1-2. (a) Wuarom jeft ons daut Moot, daut väl Breeda tru en soone Jäajent prädjen, wua de Menschen nich horchen wellen? (See daut Bilt aum Aunfank.) (b) Waut säd Jesus äwa daut prädjen en siene Omjäajent? (See de Footnoot.)

SERGIO UN OLINDA sent een Poa Lied von de Stäts. Dee sent aul enne 80 Joa un sent beid Pionia. De latste Tiet felt dee daut schwanda to gonen, wäajen an de Been weedoonen. Oba dee gonen doawäajen jieda Vermeddach no eene Städ enne Staut, wua väl Menschen vebiekomen un wua uk de Bossen dicht bie stellhoolen. Klock säwen stonen dee doa aul un beeden de Menschen biblische Bieekja aun, un daut doonen dee aul fa väl Joaren. De mieeschte Menschen jäwen nich väl om dee rom, oba dee bliewen doawäajen tru opp äare Städ un kjikjen schaftich no deejanje, waut no an kjikjen. Opp Meddach gonen dee gaunz langsom wada no Hus. Un näakjsten Dach Klock säwen zemorjes sent dee wada doa. Soo doonen dee daut sas Doag de Wäakj jieda Vermeddach un daut daut gaunze Joa derch.

² Soo aus Sergio un Olinda jeft daut väl true Breeda un Sestren, waut aul joarenlank en soone Jäajent prädjen, wua de mieeschte  nich horchen wellen. Wan daut bie die uk soo es, dan low wie die sea, wiels du soo bestendich best. * Dien goodet Biespel jeft väl Breeda Moot un mau rajcht soone, waut Jehova aul väl Joaren deenen. Een Kjreisoppsechta sajcht biejlikj: “Wan ekj met soone true Breeda un Sestren toop em Deenst sie, kjrie ekj niee Krauft.” Een aundra sajcht: “Daut dee soo tru sent, halpt mie wiedatomoaken un en mienen Deenst mootich to bliewen.” Noch een aundra sajcht: “Dee äa goodet Biespel jeit mie sea to Hoaten.”

3. Äwa woone dree Froagen woa wie nu räden, un wuarom?

³ En disen Artikjel woa wie äwa dree Froagen räden: Wuarom woa wie eenjemol mootloos? Woo kjenn wie Frucht brinjen? Waut kaun ons halpen, wieda jeduldich Frucht to droagen? De Auntwuaten opp dise Froagen kjennen ons halpen mootich wiedatoprädjen, soo aus Jesus ons daut oppjejäft haft.

4. (a) Woo feeld Paulus sikj doaräwa, daut de mieeschte Juden nich horchen wullen? (b) Wuarom feeld Paulus sikj soo?

⁴ Wan wie mol mootloos sent, wäajen de Menschen nich no de goode Norecht horchen wellen, dan kjenn wie vestonen, woo dän Apostel Paulus daut jinkj. Hee prädijd soo bie 30 Joa un holp väl Menschen, Jesus siene Jinja to woaren (Apj. 14:21; 2. Kor. 3:2-3). Oba bie de Juden kunn hee nich väl aunfangen. De mieeschte weesen Paulus auf un eenje vefoljden dän mau rajcht (Apj. 14:19; 17:1, 4-5, 13). Woo feeld Paulus sikj doaräwa, daut de Juden nich horchen wullen? Hee säd: “Ekj saj junt de Woarheit en Christus . . . daut ekj soo . . . besorcht sie, daut mie daut Hoat Dach un Nacht wee deit” (Reem. 9:1-3). Wuarom feeld Paulus sikj soo? Wäajen hee dän Prädichtdeenst un de Menschen sea jleicht. Paulus wia sea om de Juden bekjemmat un am deed daut wee, wan hee sach, daut dee Gott siene Jnod nich aunneemen.

5. (a) Wuarom doo wie de Menschen prädjen? (b) Wuarom es daut nich toom wundren, daut wie noch mol mootloos sent?

⁵ Soo aus Paulus doo wie de Menschen prädjen, wäajen wie opp iernst om dee bekjemmat sent (Mat. 22:39; 1. Kor. 11:1). Wie haben daut selfst beläft, woo väl Säajen daut brinjt, wan eena Jehova deent. Un wie wellen aundre halpen, daut dee daut uk beläwen kjennen. Doawäajen rod wie dee emma wada too, de Woarheit äwa Jehova to lieren un uk waut hee sikj met de Menschen väajenomen haft. Daut es soo, aus wudd wie to de Menschen sajen: “Wie haben een besondret Jeschenkj fa junt. Toom Jefaulen, nämt daut aun.” Un wan dee daut nich wellen, dan es daut nich toom wundren, daut ons “daut Hoat . . . wee deit”. Daut bediet oba nich, daut ons Gloowen schwak es. Daut wiest eefach, daut wie dän Prädichtdeenst un de Menschen sea jleichen. Doawäajen hia wie nich opp to prädjen, wan wie uk mol mootloos sent. Veleicht jeit ons daut soo aus Elena, waut aul mea aus 25 Joa Pionia es. See sajcht: “Mie felt daut prädjen schwoa, oba daut jeft doawäajen nuscht, waut ekj leewa doonen wudd aus daut.”

6. Waut vonne Froag woa wie beauntwuaten, un woo woa wie daut doonen?

⁶ Wuarom kjenn wie ons secha sennen, daut wie em Deenst Frucht brinjen kjennen, endoont wua wie prädjen? De Auntwuat opp dise wichtje Froag woa wie finjen,  wan wie twee von Jesus siene Jlikjnisen betrachten, wua hee doavon rät, daut et needich es Frucht to droagen (Mat. 13:23). Daut ieeschte Jlikjnis haundelt sikj von eene Wienstud.

7. (a) Wäa sent “de Wiengoadna”, “de . . . Wienstud” un “de Ranken”? (b) Woone Froag fält ons noch to beauntwuaten?

⁷ Läs Johanes 15:1-5, 8. Jesus säd to siene Apostel: “Mien Voda woat doaderch jeieet, wan jie väl Frucht brinjen un miene Jinja woaren.” Jesus säd, Jehova wia “de Wiengoadna”, hee selfst wia “de rajchte Wienstud” un siene Jinja wieren “de Ranken”. * Oba waut wia de Frucht, waut Jesus siene Nofolja brinjen sullen? En dit Jlikjnis säd Jesus daut nich krakjt, oba hee säd waut, waut ons halpt to vestonen, waut de Frucht wia.

8. (a) Wuarom kaun de Frucht en dit Jlikjnis nich een Bilt sennen fa de niee Jinja? (b) Wudd Jehova waut von ons velangen, waut wie nich doonen kunnen? Laj daut ut.

⁸ Jesus säd äwa sienen Voda: “Aule Ranken aun mie, dee nich Frucht droagen, schnitt hee auf.” Daut bediet, Jehova talt ons bloos fa siene Deena, wan wie Frucht droagen (Mat. 13:23; 21:43). Doawäajen kaun de Frucht, waut jieda Christ droagen mott, nich een Bilt sennen fa de Lieelinja, ooda de niee Jinja, waut dee moakt (Mat. 28:19). Sest wudd je daut bedieden, daut aul de true Vekjindja, waut noch kjeenem haben kunt halpen Jesus notofoljen, soo wieren aus de Ranken, waut nich Frucht druagen. Oba daut kaun nich soo sennen, wiels wie kjennen je kjeenem bemotten, Jesus notofoljen. Jehova es een leeftolja Gott. Hee wudd kjeenmol waut velangen, waut wie nich doonen kunnen. Hee velangt von ons bloos soont, wuatoo wie emstaunt sent (5. Mo. 30:11-14).

9. (a) Woo kjenn wie Frucht droagen? (b) Äwa woon Jlikjnis woa wie räden, un wuarom?

⁹ Waut bediet daut dan, Frucht to droagen? Daut mott waut sennen, waut jieda eena von ons doonen kaun. Waut haft Jehova aul siene Deena oppjejäft? Dee sellen daut Evangelium von Gott sien Rikj prädjen (Mat. 24:14). * Jesus sien Jlikjnis von dän Maun, waut doa seid, moakt daut uk dietlich, waut daut bediet, Frucht to droagen. Well wie mol een bät äwa dit Jlikjnis räden.

10. (a) Waut stald de Sot un de Ieed en dit Jlikjnis väa? (b) Waut jeft daut von eene Weitstud?

¹⁰ Läs Lukas 8:5-8, 11-14; 8:15, Friesenbibel. * En daut Jlikjnis von dän Maun, waut doa seid, wia de Sot “Gott sien Wuat”, ooda de goode Norecht von Gott sien Rikj. De Ieed stald de Menschen äa Hoat väa. De Sot, waut opp goode Ieed foll, kjrieech Wartlen un kjeem opp un wort dan biejlikj eene Weitstud. Dee “brocht 100 mol sooväl” Frucht. Oba waut vonne Frucht jeft daut von eene Weitstud? Kjliene Weitstiedakjes? Nä, daut jeft fresche Sot, waut met de Tiet waust un to Weitstieda woat. En dit Jlikjnis jeef daut von een Kuarn 100 Kjieena. Waut haft dit met onsen Deenst to doonen?

11. (a) Waut haft daut Jlikjnis von dän Maun, waut doa seid, met onsen Deenst to doonen? (b) Woo brinj wie niee Sot verendach?

¹¹ Aus onse christelje Elren ooda aundre Breeda ons von Gott sien Kjennichrikj lieeden,  deeden dee soo to sajen Sot en goode Ieed plaunten. Dee freiden sikj sea, aus dee enworden, daut wie de goode Norecht aunneemen. Dise Sot woss emma wieda, bat dee schlieslich Frucht druach. Un soo aus de Weitstud, wua wie jroz von räden, nich niee Weitstieda drajcht, oba niee Sot, soo brinj wie nich niee Jinja verendach, oba niee Sot. * Woo doo wie daut? Jiedatsmol, wan wie aundre von Gott sien Kjennichrikj vetalen, strei wie soo to sajen von de Sot ut, waut en ons Hoat jeplaunt es (Luk. 6:45; 8:1). Soo lang aus wie de goode Norecht von daut Kjennichrikj bekauntmoaken, doo wie “Frucht brinje met Jedult”.

12. (a) Waut lia wie von Jesus siene Jlikjnisen von de Wienstud un dän Maun, waut doa seid? (b) Waut deit daut aun die, waut du von dise Jlikjnisen jelieet hast?

¹² Waut lieren ons Jesus siene Jlikjnisen von de Wienstud un dän Maun, waut doa seid? Dee halpen ons to vestonen, daut wie Frucht droagen kjennen, endoont aus de Menschen em Deenst horchen ooda nich. Wie brinjen Frucht, wan wie wiedaprädjen. Daut paust met daut toop, wua Paulus von räd. Hee säd: “Gott woat eenem jiedren doano beloonen, aus hee jeoabeit haft” (1. Kor. 3:8). Jehova woat ons doano beloonen, woo wie jeoabeit haben, un nich doano, woo väl doabie rutjekomen es. Matilda, waut aul 20 Joa Pionia es, sajcht: “Daut jeft mie väl Freid to weeten, daut Jehova daut beloont, wan wie ons aunstrenjen.”

13-14. Waut säd Paulus en Reema 10:1-2, wuarom hee nich opphieed to prädjen, wan de Menschen uk nich horchen wullen?

¹³ Waut woat ons halpen, daut wie wieda kjennen met Jedult Frucht brinjen? Soo aus wie aul jeseenen haben, wia Paulus mootloos, wiels de Juden nich no de Norecht von daut Kjennichrikj horchten. Oba Paulus hieed doawäajen nich opp dee to prädjen. En sienen Breef aun de Reema säd hee, woo hee sikj äwa de Juden feeld. Hee schreef: “Ekj wensch von Hoaten, daut Israel seelich  woaren mucht, un ekj bäd fa an to Gott. Ekj jäw an daut Zeichnis, daut see fa Gott iewren, oba see weeten nich om waut” (Reem. 10:1-2). Wuarom hieed Paulus nich opp, dee to prädjen?

¹⁴ Ieeschtens säd Paulus, daut hee de Juden wiedaprädijd, wiels hee sikj von Hoaten wenscht, daut dee jerat worden (Reem. 11:13-14). Tweedens säd hee, daut hee fa an to Gott bäd. Hee prachad Gott doarom, daut noch eenje von dee de Norecht von daut Kjennichrikj aunneemen. Un dreddens säd Paulus, daut de Juden fa Gott iewaden. Hee sach de goode Sieden von de Menschen un wist, daut de Juden, waut soo fa Gott schaufen wullen, noch mol feine Christen woaren kunnen, soo aus hee.

15. Woo kjenn wie Paulus nodoonen? Jeff Biespels.

¹⁵ Woo kjenn wie Paulus nodoonen? Ieeschtens doaderch, daut wie ons von Hoaten wenschen, deejanje to finjen, waut “to daut eewje Läwen rajcht enjestalt” sent. Tweedens doaderch, daut wie Jehova doarom prachren, daut hee de Opprechtje äa Hoat opmoakt (Apj. 13:48, NW; 16:14). Silvana, waut aul meist 30 Joa Pionia es, sajcht: “Ea ekj prädjen go, bäd ekj Jehova doarom, daut ekj rajcht äwa de Menschen denkjen kaun.” Wie froagen Jehova uk doano, daut siene Enjel ons halpen muchten, soone Menschen to finjen, waut horchen wellen (Mat. 10:11-13; Opb. 14:6). Robert, waut aul äwa 30 Joa Pionia es, sajcht: “Met Enjel tooptoschaufen, waut weeten, waut en de Menschen äa Läwen aunjeit, es waut besondret.” Dreddens see wie de Menschen äare goode Sieden un denkjen doaraun, daut dee Jehova noch mol deenen kjennen. Carl, een Eltesta, waut aul lenja aus 50 Joa jedeept es, sajcht: “Ekj kjikj, aus doa nich irjentwaut es, waut wiest, daut deejanja intressieet es, biejlikj aus dee schaftich kjikjt ooda opp iernst waut weeten well.” Wan wie dit aules nokomen, dan kjenn wie uk met Jedult Frucht droagen soo aus Paulus.

16-17. (a) Waut kjenn wie von daut lieren, waut Liera 11:6 sajcht? (b) Waut kaun ons prädjen aun dee doonen, waut ons beoobachten? Jeff een Biespel.

¹⁶ Wie sellen emma doaraun denkjen, daut daut väl aun de Menschen doonen kaun, wan wie prädjen, wan daut veleicht uk soo lat, daut dee nich horchen (läs Liera 11:6). De Menschen beoobachten ons. Dee woaren daut en, wan wie schmock aunjetrocken sent, wan wie ons fein oppstalen ooda wan wie schaftich kjikjen. Met de Tiet kaun ons goodet Vehoolen eenje bat doa brinjen, daut dee äare Meenunk äwa ons endren. Krakjt daut beläwden Sergio un Olinda, wua wie aum Aunfank von räden.

¹⁷ Sergio sajcht: “Wäajen wie krank wieren, kunn wie eene Tiet nich opp de Städ prädjen, wua wie emma deeden. Aus wie dan wada kunnen, fruagen de Menschen: ‘Wua wia jie? Wie bangden ons aul no junt.’” Un Olinda sajcht gaunz schaftich: “De Bossfoarasch bejreesten ons von ut de Boss un eenje von dee brelden to ons: ‘Jie doonen eene goode Oabeit!’ Dee fruagen mau rajcht no Bieekja.” Un Sergio un Olinda kunnen daut schia nich jleewen, aus doa een Maun no äaren Bieekjakrota kjeem un an een Wesch Bloomen jeef un sikj fa äare Oabeit bedankt.

18. Wuarom best du die eenich, met Jedult Frucht to brinjen?

¹⁸ Soo lang aus wie nich opphieren, aundre von Gott sien Kjennichrikj to vetalen, halp wie met, “aule Velkja” Zeichnis to jäwen, un daut es sea väl wieet (Mat. 24:14). Un daut scheenste es, daut wie weeten, daut Jehova met ons tofräd es, wiels hee leeft aulem, waut “Frucht brinje met Jedult”!