De Schreft haft äa Läwen veendat

WAUT brocht eenen Maun, waut bie dän Rastafari-Gloowen wia, doatoo, siene lange Hoa auftoschnieden un nich mea jäajen de witte Menschen to sennen? Un woo kunn een ruchloosa, junga Maun, waut Jelt enkollakjt fa soone, waut met Droggs schauften, sien Läwen endren? Kjikj mol, waut dise twee Mana sajen.

“Nu moak ekj nich mea eenen Unjascheet manke Menschen” (HAFENI NGHAMA)

ELLA: 34

VON WOON LAUNT: SAMBIA

WAUT EKJ EA WIA: EKJ WIA EN DÄN RASTAFARI-GLOOWEN

MIENE VEGONENHEIT: Ekj sie en Sambia jebuaren, en een Loaga fa soone Menschen, waut von een aundret Launt flichten musten. Miene Mame must von Namibia flichten aus doa Kjrich wia. Un see wia bie eene Organisazion biejegonen, waut jäajen de Rejierunk von Sied-Afrika kjamfen deed, waut dee Tiet äwa Namibia rejieren deed.

En miene ieeschte 15 Joa läwd ekj en veschiedne soone Loagasch. Doa wort junge Menschen jelieet, woo dee kjennen en dee Organisazion veraungonen, waut wie dochten, waut ons wudd friemoaken. Doa lieed wie uk, witte Menschen to haussen.

Aus ekj alf Joa wia, wull ekj een Christ woaren un bie eene Kjoakj biegonen, waut en daut Loaga wia. Ekj räd met eenen Prädja, oba dee rod mie doavon auf un doawäajen jleewd ekj nich mea aun Gott. Aus ekj 15 Joa wia, jleicht ekj sea Reggae-Musikj un ekj wull waut jäajen de Ojjerajchtichkjeit doonen, waut se de schwoate afrikaunische Menschen aundeeden. Un doawäajen jinkj ekj bie dän Rastafari-Gloowen bie. Ekj haud lange vezoddade Zoppen, deed Marihuana schmieekjen un hieed opp met Fleesch äten. Un ekj räd uk to aundre doavon, daut de schwoate Menschen sullen frie komen. Oba ekj fieed wieda een schwienschet Läwen un kjikjt grausome Films un haud uk schwiensche Räd.

WOO MIEN LÄWEN SIKJ DERCH DE SCHREFT JEENDAT HAFT: Aune 1995, aus ekj rom 20 Joa wia, docht ekj iernstlich doaräwa no, waut ekj met mien Läwen doonen wull. Ekj läsd aule Bieekja, waut ekj funk, von dän Rastafari-Gloowen. Eenje von dise Bieekja räden uk von de Schreft, oba ekj vestunt nich, waut ekj läsd. Doawäajen wort ekj mie eenich, de Schreft to läsen.

Lota jeef mie een Rastafari-Frint een Buak toom de Bibel studieren von Jehova siene Zeijen. Ekj deed selfst daut Buak met de Schreft toop studieren. Lota lieed ekj Jehova siene Zeijen kjanen un dee studieeden dan wieda met mie de Bibel.

Ekj deed mie sea aunstrenjen, daut ekj kunn opphieren met schmieekjen un met supen (2. Korinta 7:1). Ekj deed välet aun mie endren. Ekj schneet uk miene lange Hoa auf, kjikjt nich mea schwiensche un grausome Films un haud nich mea soone groffe Räd (Efeesa 5:3-4). Met de Tiet kunn ekj uk de witte Menschen vedroagen, un nu moak ekj nich mea eenen Unjascheet manke Menschen (Aposteljeschicht 10:34-35). Toom dit aules endren, must ekj opphieren met soone Musikj horchen, waut jäajen witte Menschen wia. Un ekj hieed opp, met dee Frind toop to sennen, waut mie bat doa brinjen wullen, wada een schlajchtet Läwen to fieren.

Nodäm aus ekj dise Endrungen jemoakt haud, socht ekj no een Vesaumlungshus von Jehova siene Zeijen, wiels ekj wull eent von dee woaren. Dee studieeden met mie wieda de Bibel. Aus ekj mie ieescht eenich wort, mie doa deepen to loten, wia miene Famielje nich schaftich doaräwa. Miene Mame säd to mie, ekj kunn bie irjenteene Kjoakj biegonen, oba bloos nich bie Jehova siene Zeijen. Eent von miene Onkels, waut en de Rejierunk huach aunjeseenen wia, räd dän Tiet äwa doajäajen, daut ekj eent von Jehova siene Zeijen jeworden wia.

Oba ekj lieed, woo Jesus met aundre Menschen omjinkj un ekj proowd, dän notodoonen. Daut holp mie, doamet foadich to woaren, daut dee jäajen mie wieren un sikj äwa mie domm hauden. Aus ekj daut met de Schreft vejlikjen deed, waut de Zeijen lieren, wia ekj mie gaunz secha, daut daut de woara Gloowen wia. Dee komen biejlikj daut Jeboot no, aundre to prädjen (Matäus 28:19-20; Aposteljeschicht 15:14). Un dee mischen sikj nich en polietische Sachen nenn (Psalm 146:3-4; Johanes 15:17-18).

WOO MIE DAUT TOGOOD KJEEM: De Schreft haft mie aul en väl Stekjen jeholpen. Biejlikj daut ekj opphieed met Marihuana brucken, haft mie aul miere hundat Dola jieda Moonat jespoat. Nu sie ekj väl kloara em Kopp un väl bäta auf met miene Jesuntheit.

Nu sie ekj schaftich un mien Läwen haft eenen Senn. Un daut wia waut, waut ekj von junk aun aul wull. Un daut wichtichste von aules es, daut ekj kunn Gott noda komen (Jakobus 4:8).

“Ekj hab jelieet, miene Wutt to kontrollen” (MARTINO PEDRETTI)

ELLA: 43

VON WOON LAUNT: AUSTRALIEN

WAUT EKJ EA WIA: EKJ DEED MET DROGGS SCHACHREN

MIENE VEGONENHEIT: Aus ekj oppwoss, trock wie foaken om. Ekj wond en kjliene Städa, en eene groote Staut, un fa een Stoot wond ekj uk wiet auf enne wille Hundat en Australien met de Menschen toop von doa. Mie denkjt daut noch, daut ekj doa met miene Nichten un Vadasch un miene Onkels toop Sachen deed, waut mie scheen jinjen. Wie deeden biejlikj feschen, jäajren un Jereetschoft toom jäajren buen un uk aundre Sachen buen.

Mien Voda wia een Boksa un hee lieed mie to feiten, aus ekj noch sea junk wia. Ekj wia sea hunjsch. Aus ekj een Jugentlicha wia, wankt ekj foaken no soone Städen, wua se supen un ekj deed uk. Ekj un miene Frind sochten emma no Feit. Wie brukten Massasch un Bäsbaul-Bets, om eene Grupp Menschen, von 20 ooda mea, auntojriepen.

Ekj vedeend mien Jelt met Droggs schachren un soone Sachen vekjeepen, waut aundre jestolen hauden. Ekj deed uk Jelt enkollakjten fa aundre, waut met Droggs schauften. Ekj brukt Jewäaren toom de Menschen engrulen, daut dee betolen wudden. Ekj wull een Merda woaren. Mien Spruch wia: Moak aundre doot, ea dee die dootmoaken.

WOO MIEN LÄWEN SIKJ DERCH DE SCHREFT JEENDAT HAFT: Ekj haud aul mol von Jehova siene Zeijen jehieet, aus ekj oppwoss. Mie denkjt daut noch, aus ekj jroz enne 20 wia, fruach ekj miene Mame eenen Dach, aus see wist, wua wäa von dee wond. Twee Doag lota puttad een Zeij, waut Dixon heet, bie mie aune Däa. Aus wie ieescht een Stootje jenobat hauden, dan kroagd hee mie no eent von dee äare Toopkomes. Ekj wankt doa han, un nu sie ekj aul äwa 20 Joa emma bie de Toopkomes jewast. Aulen Twiewel, waut ekj haud, kunnen dee mie met de Schreft kloa moaken.

Ekj jleicht daut sea to lieren, daut Gott om de Menschen bekjemmat es, mau rajcht om Schlajchte (2. Petrus 3:9). Ekj lieed, daut hee een leeftolja Voda es, waut sikj om mie kjemren wudd, mau rajcht wan uk sest kjeena wudd. Ekj wia uk froo, aus ekj lieed, daut hee miene Sinden wudd vejäwen, wan ekj mie endad. De Bibelvarzhen ut Efeesa 4:22-24 (PB) deeden väl aun mie. Doa woat ons toojerot: “Seet daut jie von däm oolen Mensch looskomen” un to “niee Menschen woaren, dee no Gott sienem Bilt” jeschaufen sent.

Daut dieed mie lang, mien Läwen to endren. Ekj deed enne Wäakj nich Droggs brucken, oba utgangs Wäakj, wan ekj met miene Frind toop wia, dan deed ekj wada. Ekj wort en, wan ekj wull werkjlich mien Läwen endren, dan wudd ekj motten von miene Frind wajchtrakjen. Un doawäajen wort ekj mie eenich, no eene aundre Prowins to trakjen. Eenje von miene Frind säden, see wullen met mie metfoaren un ekj leet daut. Oba hinjawäajes fungen dee aun met Marihuana schmieekjen un dee fruagen mie, aus ekj uk wull. Un dan säd ekj to dee, ekj wia mie eenich jeworden, met soon Läwen opptohieren – un von doa, fua ekj dan auleen wieda. Lota wort ekj en, daut miene Frind korz no daut hauden eene Bank bestolen un daut dee doatoo eene korte Flint methauden.

WOO MIE DAUT TOGOOD KJEEM: Aus ekj dee Frind ieescht haud tochjeloten, dan wia mie daut väl leichta, de Endrungen to moaken, waut doa fälden, en mien Läwen. Aune 1989 leet ekj mie aus eent von Jehova siene Zeijen deepen. Nodäm aus ekj mie haud deepen loten, fungen uk miene Sesta, miene Mame un miene Pape aun, met mie toop Jehova to deenen.

Ekj sie nu aul fa 17 Joa befriet un hab dree schmocke Kjinja. Ekj hab jelieet, miene Wutt unja Kontroll to hoolen, mau rajcht wan se mie enoajren. Un ekj hab uk jelieet, de Menschen “von aule Raussen, Volkjsstam, [un] Sproaken” to leewen (Openboarunk 7:9, PB). Ekj sie enjeworden, daut Jesus siene Wieed soo sent, waut hee säd: “Wan jie bie dee Wieed bliewen, waut ekj junt jelieet hab, sent jie woarhauftich miene Jinja. Dan woa jie weeten waut Woarheit es, un de Woarheit woat junt frie moaken” (Johanes 8:31-32, PB).

[Takjst]

Toom mie endren, must ekj opphieren met soone Musikj horchen, waut jäajen witte Menschen wia

[Takjst]

Ekj un miene Frind sochten emma no Feit. Wie brukten Massasch un Bäsbaul-Bets, om eene Grupp Menschen, von 20 ooda mea, auntojriepen