daut jeft nuscht, waut am doavon aufhoolen kaun (Jes. 46:10-11).

7. Waut kjenn wie doonen, daut wie onsen himlischen Voda noch mea räakjnen?

 ⁷ Wie woaren onsen himlischen Voda noch mea räakjnen, wan wie doaräwa nodenkjen, waut hee aul jedonen haft un waut wie doonen kjennen, wiels hee ons halpt. Wan wie biejlikj mol kjikjen, woo wundascheen Jehova aules jemoakt haft, dan weet wie ons Wunda meist nich uttospräakjen (Psa. 8:4-5). Un wan wie doaraun denkjen, waut wie doonen kjennen, wiels Jehova ons halpt sienen Wellen to doonen, dan kjrie wie grooten Respakjt fa am. Jehova sien Nomen es werkjlich butajeweenlich, wäajen doa aules met en es, waut ons himlischa Voda jedonen haft un woo hee es un waut hee noch doonen woat (Psa. 89:8-9).

8. Woo denkjt Jehova äwa sienen Nomen, soo aus 5. Mose 32:2-3 sajcht?

⁸ Jroz ea de Israeliten en daut vesproakne Launt nenkjeemen, lieed Jehova Moses een Leet (5. Mo. 31:19). Un Moses sull daut dan de Israeliten lieren (läs 5. Mose 32:2-3). No dise Varzh no wull Jehova nich, daut sien Nomen unjare Dakj jehoolen wort, soo aus wan dee too heilich wia toom utspräakjen. Hee well, daut aule sienen Nomen kjanen! Woo scheen wia daut nich fa de Israeliten, daut Moses an von Jehova un von sienen harlichen Nomen lieed. Daut jeef dee Krauft un frescht dee opp, krakjt soo aus een feina Soddaräajen daut Grauss. Woo kjenn wie aundre uk soo lieren?

9. Woo kjenn wie methalpen, daut Gott sien Nomen jeheilicht woat?

⁹ Wan wie prädjen, dan kjenn wie de Schreft brucken, om de Menschen uttolajen, daut Gott eenen Nomen haft un daut dee Jehova heet. Wie kjennen an feine Bieekja un Videos ooda Artikjels von onse Websied wiesen, waut Jehova ieren. Un veleicht kjenn wie uk bie de Oabeit, en de School ooda hinjawäajes aundre von onsen leeftoljen Gott vetalen un woo hee es. Wan wie dee vetalen, woo väl feinet Jehova fa ons un fa de Ieed doonen woat, dan woaren dee veleicht toom ieeschte Mol en, woo väl Jehova ons räakjent. Wan wie aundre de Woarheit äwa onsen leeftoljen Voda lieren, dan halp wie met, daut Gott sien Nomen jeheilicht woat. Un wie halpen de Menschen entoseenen, daut see väl Läajes äwa Gott jelieet haben. Sest nuscht kaun dee soo sea oppfreschen un Krauft jäwen aus daut, waut wie dee ut de Schreft lieren (Jes. 65:13-14).

10. Wuarom es daut nich jenuach, wan wie onse Bibelschiela bloos lieren, waut Gott von an velangt?

¹⁰ Wan wie met wäm de Bibel studieren, dan well wie dänjanjen Jehova sienen Nomen lieren un halpen dän to brucken. Un wie wellen uk, daut dee Jehova goot kjanen lieet. Wudd daut jenuach sennen, wan wie dän bloos lieren wudden, waut Jehova von siene Deena velangd? Een Bibelschiela weet boolt, waut Gott siene Jebooten sent, un jleicht dee woomäajlich uk. Oba woat dee soone groote Leew fa Jehova haben, daut dee dän jehorchen well? Eva kjand je Gott siene Jebooten uk, oba see leewd Gott nich opp iernst. Un bie Adam wia daut krakjt soo (1. Mo. 3:1-6). Doawäajen rieekjt daut nich too, wan wie aundre bloos lieren, waut Gott von siene Deena velangt.

11. Woo kjenn wie wäm halpen Jehova to leewen, wan wie dän von Jehova siene Jesazen lieren?

¹¹ Jehova siene Jesazen sent ons emma toom gooden (Psa. 119:97, 111-112). Oba onse Bibelschiela woaren daut veleicht  nich vestonen, wan dee daut nich lieren, daut Jehova ons dee ut Leew jeef. Doawäajen kjenn wie dee froagen: “Waut jleefst du, wuarom haft Gott ons dit Jeboot jejäft ooda waut aundret aufjesajcht? Waut lieet ons daut von Gott?” Wan wie dee halpen, äwa Jehova notodenkjen un sienen grooten Nomen opp iernst to leewen, dan kjenn wie dee leichta to Hoaten räden. Dan woaren dee nich bloos Jehova siene Jesazen leewen, oba uk Jehova (Psa. 119:68). Dee äa Gloowen woat stoakja woaren un dee woaren en schwieeje Proowen tru bliewen kjennen (1. Kor. 3:12-15).

12. Woo kjeem daut bat doa, daut David sien Hoat sikj opp twee Sieden stald, un woo kjeem daut ut?

¹² De Kjennich David schreef en Psalm 86:11 waut sea wichtjet. Doa säd hee: “Hool mien Hoat bie daut eene”. David haud daut selfst beläft, woo leicht daut wia, daut ons Hoat sikj opp twee Sieden stald. Aus hee mol oppem Dak von sienen Paulaust wia, sach hee eenen aundren Maun siene Fru, waut sikj jroz boden deed. Wia David sien Hoat dan gaunz opp Jehova siene Sied? Hee wist je, daut Jehova jesajcht haud: “Lot junt nich daut jankren, waut de Noba haft, . . . nich siene Fru” (2. Mo. 20:17). Oba hee kjikjt doa doawäajen nich fuat. Sien Hoat stunt opp twee Sieden: Am jankad de Fru Batseba un hee wull oba uk Jehova jefaulen. Hee haud Jehova aul lang jeleeft un jedeent, un doch jinkj hee sien schlajchtet Velangen no un deed waut sea orrajchtet. Daut brocht Schaund opp Jehova sienen Nomen. Un David siene Famielje un aundre musten doa sea unja lieden (2. Sam. 11:1-5, 14-17; 12:7-12).

13. Woo weet wie, daut David sien Hoat nich fa emma opp twee Sieden stunt?

¹³ Jehova wees David trajcht un dee kunn wada sien Frint woaren (2. Sam. 12:13; Psa. 51:4-6, 19). David hilt em Denkj, woo schlajcht daut utkjeem, aus sien Hoat opp twee Sieden stunt. Siene Wieed en Psalm 86:11 wudd eena uk kjennen soo äwasaten: “Jeff mie een ojjedeeldet Hoat.” Horcht Jehova no daut, wua David am no fruach? Jo, wiels de Schreft sajcht lota, daut David “en sien Hoat . . . gaunz tru to däm HARN” wia (1. Kjen. 11:4; 15:3).

14. Waut mott wie äwalajen, un wuarom?

¹⁴ David siene Jeschicht jeft ons Moot. Oba dee es uk eene Woarnunk fa ons, wäajen wie uk mol leicht kunnen eene schwoare Sind begonen. Endoont aus wie Jehova  noch mau een Stootje deenen ooda aul joarenlank, wie motten äwalajen: “Pauss ekj opp, daut de Soton nuscht aun mien Hoat doonen kaun?”

15. Woo kaun de Gottesforcht ons halpen, wan wie Bilda seenen, waut ons opp orreine Jedanken brinjen?

¹⁵ Waut deist du biejlikj, wan du en eenen Film ooda em Internet een Bilt sitst, waut die opp orreine Jedanken brinjen kunn? Eena wudd leicht kjennen denkjen, daut daut nuscht deed, wiels daut nich werkjlich een noaktjet Bilt wia. Oba wudd de Soton daut nich kjennen brucken toom waut aun dien Hoat doonen? (2. Kor. 2:11). Soon Bilt es soo aus een Beitel, waut eena brukt toom eenen grooten Kjneppel spoolen. Ieeschtlich deit eena de schoape, spetze Kaunt em Holt nenschlonen. Un wan eena dän Beitel wieda nenschleit, dan spoolt de gaunza Kjneppel. Kjennen Bilda, waut ons opp orreine Jedanken brinjen, krakjt soo sennen aus de spetze Kaunt von dän Beitel? Daut fangt kjlien aun un lat nich no waut schlemmet, oba daut kaun eenem bat doa brinjen, jäajen Jehova to sindjen. Doawäajen sell wie nuscht orreinet en ons Hoat nenloten! Well wie ons eenich sennen, Jehova sienen Nomen met ons gaunzet Hoat to ferchten!

16. Waut sell wie äwalajen, wan wie vesocht woaren?

¹⁶ Oba de Soton vesieekjt ons uk noch met aundre Sachen. Waut doo wie dan? Eena wudd leicht kjennen denkjen: “Daut deit je nuscht. Wäajen daut wudd je ekj nich utjeschloten woaren. Dan kaun daut doch nich soo schlemm sennen.” Wäa soont denkjt, brinjt sikj en groote Jefoa. Daut wudd väl bäta sennen to äwalajen: “Brukt de Soton dise Vesieekjunk toom waut aun mien Hoat doonen? Wudd ekj opp Jehova sienen Nomen Schaund brinjen, wan ekj mien orrajchtet Velangen nojinkj? Wudd  ekj Gott derch daut noda komen ooda wudd ekj am wieda aufkomen?” Denkj äwa dise Froagen no un bäd Jehova om Weisheit, daut du dee opprechtich beauntwuaten kaust (Jak. 1:5). Daut kaun een groota Schutz fa die sennen. Wuarom? Wiels du die dan gaunz eenich sennen woascht, nuscht orrajchtet to doonen. Du kaust dan krakjt soo sajen aus Jesus: “Wajch met die, Soton!” (Mat. 4:10).

17. Wuarom helt een Hoat, waut opp twee Sieden steit, nich väl en? Met waut jeit daut to vejlikjen?

¹⁷ Een Hoat, waut opp twee Sieden steit, helt nich väl en. Stal die mol väa, doa es eene Grupp, waut Baul spälen wellen. Eenje von dee woaren unjarenaunda nich fein foadich. Aundre wellen emma daut väaschte sennen, un noch de aundre hoolen sikj nich aun de Räajlen. Un waut aundre rechten sikj nich no dän Leida. Dise Grupp woat secha nich jewennen. Oba eene Grupp, wua see aula toopschaufen, woat fein wiedakomen. Ons Hoat kaun soo sennen aus dise goode Grupp, wan onse Jedanken, Wenschen un Jefeelen aula toopschaufen, om Jehova to deenen. De Soton wudd daut jleichen, waut aun ons Hoat to doonen. Hee well, daut onse Jedanken, Wenschen un Jefeelen jäajen daut schaufen, waut Jehova fa rajcht talt. Oba wie motten Jehova met ons gaunzet Hoat deenen (Mat. 22:36-38). Well wie emma no ons Hoat oppaussen!

18. To waut best du die eenich, soo aus Micha 4:5 sajcht?

¹⁸ Well wie krakjt soo bäden aus David. Hee säd: “Hool mien Hoat bie daut eene, daut ekj dienen Nomen ferchten woa.” Strenj die aun, daut notokomen. Aun diene Entscheidungen saul emma to seenen sennen, daut du groote Ieaforcht fa Jehova sienen heiljen Nomen hast un eent von siene Zeijen best. Dan woascht du am eenen gooden Nomen moaken (Spr. 27:11). Un du woascht kjennen mank dee sennen, waut dän Profeet Micha nodoonen. Dee säd: “Wie woaren opp emma soo läwen, aus ons HAR un Gott daut haben well” (Micha 4:5).