1. Woo denkjt Jehova äwa deemootje Menschen? Laj daut ut.

JEHOVA leeft deemootje Menschen. Bloos deejanje, waut opp iernst deemootich sent, kjennen goode Frind met am sennen. Oba “de stolte” kjant hee bloos “von wiet auf” (Psa. 138:6). Wie aula wellen Jehova jefaulen un von am jeleeft woaren. Doawäajen sell wie daut lieren, deemootich to sennen.

2. Von waut woa wie en disen Artikjel räden?

² En disen Artikjel woa wie dree Froagen beauntwuaten: 1. Waut es Deemoot? 2. Wuarom sell wie lieren, deemootich to sennen? Un 3. wanea kaun daut schwoa sennen, deemootich to bliewen? Wie woaren uk seenen, daut wie Jehova sien Hoat froo moaken un daut ons daut selfst togood kjemt, wan wie deemootich sent (Spr. 27:11; Jes. 48:17).

3. Waut bediet daut, deemootich to sennen?

³ Een deemootja Mensch talt sikj nich fa hecha aus aundre un es uk nich stolt. Hee weet, daut Jehova väl jrata es aus hee, un denkjt uk rajcht äwa aundre Menschen. Soon Mensch helt em Denkj, daut de aundre en jewesse Stekjen bäta sent aus hee selfst (Filip. 2:3-4).

4-5. Wuarom es daut nich onbedinjt von buten to seenen, aus eena deemootich es?

⁴ Eenje Menschen lat deemootich, oba dee sent daut nich werkjlich. Veleicht sent dee bleed ooda dee sent leeftolich un respakjtvoll, wäajen äare Elren an daut jelieet haben. Oba ennalich kjennen dee sea stolt sennen. Un enne Lenjd  woat sikj daut utwiesen, waut dee werkjlich em Hoat haben (Luk. 6:45).

⁵ Aundre sent nuscht nich bleed un sajen aules jlikjtoo, oba daut bediet nich onbedinjt, daut dee stolt sent (Joh. 1:46-47). Dee motten oppaussen, daut dee sikj nich opp sikj selfst veloten. Wie aula motten doaropp schaufen, daut wie von Hoaten deemootich sent, endoont aus wie bleed sent ooda nich.

6. Waut kjenn wie no 1. Korinta 15:10 no von dän Apostel Paulus lieren?

⁶ Well wie mol seenen, waut wie von dän Apostel Paulus lieren kjennen. Jehova brukt am toom en sea väl Städa fresche Vesaumlungen oppstalen. Woomäajlich kunn hee mea em Deenst doonen aus irjenteen aundra von Jesus Christus siene Apostel. Oba Paulus deed sikj nich erhäwen. Hee säd deemootich: “Ekj sie de jerinjsta von de Apostel un sie daut nich wieet, een Apostel jenant to woaren, wiels ekj Gott siene Jemeent vefolcht hab” (1. Kor. 15:9). Un dan muak Paulus daut dietlich, daut hee bloos derch Gott siene Jnod kunn Frint met Gott sennen un nich, wäajen hee selfst soo väl volbrocht haud ooda soo besonda wia (läs 1. Korinta 15:10). En sienen Breef aun de Korinta wees Paulus, woo eena kunn deemootich sennen. Hee pucht nich met sikj, wan eenje von dise Vesaumlunk sikj uk äwa am erhäwen wullen (2. Kor. 10:10).

7. Woo wia daut bie eenje bekaunde Breeda en onse Tiet to seenen, daut dee deemootich wieren? Jeff een Biespel.

⁷ De Läwesjeschicht von Brooda Karl F. Klein, waut em Väastaunt von Jehova siene Zeijen wia, haft aul väl von Jehova siene Deena Moot jejäft. Doa vetald hee deemootich von väl Schwierichkjeiten, waut hee haud. Aus hee biejlikj aune 1922  toom ieeschte Mol von Hus to Hus prädijd, foll am daut soo schwoa, daut hee daut ojjefäa twee Joa nich wada proowd. Un lota, aus hee dan em Betel deend un doa Rot kjrieech, oajad hee sikj eene Tietlank doaräwa. Hee bruak uk gaunz met de Narfen toop, wan hee sikj lota uk wada bäta feeld. Un doch kjrieech hee väl scheene un besondre Oppgowen en Jehova siene Organisazion. Denkj mol han, woo deemootich soon bekaunda Brooda sennen mott, om gaunz frie von siene Schwakheiten to räden! Een deel Breeda un Sestren denkjt daut noch von disen leewen Brooda un von siene feine Läwesjeschicht. *

8. Woo wiest 1. Petrus 5:6 ons, daut Jehova Deemoot jleicht?

⁸ Jehova jleicht deemootje Menschen, un daut es de wichtichste Uasoak, wuarom wie wellen deemootich sennen. Daut muak de Apostel Petrus dietlich (läs 1. Petrus 5:6). Daut Buak “Komm, folge mir nach” rät von Petrus siene Wieed un sajcht: “Stolt sennen es soo aus Jeft un kaun sea schlemme Foljen haben. Gott kaun met dän kjlieekjsten Mensch nuscht aunfangen, wan dee stolt es. Oba een gaunz jeweenelja Mensch kaun fa Jehova sea wieetvoll sennen, wan dee deemootich es. . . . [Hee] freit sikj sea, wan hee ons . . . fa onse Deemoot beloonen kaun.” * Jeft daut noch waut bätret, aus Jehova sien Hoat froo to moaken? (Spr. 23:15).

9. Wuarom sent aundre wellich met ons toop, wan wie deemootich sent?

⁹ Waut fa goodet brinjt daut noch, wan wie deemootich sent? Eent es, daut aundre dan wellich met ons toop sent. Wuarom? Denkj wie mol doaraun, waut vonne Menschen wie jleichen (Mat. 7:12). De mieeschte wellen nich met soone toop sennen, waut emma opp äa Stekj bliewen un kjeenmol no aundre horchen. Oba ons jeit daut scheen, met onse Gloowesbreeda toop to sennen, waut “metlieden haben, breedalich goot . . . [sent] un von Hoaten deemootich . . . [sent]” (1. Pet. 3:8). Wan wie wellich met soone Menschen toop sent, dan woaren dee uk wellich met ons toop sennen, wan wie deemootich sent.

10. Wuarom moakt Deemoot ons daut Läwen leichta?

¹⁰ Deemoot moakt ons uk daut Läwen leichta. Secha woa wie eenjemol waut  seenen ooda beläwen, waut wie fa ojjerajcht talen. De weisa Kjennich Salomo säd: “Ekj hab jeseenen, daut een Kjnajcht opp een Pieet sett, un een Volkjsleida tofoot jeit, aus een Kjnajcht” (Liera 10:7). Deejanje, waut sikj met väl vestonen, kjrieen nich emma de Iea, waut dee traft. Un dee, waut sikj met weinja vestonen, woaren eenjemol sea jeloft. Oba Salomo wist, daut et bäta wia, sikj to daut to schekjen, woo daut em Läwen rand, enne Städ sikj daut bloos doamet schwoa to moaken (Liera 6:9). Wan wie deemootich sent, dan woa wie ons leichta to soont schekjen, waut wie fa ojjerajcht talen.

11. Waut sell wie doonen, wan wie Rot kjrieen?

¹¹ Wie kjennen daut jieda Dach bewiesen, daut wie deemootich sent. Well wie mol een poa Biespels seenen: Wan wie Rot kjrieen. Wan sikj wäa de Tiet nemt un ons eenen Rot jeft, dan es daut woomäajlich een Bewies doafäa, daut wie eenen jratren Fäla jemoakt haben, aus wie dochten. Veleicht wudd ons fuaz jankren, doajäajen to strieden. Veleicht gruns wie äwa dänjanjen, waut ons dän Rot jeft, ooda wie jleichen daut nich, woo dee ons daut sajcht. Oba wan wie deemootich sent, dan strenj wie ons aun, de rajchte Enstalunk to haben.

12. Wuarom sell wie no Spricha 27:5-6 no dankboa sennen, wan ons wäa Rot jeft? Met waut jeit daut to vejlikjen?

¹² Een deemootja Mensch es dankboa fa Rot. Stal die mol väa, daut du bie een Toopkomen best. Nodäm daut du doa met miere Breeda un Sestren vetalt hast, kroacht die wäa oppoat un sajcht die leeftolich, daut du waut tweschen de Tänen hast. Secha schämt sikj die daut. Oba freist du die nich, daut deejanja die daut säd? Un woomäajlich wurscht du die wenschen, daut die daut aul ea wäa jesajcht haud. Krakjt soo deemootich un dankboa well wie sennen, wan een Gloowesbrooda soo äwanäment es un ons eenen Rot jeft, wan daut needich es. Soon Brooda es ons Frint un nich ons Fient (läs Spricha 27:5-6; Gal. 4:16).

13. Woo kjenn wie deemootich sennen, wan aundre eene Oppgow en Jehova sien Volkj kjrieen?

¹³ Wan aundre eene jewesse Oppgow ooda een Aumt kjrieen. Een Eltesta, waut Jason heet, sajcht: “Wan aundre eene besondre Oppgow kjrieen, dan wunda ekj eenjemol, wuarom mie dee nich traft.” Jeit die daut uk eenjemol soo? Daut es fein, wan eena doano sträft, mea fa Jehova to doonen (1. Tim. 3:1). Oba wie motten  oppaussen, waut wie denkjen. Aus wan nich, kaun ons Hoat leicht stolt woaren. Een Brooda kunn dan biejlikj denkjen, daut hee deejanja es, waut sikj daut baste met eene jewesse Oppgow en de Vesaumlunk vesteit. Ooda eene befriede Sesta kunn denkjen: “Mien Maun wudd sikj väl bäta met daut weeten aus jan Brooda!” Oba wan wie opp iernst deemootich sent, dan woa wie nich soo jesonnen sennen.

14. Waut kjenn wie von daut lieren, waut Moses deed, aus aundre Mana besondre Oppgowen kjrieejen?

¹⁴ Wie kjennen väl von Moses lieren. Waut deed hee, aus aundre Menschen besondre Oppgowen kjrieejen? Moses räakjend daut sea väl, daut hee de Israeliten äa Leida sennen kunn. Oba aus Jehova noch aundre Mana aunstald, wia hee nich aufjenstich (4. Mo. 11:24-29). Hee wia deemootich un leet sikj von aundre halpen, daut Volkj to rechten (2. Mo. 18:13-24). Daut kjeem de Israeliten sea togood, wiels daut dan mea Mana jeef, waut doa met Jerechtssachen schaufen kunnen. Moses wia aulsoo dolla doarom todoonen, daut de Menschen Help kjrieejen, aus daut hee eene besondre Oppgow haud. Es daut nich een goodet Biespel fa ons? Wan wie waut fa Jehova doonen wellen, dan well wie em Denkj hoolen, daut et wichtja es, deemootich to sennen, aus sikj met väl to weeten. De Schreft sajcht: “Wan du, HAR, uk huach bowen best, du kjikjst rauf un sitst de jerinje” (Psa. 138:6).

15. Waut haft sikj bie väl Breeda un Sestren jeendat?

¹⁵ Wan onse Omstend sikj endren. Nich lang trigj kjrieejen väl Breeda un Sestren, waut Jehova aul lang jedeent haben, eene fresche Oppgow. Biejlikj jeef et von 2014 aun kjeene Distrikjtoppsechta mea un doawäajen kjrieejen dise Breeda un äare Frues eene fresche Oppgow em Voltietdeenst. Un von 2014 aun es daut uk soo, daut  een Brooda nich mea kaun Kjreisoppsechta sennen, wan dee ieescht 70 Joa es. Un Breeda, waut 80 Joa ooda ella sent, kjennen en äare Vesaumlunk nich mea de Plona von de Eltestasch sennen. Un en de latste Joaren worden uk väl Breeda, waut em Betel deenden, aundatwäajen hanjeschekjt toom doa Pionia sennen. Wada aundre musten met dän Sondavoltietdeenst opphieren, wiels dee Trubbel met de Jesuntheit hauden, sikj om wäm von äare Famielje kjemren musten ooda wäajen aundre Uasoaken.

16. Waut wees, daut onse Breeda un Sestren deemootich wieren, nodäm daut äare Omstend sikj endaden?

¹⁶ Väl von dise Breeda un Sestren wia daut nich leicht, sikj to äare niee Omstend to wanen. Dee räakjenden de Oppgow sea väl, waut see ea veleicht joarenlank hauden. Eenje wieren sea truarich, aus see met dee opphieren musten. Oba met de Tiet kunnen see sikj to äare niee Omstend wanen. Wuarom? Waut an daut mieeschte holp, wia äare Leew fa Jehova. Dee dochten doaraun, daut see sikj Gott hanjejäft hauden un nich eene jewesse Oppgow ooda een Woakj ooda een Aumt (Kol. 3:23). Dee deenen Jehova wieda deemootich, endoont wua daut es. Un dee schmieten aul äare “Sorjen opp am”, wiels dee weeten, daut hee fa an sorcht (1. Pet. 5:6-7).

17. Wuarom sent wie dankboa, daut Gott sien Wuat ons toorot, deemootich to sennen?

¹⁷ Sent wie nich dankboa, daut Gott sien Wuat ons toorot, deemootich to sennen? Deemoot es eene goode Ieejenschoft, waut ons un uk aundre togood kjemt. Wan wie deemootich sent, dan kjenn wie leichta met Schwierichkjeiten foadich woaren. Un daut wichtichste es, daut wie doaderch onsen himlischen Voda noda komen. Frei wie ons nich, daut hee siene deemootje Deena väl räakjent, wan hee uk “huach en ieren es”? (Jes. 57:15).