1. Waut jleich wie sea von Jesus? Laj daut ut.

EENT, waut wie von Jesus sea jleichen, es, daut hee vestonen kaun, waut fa Schwierichkjeiten wie onvolkomne Menschen haben. Aus Jesus oppe Ieed wia, freid hee sikj “met dee met, dee doa froo [wieren]”, un hield “met dee met, dee doa [hielden]” (Reem. 12:15). Aus biejlikj 70 von siene Jinja froo trigjkjeemen, wäajen dee fein hauden prädjen kunt, “freid Jesus sikj em Heiljen Jeist” (Luk. 10:17-21). Oba aus Jesus sach, woo truarich Lazarus siene Frind un Famielje wieren, nodäm daut Lazarus jestorwen wia, “wort hee en sienem Jeist sea oppjeräacht un am foll daut sea schwoa” (Joh. 11:33).

2. Waut holp Jesus metfeelent to sennen?

² Wuarom wia Jesus soo metfeelent met sindje Menschen, wan hee doch volkomen wia? Eent es, daut hee eenen grooten “Jefaulen aun de Menschheit” haud, soo aus wie en dän väajen Artikjel aul jeseenen haben (Spr. 8:31). De Leew, waut hee fa de Menschen haud, brocht am bat doa, daut hee vestonen wull, woo dee dochten. De Apostel Johanes säd: “Hee wist goot, waut bennen em Mensch wia” (Joh. 2:25). Jesus haud een Jaumahoat fa aundre. De Menschen worden daut en, daut hee an leewd, un dee horchten no de Norecht vom Kjennichrikj. Bie ons es daut biejlikj soo; je mea Metjefeel wie kjrieen, je bäta woa wie onsen Deenst kjennen derchfieren (2. Tim. 4:5, NW).

3-4. (a) Woo woa wie äwa dän Deenst denkjen, wan wie Metjefeel haben? (b) Waut woa wie en disen Artikjel seenen?

³ De Apostel Paulus wist, daut hee de Veauntwuatunk haud to prädjen, un wie haben dee uk (1. Kor. 9:16). Oba wan wie Metjefeel haben, dan woa wie nich bloos prädjen, wäajen ons daut oppjejäft es. Wie woaren daut doonen, wiels wie om de Menschen bekjemmat sent un dee halpen wellen. Wie weeten  je: “Jäwen es seelja aus nämen” (Apj. 20:35). Wan wie soo aus dit äwa onsen Deenst denkjen, dan woa wie doa mea Freid bie haben.

⁴ En disen Artikjel woa wie seenen, woo wie en onsen Deenst Metjefeel wiesen kjennen. Daut ieeschte woa wie seenen, waut wie doavon lieren kjennen, woo Jesus äwa de Menschen docht. Un dan woa wie veatlei seenen, woo wie sien Biespel nodoonen kjennen (1. Pet. 2:21).

5-6. (a) Met wäm haud Jesus Metjefeel? (b) Wuarom jaumad Jesus daut äwa de Menschen, waut hee prädijd, soo aus daut en Jesaja 61:1-2 verutjesajcht wia?

⁵ Well wie mol een Biespel seenen, woo Jesus Metjefeel wees. Eemol wieren Jesus un siene Jinja sea meed, wäajen dee soo väl jeprädicht hauden. Dee hauden “nich emol Jeläajenheit to äten”. Doawäajen säd Jesus to siene Jinja: “Well wie wua fa ons auleen gonen un ons een stootje utreiwen.” Oba een deel Menschen randen doahan, wua Jesus un siene Jinja hanwankten. Waut deed Jesus, aus hee doa hankjeem un de Menschen sach? “Am jaumad * daut äwa an, wiels dee wieren soo aus Schop onen Hoad. Un soo funk hee wada aun, an to lieren” (Mar. 6:30-34).

⁶ Soo aus wie jeseenen haben, jaumad Jesus daut äwa de Menschen. Daut wiest, daut hee Metjefeel met an haud, wiels dee “wieren soo aus Schop onen Hoad”. Veleicht sach Jesus, daut eenje von dee oam wieren un lang schaufen musten, daut see äare Famieljes vesorjen kunnen. Un aundre wieren woomäajlich truarich, wiels doa wäa jestorwen wia, waut see sea jleichten. Wan daut soo wia, dan kunn Jesus dee secha goot vestonen. Soo aus wie en dän väajen Artikjel jeseenen haben, haud Jesus woomäajlich selfst soont beläft. Jesus wia om aundre bekjemmat un wull dee Troost brinjen (läs Jesaja 61:1-2).

7. Woo kjenn wie Jesus nodoonen?

 ⁷ Waut kjenn wie von Jesus lieren? Krakjt soo aus bie Jesus sent de Menschen rom ons uk “soo aus Schop onen Hoad”. Dee motten met väl Trubbels foadich woaren. Un wie kjennen dee krakjt daut jäwen, waut dee halpen kaun – de goode Norecht vom Kjennichrikj (Opb. 14:6). Doawäajen doo wie krakjt daut waut Jesus. Wie prädjen de goode Norecht, wiels wie met “de schwake un oame Metleet haben” (Psa. 72:13). Ons jaumat daut äwa de Menschen un wie wellen dee jieren halpen.

8. Woo kjenn wie em Deenst Metjefeel wiesen? Met waut jeit daut to vejlikjen?

⁸ Waut kaun ons halpen Metjefeel to wiesen, wan wie prädjen? Wie motten ons en de Menschen äare Loag nenloten, met dee wie räden, un soo met dee omgonen, aus wie ons wudden wenschen, daut dee met ons omjinjen (Mat. 7:12). * Well wie mol veatlei seenen, woo wie daut krakjt doonen kjennen. Daut ieeschte es, daut wie kjikjen, waut jiedrem eenen krakjt fält. Wan wie prädjen, dan doo wie biejlikj soowaut aus een Dokta. Een feina Dokta kjikjt, waut jiedrem eenen fält, waut no am kjemt. Hee stalt de Kranke Froagen un horcht oppmoakjsom too, wan dee am vetalen, waut an krakjt schot. Dee jeft dee nich eefach irjent Medizien, waut am jroz enkjemt. Veleicht moakt dee ieescht Testen un dan sajcht hee dee, met waut see doktren kjennen. Biejlikj soo sell wie uk nich jiedrem eenen, waut wie em Deenst bejäajnen, äwareen aunräden. Wie sellen kjikjen, waut de Menschen krakjt fält un woo dee denkjen.

9. Waut sell wie nich denkjen? Laj daut ut.

⁹ Wan wie em Deenst met wäm räden, dan sell wie nich denkjen, daut wie aul krakjt om dän siene Omstend omweeten ooda doarom, waut hee jleeft un wuarom hee daut jleeft (Spr. 18:13). Enne Städ daut sell wie dän leeftolje Froagen stalen (Spr. 20:5). Wan daut en june Jäajent paussent es, dan froag dänjanjen, waut dee schauft, woo siene Famielje daut jeit, woo hee oppjewossen es un waut hee denkjt. Wan wie de Menschen Froagen stalen, dan woa wie enwoaren, waut dee opp iernst fält. Un wan wie daut ieescht weeten, dan kjenn wie Metjefeel wiesen un dee soont von de goode Norecht vetalen, waut dee werkjlich halpen kaun, soo aus Jesus daut deed (see uk 1. Korinta 9:19-23).

10-11. Woo kjenn wie noch Metjefeel wiesen no 2. Korinta 4:7-8 no? Jeff een Biespel.

¹⁰ Daut tweede es, daut wie ons proowen väatostalen, woo dee äa Läwen es. Veleicht hab wie mol krakjt soont beläft aus dee, wiels wie sent je uk onvolkomen  un haben Trubbels (1. Kor. 10:13). Wie weeten, daut daut Läwen nu en dise Welt sea schwoa sennen kaun. Wie kjennen daut bloos met Jehova siene Help uthoolen (läs 2. Korinta 4:7-8). Oba stal die mol väa, woo schwoa daut en dise Welt fa deejanje es, waut nich Frind met Jehova sent! Krakjt soo aus Jesus jaumat ons daut äwa soone un wie wellen dee “de scheene Norecht” von waut bätret brinjen (Jes. 52:7).

¹¹ Well wie mol seenen, waut een Brooda beläwd, waut Sergey heet. Ea hee de Woarheit kjanen lieed, wia hee sea bleed. Fa am wia daut schwoa, met aundre to räden. Met de Tiet funk hee aun, de Bibel to studieren. Sergey sajcht: “Bie mien Bibelstudium lieed ekj, daut Christen de Veauntwuatunk haben, met aundre äwa äaren Gloowen to räden. Ekj wia mie gaunz secha, daut ekj daut oba kjeenmol wudd kjennen.” Oba Sergey docht dan äwa deejanje no, waut noch nich de Woarheit jehieet hauden, un doaräwa, woo schwoa dee äa Läwen onen Jehova sennen must. Hee sajcht: “Daut, waut ekj lieed, jeef mie sea väl Freid un ennalich Fräd. Ekj wist, daut aundre daut uk fäld, daut to weeten, waut ekj jelieet haud.” Sergey kjrieech mea Metjefeel met aundre un daut jeef am Moot toom prädjen. Hee sajcht: “Ekj haud doa nich met jeräakjent, oba de Prädichtdeenst holp mie, daut ekj mie nich mea soo läach feeld, un dee stoakjt mienen Gloowen.” *

12-13. Wuarom sell wie jeduldich sennen met dee, waut wie lieren? Met waut jeit daut to vejlikjen?

¹² Daut dredde es, daut wie sellen met dee jeduldich sennen, waut wie lieren. Veleicht haben dee noch kjeenmol äwa jewesse biblische Lieren nojedocht, waut wie sea goot kjanen. Un väle sent sea faust aun daut, waut see jleewen. Veleicht denkjen dee, see motten dänselwjen Gloowen hoolen aus äa Frintschoft ooda äare Sort Menschen. Woo kjenn wie dee dan halpen?

¹³ Denkj wie mol aun een Jlikjnis: Waut  doonen se, wan eene Brigj ieescht oolt un vebrukt es? Foaken woat dee noch soolang jebrukt, bat de niee Brigj foadich es, waut se buen. Wan de niee ieescht reed es, dan bräakjen se de oole dol. Un wan wie wellen, daut aundre äare oole Glooweslieren tochloten, wua see sea faust aun sent, dan mott wie dee ieescht halpen, de niee Glooweslieren, waut see ea nich kjanden, väl to räakjnen. Daut es veleicht krakjt daut, waut dee fält, daut see kjennen daut tochloten, waut see ea jleewden. Daut kaun väl Tiet kosten, de Menschen to halpen, soone Endrungen to moaken (Reem. 12:2).

14-15. Woo kjenn wie dee halpen, waut äwa daut eewje Läwen em Paradies oppe Ieed weinich ooda nuscht weeten? Jeff een Biespel.

¹⁴ Wan wie met de Menschen em Deenst jeduldich sent, dan woa wie nich velangen, daut dee de Woarheit ut de Schreft fuaz vestonen ooda aunnämen. Ons Metjefeel woat ons halpen, daut wie ons de Tiet nämen, emma wada met dee von de Schreft to räden. Well wie mol seenen, woo wie met wäm äwa de Hopninj räden kjennen, daut wie eewich en een Paradies oppe Ieed läwen kjennen. Väle weeten weinich ooda nuscht von dise Lia. Dee jleewen veleicht, daut aules to Enj es, wan eena stoaft, ooda daut aule goode Menschen nom Himmel komen. Woo kjenn wie dee halpen?

¹⁵ Een Brooda vetalt, woo daut bie am fein schauft. Daut ieeschte läst hee de Menschen 1. Mose 1:28 väa. Dan frajcht hee, waut Gott doa säd, wua de Menschen läwen sullen un woo dee daut doa gonen sull. De mieeschte Menschen sajen: “Dee sullen oppe Ieed läwen un schaftich sennen.” Dan läst de Brooda Jesaja 55:11 un frajcht, aus Gott daut doonen woat, waut hee sikj mol väajenomen haud. Foaken sajen de Menschen dan jo. Un tolatst wiest de Brooda dee dan Psalm 37:10-11 un frajcht dee, woo daut met de Menschen lota noch mol woat sennen. Opp dee Wajch kunn de Brooda aul een deel Menschen halpen to vestonen, daut Gott noch emma well, daut de goode Menschen fa emma oppe Ieed en een Paradies läwen.

16-17. Woo kjenn wie daut wiesen, daut wie om aundre bekjemmat sent, soo aus Spricha 3:27 daut sajcht? Jeff een Biespel.

¹⁶ Daut vieede es, daut wie doaräwa nodenkjen sellen, woo wie daut wiesen kjennen, daut wie om de Menschen bekjemmat sent. Veleicht kom wie eenjemol to eene onpaussende Tiet wua han. Dan kjenn wie to dee sajen, daut ons daut leet deit un daut wie woaren opp aundatsmol komen. Waut, wan dee met waut kjlienet Help fält? Ooda wan doa wäa nich utem Hus kaun un dän fält waut to kjeepen ooda sestwaut? Veleicht wudd wie dänjanjen dan halpen kjennen (läs Spricha 3:27).

¹⁷ Eene Sesta beläwd waut sea scheenet, wäajen see waut kjlienet fa aundre deed. Ut Metjefeel schreef see eenen Breef aun eene  Famielje, wua een Kjint jestorwen wia. En dän Breef haud see waut Bibelvarzh nenjeschräwen, waut Troost jeewen. Waut säd de Famielje doatoo? De Mame schreef: “Jistren haud ekj soonen schwoaren Dach. Ekj jleew, du kaust die daut nich mol denkjen, waut dien Breef aun ons deed. Ekj kaun daut nich utspräakjen, woo väl wie daut räakjenden ooda woo väl wieet daut bie ons wia. Ekj jleew, ekj hab dienen Breef jistren oppet weinichste 20 Mol jeläst. Ekj kunn daut nich jleewen, daut wie soonen leeftoljen Breef kjrieejen, waut ons soo väl Moot toospruak. Ekj saj die von gaunzem Hoaten dankscheen.” Wie woaren secha väl goodet beläwen, wan wie ons en de Menschen äare Loag nenloten, waut lieden, un dan waut doonen toom dee halpen.

18. Waut well wie no 1. Korinta 3:6-7 no em Denkj hoolen?

¹⁸ Wan wie prädjen, kjenn wie aundre halpen, von Gott to lieren. Oba wie motten em Denkj hoolen, daut Jehova doabie daut jratste Poat deit (läs 1. Korinta 3:6-7). Hee trakjt de Menschen no sikj (Joh. 6:44). Aus de Menschen no de goode Norecht horchen ooda nich es doano, woo dee äa Hoat es (Mat. 13:4-8). Denkj doaraun, daut de mieeschte Jesus siene Norecht nich aunneemen un hee wia de jratsta Liera, waut jeemols jeläft haft. Doawäajen sell wie nich mootloos woaren, wan een deel Menschen, waut wie halpen wellen, nich horchen.

19. Waut fa goodet brinjt daut, wan wie em Deenst metfeelent sent?

¹⁹ Daut woat väl goodet brinjen, wan wie em Deenst metfeelent sent. Dan woat ons daut prädjen scheena gonen. Wie woaren daut utfinjen, woo schaftich jäwen moakt. Un dee, “waut to daut eewje Läwen rajcht enjestalt” sent, woaren leichta de goode Norecht aunnämen (Apj. 13:48, NW). “Doawäajen sull wie, soo foaken aus wie Jeläajenheit haben, aun aule Menschen goodet doonen” (Gal. 6:10). Dan woa wie de Freid haben, daut se onsen Voda em Himmel doafäa lowen (Mat. 5:16).