Ekj wort aune 1948 en eene kjliene Renzh em Sied-Wasten von Nigeria jebuaren. En dee Tiet leeten mien elsta Brooda Wahabi un uk mien Onkel Moustapha, waut mien Voda sien jinjsta Brooda wia, sikj aus Jehowa siene Zeijen deepen. Aus ekj näajen Joa wia, storf mien Voda. Ekj wia sea betriept. Mien Brooda Wahabi säd, daut wie onsen Voda wada seenen woaren, wan de Doodes vom Doot oppstonen woaren. Daut treest mie un doawäajen wull ekj uk de Bibel studieren. Ekj leet mie aune 1963 deepen un lota leeten miene aundre dree Breeda sikj uk deepen.

Aune 1965 reisd ekj no de Staut Lagos un wia doa met mienen elren Brooda Wilson toop un met Pionieren von de Vesaumlunk Igbobi. Dee äare Freid un äa Iewa brocht mie bat doa, uk Pionia to woaren em Jaunewoa 1968.

Albert Olugbebi, waut em Betel deend, haud een besondret Toopkomen met ons Jugentliche. Hee räd doavon, daut et em Nuaden von Nigeria aun Sondapionieren fäld. Mie denkjt daut noch, woo oppjebrocht Brooda Olugbebi to ons säd: “Jie sent junk un jie kjennen june Tiet un Krauft fa Jehowa brucken. Doa es een deel Oabeit fa junt!” Ekj wull soo sennen aus de Profeet Jesaja, un doawäajen jeef ekj mie fa dän Sondapionia-Deenst aun (Jes. 6:8).

 Em Mei 1968 wort ekj aus Sondapionia no de Staut Kano em Nuaden von Nigeria jeschekjt. Daut wia en de Tiet von dän Biafra-Kjrich (1967-1970). Dis Kjrich haud een deel Lieden un Doot em Nuaden von Nigeria veuasoakt, oba nu wia dee dolla em Oosten von daut Launt. Een leeftolja Brooda rod mie too, nich doa hantogonen. Oba ekj säd to dän: “Dankscheen, daut du om mie bedocht best. Oba wan Jehowa haben well, daut ekj doa deenen saul, dan sie ekj mie secha, daut hee met mie sennen woat.”

De Kjrich haud en de groote Staut Kano väl Schoden aunjerecht. To seenen, woo daut doa leet, wia sea truarich. Eenjemol em Prädichtdeenst sag wie mau rajcht Menschenkjarpasch romligjen, waut grausom wieren dootjemoakt worden. Wan doa ea uk miere Vesaumlungen wieren, hauden de mieeschte Breeda sikj oba fuatjebrocht. Doa wieren nu weinja aus 15 Vekjindja en dee Staut un dee hauden groote Angst un wieren mootloos. Dise Breeda un Sestren freiden sikj sea, aus wie sas Sondapionieren doa hankjeemen. Wie kunnen dee Moot jäwen un dee feelden sikj uk wada bäta. Wie kunnen dee uk halpen, wada Toopkomes to haben un prädjen to gonen, un daut dee uk wada äare Berechten nom Betel schekjten un Bieekja bestalden.

Wie Sondapionieren fungen aun, de Hausa-Sproak to lieren. Väl Menschen von doa horchten ons too, wan wie äant opp äare Sproak von daut Kjennichrikj vetalden. Oba eenje Menschen von de jratste Jemeent doa jleichten daut nuscht, daut wie prädjen jinjen. Wie musten sea oppaussen. Opp eene Sauz rand een Maun ons met een Massa hinjaraun, oba ekj un mien Poatna kunnen dolla ranen un dee kjrieech ons nich tohoolen! Wan daut doa uk soo jefäadlich wia, holp Jehowa ons oba, “en Sechaheit” to sennen, un daut jeef doa dan uk emma mea Vekjindja (Psa. 4:9). Nu sent doa en Kano äwa 500 Vekjindja en 11 Vesaumlungen.

Aus ekj mau een poa Moonat en Kano jewast wia, wort ekj met twee aundre Sondapionieren toop em August 1968 no de Staut Niamey jeschekjt, de Hauptstaut von de Republikj Niger. Dit Launt es  en Wast-Afrika un es eent von de heetste Jäajenden oppe Welt. Wie musten lieren met de Hett foadich to woaren un wie musten uk Fraunzeesisch lieren, waut de Laundessproak wia. Wan daut uk sea schwoa wia, vetrud wie oba opp Jehowa un fungen aun, en dee Staut to prädjen, met een poa Vekjindja toop, waut doa wonden. Een Stootje lota haud meist jieda eena en Niamey, waut doa läsen kunn, daut Buak Die Wahrheit, die zu ewigem Leben führt jekjräajen toom de Bibel studieren. De Menschen kjeemen mau rajcht no ons un fruagen no soon Buak!

Boolt word wie en, daut de Rejierunk Jehowa siene Zeijen nich jleicht. Em Juli 1969 kjeem wie toop fa dän ieeschten Kongress von dree Doag. Doa wieren rom 20 Menschen. Wie freiden ons aula, daut sikj twee Vekjindja wullen deepen loten. Oba aul dän ieeschten Dach von dän Kongress kjeemen de Poliezen doahan un hilden daut Program opp. Dee neemen de Sondapionieren un dän Kjreisoppsechta met no de Poliezen-Offiz. Nodäm daut dee ons befroacht hauden, säden dee, daut wie uk dän näakjsten Dach doa hankomen musten. Daut leet soo, daut de Trubbels wudden jrata woaren, un doawäajen hild wie de Doopräd bie wäm tus auf un kunnen de Vekjindja dan plietsch en eenen Riefa deepen.

Een poa Wäakj lota schekjt de Rejierunk mie un fief aundre Sondapionieren ut daut Launt rut. Dee jeewen ons 48 Stund Tiet un wie musten daut uk noch selfst betolen. Wie jehorchten un fuaren jlikj no daut Betel en Nigeria, wua wie dan onse niee Toodeelungen kjrieejen.

Ekj wort no Orisunbare jeschekjt, eene Renzh en Nigeria. Doa kunn ekj met de kjliene Grupp Breeda toop prädjen un Bibelstudiums fieren, un daut jinkj mie sea scheen. Oba sas Moonat lota schekjt daut Betel mie auleen wada trigj no Niger. Ieeschtlich wia ekj äwarauscht un uk een bät nerwees, oba ekj freid mie aul, de Breeda en Niger wada to seenen!

Ekj kjeem wada no Niamey. Fuaz dän näakjsten Dach troff ekj eenen Jeschaftsmaun von Nigeria. Hee wort en, daut ekj eent von Jehowa siene Zeijen wia un funk aun, mie äwa de Schreft Froagen to stalen. Wie deeden toop de Bibel studieren un aus hee ieescht oppjehieet haud met schmieekjen un supen, leet hee sikj deepen. Lota kunn ekj opp veschiedne Städen em Launt prädjen un sach, woo met de Tiet mea Menschen de Woarheit aunneemen. Aus ekj doa hankjeem, wieren doa 31 Zeijen em Launt; oba aus ekj von doa veleet, wieren daut 69.

Utgangs 1977 kjeem ekj trigj no Nigeria fa eene School, waut dree Wäakj dieed. Opp Enj wees Malcolm Vigo, waut de Plona von daut Betelkommitee wia, mie eenen Breef von daut Betel en Sierra Leone. De Breeda doa sochten no eenen jesunden, onbefrieden Pionia, waut Enjlisch un Fraunzeesisch  kunn, toom aus Kjreisoppsechta en daut Launt Guinea deenen. Brooda Vigo säd to mie, daut se mie en de School fa dise Oppgow utjelieet hauden. Hee muak mie uk dietlich, daut et nich eene leichte Toodeelunk wia. Hee säd to mie: “Äwalaj daut goot, ea du daut aunnemst”. Oba ekj säd fuaz: “Wäajens daut Jehowa es, waut mie doahan schekjt, woa ekj gonen”.

Ekj fluach metem Zhett no Sierra Leone un troff mie doa met de Betelbreeda. Een Brooda von daut Betel-Kommitee säd to mie: “Wie weeten nich krakjt, woo de Breeda en Guinea daut jeit.” Guinea es een Nobalaunt von Sierra Leone, un daut Betel von Sierra Leone wia äwa daut Prädichtwoakj en Guinea aunjestalt. Oba wäajen en Guinea väl Orru wia, kunnen de Betelbreeda nich väl met de Breeda von Guinea räden. Daut Betel haft ieremol jeprooft, eenen Brooda doa hantoschekjen, oba wäajen de Rejierunk haft daut kjeenmol jeschauft. Doawäajen säden dee to mie, ekj sull no Conakry foaren, de Hauptstaut von Guinea, un doa proowen, met de Papieren to schaufen, daut ekj doa em Launt bliewen kunn.

Aus ekj en Conakry aunkjeem, jinkj ekj no dän Konsel von Nigeria un säd doa, daut ekj en Guinea prädjen wull. Oba hee rod mie too, nich doa to bliewen, wiels dee kunnen mie enstoppen ooda doa kunn noch schlemret passieren. Hee säd to mie: “Go trigj no Nigeria un doo doa prädjen”. Oba ekj auntwuad: “Ekj woa hia bliewen”. Dan schreef hee eenen Breef no eenen Beaumten von de Rejierunk en Guinea un fruach dän, aus dee mie met de Papieren halpen kunn, un dis Beaumta holp mie doamet.

Meist fuaz doano fua ekj trigj nom Betel en Sierra Leone un vetald de Breeda, waut de Beaumta jedonen haud. De Breeda wieren sea schaftich, aus dee hieeden, daut Jehowa miene Reis jesäajent haud. Ekj haud de Frieheit jekjräajen, en Guinea to bliewen!

Vonne 1978 bat aune 1989 deend ekj en Guinea un Sierra Leone aus Kjreisoppsechta un aus Veträda von dän Kjreisoppsechta en Liberia. Aum Aunfank wort ekj foaken krank; eenjemol uk, wan ekj irjentwua enne wille Hundat wia. Oba de Breeda holpen mie emma, daut ekj no een Hospitol kjeem.

Opp eene Sauz kjrieech ekj sea schlemm de Malaria-Krankheit un haud uk Ojjezeffa. Aus ekj mie ieescht bäta feeld, wort ekj en, daut de Breeda aul doaräwa jerät hauden, wua see mie wudden begrowen! Wan ekj uk foaken en Läwesjefoa wia, hab ekj oba kjeenmol jedocht, daut ekj miene Toodeelunk veloten wull. Bat vondoag sie ekj mie gaunz secha, daut de woare Sechaheit von dän Gott kjemt, waut de Doodes oppwakjen kaun.

Aune 1988 bejäajend ekj eene deemootje un jeistelje Pionia-Sesta, waut Dorcas heet. Wie befrieden ons un see kjeem met mie met em Kjreisdeenst. Dorcas bewees, daut see eene leeftolje Ehefru wia, waut väl derchsad. Wie jinjen toop bat 25 Kjlomeeta (15 Miel) von eene Vesaumlunk no de aundre un musten uk noch onse Tauschen droagen. Wan de Vesaumlungen wieda auf wieren, fua wie doa met,  wua wie kunnen. De Wäaj hauden groote Lajcha un wieren sea blottich.

Dorcas es sea äwanäment. Eenjemol must wie biejlikj äwarem Wota, wua Kruckedellen bennen wieren. Een mol must wie fief Doag reisen un eene heltane Brigj, wua wie äwa musten, wia tweijegonen. Dan must wie met Lommen äwa dän Riefa foaren. Aus Dorcas oppstunt toom ut de Lomm rutstaupen, foll see en daut deepe Wota nenn. Wie kunnen beid nich schwamen un doa wieren Kruckedellen en dän Riefa. Toom Jlekj sprungen eenje junge Mana doa nenn un kunnen ar raden. Wie hauden beid fa eene jewesse Tiet schlajchte Dreem wäajen daut, oba wie muaken doawäajen met onse Toodeelunk wieda.

Aunfangs 1992 vefieed wie ons sea aus wie enworden, daut Dorcas wudd een Kjlienet haben. Wudd wie nu kjennen em Voltietdeenst bliewen? Wie dochten soo: “Jehowa haft ons een Jeschenkj jejäft!” Doawäajen nand wie onse Dochta Jahgift (opp Enjlisch bediet daut: “Jeschenkj von Jehowa”). Vea Joa lota kjeem uk noch äa kjliena Brooda Eric to Welt. Onse Kjinja wieren beides Jeschenkja von Jehowa. Jahgift deend fa eene jewesse Tiet en de Äwasatungsoffiz en Conakry un Eric es een Deenstaumthelpa.

Met de Tiet hieed Dorcas opp met dän Sondapionia-Deenst. Oba see muak doawäajen met dän Pioniadeenst wieda, wan see sikj uk om onse Kjinja kjemmad. Met Jehowa siene Help kunn ekj wieda aus Sondapionia deenen. Aus onse Kjinja ieescht jrata wieren, kunn Dorcas uk wada Sondapionia sennen. Un nu deen wie beid aus Missionoaren en Conakry.

Ekj sie emma doahan jegonen, wua Jehowa mie hanjeschekjt haft. Ekj un miene Fru haben daut foaken jeseenen, woo hee ons beschizt un säajend. Wäajen wie opp Jehowa vetruden un nich opp tietelje Sachen, sent wie väl Sorjen un Trubbels utem Stich jegonen. Ekj un Dorcas haben daut selfst beläft, woo Jehowa Gott ons beschizt haft (1. Chr. 16:35). Ekj sie mie secha, daut daut Läwen von aul dee, waut opp Jehowa vetruen, “en däm Schutz von däm HARN . . . [onsen] Gott” es (1. Sam. 25:29).