2. Hungaschnoot

“Doa woat Hungaschnoot . . . sennen” (MARKUS 13:8, PB).

● Een Maun mott sikj fuatbrinjen no daut Darp Quaratadji em Launt Niger. Siene Jeschwista un aundret Frintschoft sent doa uk hanjekomen, wiels en äare Jäajent eene Hungaschnoot es. Oba dis Maun licht auleen opp eene Fluadakj. Wuarom licht dee oppoat von de aundre? Sidi, de Väaschta en daut Darp, sajcht: “Hee kaun [siene Famielje] nuscht toom äten jäwen un woacht sikj dee nich mea enne Uagen to kjikjen.”

WAUT TO BEOOBACHTEN ES: Meist jieda säwenda Mensch oppe Ieed kaun sikj nich jieda Dach saut äten. Besonda oajch es daut en Afrika, wua opp Städen jieda dredda Mensch dän Tiet äwa Hunga lieden mott. Toom vestonen, waut daut meent, stal die mol eene Poa Lied väa met een Kjint. Daut Äten rieekjt bloos fa twee too. Wäa saul dan nuscht äten? De Pape, de Mame ooda daut Kjint? En soone Loag sent väl Famieljes jieda Dach.

WAUT EENJE SAJEN: Oppe Ieed jeft daut mea aus jenuach Äten fa aule. Daut wudd bloos fälen, daut bäta to vedeelen.

ES DAUT SOO, AUS DEE SAJEN? Vondoag dän Dach schauft de Foarmarie mea Ätwoa towäaj aus jeemols ea, un daut es uk mäajlich, daut aulawäajen hantobrinjen. Rajcht jesajcht sull daut schaufen, met aulen Hunga een Enj to moaken. Un doch haben se daut nich kunt, wan se uk aul väle Joaren proowen.

WAUT JLEEFST DU? Erfelt Markus 13:8 sikj? Es doa Hungaschnoot opp väl Städen, wan de Welt uk emma foadja woat?

Een Ieedbäben ooda eene Hungaschnoot brinjt foaken noch waut aundret met sikj, waut uk een Tieekjen von de latste Doag es.

[Takjst]

“Mea aus een Dreddel von de Kjinja, waut aun Lungenenzindunk, Derchfaul ooda aundre Krankheiten stoawen, wudden kjennen äwaläwen, wan dee jenuach to äten hauden” (ANN M. VENEMAN, JEWÄSNE PRÄSIDENTIN VON DAUT UNO-KJINJAWOAKJ)

[Bilt Biltnowies]

© Paul Lowe/Panos Pictures