Wan wie too sea doano kjikjen, en waut fa Stekjen aundre daut aundasch haben aus wie, dan kjenn wie daut leicht fa schlajcht talen. Un wie wudden ons kjennen fa bäta talen aus dee. Un wan wie schlajcht äwa wäm denkjen, dan woat ons daut schwoa sennen, met dän metfeelent to sennen. Daut aules kaun wiesen, daut eena eenen Unjascheet manke Menschen moakt.

“Freit junt met dee met, dee doa froo sent, un hielt met dee met, dee doa hielen” (REEMA 12:15)

Waut meent daut? Dis Bibelvarsch wiest ons, daut wie sellen metfeelent sennen. Daut bediet, daut wie ons en eenen aundren siene Städ stalen un proowen to vestonen, woo dee sikj feelt.

Wan wie met wäm metfeelen, dan woa wie en, woo väl wie met dän äwareen haben. Wie vestonen dan, daut deejanja woomäajlich krakjt soo denkjt aus wie un krakjt daut deit waut wie. Wan wie Metjefeel haben, dan kjenn wie seenen, daut wie aules Menschen sent, krakjt endoont von wua wie häakomen. Wan wie doano kjikjen, waut wie met aundre äwareen haben, dan woat ons daut leichta sennen, goot von dee to denkjen.

Metjefeel woat ons uk halpen, daut wie aundre achten. Anne-Marie von Senegal acht ieeschtemma soone Menschen nich väl, waut en äa Launt nich goot aunjeseenen wieren. Woo holp Metjefeel ar sikj to endren? See sajcht: “Aus ekj sach, woo schwoa dee daut hauden, docht ekj doaräwa no, woo ekj mie en dee äare Städ feelen wudd. Un mie dakjt daut op, daut ekj nuscht mea wieet wia aus dee un daut ekj nich Uasoak haud, mie fa bäta to talen.” Wan wie proowen to vestonen, waut fa Schwierichkjeiten de aundre haben, dan woa wie nich soo leicht äwa dee grumsaujen.

Wan du schlajcht äwa aundre denkjst, dan proow to vestonen, waut du met dee äwareen hast. Woo jeit dee daut biejlikj, . . .

• wan dee met äare Famielje toop waut äten?

• wan dee dän Dach äwa sea jeschauft haben?

• wan dee met äare Frind toop sent?

• wan dee äare baste Sort Spell horchen?

Dan stal die daut väa, woo die daut en dee äare Städ wudd gonen. Denkj mol han:

• “Waut wudd ekj doonen, wan aundre mie aufschuwen deeden?”

• “Woo wudd ekj mie feelen, wan aundre mie fa schlajcht talen wudden, ea dee mie verheipts kjanden?”

• “Woo wudd ekj wellen behaundelt woaren, wan ekj von deeselwje Sort Menschen wia?”