De Schreft haft äa Läwen veendat

WUAROM kjeem een Maun trigj no de Glooweslieren, waut hee veloten haud, aus hee jinja wia? Woo kunn een junga Maun aunfangen, Jehova aus sienen Voda to seenen? Läs, waut dise Menschen to sajen haben.

“Ekj must onbedinjt wada trigj no Jehova komen” (ELIE KHALIL)

WANEA JEBUAREN: 1976

VON WOON LAUNT: ZIEPERN

WAUT EKJ EA WIA: VELOARNA SÄN

MIENE VEGONENHEIT: Ekj wia en Ziepern jebuaren, oba ekj woss en Australien opp. Miene Elren wieren Jehova siene Zeijen un dee deeden äa bastet toom mie uk lieren, Jehova to leewen un sien Wuat de Bibel. Oba aus ekj een Jugentlicha wia, funk ekj aun, jäajenaun to woaren. Ekj schlikjt mie de Nacht rut toom met aundre Jugentliche toop sennen. Wie stoolen Koaren un brochten ons uk en väl aundre Trubbels.

Ieeschtlich deed ekj daut em plietschen, om daut miene Elren daut nich sull schlajcht gonen. Oba met de Tiet wia mie daut dan endoont, aus dee daut wudden enwoaren. Ekj wort Frint met Menschen, waut väl ella wieren aus ekj un nich Jehova leewden. Un doawäajen wort daut noch oaja met mie. Schlieslich säd ekj to miene Elren, daut ekj nich lenja wull waut met äaren Gloowen to doonen haben. Dee proowden, mie jeduldich to halpen, oba ekj neem daut nich aun. Miene Elren wieren sea truarich.

Aus ekj ieescht von tus wia, funk ekj aun Droggs to brucken. Ekj deed mau rajcht een deel Marihuana akren un vekjeepen. Ekj fieed een schwienschet Läwen un ekj jleicht uk bie wille Fasten un bie soone Städen to sennen, wua se daunzten un soopen. Ekj funk uk aun, sea leicht doll to woaren. Wan irjentwäa waut säd ooda deed, waut ekj nich jleicht, dan wort ekj sea doll un breld de Menschen ut un vekjield dee. Ekj deed aules, waut miene Elren mie jelieet hauden, waut ekj nich doonen sull.

WOO MIEN LÄWEN SIKJ DERCH DE SCHREFT JEENDAT HAFT: Ekj wort goode Frind met eenen, waut met mie toop Droggs brukt. Aus dee noch sea junk wia, wia dän sien Voda jestorwen. Wie bleewen foaken lot enne Nacht opp un vetalden. Un dan vetald hee mie eenjemol, daut hee sikj sea no sienen Voda bangd. Miene Elren hauden mie äwa de Hopninj jelieet, daut de Doodes woaren oppstonen. Doawäajen vetald ekj am, daut Jesus eenje Doodes haud oppjewakjt un daut hee vesprakjt, daut lota uk to doonen (Johanes 5:28-29). Ekj säd to dän: “Stal die mol väa, dienen Voda wada to seenen. Wie wudden aula kjennen fa emma en een Paradies oppe Ieed läwen.” Daut jinkj mienen Frint sea to Hoaten.

Un opp aundatsmol wull mien Frint äwa de latste Tiet ooda de Lia von de Dree-Eenichkjeit weeten. Ekj neem siene Bibel un wees am Bibelvarzhen, waut de Woarheit äwa Jehova Gott, äwa Jesus un de latste Tiet lieeden (Johanes 14:28; 2. Timotäus 3:1-5). Ekj wort en, je mea ekj to mienen Frint von Jehova räd, je dolla docht ekj selfst uk wada aun Jehova.

Soo bie sacht foll mie de Woarheit wada bie, waut miene Elren mie hauden ut de Schreft jelieet un dit deed waut aun mie. Biejlikj eenjemol, wan ekj bie een Fast wia un met miene Frind toop Droggs brukt, funk ekj opp eenst aun, äwa Jehova notodenkjen. Een deel von miene Frind säden, daut see Gott väl räakjenden, oba waut dee deeden, wees gaunz waut aundret. Ekj wull nich soo sennen aus dee un doawäajen must ekj waut endren. Ekj must onbedinjt wada trigj no Jehova komen.

Sikj to endren es leichta jesajcht aus jedonen. Eenjet to endren wia mie nich sea schwoa; biejlikj wia mie daut leicht, opptohieren met Droggs brucken un ekj hieed uk opp, met de Frind toop to sennen, waut ekj ea haud. Un ekj funk aun, de Schreft met eenen Eltesten von de Vesaumlunk to studieren.

Aundret to endren wia väl schwanda. Mie wia daut sea schwoa, miene Wutt unja Kontroll to hoolen. Eenjemol kunn ekj daut fa een Stootje, oba dan passieed waut un dan hoakt ekj wada ut. Lota feeld ekj mie schuldich doaräwa un docht, ekj wudd mie kjeenmol endren kjennen. Ekj wia gaunz mootloos un vetald dän Eltesten daut, met dän ekj toop de Schreft studieed. Hee wia emma jeduldich un leeftolich un hee holp mie sea. Eemol jeef hee mie eenen Artikjel von dän Woaktorm to läsen. En dän wort jesajcht, woo wichtich daut es, nich opptojäwen. a Wie räden doavon, waut ekj doonen kunn, wan de Wutt oppkjeem. Aus ekj daut nokjeem, waut ekj en dän Artikjel jeläst haud, un sea to Jehova bäd, kunn ekj met de Tiet miene Wutt unja Kontroll hoolen. Em Aprell aune 2000 leet ekj mie dan aus eent von Jehova siene Zeijen deepen. Daut brukt eena nich mol sajen, woo schaftich miene Elren wieren!

WOO MIE DAUT TOGOOD KJEEM: Wäajens ekj nich mea Droggs bruck un nich mea een schwienschet Läwen fia, hab ekj ennalichen Fräd un een reinet Jewessen. Krakjt endoont waut ekj nu doo, aus ekj schauf ooda bie de Toopkomes sie ooda Scheengonen hab, ekj sie nu väl schaftja aus ea.

Ekj sie Jehova sea dankboa, daut miene Elren kjeenmol von mie vejäten deeden. Un ekj denkj uk aun Jesus siene Wieed ut Johanes 6:44 (PB): “Kjeena kaun no mie komen, wan de Voda, dee mie jeschekjt haft, am nich trakjen deit.” Mie jeit daut sea to Hoaten, daut ekj hab kunt trigj no Jehova komen, wiels hee mie trigj no am trock.

“Ekj wenscht mie eenen Voda” (MARCO ANTONIO ALVAREZ SOTO)

WANEA JEBUAREN: 1977

VON WOON LAUNT: CHILE

WAUT EKJ EA WIA: EKJ WIA EN EENE GRUPP, WAUT SEA WILLET UN SCHLAJCHTET SPELL MUAK

MIENE VEGONENHEIT: Miene Mame trock mie auleen opp en Punta Arenas, eene schmocke Staut em Sieden von Sied-Amerika. Miene Elren jinjen uteneen aus ekj fief Joa wia un doawäajen feeld ekj mie veloten. Ekj wenscht mie eenen Voda.

Miene Mame studieed met Jehova siene Zeijen toop de Schreft un see neem mie met no de Toopkomes em Vesaumlungshus. Oba ekj jleicht de Toopkomes nuscht un ekj stald mie oppem Wajch doahan foaken sea schlajcht opp. Aus ekj 13 wia, hieed ekj gaunz opp met no de Toopkomes wanken.

Ekj jleicht sea Musikj un ekj wort en, daut ekj daut goot vestunt, Musikj to spälen. Un aus ekj noch mau 15 Joa wia, späld ekj aul sea willet, schlajchtet Spell. Ekj deed daut bie groote un kjliene Fasten un uk bie Städen, wua Menschen toopkjeemen toom drinkjen. Ekj wia väl met soone Menschen toop, waut sea fein vestunden, veschiednet Musikj to spälen un doawäajen intressieeden mie dan uk aundre Sorten Musikj. Doa, wua ekj wond, wia eene Musikj-School un doa deed ekj mie dan utlieren. Aus ekj 20 Joa wia, trock ekj no de Hauptstaut, Santiago, toom mie doa noch wieda utlieren. Ekj späld oba uk wieda en Gruppen sea willet un schlajchtet Musikj.

Aul dise Joaren feeld ekj mie ladich. Om mie nich soo aus dit to feelen, funk ekj aun to supen un Droggs to brucken, met miene Frind toop von de Musikj-Grupp. Dee wieren fa mie soo aus miene Famielje. Ekj wia sea jäajenaun un daut wia mie uk auntoseenen. Ekj haud emma gaunz schwoate Kjleeda aun un ekj leet mie dän Boat waussen un uk de Hoa sea lank waussen.

Ekj rieed mie emma wada Trubbel en met aundre un mau rajcht uk met de Poliezen. Eemol aus ekj too väl jedrunken haud, funk ekj eenen Striet aun met Menschen, waut Droggs vekoften, wäajens dee mie un miene Frind baudren deeden. Dise Menschen vekjielden mie soo sea, daut see mie dän Bak-Knoaken tweibruaken.

Oba daut wia lang nich daut schlemste, waut mie passieed. Daut schlemste saden dee mie too, waut mie daut dolste no aun wieren: Eenen Dach wort ekj en, daut miene Mejal aul fa Joaren met mienen basten Frint deed un aul miene aundre Frind wisten daut un hauden daut fa mie plietsch jehoolen. Daut sad mie sea too.

Ekj trock trigj no Punta Arenas un doa lieed ekj aundre Menschen Musikj to spälen un ekj deed uk fa Jelt een Instrument spälen, waut Cello heet. Ekj deed uk fa wieda met soone Gruppen toop Musikj spälen un oppschnaken, waut sea willet, schlajchtet Spell muaken. Ekj troff eene schmocke Mejal, waut Sussan heet, un dan trock wie toop. Lota wort Sussan en, daut äare Mame aun de Lia von de Dree-Eenichkjeit jleewd un ekj nich. Un see fruach: “Waut es dan nu de Woarheit?” Ekj säd to ar, daut ekj wist, daut de Lia von de Dree-Eenichkjeit faulsch wia, oba ekj kunn ar daut nich met de Schreft bewiesen. Oba ekj wist, wäa doa kunn. Ekj säd to ar, daut Jehova siene Zeijen ar kunnen de Woarheit ut de Schreft wiesen. Un dan deed ekj waut, waut ekj aul fa Joaren nich mea jedonen haud: Ekj bäd to Gott un fruach am no Help.

Een poa Doag lota sach ekj eenen Maun, waut mie bekaunt väakjeem, un dan fruach ekj dän, aus hee eent von Jehova siene Zeijen wia. Wan hee sikj uk een bät fercht fa mie, wäajen woo mie leet, säd hee mie aules leeftolich, waut ekj weeten wull, äwa daut Vesaumlungshus un de Toopkomes. Ekj wia mie secha, daut daut de Auntwuat opp miene Jebäda wia, daut ekj dän troff. Ekj wankt no een Toopkomen un sad mie en de hinjaschte Rieej dol, daut mie kjeena seenen sull. Oba väl von dee kjanden mie noch von ieeschtemma, aus ekj noch een Kjint wia. Dee neemen mie frintlich opp un pakten mie om un daut holp mie, daut ekj mie sea ruich feeld. Daut wia soo, aus wan ekj wada tus wia. Aus ekj dän Maun sach, waut mie haud von de Schreft jelieet aus ekj kjlien wia, fruach ekj dän, aus hee wada wull met mie toop studieren.

WOO MIEN LÄWEN SIKJ DERCH DE SCHREFT JEENDAT HAFT: Eenen Dach läsd ekj Spricha 27:11 (PB), waut sajcht: “Mien Sän, sie weis un moak mie daut Hoat froo”. Ekj kunn daut nich foten, daut een jeweenelja Mensch dän Schepfa von Himmel un Ieed kunn schaftich moaken. Un dan dakjt mie daut op, daut Jehova de Voda wia, no dän ekj mien gaunzet Läwen jesocht haud!

Ekj wull mienen himlischen Voda jefaulen un sienen Wellen doonen. Oba ekj wia fa Joaren veskloft jewast aun Droggs un stoakjet. Dan kunn ekj Jesus siene Lia ut Matäus 6:24 (PB) vestonen, wua daut sajcht: “Kjeena kaun twee Haren deenen.” Aus ekj mie proowd to endren, holp de Rot ut 1. Korinta 15:33 (PB) mie besonda: “Schlajchte Jesalschoft vedoaft goode Aunjewanheiten.” Ekj kunn vestonen, daut ekj mie nich wudd endren kjennen, wan ekj noch emma met deeselwje Menschen toop wia un no deeselwje Städen wankt. De Rot ut de Schreft wia dietlich: Wan ekj wull werkjlich Gott deenen, dan wudd ekj mie motten sea endren (Matäus 5:30).

Ekj jleicht daut wille Spell soo grulich sea, un doawäajen wia mie daut sea schwoa, opptohieren daut to spälen un doano to horchen. Oba met de Help von miene Frind en de Vesaumlunk kunn ekj entlich doamet opphieren. Ekj hieed opp met Droggs brucken un uk met too sea drinkjen. Ekj deed uk miene Hoa aufschnieden, mie putzen un hieed uk opp, mie bloos schwoat auntotrakjen. Oba aus ekj Sussan ea vetald, daut ekj mie wull de Hoa aufschnieden, dan wort see nieschierich. See säd: “Ekj well weeten, waut doa bie daut Vesaumlungshus aunjeit un doawäajen woa ekj met die metgonen!” See jleicht daut sea, waut see doa sach, un boolt funk see uk aun, de Schreft to studieren. Lota befried wie ons dan un aune 2008 leet wie ons aus Jehova siene Zeijen deepen. Wie sent schaftich, daut wie nu met miene Mame toop kjennen Jehova deenen.

WOO MIE DAUT TOGOOD KJEEM: Ekj hab daut Läwen tochjeloten, wua ekj bloos faulsche Frind haud un nich werkjlich schaftich wia. Ekj jleich noch emma sea Spell, oba nu wäl ekj mie goot, no waut von Spell ekj horch. Ekj bruck daut, waut ekj beläft hab, toom miene Famielje un aundre halpen, besonda junge Menschen. Ekj well dee halpen to vestonen, daut daut, waut de Welt auntobeeden haft, veleicht moakhauftich lat, oba to goodalatst es daut bloos soo “aus Drakj” (Filippa 3:8, PB).

Ekj hab true Frind enne Christenvesaumlunk jefungen, wua woare Leew un Fräd es. Un daut baste es: Ekj sie met Jehova Frind jeworden. Ekj hab nu entlich mienen Voda jefungen.

[Footnoot]

[Takjst]

“Ekj hab kunt trigj no Jehova komen, wiels hee mie trigj no am trock”