Dit Jefeel kjemt opp, wan eena daut äwadrock haft. Dien Vestaunt veschekjt dan Sachen, waut sikj Hormonen nanen, em gaunzen Kjarpa. Doamet fangt daut Hoat aun, bosja to gonen, de Blootdruck jeit nopp, eena fangt aun, pienja to odmen un de Musklen holen aun. Ea eena doa waut von enwoat, es de Kjarpa aul reed toom waut doonen. Wan soone Oppräajunk ieescht äwa es, dan lat de Kjarpa wada no soo aus jeweenlich.

Stress halpt eenem, met schwoare Loagen omtogonen. Daut fangt aula em Vestaunt aun. Stress halpt dän Kjarpa uk, haustich bie de Sach to sennen. Wan daut met Mot es, dan kaun eenem daut soogoa halpen, daut uttofieren, waut eena sikj väajenomen haft ooda aundre wichtje Sachen bäta notokomen.

Oba wan eena too sea, too lang ooda emma Stress haft, dan kaun eenem daut schoden. Daut kaun doatoo fieren, daut eena kjarpalich, ennalich un uk em Vestaunt doarunja lieden mott, ooda daut eena sikj aundasch vehelt un uk aundre aundasch behaundelt. Eenje fangen dan aun to drinkjen ooda wanen sikj aundre schlajchte Sachen aun. Daut kaun soo wiet komen, daut eena narfenkrank woat, gaunz raufkjemt ooda sikj soogoa well daut Läwen nämen.

Stress kaun to veschiedne Krankheiten fieren, wan daut uk nich bie aule äwareen es. Schia jieda Poat vom Kjarpa kjricht daut to späaren.