Kjrich kjemt ernoa sea dia.

•   “Äware gaunze Welt worden tojoa 2.2 Billionen Dola fa Kjrich utjejäft; soo väl aus kjeenmol ea” (The Washington Post, 13. Feebawoa 2024).

 Oba Kjrich kost nich bloos Jelt. Doa es väl mea met en. Een Biespel doatoo es de Kjrich en de Ukraine:

•   Soldoten. Forscha taksieren, daut von dan, aus de Kjrich twee Joa trigj aunfunk, meist 500,000 Soldoten todood ooda tosplät kjeemen.

•   Jeweenelje Menschen. Äwa 28,000 Menschen storwen ooda worden velazt no de Veeende Nazionen no. Oba een väaschta Beaumta von de Veeende Nazionen säd: “Dauts nich to weeten, woo väl Schoden dis schlemma Kjrich aun de Menschen äa Läwen jedonen haft.” a

 Wäajen Kjrich un Orru motten een deel Menschen äware gaunze Welt sea schwoa toobrinjen:

•   114 Millionen Menschen musten wäajen Kjrich un Grausomkjeit äa Tus veloten (dise Zol es von Septamba 2023).

•   Millionen Menschen haben kjeenmol nich jenuach to äten. “Orru es noch emma de jratste Uasoak doafäa, daut Menschen Hunga lieden motten. 70% von aul dee, waut Hunga lieden motten, läwen en Jäajenden, wua Kjrich es un väl Grausomet passieet” (World Food Programme).

 Woat daut met Kjrich noch mol een Enj haben? Woat doa irjentwanea mol aulawäajen Fräd sennen? Woat daut mol eene Tiet jäwen, wua kjeena mea woat oam sennen un wua aule Menschen woaren jenuach to äten haben von aul daut, waut de Ieed verendach brinjt? Waut sajcht de Schreft?

 De Schreft säd verut, daut doa wudd opp väl Städen Kjrich sennen. Daut es en eene Profezeiunk to finjen, wua daut von eenen Ritta opp een Pieet rät:

•   “Dan kjeem een fiaroodet Pieet rut. Un däm, dee doabowen saut, wort daut jejäft, dän Fräd von de Ieed to nämen, un daut Menschen sikj unjarenaunda doot moaken wudden. Un am wort een grootet Schwieet jejäft” (Openboarunk 6:4, PB).

 Disen Ritta komen noch twee aundre hinjaraun: eena stalt Hungaschnoot väa, waut daut opp väl Städen jäwen wudd, un de aundra dän Doot, waut derch Krankheiten un aundret veuasoakt woaren wudd (Openboarunk 6:5-8). Wan du mea weeten west äwa dise Profezeiunk ut de Schreft un wuarom wie fa neiw sajen kjennen, daut dee sikj bie dise Tiet erfelt, dan läs dän Artikjel “Die vier Reiter der Apokalypse: Wer sind sie?”

 Boolt woat kjeen Jelt un uk nuscht aundret mea fa Kjrich vekwost woaren. Oba nich de Menschen woaren daut bat doa brinjen. De Schreft sajcht:

•   Daut es Gott, waut “en aule Welt met aulem Kjrich een Enj moakt” (Psalm 46:10, PB).

•   Gott woat aul dän Schoden wada goot moaken, waut derch Kjrich veuasoakt woat. “Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen” (Openboarunk 21:4, PB).

•   Gott woat doafäa sorjen, daut aule woaren fa emma en Fräd läwen kjennen. “Mien Volkj woat en een rujet Launt wonen, wua äare Hiesa lang stonen woaren. See woaren onvestieet un tofräd sennen” (Jesaja 32:18, PB).

 De Profezeiungen von de Schreft wiesen, daut Kjrich un aundret, waut bie dise Tiet passieet, een Tieekjen doafäa es, daut dise Frädenstiet boolt komen woat.

 Woo woat Gott doafäa sorjen, daut doa aulawäajen woat Fräd sennen? Hee woat daut derch sien Kjennichrikj, siene himlische Rejierunk, doonen (Matäus 6:10). Waut es dit Kjennichrikj, un waut kaun daut fa die doonen? Kjikj dit korte Video Waut es Gott sien Kjennichrikj?