Ekj sie en Acul jebuaren. Daut es eene Staut, waut doa Wasten en Guatemala manke Boaj es. Miene Famielje jehieet to de Ixil-Menschen, daut es eene Grupp, waut von de Maya aufstaumt. Aus ekj oppwoss, räd wie buta Spaunisch noch eene indiaunische Sproak. Aus ekj nat wia, wia doa noch de Birjakjrich, waut fa 36 Joa en Guatemala wia. En dee Tiet storwen doa väl von de Ixil-Menschen.

Aus ekj vea Joa wia, späld mien 7-joascha Brooda met eene kjliene Bomm, un dan däwad dee derch een Ojjlekj opp. Derch dit Ojjlekj kjeem mien Brooda todood un ekj wort blint. No daut wort mie no eene School jebrocht, waut fa blinje Kjinja wia, enne Staut Guatemala, un doa lieed ekj dan de Blinjeschreft. Doa wort mie aufjesajcht, met aundre Kjinja waut to doonen to haben, un miene Schoolpoatna hilden sikj uk auf von mie. Ekj wist kjeenmol, wuarom daut soo wia, un ekj feeld mie emma sea auleen. Un ekj kunn daut emma meist nich aufluaren bat de twee Moonat em Joa, wua ekj emma no Hus kunn no miene Mame. Dee wia emma soo leeftolich, oba see storf, aus ekj tieen Joa wia. Daut muak mie sea truarich. Ekj feeld mie soo, daut de eensje Persoon, waut mie oppe gaunze Welt noch leewd, wia nu wajch.

Aus ekj alf Joa wia, trock ekj trigj no de Staut, von wua ekj wia, un wond dan bie mienen Haulfbrooda un siene Famielje. Dee sorjden fa mie em tieteljen, oba kjeena kunn mie halpen met woo ekj mie feeld. Eenjemol prachad ekj Gott un fruach: “Wuarom must miene Mame stoawen? Wuarom sie ekj blint jeworden?” Menschen säden to mie, daut aul dit truaje Gott sien Wellen wia. Ekj docht bie mie soo, Gott haud kjeen Metjefeel un haundeld ojjerajcht. De eensje Uasoak, wuarom ekj mie nich daut Läwen neem, wia, wäajen ekj nich wist, woo.

Wäajen ekj blint wia, wia ekj em kjarpalichen, un woo ekj mie ennalich feeld, sea helploos. Aus ekj noch een kjliena Jung wia, wort mie opp een poa Sauz mesbrukt. Ekj hab daut kjeenmol aunjemalt, wäajen ekj docht, kjeena jeef doa waut om rom. Menschen räden schia nienich met mie un ekj unjahilt mie uk met kjeenem. Ekj wia sea betriept, met de Narfen rauf, un ekj vetrud uk kjeenem.

Aus ekj 13 Joa wia, kjeemen doa twee von Jehova siene Zeijen (een Poa Lied) no mie, aus wie jroz Spältiet enne School hauden. Eene Lierarin jaumad daut äwa mie un haud dee jefroacht, aus dee mie mol besieekjen wullen. Dee vetalden to mie von de biblische Vespräakjungen, daut eenen Dach de Vestorwne wada läwen wudden un daut de Blinje wada seenen wudden (Jesaja 35:5; Johanes 5:28-29). Ekj jleicht sea, waut dee mie vetalden, oba daut wia schwoa, mie met dee to unjahoolen, wiels ekj wia daut nich jewant to räden. Wan ekj mie uk sea trigjhilt, wieren dee oba leeftolich, jeduldich un kjeemen mie emma wada besieekjen toom mie mea von ut de Schreft lieren. Toom bat doa komen, wua ekj wond, must dit Poa Lied äwa 10 Kilomeeta (6 Miel) gonen un äwa eenen Boajch.

Mien Haulfbrooda säd mie, woo dee leet, daut dee sikj sea natieedlich aunjetrocken hauden, oba daut et doa nich no leet, daut dee rikj wieren. Oba doch brochten dee mie emma kjliene Jeschenkja un weesen, daut see sikj fa mie intressieeden. Ekj docht bie mie soo, daut bloos woare Christen soo väl fa aundre doonen wudden.

Ekj studieed de Schreft met de Help von de Blinjeschreft-Bieekja. Wan ekj daut uk kunn vestonen, waut ekj lieed, wia mie daut oba schwoa, jewesset ennalich auntonämen. Ekj kunn daut biejlikj schwoa jleewen, daut Gott om mie perseenlich bekjemmat wia un daut aundre sikj uk kunnen soo äwa mie feelen, aus Gott deed. Ekj kunn daut vestonen, daut Jehova daut schlajchte fa eene jewesse Tiet toolat, oba ekj kunn mie daut schwoa väastalen, daut Jehova een leeftolja Voda es. *

Soo bie sacht holp mie daut, waut ekj ut de Schreft lieed, mien denkjen to endren. Ekj lieed biejlikj, daut Gott een grootet Metleet haft met dee, waut doa lieden motten. Gott säd to siene Deena, waut doa soo schlajcht behaundelt worden: “Ekj hab daut goot jeseenen, woo mien Volkj . . . jekjwält woat. . . . Mie besorcht daut, daut see soo lieden” (2. Mose 3:7). Aus mie daut ieescht kloa wort, daut Jehova biejlikj een sea leeftolja un metfeelenda Gott es, wull ekj mie am hanjäwen. Ekj leet mie dan aune 1998 aus eent von Jehova siene Zeijen deepen.

Ojjefäa een Joa nodäm daut ekj mie deepen leet, jinkj ekj eene Klauss derch fa Blinje, dicht bie de Staut Escuintla. Een Eltesta enne Vesaumlunk wort en, woo schwoa daut fa mie wia, räajelmässich no de Toopkomes to komen, wäajen ekj soon Enj auf wond. De Wajch, waut ekj gonen must toom no daut Vesaumlungshus komen, wia krakjt dee Wajch, wua dit Poa Lied emma no mie kjeemen toom met mie de Schreft studieren. Daut wia schwoa fa mie, bat doa to komen. De Eltesta holp mie un socht eene Famielje doa en Escuintla, waut reed wia, mie bie an wonen to loten. Dee holpen mie uk, no de Toopkomes to komen. Noch bat vondoag dän Dach sorjen dee soo fa mie, aus wan ekj wudd een Poat von äare Famielje sennen.

Ekj wudd noch väl mea kjennen sajen, woo de Breeda mie en de Vesaumlunk Leew jewäsen haben. Rajcht jesajcht es daut de Grunt, wuarom ekj eent von Jehova siene Zeijen woaren wull. Nu sie ekj mank woare Christen (Johanes 13:34-35).

Ekj feel mie nich mea wieetloos un onen Hopninj. Nu haft mien Läwen werkjlich eenen Senn. Ekj bruck de mieeschte von miene Tiet en daut Prädichtwoakj von Jehova siene Zeijen un lia aundre de Woarheit ut de Schreft, enne Städ bloos doaraun to denkjen, daut ekj blint sie. Ekj kaun mau rajcht aus Eltesta deenen un uk biblische Räden fa aulemaun enne Vesaumlunk jäwen. Ekj hab uk kunt Räden oppe Kongressen jäwen, wua dusende Menschen wieren.

Aune 2010 wia ekj de School toom em Deenstaumt utlieren derch (nu woat dee de School fa Kjennichrikjsvekjindja jenant). Dee wia en El Salvador. Dise School holp mie, daut ekj miene Veauntwuatungen enne Vesaumlunk bäta nokomen kunn. Dise Belierunk holp mie uk, daut ekj mie waut wieet un jeleeft feeld von Jehova Gott. Un hee kaun irjentwäm brucken toom sien Woakj doonen.

Jesus säd: “Jäwen es seelja [ooda moakt schaftja] aus nämen” (Aposteljeschicht 20:35). Nu kaun ekj werkjlich sajen, daut ekj schaftich sie. Ea wudd ekj kjeenmol jedocht haben, daut daut mäajlich wia. Nu weet ekj, daut ekj aundre halpen kaun.