1. Wuarom sent wie ons secha, daut wie “en de latste Doag” läwen?

BEST du no 1914 jebuaren? Dan hast du dien Läwen lank “en de latste Doag” von dise Welt jeläft (2. Tim. 3:1). Wie aula haben von daut jehieet, waut Jesus fa de latste Tiet verutsäd. Hee räd biejlikj von Kjrich, Hungaschnoot, Ieedbäbens, Krankheiten un daut de Gottloosichkjeit wudd toonämen un daut Jehova siene Deena wudden vefolcht woaren (Mat. 24:3, 7-9, 12; Luk. 21:10-12). Wie haben uk jeseenen, daut de Menschen sikj soo oppstalen, aus de Apostel Paulus daut verutsäd. (See dän Kausten “ Woo de Menschen nu sent”.) Wiels wie Jehova deenen, sent wie ons gaunz secha, daut wie nu “en de latste Doag” läwen.

2. Waut mott wie weeten?

² Von aune 1914 es aul väl Tiet vegonen, un daut jeft auntovestonen, daut wie nu aum Enj von “de latste Doag” läwen. Wiels daut Enj soo dicht bie es, mott wie de Auntwuaten fa een poa wichtje Froagen weeten, biejlikj: Waut woat gaunz aum Enj von de “de latste Doag” passieren? Un waut velangt Jehova en de Tweschentiet von ons?

3. Waut woaren de Velkja no 1. Tessalonicha 5:2-3 no bekauntmoaken?

³ Läs 1. Tessalonicha 5:2-3. Paulus rät hia von “dän Harn sien[en] Dach”. Dee woat aunfangen, wan se jäajen “daut groote Babel” komen, waut aule faulsche Gloowes oppe Welt väastalt, un dis Dach dieet bat Harmagedon (Opb. 16:14, 16; 17:5). Jroz ea Jehova sien Dach aunfangt, woaren de Velkja  bekauntmoaken, daut “aules . . . ruich un secha [es]”. (Eenje Bibeläwasatungen sajen uk: “Fräd un Sechaheit”.) Biejlikj soone Wieed brucken de huage Rejierungsmana eenjemol, wan dee doavon räden, woo de veschiedne Lenda kjennen bäta unjarenaunda foadich woaren. * Oba de Bekauntmoakunk: “Aules es ruich un secha”, wua de Schreft von rät, woat aundasch sennen. Wuarom? Wan daut bekauntjemoakt woat, dan woaren väl Menschen jleewen, daut de Rejierungsmana daut opp iernst jejlekjt haft, dise Welt sechra to moaken. Oba en Werkjlichkjeit woat dan de “groote Triebsaul” aunfangen un “äa vedoawen [woat] plazlich äwa an komen” (Mat. 24:21, Reimerbibel).

4. (a) Waut weet wie noch nich äwa de Bekauntmoakunk: “Aules es ruich un secha”? (b) Waut weet wie aul doaräwa?

⁴ Wie weeten eenjet äwa de Bekauntmoakunk: “Aules es ruich un secha”. Oba wie weeten biejlikj nich, waut de Rejierungsmana bat doa brinjen woat, daut dee daut sajen woaren ooda woo dee daut krakjt doonen woaren. Un wie weeten uk nich, aus dee mieremol soowaut bekauntmoaken woaren ooda mau eemol. Oba endoont, woo daut krakjt sennen woat, wie weeten, daut wie ons dan nich sellen enbillen loten, daut de Rejierungsmana opp iernst oppe gaunze Welt Fräd moaken kjennen. Enne Städ daut woat daut de Bekauntmoakunk sennen, wua wie aul lang opp jeräakjent haben. Daut woat daut Tieekjen sennen, daut “dän Harn sien Dach” meist fuaz aunfangt!

5. Woo halpt 1. Tessalonicha 5:4-6 ons, daut wie reed sent fa “dän Harn sien[en] Dach”?

⁵ Läs 1. Tessalonicha 5:4-6. Paulus siene Wieed wiesen ons, waut wie doonen kjennen, daut wie reed sent fa “dän Harn sien[en] Dach”. Wie sellen “nich schlopen, soo aus de aundre”, oba “waka . . . bliewen” un oppaussen. Wie motten biejlikj oppaussen, daut wie nich doaderch Poat “von dise Welt” woaren, daut wie ons mank de Politikj menjen, un wie sellen ons uk opp kjeenem siene Sied stalen (Joh. 15:19). Wie weeten, daut bloos Gott sien Kjennichrikj werkjlich Fräd brinjen kaun.

6. Bie waut well wie aundre halpen, un wuarom?

⁶ Wie wellen selfst waka bliewen, oba wie wellen uk aundre halpen, daut dee oppwakjen un doaropp achten, waut de Schreft verutsajcht. Hool wie emma em Denkj, daut ons Prädichtwoakj sea drinjent es! Wiels wan de groote Triebsaul ieescht aunfangt, dan woat et fa de Menschen too lot sennen, sikj noch opp Jehova siene Sied to stalen. *

7. Waut well Jehova, waut wie nu doonen sellen?

⁷ Jehova sien Dach woat boolt komen. Doawäajen well hee, daut wie em Deenst drock bliewen un emma beschafticht sent met onse “Oabeit fa dän Harn” (1. Kor. 15:58). Jesus säd verut, waut wie doonen wudden. Aus hee doavon räd, waut en de latste Tiet aules passieren wudd, säd hee uk: “Daut Evangelium [mott] aule Velkja jeprädicht woaren” (Mar. 13:4, 8, 10; Mat. 24:14). Stal die mol väa: Jiedatsmol, wan du em Deenst best, dan halpst du met, daut dise biblische Profezeiunk sikj erfelt!

8. Woo kjemt daut met daut Prädichtwoakj wieda?

⁸ Woo kjemt daut met daut Prädichtwoakj wieda? Jieda Joa hieren emma mea Menschen de Norecht von daut Kjennichrikj. Well wie bloos mol seenen, woo “en de latste Doag” de Zol von de Vekjindja oppe gaunze Welt toojenomen haft. Aune 1914 jeef et 5 155 Vekjindja en 43 Lenda. Oba vondoag dän Dach jeft et ojjefäa 8¹⁄₂ Millionen Vekjindja en 240 Lenda! Un ons Woakj es noch nich derch. Wie motten daut wieda bekauntmoaken, daut bloos Gott sien Kjennichrikj aul onse Trubbels fiksen kaun (Psa. 145:11-13).

9. Wuarom mott wie wieda de goode Norecht von daut Kjennichrikj prädjen?

⁹ Wie woaren de goode Norecht von daut Kjennichrikj soo lang prädjen, bat Jehova sajcht, daut wie opphieren sellen. Woo väl Tiet haben de Menschen noch toom Jehova Gott un Jesus Christus kjanen lieren? (Joh. 17:3). Daut weet wie nich. Oba wie weeten, daut “aul dee, waut to daut eewje Läwen rajcht enjestalt [sent]”, nu noch no de goode Norecht horchen kjennen, ea de groote Triebsaul aunfangt (Apj. 13:48, NW). Woo kjenn wie dee halpen, ea daut too lot es?

10. Woo halpt Jehova ons, daut wie de Menschen de Woarheit lieren kjennen?

¹⁰ Jehova jeft ons derch siene Organisazion aules, waut ons fält, om de Menschen de Woarheit to lieren. Wie woaren biejlikj jieda Wäakj utjelieet bie daut Toopkomen enne Wäakj. Doa lia wie, waut wie bie de ieeschte Vetal uk bie Wadabesuchs sajen kjennen un woo wie kjennen met wäm de Bibel studieren. Jehova siene Organisazion haft ons uk daut Jereetschoft fa dän Deenst jejäft. Dise Sachen halpen ons, . . .

•   eene Vetal auntofangen,

• wäm nieschierich to moaken,

• de Menschen to halpen, daut dee mea weeten wellen,

• Bibelstudiums de Woarheit ut de Schreft to lieren un

• Intressieede no onse Websied hantowiesen un nom Vesaumlungshus to kroagen.

Oba daut rieekjt nich too, bloos dise Sachen to haben. Wie motten dee uk brucken. * Wan wie biejlikj met wäm fein räden kjennen un dän dan een Zeichnisblaut ooda eene Tietschreft loten, dan kaun dee doabennen läsen, bat wie dän wada trafen. Jieda eena haft selfst de Veauntwuatunk, jieda Moonat soo väl aus mäajlich em Deenst to doonen.

11. Wuarom jeft et de Bibelklaussen em Internet?

¹¹ Jehova halpt de Menschen uk derch de Bibelklaussen em Internet, de Woarheit kjanen to lieren. Wuarom jeft et dise Bibelklaussen opp jw.org^®? Wiels jieda Moonat sea väl Menschen oppe gaunze Welt em Internet sieekjen, wäajen see doa mea ut de Bibel lieren wellen. De Bibelklaussen opp onse Websied kjennen dee halpen, de Woarheit ut Gott sien Wuat to finjen. Un eenjemol räd wie veleicht uk met Menschen, waut nich fuaz met ons toop de Bibel studieren wellen. Dan kjenn wie an de Bibelklaussen opp onse Websied wiesen ooda dee eenen Link fa dee schekjen, wan et dee aul opp eene Sproak jeft, waut dee vestonen kjennen. *

12. Waut kaun eena bie de Bibelklaussen em Internet lieren?

¹² Onse Bibelklaussen em Internet haundlen sikj von de Teemasch: “De Bibel un wäa dee jeschräwen haft”, “De Persoonen enne Bibel” un “De Hopninj, wua de Bibel von rät”. Doa kaun eena biejlikj lieren:

• Woo de Bibel eenem halpen kaun

• Wäa Jehova, Jesus un de Enjel sent

• Wuarom Gott de Menschen muak

• Wuarom daut soo väl Lieden un schlajchtet jeft

Doa kaun eena uk lieren, woo Jehova . . .

• met daut Lieden un dän Doot een Enj moaken woat un

• de Vestorwne oppwakjen woat un

• woo sien Kjennichrikj harschen woat enne Städ de schlajchte menschelje Rejierungen.

13. Rieekjt daut too, bloos de Bibelklaussen em Internet derchtogonen? Laj daut ut.

¹³ Daut es nich jenuach, daut de Menschen bloos de Bibelklaussen em Internet derchgonen. Jesus haft ons aunjestalt, Jinja to moaken. Wie hopen, daut de Intressieede de Bibelklaussen derchgonen un dee jleichen un dan noch mea lieren wellen. Dan wellen see veleicht een Bibelstudium aunfangen. Opp Enj von jieda Poat von de Bibelklaussen woat de Läsa toojerot, daut see doano froagen sellen, daut doa wäa met an toop de Bibel studieet. Jieda Dach froagen jlikjderch mea aus 230 Menschen oppe gaunze Welt opp onse Websied no een Bibelstudium. Daut es onbedinjt needich, daut eena met eenen Bibelliera toop de Bibel studieet!

14. Bie waut sell wie ons bastet doonen, soo aus Jesus en Matäus 28:19-20 sajcht, un wuarom?

¹⁴ Läs Matäus 28:19-20. Wan wie Bibelstudiums haben, dan sell wie ons bastet doonen, om Jesus sien Jeboot notokomen: “Moakt an to Lieelinja un . . . lieet an aules to doonen, waut ekj junt befolen hab.”  Wie motten de Menschen wiesen, woo needich daut es, daut dee fa Jehova un fa sien Kjennichrikj enstonen. Doawäajen mott wie dee halpen, daut notokomen, waut see lieren, un sikj Jehova hantojäwen un deepen to loten. Aus wan nich, woaren dee Jehova sienen Dach nich äwaläwen kjennen (1. Pet. 3:21, NW).

15. To waut hab wie nich Tiet, un wuarom?

¹⁵ Soo aus wie aul jeseenen haben, es daut Enj von dise Welt sea dicht bie. Doawäajen hab wie nich mea de Tiet, wieda met soone de Bibel to studieren, waut sikj aulmols nich eenich woaren, Christus notofoljen (1. Kor. 9:26). Ons Woakj es drinjent! Doa motten noch väle de Norecht von daut Kjennichrikj hieren, ea daut too lot es.

16. Waut mott wie aula doonen, soo aus Openboarunk 18:2, 4-5, 8 sajcht? (See uk de Footnoot.)

¹⁶ Läs Openboarunk 18:2, 4-5, 8. En dise Varzh see wie noch waut, waut Jehova von siene Deena velangt. Aule woare Christen motten gaunz wajchbliewen von daut groote Babel. Soone, waut met ons de Bibel studieren, jehieeden ea woomäajlich to eenen faulschen Gloowen. Veleicht fuaren dee no eene Kjoakj un muaken bie dee äare Jewanheiten met. Ooda dee deeden äare Kjoakj met Jelt unjastetten. Ea eena, waut de Bibel studieet, een ojjedeepta Vekjindja woaren kaun, mott dee sikj von aules loosmoaken, waut met dän faulschen Gloowen to doonen haft. Wan dee to eene Jemeent ooda to sest eene Organisazion jehieet, waut met daut groote Babel to doonen haft, dan mott dee doa rutgonen – dee wudd biejlikj kjennen eenen Breef no dee schriewen, om sikj von dee loostomoaken. *

17. Waut vonne Oabeit woaren Christen nich doonen, un wuarom nich?

¹⁷ Een woara Christ mott uk oppaussen, daut siene Oabeit nuscht met daut groote Babel to doonen haft (2. Kor. 6:14-17). Dee wudd sikj biejlikj nich bie eene Kjoakj vemeeden. Un een Christ, waut fa eenen Wieet schauft, wudd secha nich wellen väl en een Jebied schaufen, waut met dän faulschen Gloowen to doonen haft. Un wan dee selfst de Wieet es, dan woat dee sikj nich aunbeeden fa daut groote Babel to schaufen un dee woat uk kjeene Oabeit fa dee doonen, wan see am doano froagen. Wuarom näm wie daut soo iernst? Wäajen wie nuscht met de Woakjen un de Sinden  von Gloowes to doonen haben wellen, waut Gott fa orrein talt (Jes. 52:11). *

18. Woo hilt een Brooda sikj bie de Oabeit aun de biblische Gruntsauzen?

¹⁸ Joaren trigj fruagen se eenen Eltesten, waut fa sikj selfst schauft, aus hee en siene Staut bie de Kjoakj een bät waut deschren kunn. Dee, waut am fruach, wist goot, daut de Brooda emma säd, hee wudd nich fa eene Kjoakj schaufen. Oba wiels dän daut sea needich aun eenen Descha fäld, prachad hee dän Brooda, daut hee daut doonen sull. De Brooda oba hilt sikj aun de biblische Gruntsauzen un säd de Oabeit auf. Un de näakjste Wäakj wia doa dan een Bilt en de Post, wua een aundra Descha aun dise Kjoakj een Kjriez aunmuak. Wan ons Brooda de Oabeit aunjenomen haud, dan wudd doa goot haben kunt een Bilt von am en de Post sennen. Stal die väa, waut siene Gloowesbreeda dan wudden äwa am jedocht haben! Un woo wudd Jehova sikj jefeelt haben?

19-20. (a) Waut hab wie bat nu jelieet? (b) Waut mott wie noch lieren?

¹⁹ De Schreft wiest ons, woone wichtje Profezeiunk sikj daut näakjste erfellen woat. Boolt woaren de Velkja bekauntmoaken, daut “aules . . . ruich un secha [es]”. Oba Jehova haft ons jelieet, daut dee nich opp iernst Fräd moaken kjennen, waut oppe Lenjd blift. Waut sell wie doonen, bat dise Profezeiunk sikj erfelt un daut Vedoawen plazlich äwa an kjemt? Jehova well haben, daut wie flietich de goode Norecht von daut Kjennichrikj prädjen un ons bemieejen, mea Jinja to moaken. Un wie motten gaunz wajchbliewen von aule faulsche Gloowes. Doa es met en, daut wie ut daut groote Babel rutgonen un fa daut kjeene Oabeit doonen.

²⁰ Oba waut velangt Jehova noch von ons? Waut woat aum Enj von “de latste Doag” noch passieren? Un woo kjenn wie ons opp daut reedmoaken, waut boolt kjemt? Daut woa wie en dän näakjsten Artikjel lieren.