1-2. Waut woat ons no 1. Petrus 4:7-8 no halpen, met groote Trubbels foadich to woaren?

DAUT Enj von “de latste Doag” kjemt emma noda un wie motten woomäajlich met groote Trubbels foadich woaren (2. Tim. 3:1). En een Launt en West-Afrika biejlikj jeef et väl Orru, nodäm aus se doa stemmen deeden. Äwa sas Moonat wia daut fa onse Breeda un Sestren doa sea jefäadlich, wäajen doa soo väl jekjamft wort. Waut holp an en dise schwoare Tiet? Eenje kunnen bie Gloowesbreeda bliewen, waut en eene sechre Jäajent wonden. Een Brooda vetald: “En dise Loag wia mie daut väl wieet, daut ekj kunn met miene Frind toop sennen. Wie kunnen ons unjarenaunda Moot toospräakjen.”

² Wan de “groote Triebsaul” aunfangt, dan woa wie ons sea freien, daut wie goode Frind haben, waut ons leewen (Opb. 7:14, Reimerbibel). Doawäajen mott wie ons nu soone Frind sieekjen (läs 1. Petrus 4:7-8). Wie kjennen väl von Jeremia lieren. Siene Frind holpen am, daut hee aum Läwen bliewen kunn, jroz ea Jerusalem venicht wort. * Woo kjenn wie Jeremia nodoonen?

3. (a) Wuarom haud Jeremia sikj leicht kunt oppoat hoolen? (b) Waut vetald Jeremia sienen Schriewa Baruch, un woo kjeem daut ut?

³ Jeremia läwd oppet weinichste 40 Joa mank Menschen, waut Gott nich tru wieren. Daut wieren biejlikj Nobasch un woomäajlich uk Frintschoft von siene Staut Anatot (Jer.  11:21; 12:6). Oba hee hilt sikj doawäajen nich von aule Menschen oppoat. Hee vetald sienen truen Schriewa Baruch, woo am daut jinkj, un wie kjennen daut nu uk läsen (Jer. 8:21; 8:23; 20:14-18; 45:1). Secha fungen Baruch un Jeremia sikj emma mea aun to räakjnen un to respakjten, aus Baruch Jeremia siene Jeschicht oppschreef (Jer. 20:1-2; 26:7-11).

4. (a) Waut säd Jehova, waut Jeremia doonen sull? (b) Woo holp dise Oppgow Jeremia un Baruch, daut dee jratre Frind worden?

⁴ Jeremia wia joarenlank äwanäment un säd to de Israeliten, woo daut met Jerusalem romkomen wudd (Jer. 25:3). Aus Jehova de Menschen noch eemol sajen leet, daut see omkjieren sullen, säd hee to Jeremia, daut hee siene Woarnunk en eene Schreftroll nenschriewen sull (Jer. 36:1-4). Jeremia un Baruch deeden daut, waut Gott haben wull, un daut dieed woomäajlich een poa Moonat. Dee schauften fein toop un secha deeden dee sikj väl unjahoolen un em Gloowen stoakjen.

5. Woo bewees Baruch, daut hee werkjlich Jeremia sien Frint wia?

⁵ Aus de Schreftroll foadich wia, must Jeremia sikj doaropp veloten, daut sien Frint Baruch de Menschen daut säd, waut doabennen stunt (Jer. 36:5-6). Baruch wia äwanäment un kjeem dise Oppgow no. Kaust du die väastalen, woo brow Jeremia met Baruch wia, aus dee no dän Väahoff vom Tempel jinkj un daut bekauntmuak? (Jer. 36:8-10). De Rejierungsmana von Juda hieeden, waut Baruch jedonen haud, un wullen haben, daut dee an uk de Schreftroll väaläsen sull (Jer. 36:14-15). Dan worden dee sikj eenich, dän Kjennich Jojakim daut weeten to loten, waut Jeremia jesajcht haud. Oba ut Metleet “säden de Rejierungsmana to Baruch, daut hee un Jeremia sullen wajchgonen, wua kjeena  wist wua see wieren” (Jer. 36:16-19). Daut wia een gooda Rot!

6. Waut deeden Jeremia un Baruch, aus dee Jäajenstaunt kjrieejen?

⁶ Aus de Kjennich Jojakim hieed, waut Jeremia jeschräwen haud, wort hee soo doll, daut hee de Schreftroll vebrend un säd, daut se Jeremia un Baruch sullen faustnämen. Oba Jeremia leet sikj nich enenjsten. Hee neem eene fresche Schreftroll un säd to Baruch, waut Jehova jesajcht haud, “un Baruch schreef aules dol, waut Jeremia am väasäd, soo aus daut opp de Schreftroll jewast wia, woone Jojakim, de Kjennich von Juda, em Fia vebrent haud” (Jer. 36:26-28, 32).

7. Woo kjeem daut woomäajlich ut, daut Jeremia un Baruch toopschauften?

⁷ Soone Menschen, waut toop waut schwoaret derchgonen, woaren foaken groote Frind. Doawäajen es daut goot mäajlich, daut Jeremia un Baruch sikj noch bäta kjanen lieeden un noch jratre Frind worden, aus see toopschauften toom de Schreftroll fresch oppschriewen, waut de schlajchta Kjennich Jojakim oppjeriemt haud. Waut kjenn wie von dise Jeschicht lieren?

8. Wuarom kaun ons daut schwoa faulen, ons goode Frind to sieekjen, un wuarom sell wie nich oppjäwen?

⁸ Veleicht kjrie wie ons doa meist nich too, ons to aundre uttoschedden, wäajen ons mol wäa velazt haft (Spr. 18:19, 24). Ooda wie denkjen, daut wie goanich jenuach Tiet un Krauft haben toom ons goode Frind sieekjen. Oba wie sellen doawäajen nich oppjäwen. Wan wie wellen, daut onse Breeda ons en schwoare Tieden biestonen, dan mott wie nu lieren, dee daut to sajen, waut ons oppem Hoaten licht. Mau dan kjenn wie opp iernst Frind met dee woaren (1. Pet. 1:22).

9. (a) Woo wia daut to seenen, daut Jesus sikj opp siene Frind veleet? (b) Wuarom feel wie ons dolla met aundre vebungen, wan wie gaunz op met dee räden? Jeff een Biespel.

⁹ Daut Jesus sikj opp siene Frind veleet, wia doaraun to seenen, daut hee gaunz op met dee räd (Joh. 15:15). Wie kjennen am nodoonen, wan wie met aundre von daut räden, waut ons freit ooda Sorjen moakt ooda wua wie truarich äwa sent. Wan wie dee goot toohorchen, dan woa wie secha enwoaren, daut dee en väl Stekjen soo denkjen un feelen aus wie un no dautselwje sträwen. Daut es biejlikj bie eene Sesta to seenen, waut Cindy heet un meist 30 Joa es. See es Frint met eene Pionia-Sesta, waut Marie-Louise heet un meist  70 Joa es. Dee beid gonen jieda Donnadach ver Meddach toop prädjen un räden gaunz op äwa veschiedne Sachen. Cindy sajcht: “Ekj jleich daut, met miene Frind äwa deepe Sachen to räden. Soo kaun ekj dee bäta kjanen lieren un vestonen.” Wan wie met aundre wellen Frind sennen, dan mott wie leeftolich un op met dee räden. Wan wie ons krakjt soo aus Cindy bemieejen, daut to doonen, dan woa wie ons met onse Frind secha uk dolla vebungen feelen (Spr. 27:9).

10. Woo kaun daut utkomen, wan wie met onse Gloowesbreeda toopschaufen, soo aus Spricha 27:17 sajcht?

¹⁰ Wan wie krakjt soo aus Jeremia un Baruch met onse Gloowesbreeda toopschaufen un dee äare goode Sieden seenen, dan kjenn wie von dee lieren un dee noda komen (läs Spricha 27:17). Woo jeit die daut biejlikj, wan du met eenen Frint toop em Deenst best un hieescht, woo äwanäment dee fa sienen Gloowen ensteit ooda woo bejeistat dee von Jehova rät un von daut, waut Jehova noch doonen woat? Secha räakjenst du dän dan noch mea!

11-12. Waut fa een Biespel wiest, daut wie jratre Frind woaren, wan wie met onse Breeda toop em Deenst sent?

¹¹ Well wie mol twee Biespels seenen, waut wiesen, daut wie aundre noda komen, wan wie met dee em Deenst toopschaufen. Eene Sesta, waut Adeline heet un 23 Joa wia, fruach äare Frind Candice, aus see nich toop wua prädjen wullen, wua don noch nich väl jeprädicht wort. See sajcht: “Wie wullen flietja prädjen un mea Freid em Deenst haben. Un wie wullen beid mea Moot kjrieen toom Jehova wieda ons bastet jäwen.” Woo kjeem dee daut togood, daut see toopschauften? Adeline sajcht: “Wie räden jieda Zeowes doavon, woo ons daut jinkj un woo wie späaden, daut Jehova ons em Deenst leiden deed, un waut fa scheenet wie biem prädjen beläwden. Daut jinkj ons sea scheen, gaunz op unjarenaunda to vetalen un ons noch bäta kjanen to lieren.”

 ¹² Laïla un Marianne sent twee onbefriede Sestren von Frankreich. Dee deeden fief Wäakj en Bangui prädjen, de Hauptstaut von de Zentralafrikaunische Republikj, wua een deel Menschen wonen. Laïla sajcht: “Daut wia nich emma leicht, oba wäajen wie väl unjarenaunda räden un opp iernst Leew hauden, word wie noch jratre Frind. Aus ekj sach, woo Marianne sikj to de niee Omstend wand un woo sea see de Menschen doa leewd un woo flietich see em Deenst wia, räakjend ekj ar noch mea.” Wie brucken nich wajchtrakjen toom soont beläwen. Wie kjennen onse Breeda un Sestren uk jiedatsmol bäta kjanen lieren un jratre Frind met dee woaren, wan wie hia toop em Deenst sent.

13. Waut passieet eenjemol, wan wie väl met aundre toop sent?

¹³ Wan wie väl met onse Frind toop sent, dan see wie eenjemol nich bloos dee äare goode Sieden, oba uk dee äare Schwakheiten. Waut kaun ons halpen, doawäajen goode Frind met dee to bliewen? See wie noch eemol, waut Jeremia beläwd. Waut holp am, no aundre äare goode Sieden to kjikjen un nich no dee äare Fäla?

14. Waut wort Jeremia von Jehova en, un woo holp am daut?

¹⁴ Jeremia schreef daut Bibelbuak Jeremia un woomäajlich uk de Bieekja 1. un 2. Kjennichs. Daut holp am secha sea, daut hee seenen kunn, woo metfeelent Jehova met onvolkomne Menschen wia. Jeremia wort biejlikj en, daut dän Kjennich Ahab siene schlajchte Woakjen leet wieren. Doawäajen durf dee daut aul nich beläwen, woo siene gaunze Famielje storf (1. Kjen. 21:27-29). Un Jeremia wist uk, daut Manasse Jehova noch väl dolla beleidicht haud aus Ahab. Un doch hilt Jehova dän daut togood, wiels hee omkjieed (2. Kjen. 21:16-17; 2. Chr. 33:10-13). Aul dit holp Jeremia secha, daut hee met siene goode Frind krakjt soo jeduldich un metfeelent wia aus Gott (Psa. 103:8-9).

15. Woo deed Jeremia Jehova siene Jedult no, aus Baruch sikj auflenkjen leet?

¹⁵ Woo jinkj Jeremia biejlikj met Baruch om, aus dee sikj mol von siene Oppgow auflenkjen leet? Hee docht nich fuaz, daut fa sienen Frint kjeene Rot mea wia, un hee holp dän doaderch, daut hee am Gott siene leeftolje un dietelje Norecht säd (Jer. 45:1-5). Waut kjenn wie von dise Jeschicht lieren?

16. Waut mott wie doonen, daut wie kjennen met aundre Frind bliewen, soo aus daut en Spricha 17:9 steit?

¹⁶ Wie weeten je, daut wie nich velangen kjennen, daut onse Breeda un Sestren sellen volkomen sennen. Doawäajen mott wie ons bemieejen, uk fa wieda Frind met dee to bliewen. Wan dee eenen Fäla moaken, mott wie dee veleicht leeftolich un dietlich eenen biblischen Rot jäwen (Psa. 141:5). Un wan dee ons velazen, dan sell wie dee togood hoolen. Wan de Sach ieescht berät es, dan mott wie oppaussen, daut wie doa lota nich wada von räden (läs Spricha 17:9). En dise schwoare Tiet mott wie no de goode Sieden von onse Breeda un Sestren kjikjen un nich no dee äare Schwakheiten! Daut woat ons halpen, daut wie jratre Frind met dee woaren, un daut woat ons en de groote Triebsaul fälen.

17. Woo bewees Jeremia en schwoare Tieden, daut hee een woara Frint wia?

¹⁷ De Profeet Jeremia bewees en schwoare Tieden, daut hee een woara Frint wia. Nodäm daut dän Kjennich sien Beaumta  Ebed-Melech Jeremia ut dän blotjen Zista jerat haud, wua hee stoawen sull, haud Ebed-Melech Angst, daut de Rejierungsmana am waut aundoonen wudden. Aus Jeremia daut enwort, docht hee nich, daut sien Frint doa aul wudd met foadich woaren. Hee deed aules, waut hee kunn, om dän Moot tootospräakjen, wan hee uk enjestopt wia. Hee treest sienen Frint Ebed-Melech un leet dän daut weeten, waut Jehova vesproaken haud (Jer. 38:7-13; 39:15-18).

18. Waut sell wie no Spricha 17:17 no doonen, wan een Frint waut schwoaret derchmoakt?

¹⁸ Vondoag dän Dach haben onse Breeda un Sestren veschiedne Schwierichkjeiten. Väle motten biejlikj lieden wäajen soone Sachen aus Kjrich ooda Ieedbäben. Wan soont passieet, dan kjenn wie dee woomäajlich en ons Hus oppnämen. Ooda wie kjennen dee em tieteljen halpen. Oba wie aula kjennen Jehova doano froagen, daut hee onse Breeda halpt. Wan wie enwoaren, daut een Brooda ooda eene Sesta mootloos es, dan weet wie veleicht nich, waut wie sajen ooda doonen sellen. Oba jieda eena kaun waut fa dee doonen. Wie wudden ons biejlikj kjennen Tiet nämen fa dee ooda dee opprechtich toohorchen, wan dee waut vetalen. Un wie kunnen dee uk von eenen Bibelvarsch vetalen, waut wie sea jleichen un waut ons väl Troost jeft (Jes. 50:4, NW). Daut wichtichste es, daut wie onse Frind biestonen, wan dee Help fält (läs Spricha 17:17).

19. Woo kjemt ons daut lota noch mol togood, wan wie nu aul groote Frind woaren?

¹⁹ Wie motten ons nu gaunz eenich sennen, met onse Breeda un Sestren groote Frind to woaren un to bliewen. Wuarom? Wäajen onse Jäajna Läajes oppmoaken woaren, daut wie ons sellen unjarenaunda oneenich woaren. Dee woaren ons wellen bat doa brinjen, daut wie onse Breeda nich mea halpen un vetruen sellen. Oba daut woat dee nich jlekjen. Dee woaren ons nich kjennen uteneen brinjen. Wie woaren nich bloos batem Enj von dise Welt Frind bliewen, oba fa emma un eewich!