1. Waut openboad Jehova em Goaden Eden äwa onsen Jäajna?

ADAM wist secha, daut Schlangen nich räden kunnen. Doawäajen wia am veleicht kloa, daut et must een Enjel jewast sennen, waut derch de Schlang met Eva räd (1. Mo. 3:1-6). Adam un Eva wisten to sajen nuscht äwa disen Enjel. Oba Adam wort sikj doawäajen eenich, sikj opp dän siene Sied to stalen un sienen leeftoljen Voda em Himmel dän Rigjen to dreien (1. Tim. 2:14). Jehova funk dan fuaz aun, eenjet äwa disen schlajchten Enjel to openboaren, waut Adam un Eva veleit haud, un vespruak, daut dee noch wudd venicht woaren. Oba Jehova säd uk, ea daut bat doa wia, wudd dis Jäajna, waut derch de Schlang jerät haud, sikj jäajen deejanje stalen, waut Gott leewden (1. Mo. 3:15).

2-3. Waut kunn de Uasoak jewast sennen, wuarom Jehova mau weinich äwa dän Soton openboad, ea de Messias kjeem?

² Jehova haft kjeenmol jesajcht, woo dis Enjel ieeschtemma heet, waut sikj em Goaden Eden jäajen am stald. * Ieescht mol  ojjefäa 2 500 Joa lota säd Gott, wäa dis Jäajna wia (Hiob 1:6, NW). Dee es nu aus “de Soton” bekaunt, waut “Fient” bediet, un mau dree Bieekja en de Hebräische Schreften räden von dän. Daut sent 1. Chronik, Hiob un Sacharja. Wuarom wort en de Tiet ver dän Messias soo weinich von disen Jäajna jerät?

³ Woomäajlich wull Jehova dän Soton nich doamet ieren, daut et en de Hebräische Schreften aulawäajen von dän un siene Woakjen räd. De Hebräische Schreften wieren doatoo, daut de Menschen dän Messias erkjanen wudden un am nofoljen kunnen (Luk. 24:44; Gal. 3:24, NW). Aus de Messias dan ieescht kjeem, brukt Jehova dän un siene Jinja, om noch mea von dän Soton to openboaren un von de Enjel, waut sikj opp siene Sied stalden. * Dit es paussent, wäajen Jehova woat Jesus un de Jesaulwde, waut met dän toop rejieren, brucken toom dän Soton un siene Nofolja venichten (Reem. 16:20; Opb. 17:14; 20:10).

4. Wuarom sell wie nich äwamotich Angst haben fa dän Fient?

⁴ De Apostel Petrus säd, daut de Fient soo wia aus “een brellenda Leiw”, un Johanes nand dän eene “Schlang” un eenen “Droak” (1. Pet. 5:8; Opb. 12:9). Oba wie sellen doawäajen nich äwamotich Angst haben fa dän, wiels dee kaun nich aules doonen, waut am jankat (läs Jakobus 4:7). Jehova, Jesus un de true Enjel stonen ons bie, un met dee äare Help kjenn wie dän Fient wadastonen. Well wie nu mol äwa dree wichtje Froagen räden un seenen, waut wie doavon lieren kjennen: Woo väl Macht haft de Soton? Woo prooft dee aundre to veleiden? Un waut kaun de Fient nich doonen?

5-6. Wuarom kjennen de menschelje Rejierungen ons nich met de Trubbels halpen, waut ons daut mieeschte toosaten?

⁵ Een deel Enjel stalden sikj krakjt soo aus de Soton jäajen Gott. Ver de Sintflut kunn de Soton weens eenje von dee bat doa brinjen, daut dee sikj met Mejales veläwden von mank de Menschen. De Schreft rät krakjt von dit en Bildasproak, wan dee sajcht, daut de Droak een Dreddel von de Stierns aum Himmel met sikj reet (1. Mo. 6:1-4; Jud. 6; Opb. 12:3-4). Aus dise Enjel Gott siene Famielje em Himmel veleeten, stalden dee sikj unja dän Soton siene Macht. Oba dit es nich eefach bloos eene Häad Jäajna, wua jieda eena deit, waut am jankat. Biejlikj soo aus Gott sien Kjennichrikj oppjestalt haft, soo haft de Fient uk eene onsechtboare Rejierunk oppjestalt. Hee haft sikj selfst toom Kjennich jemoakt un de beese Jeista Macht un veschiedne Oppgowen jejäft un lat dee äwa dise Welt harschen (Efs. 6:12).

⁶ De Fient deit derch siene Organisazion aule Rejierungen oppe Ieed kontrollen. Daut weet wie, wäajen hee wees Jesus “aule Kjennichsrikjs en de Welt” un säd: “Dee woa ekj die aula met Macht un Harlichkjeit toop jäwen; wiels dee sent mie jejäft worden, un ekj kaun dee däm jäwen, wäm ekj well” (Luk. 4:5-6). Daut jeft doawäajen noch väl Rejierungen, waut goodet doonen un de Menschen werkjlich halpen wellen. Oba kjeene menschelje Rejierunk ooda Harscha kaun ons met de Trubbels halpen, waut ons daut mieeschte toosaten (Psa. 146:3-4; Opb. 12:12).

7. To waut brukt de Soton de Rejierungen, de faulsche Gloowes un de Haundelswelt? (See daut Bilt aum Aunfank.)

⁷ De Soton un de beese Jeista brucken nich bloos de Rejierungen, oba uk de  faulsche Gloowes un de Haundelswelt toom “de gaunze Welt” veleiden (Opb. 12:9). Derch de faulsche Gloowes vebreet de Fient Läajes äwa Jehova. Daut späat sikj uk soo, daut hee daut bat doa brinjen well, daut soo väl Menschen aus mäajlich Gott sienen Nomen vejäten (Jer. 23:26-27). Soo kjemt daut bat doa, daut eenje, waut Gott aunbäden wellen, en Werkjlichkjeit de beese Jeista aunbäden (1. Kor. 10:20; 2. Kor. 11:13-15). De Fient vebreet uk derch de Haundelswelt Läajes, biejlikj daut eena bloos dan schaftich es, wan eena väl Jelt un väl em tieteljen haft (Spr. 18:11). Soone, waut aun dise Läajes jleewen, läwen bloos noch fa “daut Rikjtum” enne Städ fa Gott (Mat. 6:24). Met de Tiet kjennen dee daut tietelje soo sea jleichen, daut et de Leew fa Gott stekjt, waut dee ea veleicht hauden (Mat. 13:22; 1. Joh. 2:15-16).

8-9. (a) Waut lieet ons de Jeschicht von Adam un Eva un von de aufjefolne Enjel? (b) Wuarom es daut goot to weeten, daut de Fient de Welt en siene Macht haft?

⁸ Waut lieet ons de Jeschicht von Adam un Eva un von de aufjefolne Enjel? Eent es, daut et bloos twee Sieden jeft, un wie motten ons fa eene entscheiden. Entwäda bliew wie Jehova tru ooda wie stalen ons opp dän Fient siene Sied (Mat. 7:13). Daut tweede es, daut deejanje, waut sikj no dän Soton rechten, doa oppe Lenjd mau weinich bie haben. Adam un Eva kunnen biejlikj selfst entscheiden, waut goot un waut schlajcht wia, un de beese Jeista kjrieejen eene jewesse Macht äwa de menschelje Rejierungen (1. Mo. 3:22). Oba wiels daut emma schlajcht utkjemt, wan eena sikj opp dän Soton siene Sied stalt, brocht daut mea Schoden opp Adam un Eva un de beese Jeista aus Nutzen (Hiob 21:7-17; Gal. 6:7-8).

⁹ Wuarom es daut goot to weeten, daut de Fient de Welt en siene Macht haft? Daut halpt ons, daut wie rajcht äwa de Rejierungen denkjen un wieda de goode Norecht prädjen. Wie weeten, daut Jehova well, daut wie de Rejierungen unjadon sent (1. Pet. 2:17). Un hee well uk, daut wie dee äare Jesazen jehorchen soo lang aus daut nich jäajen siene Jesazen jeit (Reem. 13:1-4). Oba wie weeten, daut wie ons nich en de Politikj enmischen sellen. Doawäajen stried wie nich fa eene polietische Partei, ooda Grupp, un trakjen kjeenen menscheljen Harscha väa (Joh. 17:15-16; 18:36). Wie wellen uk ons bastet doonen, om aundre de Woarheit äwa Gott to lieren, wäajen ons kloa es, daut de Fient doaropp schauft, daut de Menschen Gott sienen Nomen vejäten un schlajcht äwa dän denkjen sellen. Wie freien ons, daut wie no Gott sienen Nomen jenant sent, un wie brucken dän uk wellich. Gott to leewen es väl bäta, aus daut Jelt ooda de tietelje Sachen to leewen (Jes. 43:10, NW; 1. Tim. 6:6-10).

10-12. (a) Met waut kunn de Soton woomäajlich eenje Enjel tofaul brinjen? (b) Waut lieet ons daut, waut met väl Enjel wort?

¹⁰ De Soton haft sikj daut krakjt utjedocht, woo hee de Menschen daut baste tofaul brinjen kaun. Eenjemol deit dee de Menschen met waut locken, un aundatsmol grult hee dee en, daut dee sellen biejäwen.

¹¹ De Soton kunn väl Enjel velocken. Secha haft hee dee lang beoobacht, om to weeten, met waut hee dee vesieekjen kunn. Eenje kunn hee bat doa brinjen, daut see sikj met Frues veläwden. Von dee äare Kjinja jeef daut grausome Riesen, waut de Menschen unjadrekjten (1. Mo. 6:1-4). Veleicht lokt de Fient de Enjel nich bloos doamet, daut see sikj veläwen kunnen, oba uk doamet, daut see wudden Macht äwa de Menschen haben. Woomäajlich deed hee daut doaropp, daut de Profezeiunk von “[de Fru äaren] Nokomen” sikj nich erfellen sull (1. Mo. 3:15). Oba Jehova leet daut nich. Derch de Sintflut muak hee de Plons tonuscht, waut de Soton un de beese Jeista hauden.

¹² Waut kjenn wie von aul dit lieren? Met Huararie un Stolt kaun de Fient de Menschen sea locken. De Enjel, waut sikj opp dän Fient siene Sied stalden, schauften ea sea lang met Gott em Himmel toop. Oba dee leeten schlajchte Wenschen en sikj oppkomen, waut emma stoakja worden. Wie motten emma doaraun denkjen, daut sikj en ons Hoat uk schlajchte Wenschen faustsaten kjennen, endoont woo lang wie Jehova aul deenen (1. Kor. 10:12). Doawäajen mott wie ons Hoat emma wada unjasieekjen un jäajen orreine Jedanken un Stolt schaufen (Gal. 5:26; läs Kolossa 3:5).

13. Met waut lokt de Soton ons noch, un woo kjenn wie ons doafäa schitzen?

¹³ De Fient lokt de Menschen uk doaderch, daut hee dee to soont nieschierich moakt, waut met Zaubarie to doonen haft. Vondoag dän Dach brukt hee de faulsche Gloowes un dän Tietvedrief, daut dee sikj sellen fa de beese Jeista intressieren. Biejlikj woat daut en Films, Gäms un uk bie aundren Tietvedrief soo hanjestalt, aus wudd Zaubarie waut besondret sennen. Waut kjenn wie doonen, daut wie nich en dise Faul nenjeroden? Wie brucken nich doano luaren, daut Gott siene Organisazion ons krakjt väasajcht, waut vonne Films, Bieekja, Gäms un soo wieda wie haben kjennen un woone nich. Jieda eena mott sien Jewessen no daut oppschoapen, waut Gott fa rajcht talt (Heb. 5:14). Wie kjennen ons rajcht entscheiden, wan onse Leew fa Gott nich jeheichelt es (Reem. 12:9). Wie wudden kjennen äwalajen: “Kunnen aundre von mienen Tietvedrief denkjen, daut ekj een  Heichla sie? Wan miene Bibelstudiums ooda Wadabesuchs sagen, waut ekj fa Tietvedrief haud, wudden dee dan denkjen, daut ekj daut nokjeem, waut ekj an lieed?” Wan wie selfst daut doonen, waut wie aundre lieren, dan woa wie nich soo leicht en dän Soton siene Faulen nenjeroden (1. Joh. 3:18).

14. Met waut prooft de Soton ons veleicht entogrulen, un woo kjenn wie tru bliewen?

¹⁴ Eenjemol prooft de Fient ons uk entogrulen, daut wie Jehova sellen ontru woaren. Biejlikj kaun hee Rejierungen bat doa brinjen, daut dee ons Prädichtwoakj aufsajen. Hee kaun uk onse Schoolpoatna ooda Oabeitspoatna enbillen, daut dee äwa ons spotten, wiels wie soo läwen wellen, aus de Schreft sajcht (1. Pet. 4:4). Hee kaun daut uk bat doa brinjen, daut ons Frintschoft ons utem gooden Senn toorot, nich mea no de Toopkomes to foaren (Mat. 10:36). Woo kjenn wie dan tru bliewen? Eene Help es, wan wie doamet räakjnen, daut de Soton met soont aunkjemt, wiels dee fieet je Kjrich jäajen ons (Opb. 2:10; 12:17). Un wie motten uk em Denkj hoolen, wuarom dee jäajen ons kjamft. Dee behaupt, daut wie Jehova bloos deenen, wan ons daut utkjemt. Un wan daut mol sull schwoa woaren, dan wudd wie Gott fuaz dän Rigjen dreien (Hiob 1:9-11; 2:4-5). Wie motten Jehova emma om Krauft bäden un doaraun denkjen, daut hee ons kjeenmol woat em Stäakj loten (Heb. 13:5).

15. Kaun de Soton ons bemotten, waut to doonen, waut wie nich wellen? Laj daut ut.

¹⁵ De Fient kaun kjeenem waut bemotten, waut deejanja nich well (Jak. 1:14). Oba väle en de Welt woaren daut nich mol en, daut see opp dän siene Sied sent. Wan dee dan de Woarheit kjanen lieren, motten dee sikj selfst entscheiden, wäm see deenen wellen (Apj. 3:17; 17:30). Wan wie ons gaunz eenich sent, Gott sienen Wellen to doonen, dan kaun de Soton ons nich doatoo kjrieen, ontru to woaren (Hiob 2:3; 27:5, NW).

16-17. (a) Waut jeft daut noch, waut de Soton un de beese Jeista nich doonen kjennen? (b) Wuarom sell wie nich Angst haben, opp ludes to bäden?

¹⁶ Doa es noch mea, waut de Soton un de beese Jeista nich doonen kjennen. Biejlikj jeft de Schreft noanich auntovestonen, daut dee onse Jedanken läsen kjennen ooda daut, waut wie em Hoat haben. Daut sajcht bloos, daut Jehova un Jesus daut kjennen (1. Sam. 16:7; Mar. 2:8). Woo es daut dan, wan wie räden ooda opp ludes bäden? Sull wie Angst haben, daut de Fient ooda de beese Jeista onse Jebäda hieren un doa dan mankspälen? Nä. Woosoo nich? Wie haben je uk nich Angst, goodet fa Jehova to doonen, bloos wiels de Fient ons veleicht sitt. Krakjt soo es daut uk, wan wie opp ludes bäden. Wie brucken nich Angst haben, wäajen de Fient ons veleicht hieet. De Schreft rät von väl true Deena, waut opp ludes bäden deeden, oba daut sajcht noanich, daut dee Angst hauden, daut de Fient an hieren wudd (1. Kjen. 8:22-23; Joh. 11:41-42; Apj. 4:23-24). Wan wie ons aunstrenjen, soo to räden un to haundlen aus Jehova daut haben well, dan kjenn wie ons doaropp veloten, daut hee nich tooloten woat, daut de Soton ons waut aundeit, waut ons opp emma schot (läs Psalm 34:8).

¹⁷ Wie motten weeten, woo ons Jäajna schauft, oba wie brucken fa dän nich äwamotich Angst haben. Met Jehova siene Help kjennen mau rajcht onvolkomne Menschen jäajen dän Fient jewennen (1. Joh. 2:14). Wan wie ons jäajen dän stalen, dan woat dee von ons veschwinjen (Jak. 4:7; 1. Pet. 5:9). Daut späat sikj soo, daut de Soton besonda de junge Menschen opp Ziel haft. Woo kjennen dee jäajen dän bestonen? Doavon haundelt de näakjsta Artikjel sikj.