Jeef et daut Uniwersum aul emma?

1. Mose 1:1 sajcht: “Aum Aunfank muak Gott Himmel un Ieed.”

Bat rom daut Joa 1950 jleewden bekaunde Wissenschoftla, daut et daut Uniwersum aul emma jejäft haud. Oba no daut no, waut Wissenschoftla nu rutjefungen haben, stonen de mieeschte too, daut daut Uniwersum doch eenen Aunfank haud.

Woo leet de Ieed aum Aunfank?

1. Mose 1:2, 9 sajcht, de Ieed haud dan “noch kjeen Jeschekj un kjeen Läwen”.

Sea soo erkjläaren de Forscha daut vondoag dän Dach uk. De Wissenschoftla Patrick Shih sajcht, daut de Ieed “aum Aunfank nich läwendje Loft rom haud . . . un daut dee ladich un fonnich leet.” En daut Heft Astronomy woat jesajcht: “Waut de Forscha daut latste rutjefungen haben, jeft auntovestonen, daut dee Ieed aum Aunfank voll Wota wia un weinich ooda kjeen Launt to seenen wia.”

 Woo veendad sikj de Loft romme Ieed met de Tiet?

1. Mose 1:3-5 jeft auntovestonen, daut aum Aunfank nich to seenen wia, von wua daut Licht kjeem. Mau lota wort daut dietlich, aus de Sonn un Mon von oppe Ieed kloa to seenen wieren (1. Mose 1:14-18).

Daut Smithsonian Environmental Research Center sajcht, daut de Loft romme Ieed ieeschtlich bloos doffet Licht derchleet. Dee sajen: “Doa wia Metan-Gauss oppe gaunze Ieed soo aus een dichta Näwel.” Lota deed “de Metan-Gauss sikj aufkloaren un de bleiwa Himmel jinkj to seenen.”

Woo kjeem daut Läwen eent no daut aundre opp?

1. Mose 1:20-27 sajcht, daut ieescht Fesch, Väajel un Launt-Tieren jemoakt worden un tolatst Menschen. Forscha jleewen, daut et ieescht de Fesch jeef, dan lang lota aundre Tieren un noch väl lota de Menschen.

Eenjemol woat jesajcht, daut de Bibel nich met daut tooppaust, waut de Wissenschoftla rutjefungen haben. Daut haft foaken doamet to doonen, daut se nich rajcht vestonen, waut de Bibel werkjlich sajcht.

De Bibel sajcht nich, daut daut Uniwersum un de Ieed bloos 6 000 Joa oolt sent. Dee sajcht bloos, de Ieed un daut Uniwersum worden “aum Aunfank” jemoakt (1. Mose 1:1). De Bibel sajcht nich, woo lang trigj daut wia.

De Bibel sajcht nich, daut aulet Läwen en sas Doag von 24 Stund jemoakt wort. Wan de Bibel hia von eenen “Dach” rät, meent dee eene jewesse Tiet. Toom Biespel nant eene Tiet von de sas “Doag“, wua 1. Mose, Kapitel 1 von rät un wua de Ieed un daut Läwen doabowen jemoakt wort, uk dän “Dach, . . . [wua] Gott de Ieed un Himmel muak” (1. Mose 2:4, JHF). Een eensja Dach von de sas “Doag”, wua Jehova * Gott de Ieed un daut Läwen doabowen muak, kaun aulsoo eene sea lange Tiet jewast sennen.

De Bibel sajcht nich, daut läwendje Sachen sikj met de Tiet nich veendren kjennen. Ieeschte Mose sajcht, daut de Tieren “eene jiedre Sort oppoat” jemoakt wort (1. Mose 1:24-25) Daut biblische Wuat “Sort” meent hia eene groote Grupp Läwenwäsent, wua veschiedne Tieren mank jehieren, waut sea änlich sent. Dit Wuat kunn bedieden, daut dee Tieren, waut to eene “Sort” jehieren un toopläwen, sikj met de Tiet een bät veendren kjennen.

 Waut denkjst du?

Soo aus wie jroz jeseenen haben, sajcht de Bibel en eefache oba krakjte Wieed, woo de Ieed aum Aunfank leet un woo daut Uniwersum un daut Läwen aunjefongen haft. Kunn daut sennen, daut de Bibel dan uk sajcht, wäa daut aules jemoakt haft? De Encyclopædia Britannica sajcht: “De eefache Iedee, daut daut Läwen derch butamenschelje Krauft tostaund jekomen es, stemt met daut, waut de Wissenschoft bat nu rutjefungen haft.” *