1-2. Woo kjenn wie Jehova aunbäden, daut hee daut aunnemt?

 WAUT kjemt die em Kopp, wan du daut Wuat “Aunbädunk” hieescht? Veleicht denkjst du aun eenen Brooda, waut biesied sien Bad opp Kjneees es un iernstlich to Jehova bät. Ooda du denkjst aun eene schaftje Famielje, waut jroz deep de Bibel studieet.

² En beid Biespels wia een Poat von Jehova siene Aunbädunk met en. Hee woat dee äare Aunbädunk aunnämen, wan dee met daut tooppaust, waut hee sikj väajenomen haft, un wan dee am leewen un respakjten. Wie leewen Jehova sea, un wie weeten, daut hee daut vedeent, daut wie am aunbäden, un doawäajen well wie daut soo goot aus mäajlich doonen.

3. Waut woa wie en disen Artikjel seenen?

³ En disen Artikjel woa wie lieren, waut vonne Aunbädunk Jehova ieeschtemma aunneem. Un wie woaren uk acht veschiedne Eenselheiten seenen, waut bie onse Aunbädunk met en sent, un waut Jehova aunnemt. Dit woat ons halpen doaräwa notodenkjen, woo wie ons noch vebätren kjennen. Wie woaren uk seenen, wuarom ons daut schaftich moakt, Jehova opp de rajchte Wajch auntobäden.

4. Woo weesen Jehova siene Deena ieeschtemma aul, daut see Respakjt un Leew fa Jehova hauden?

⁴ Aul lang ver de ieeschte Christen weesen soone true Mana aus Abel, Noah, Abraham un Hiob aul, woo väl Respakjt un Leew dee fa Jehova hauden. Woo kunnen see daut wiesen? Doaderch, daut see Gloowen hauden, jehuarsom wieren un Opfa brochten. De Bibel sajcht daut nich krakjt, waut dee aules deeden. Oba secha deeden dee äa bastet, om Jehova to ieren un am soo auntobäden, daut hee daut aunnämen kunn. Lota jeef Jehova de Israeliten daut Jesaz Moses. Dit Jesaz wees dee gaunz kloa, woo Jehova wull, daut see am aunbäden sullen.

5. Woo well Jehova, daut Jesus siene Nofolja am aunbäden?

⁵ Nodäm daut Jesus jestorwen un vom Doot oppjestonen wia, velangd Jehova nich mea, daut se sikj musten aun daut Jesaz Moses hoolen (Reem. 10:4). Nu jeef daut een nieet Jesaz, un daut wia “Christus sien Jesaz” (Gal. 6:2). Dee kunnen dit Jesaz nokomen, wan dee Jesus sien Biespel nodeeden un sikj aun siene Lieren hilden. Dee brukten sikj daut Jesaz nich utwendich lieren un sikj nich aun eene lange List hoolen, waut se aules doonen un nich doonen kunnen. Vondoag dän Dach doonen Christen uk äa bastet, om Christus notofoljen, daut Jehova met an tofräd es un daut dee “Ru finjen” fa sikj selfst (Mat. 11:29).

6. Woo kaun ons dis Artikjel togood komen?

⁶ Wan wie nu aule Eenselheiten von onse Aunbädunk unjasieekjen, dan denkj äwa dit no: “Woo sie ekj en disen Stekj aul veraunjekomen?” Ooda: “Kaun ekj mie en miene Aunbädunk noch vebätren?” Wie wudden sellen tofräd sennen, daut wie aul veraunjekomen sent, oba wie kjennen uk Jehova froagen, aus dee ons halpen well to seenen, wua wie ons noch vebätren kjennen.

7. Woo denkjt Jehova doaräwa, wan wie von Hoaten to am bäden?

⁷ Bie onse Aunbädunk es met en, daut wie to Jehova bäden. De Schreft vejlikjt onse Jebäda met een scheenet, reedjemoaktet Weiruak, waut se bie daut Vesaumlungszelt un lota biem Tempel vebrenden (Psa. 141:2). Von daut Weiruak jeef daut een scheenet Jeroch, waut Gott jefoll. Krakjt soo jefelt am daut, wan wie von Hoaten to am bäden, wan wie uk nich besondre Wieed brucken (Spr. 15:8; 5. Mo. 33:10, NW). Wie kjennen ons secha sennen, daut Jehova daut sea jleicht, wan wie am sajen, daut wie am leewen un dankboa sent. Hee well, daut wie am äwa onse Sorjen, onse Hopninj un onse Wenschen vetalen. Wie wudden uk kjennen doaräwa nodenkjen, waut wie to Jehova sajen wellen, ea wie to am bäden. Wan wie daut doonen, dan jäw wie onsen himlischen Voda daut baste Weiruak.

8. Woo kjenn wie Gott lowen?

⁸ Bie onse Aunbädunk es met en, daut wie Jehova lowen (Psa. 34:2). Wie lowen Jehova, wan wie ut Dankboakjeit äwa siene besondre Ieejenschoften un Woakjen räden. Wan wie ons de Tiet nämen doaräwa notodenkjen, woo goot Jehova es – woo väl goodet hee fa ons jedonen haft – dan woa wie emma Jrind haben am to lowen. Biem prädjen woa wie goode Jeläajenheiten haben, daut “onse Leppen . . . am bekjanen un lowen” (Heb. 13:15). Krakjt  soo aus wie ons verhäa Jedanken doaräwa moaken, waut wie Jehova em Jebäd sajen wellen, soo wudd daut goot sennen, wan wie verhäa aul doaräwa nodochten, waut wie to de Menschen em Deenst sajen wellen. Wie wellen, daut onse Opfa, toom Jehova lowen, emma sellen de baste sennen. Wan wie met aundre äwa de Woarheit räden, dan doo wie daut von Hoaten.

9. Woo komen ons de Toopkomes togood soo aus de Israeliten ieeschtemma? Woo haben die dee jeholpen?

⁹ Bie onse Aunbädunk es met en, daut wie no de Toopkomes wanken. To de Israeliten wort jesajcht: “Dree mol em Joa sellen aule Mana ver däm HARN komen, opp dee Städ dee hee doatoo wälen woat” (5. Mo. 16:16). Doatoo musten dee äare Hiesa veloten un uk äare Arnt oppe Stap. Oba Jehova vespruak an, daut kjeena äa Launt wudd haben wellen, “wan aule Mana dree mol em Joa äa Launt veloten om ver däm HARN, junen Gott, to komen” (2. Mo. 34:24). Wiels de Israeliten gaunz opp Jehova vetruden, jinjen dee jieda Joa no de Fasten. Dee kjeem daut en väl Stekjen togood; biejlikj lieeden dee doaderch mea äwa Jehova sien Jesaz, woo goot Jehova to an wia, un dee kunnen uk met soone toop sennen, waut Jehova uk leewden (5. Mo. 16:15). Biejlikj soo kjemt ons daut togood, wan wie ons aunstrenjen no aule Toopkomes to wanken. Un Jehova freit sikj secha sea doaräwa, wan wie ons fein reedmoaken un korte un goode Auntwuaten jäwen.

10. Wuarom es sinjen en de Aunbädunk soo wichtich?

¹⁰ Bie onse Aunbädunk es met en, daut wie met onse Breeda un Sestren toop sinjen (Psa. 28:7). Fa de Israeliten wia daut ieeschtemma sea wichtich bie de Aunbädunk to sinjen. De Kjennich David stald biejlikj 288 Leviten aus Sinja biem Tempel aun (1. Chr. 25:1, 6-8). Vondoag dän Dach wies wie Gott onse Leew, wan wie am met Leeda lowen. Onse Stemm es bie daut nich daut wichtichste. Denkj wie mol aun dit: Wie moaken biem räden foaken Fäla, oba daut helt ons nich doavon trigj, daut wie bie de Toopkomes un em Prädichtdeenst nich räden (Jak. 3:2). Biejlikj soo sull ons daut nich trigjhoolen, Jehova met Leeda to lowen, bloos wäajen wie denkjen, daut wie nich ne goode Stemm haben.

11. Wuarom sell wie ons no Psalm 48:14 no Tiet nämen toom aus Famielje de Bibel studieren?

¹¹ Bie onse Aunbädunk es met en, daut wie Gott sien Wuat studieren un onse Kjinja von am lieren. De Sabat wia fa de Israeliten ieeschtemma eene goode Jeläajenheit, äare Oabeit tochtoloten un sikj doafäa Tiet to nämen Jehova noda to komen (2. Mo. 31:16-17). De true Israeliten lieeden äare Kjinja äwa Jehova un woo goot hee wia. Wie sellen ons uk Tiet nämen, Gott sien Wuat to läsen un to studieren. Dit jehieet to onse Aunbädunk, un wie komen am doaderch emma noda (Psa. 73:28). Un wan wie aus Famielje toop studieren, dan halp wie onse Kjinja, daut dee met onsen leeftoljen himlischen Voda goode Frind woaren kjennen (läs Psalm 48:14).

12. Waut lia wie doavon, woo Jehova de Oabeit von dee sach, waut daut Vesaumlungszelt muaken?

¹² Bie onse Aunbädunk es met en, daut wie soone Städen, waut fa Jehova jebrukt woaren, buen un unjahoolen. De Bibel sajcht, daut de Oabeit, om daut Vesaumlungszelt to moaken, een “heilje[t] Woakj” wia (2. Mo. 36:1, 4, NW). Vondoag dän Dach sitt Jehova daut uk aus eenen  heiljen Deenst aun, wan se Vesaumlungshiesa un aundre Jebieda buen toom am doa aunbäden. Eenje Breeda un Sestren nämen sikj väl Tiet, om bie dit Woakj mettohalpen. Sent wie nich dankboa doafäa, daut dee daut Kjennichrikjswoakj opp dise besondre Wajch unjastetten? Secha gonen dee uk prädjen. Eenje von dee wellen mau rajcht Pionia sennen. De Eltestasch kjennen daut Buwoakj unjastetten, wan dee soone Breeda un Sestren loten Pionia sennen, waut de Bedinjungen doatoo erfellen. Aus wie ons nu met buen vestonen ooda nich, wie aula kjennen methalpen, daut soone Jebieda rein un en Ordninj jehoolen woaren.

13. Wuarom sell wie fa daut Kjennichrikjswoakj Gowen jäwen?

¹³ Bie onse Aunbädunk es met en, daut wie Gowen fa daut Kjennichrikjswoakj jäwen. De Israeliten ieeschtemma sullen Jehova een Jeschenkj brinjen, wan see jieda Joa no de Fasten jinjen (5. Mo. 16:16). Dee sullen doano jäwen, aus dee em tieteljen hauden. Doaderch kunnen see Jehova äare Dankboakjeit fa aul daut wiesen, waut hee fa an deed. Woo kjenn wie Jehova onse Leew un Dankboakjeit wiesen fa daut jeistelje? Eene Wajch es, wan wie fa onse Vesaumlunk un fa daut Woakj oppe gaunze Welt Gowen jäwen, doano, woo väl wie kjennen. De Apostel Paulus säd: “Wan eena wellich es to jäwen, es de Gow bie Gott aunjenäm doano aus eena haft, un nich doano aus eena nich haft” (2. Kor. 8:4, 12). Jehova schazt jieda Gow sea väl, endoont aus daut mau weinich es (Mar. 12:42-44; 2. Kor. 9:7).

14. Woo denkjt Jehova no Spricha 19:17 no doaräwa, wan wie onse Breeda uthalpen?

¹⁴ Bie onse Aunbädunk es met en, daut wie onse Gloowesbreeda uthalpen. Jehova vespruak de Israeliten, daut hee an säajnen wudd, wan see de Oame uthalpen wudden (5. Mo. 15:7, 10). Soo jiedatsmol, wan wie soone Gloowesbreeda halpen, waut daut fält, sitt Jehova daut soo, aus wudd wie am daut jäwen (läs Spricha 19:17). Aus biejlikj de Christen en Filippi Paulus een Jeschenkj schekjten, nand hee daut “een scheenrikjendet un aunjenämet Opfa, daut Gott jefelt” (Filip. 4:18). Du wurscht kjennen doaräwa nodenkjen, aus doa wäa en diene Vesaumlunk es, wäm du kust halpen. Jehova freit sikj, wan hee sitt, daut wie onse Tiet, Krauft, Fäichkjeiten un tietelje Sachen brucken toom dee halpen, waut daut fält. Hee talt daut aus Poat von onse Aunbädunk (Jak. 1:27).

15. Wuarom es daut fa ons nich eene Laust, onse Tiet un Krauft to brucken toom Jehova aunbäden?

¹⁵ Jehova rajcht aunbäden brukt Tiet un Aunstrenjunk. Oba daut es nich eene Laust fa ons (1. Joh. 5:3). Wuarom nich? Wiels wie bäden am aun, wäajen wie am leewen. Stal wie ons mol eenen kjlienen Jung väa, waut siene Pape well waut jäwen. Am dieet daut veleicht miere Stund, fa siene Pape waut to molen. Oba hee beschot daut nich, wan daut uk lang jedieet haft. Hee leeft siene Pape un es schaftich, daut hee am waut jäwen kaun. Biejlikj soo sent wie uk schaftich, daut wie onse Tiet un Krauft brucken kjennen toom Jehova aunbäden, wiels wie am leewen.

16. Woo denkjt Jehova no Hebräa 6:10 no doaräwa, waut jieda eena fa am doonen kaun?

¹⁶ Leeftolje Elren woaren von äare Kjinja nich jlikjen väl velangen. Dee weeten, daut jieda Kjint veschieden es un woo väl daut doonen kaun. Krakjt soo weet ons himlischa Voda uk, woo väl jieda eena von ons  jäwen kaun. Veleicht kaust du mea doonen aus diene Frind. Ooda du kaust veleicht nich soo väl doonen aus aundre wäajen diene Jesuntheit, dien Ella ooda de Veauntwuatunk, waut du en diene Famielje hast. Dan sie nich mootloos (Gal. 6:4). Jehova woat dien Woakj nich vejäten. Soo lang aus du dien bastet jefst un daut utem rajchten Senn deist, woat hee sikj doaräwa freien (läs Hebräa 6:10). Jehova sitt mau rajcht daut, waut du wurscht jleichen to doonen. Hee well, daut du schaftich un tofräd best met daut, waut du am jäwen kaust.

17. (a) Waut kjenn wie doonen, wan ons eenjet schwoa felt, waut bie de Aunbädunk met en es? (b) Woo es die daut togood jekomen, waut en dän Kausten “ Woo du mea Freid haben kaust” jewäsen woat?

¹⁷ Waut es, wan ons eenjet schwoa felt, soo aus perseenlich studieren un prädjen? Wan wie daut foaken doonen, dan woa wie daut uk dolla jleichen un ons woat daut togood komen. Well wie onse Aunbädunk mol met ekserseisen ooda Musikj spälen vejlikjen. Wan wie daut bloos han un wada mol doonen, dan woa wie nich sea wiet veraunkomen. Oba waut woat passieren, wan wie daut jieda Dach doonen? Aum Aunfank woa wie veleicht bloos emma een poa Minuten kjennen, oba met de Tiet woa wie daut dan emma fa lenja kjennen. Wan wie seenen, waut doabie rutkjemt, wan wie ons aunstrenjen, dan woa wie ons secha aul doatoo freien un ons woat daut uk scheen gonen. Krakjt soo es daut uk met onse Aunbädunk.

18. Waut es daut wichtichste en ons Läwen, un waut woat doabie rutkomen?

¹⁸ Jehova met ons gaunzet Hoat auntobäden es daut wichtichste en ons Läwen. Wan wie daut doonen, dan woa wie schaftich sennen, eenen Senn em Läwen haben un de Hopninj haben, Jehova fa emma auntobäden (Spr. 10:22). Wie haben nu aul ennalich Fräd, wäajen wie weeten, daut Jehova siene Deena halpt, wan dee Schwierichkjeiten beläwen (Jes. 41:9-10). Wie haben werkjlich goode Uasoak schaftich to sennen, wan wie onsen leeftoljen Voda aunbäden, waut aule “Harlichkjeit un Iea” traft von de gaunze Schepfunk! (Opb. 4:11).