En Galata 5:22-23 rät daut von näajen goode Ieejenschoften. Doa sajcht daut: “Dän Jeist siene Frucht es Leew, Freid, Fräd, Jedult, Frintlichkjeit, gootjesonnen sennen, Gloowen, Jelindichkjeit un Selfstbeharschunk.” Oba dit sent nich de eensje goode Ieejenschoften, waut eena derch Gott sienen Jeist kjrieen kaun.

Woo weet wie daut? Well wie mol seenen, waut de Apostel Paulus säd, jroz ea hee von dän Jeist siene Frucht räd. Hee schreef: “Waut daut Fleesch fa Woakjen haft es kloa: doa es Ehebruch, Huararie, Onreinheit, onbandjet Läwen, Aufjettarie, Zaubarie, Fientschoft, Striet, Habsucht, Wutt, nosikj sennen, Zank, Spoolarie, Aufgonst, Mort, supen, un fräten un soowaut mea” (Gal. 5:19-21). No daut no jeft daut uk noch aundret, waut to de Woakjen von daut Fleesch jehieet, biejlikj daut, wua Kolossa 3:5 von rät. Un aus Paulus dan von de näajen Ieejenschoften von dän Jeist siene Frucht räd, jeef hee uk auntovestonen, daut doa noch mea goode Ieejenschoften met en wieren. Hee säd je: “Jäajen soone es daut Jesaz nich.”

Wie kjennen daut noch bäta vestonen, wan wie dän Jeist siene Frucht met daut vejlikjen, waut Paulus to de Vesaumlunk en Efesus säd. Hee schreef: “Daut Licht brinjt goodet, Jerajchtichkjeit un Woarheit verendach” (Efs. 5:8-9). Daut wiest, daut bie daut, waut “daut Licht . . . verendach [brinjt]”, un uk bie “dän Jeist siene Frucht” “goodet”, ooda “gootjesonnen sennen”, un Jerajchtichkjeit un Woarheit met en sent.

Paulus säd uk mol to Timotäus, daut hee sull no sas goode Ieejenschoften sträwen. Hee schreef: “Sträw no daut Goode, no Jerajchtichkjeit, no Gloowen, no Leew, un sie jeduldich un gootmeenent!” (1. Tim. 6:11). Vea von dise Ieejenschoften (Gloowen, Leew, Jedult un gootmeenent sennen, ooda Jelindichkjeit) jehieren to “dän Jeist siene Frucht”. Oba Timotäus sull je uk no daut goode un no Jerajchtichkjeit sträwen – un secha wist hee, daut hee daut onen dän heiljen Jeist nich wudd doonen kjennen (see uk Kolossa 3:12; 2. Petrus 1:5-7).

Wie kjennen seenen, daut Galata 5:22-23 nich von aule Ieejenschoften rät, waut Christen haben sellen. Gott sien Jeist kaun ons halpen, daut wie de näajen Ieejenschoften haben, waut to “dän Jeist siene Frucht” jehieren. Oba doa sent noch mea Ieejenschoften needich, daut wie kjennen stoakje Christen un “niee Menschen woaren, dee no Gott sienem Bilt en Jerajchtichkjeit un Heilichkjeit jeschaufen sent” (Efs. 4:23-24).