Boolt komen bätre Tieden!

“Daut woat nich mea lang dieren, dan woaren de gottloose nich mea sennen . . . Oba de deemootje woaren daut Launt oawen, un sikj to de groote Fräd freien” (PSALM 37:10-11, PB).

WÄA wudd daut nich wellen selfst beläwen, wan dise Profezeiunk sikj erfelt? Wie haben goode Uasoak to jleewen, daut et boolt bat doa es.

En de väaje Artikjels räd daut von een poa biblische Profezeiungen, waut kloa bewiesen, daut wie en de “latste Doag” läwen (2. Timotäus 3:1-5, PB). Gott leet de Bibelschriewa dee verutsajen, om ons Hopninj to jäwen (Reema 15:4). Wiels dise Profezeiungen sikj erfellen, weet wie, daut aulet schwoare boolt vebie es.

Waut kjemt no de latste Doag? Gott sien Kjennichrikj woat äwa aule Menschen rejieren (Matäus 6:9-10). Enne Schreft woat jesajcht, woo daut dan oppe Ieed sennen woat:

● Kjeena woat motten hungren. Doa woat “jenuach Jeträajd em Launt sennen, un de Boaj bat bowen dicht voll stonen” (Psalm 72:16, PB).

● Daut woat kjeene Kranheiten mea jäwen. “Kjeena von june Menschen woat sajen: ‘Ekj sie nich jesunt’” (Jesaja 33:24, PB).

● De Schoden enne Natua woat jefikst woaren. “De Wiltnis un daut Drieechlaunt woaren sikj freien; daut drieeje Ollaunt woat jlekjlich sennen un met Bloomen dachen” (Jesaja 35:1, PB).

Daut sent bloos een poa biblische Profezeiungen, waut sikj boolt erfellen woaren. Wuarom frajchst du nich mol Jehova siene Zeijen, wuarom dee sikj soo secha sent, daut boolt bätre Tieden komen woaren?