Es daut Uniwersum (de Stiernhimmel un de Ieedbaul) un daut Läwen von Gott jemoakt ooda es daut von veselfst jekomen? Daut, waut de Forscha un de Bibel aum Aunfank von disen Artikjel sajen, sent sea veschiedne Auntwuaten opp dise Froag. Opp beid Sieden jeft daut väl Menschen, waut aula opp äa Stekj stonen bliewen. Oba väl Menschen sent sikj nich secha en disen Stekj. Un äwa Tellewizhen, en Bieekja un aundatwäajen woat sea äwa dit jesträden.

Veleicht haft dien Schoolliera die mol gaunz vesechat, daut daut Uniwersum un daut Läwen von veselfst jekomen es; onen eenen Schepfa, waut daut jemoakt haft. Oba jeef dee die Bewies doafäa? Ooda veleicht hast du von de Gloowesleidasch jehieet, daut et eenen Schepfa jeft. Oba jeewen dee die Bewies doafäa? Ooda säden dee bloos, daut du daut eefach jleewen motst, wiels daut en de Bibel soo steit?

Secha hast du mol äwa dit nojedocht un du denkjst veleicht: Kjeena kaun secha sajen, aus daut eenen Schepfa jeft. Ooda veleicht denkjst du soo: Es daut verheipts wichtich, mie daut to unjastonen?

En dit Woat waka! woa wie seenen, waut väle bat doa jebrocht haft, aun eenen Schepfa to jleewen. Un dan woa wie uk noch seenen, wuarom daut wichtich es, sikj daut to unjastonen, von wua daut Läwen oppe Ieed häakjemt.