VÄL Menschen wundren, aus Gott no äare Jebäda horcht un an daut dan uk jeft, om waut see bäden. De Schreft wiest, daut Jehova werkjlich no onse Jebäda horcht. Oba aus hee ons daut jeft, om waut wie bäden, haft väl met ons selfst to doonen.

Jesus säd, daut et nich goot wia, woo de Gloowesleidasch to siene Tiet bäden. Hee nand dee Heichla, wiels dee bäden bloos toom sikj bie de Menschen eenen gooden Nomen moaken. Jesus säd, daut deejanje aul “äaren Loon wajch” hauden (Matäus 6:5, PB). Hee meend doamet, daut dee aul aules jekjräajen hauden, waut see wullen, un daut wia, daut de Menschen sullen wunda denkjen von an. Oba Gott horcht nich no dee äare Jebäda. Un daut es vondoag dän Dach mau nich aundasch. De Menschen bäden bloos om daut, waut see selfst wellen un achten doa nich opp, waut Gott well. Wan de Menschen nich wellen no daut horchen, waut de Schreft sajcht, dan well Gott uk nich no dee äare Jebäda horchen.

Woo es daut bie die? Woat Gott no diene Jebäda horchen? Aus dee woat no diene Jebäda horchen ooda nich, daut haft nuscht doamet to doonen, von wua du best ooda aus du aunjeseenen best. De Schreft sajcht ons gaunz dietlich, “daut Gott manke Menschen kjeen Unjascheet moakt; oba ut aule Velkja, dee aunnemt, dee am ferchten un doonen waut rajcht es” (Aposteljeschicht 10:34-35, PB). Best du soo aus dis Varsch sajcht? Wan du Gott ferchst, dan deist du am sea achten un du west nuscht doonen, waut am truarich moakt. Wan du daut deist, waut rajcht es, dan woascht du nich bloos daut doonen, waut Menschen wellen haben, oba uk daut, waut Gott fa rajcht talt. West du opp iernst haben, daut Gott no diene Jebäda horchen saul? Dan kaun de Schreft die wiesen, waut du doonen kaust. *

Een deel Menschen wellen bloos, daut Gott äare Jebäda saul derch een Wunda beauntwuaten. Oba mau rajcht en de Bibeltiet deed Gott mau sea selden mol een Wunda, wan doa wäa om jebät haud. Un von een Wunda bat daut aundre vejinjen foaken hundade Joaren. De Schreft wiest uk, daut et no de Apostel äare Tiet nich mea wudd Wunda jäwen (1. Korinta 13:8-10). Meent daut dan, daut Gott onse Jebäda verheipts nich beauntwuat? Nä, daut meent daut nich. Unjasto wie ons daut mol, no woone Jebäda Gott horchen deit.

Gott jeft Weisheit. Von Jehova kjemt aul de woare Weisheit. Un wäaemma no siene Weisheit läwen well un doano frajcht, dän woat Gott wellich jäwen (Jakobus 1:5).

Gott jeft ons sienen heiljen Jeist un daut halpt ons en veschiedne Stekjen. De heilja Jeist es Gott siene wirkjende Krauft. Daut es de stoakjste Krauft, waut daut jeft. Dee kaun ons halpen, schwoaret uttohoolen, dee kaun ons halpen, ruich to bliewen, wan wie Sorjen haben un dee kaun ons uk halpen, daut wie feine Menschen woaren (Galata 5:22-23). Jesus säd to siene Nofolja, daut Gott ons wellich sienen heiljen Jeist jeft (Lukas 11:13).

Gott halpt dee, waut am iernstlich sieekjen (Aposteljeschicht 17:26-27). Daut jeft Menschen von aulawäajen oppe Welt, waut opp iernst no de Woarheit sieekjen. Dee wellen Gott kjanen lieren, dee wellen weeten, waut Gott sien Nomen es, waut hee sikj met de Ieed un fa de Menschen väajenomen haft un woo see Gott kjennen noda komen (Jakobus 4:8). Wie aus Jehova siene Zeijen trafen foaken Menschen, waut nieschierich sent no soont aus dit. Un wie freien ons uk, wan wie dee kjennen halpen to vestonen, waut de Schreft äwa aul dit sajcht.

Haft wäa von Jehova siene Zeijen die dit Buak jejäft? Sieekjst du no Gott? Veleicht es dit krakjt de Auntwuat, waut Gott die jeft.