Späat sikj die daut uk soo, daut et emma schwanda es, to weeten, waut Woarheit es un waut nich? Daut schient soo, daut de Menschen dolla doano gonen, woo dee sikj feelen un waut dee selfst jleewen, enne Städ waut Woarheit es ooda waut soo es. Oppe gaunze Welt jleewen väle, daut et verheipts kjeene Woarheit jeft.

 Daut Menschen soo denkjen es nich waut nieet. Rom 2,000 Joa trigj fruach de reemischa Harscha Pontius Pilatus Jesus: “Wauts Woarheit?” (Johanes 18:38). Wan Pilatus uk nich werkjlich eene Auntwuat wull, es daut oba eene wichtje Froag. De Schreft haft de Auntwuat opp dise Froag un dee kaun die halpen to weeten, waut de Woarheit es un waut nich, en dise Welt wua väle gaunz derchenaunda sent.

Jeft daut verheipts de Woarheit?

 Jo. Wan de Schreft daut Wuat “Woarheit” brukt, dan es daut, wäajen doa Bewies fäa es un wäajen daut rajcht es. De Schreft lieet, daut von Jehowa a Gott kjemt sest nuscht aus Woarheit. Hee woat de Gott von de Woarheit jenant (Psalm 31:5, NW). En de Schreft kjenn wie de Woarheit äwa Gott finjen. Dee vejlikjt de Woarheit met Licht. Dee kaun ons leiden derch dise Welt, waut vondoag gaunz derchenaunda es (Psalm 43:3; Johanes 17:17).

Woo kaust du de Woarheit finjen?

 Gott well nich, daut wie bloos eefach de Woarheit ut de Schreft blint aunnämen un hee well uk nich, daut wie ons bloos opp onse Jefeelen veloten. Oba hee well, daut wie daut selfst unjasieekjen (Reema 12:1, NW). Gott well, daut wie am kjanen lieren un emma mea räakjnen, un ons gaunzet Vestaunt doatoo brucken (Matäus 22:37-38). Hee rot ons too, daut wie ons daut selfst unjastonen, aus daut, waut wie ut de Schreft lieren, de Woarheit es (Aposteljeschicht 17:11).

Woo funk daut met daut lieejen aun?

 No de Schreft no es Soton, de Beesa Fient, de “Voda von de Läajes” (Johanes 8:44). Daut es, wäajen hee met daut lieejen aunfunk, aus hee to Adam un Eva äwa Gott lieejen deed (1. Mose 3:1-6, 13, 17-19; 5:5). Von don aun haft de Soton noch emma Läajes äwa Gott vetalt un haft jeprooft, de Woarheit unja de Dakj to hoolen (Openboarunk 12:9).

Wuarom woat doa vondoag dän Dach soo foaken jeloagen?

 De Schreft nant onse Tiet “de latste Doag” (2. Timotäus 3:1,13, PB). De Soton haft en dise latste Doag noch väl mea Macht äwa de Menschen un kaun dee leichta veleiden aus ea. Fa de Menschen es daut gaunz jeweenlich, Läajes to vetalen un aundre to veleiden un dee uttonutzen. Mau rajcht en de mieeschte Jemeenten kaun eena Läajes finjen. De Schreft säd äwa onse Tiet verut, daut Menschen “woaren sikj Lierasch aunschaufen, dee soo lieren aus an daut jefelt, dee an bloos noch de Uaren kjitlen”. Dee “woaren äare Uaren von de Woarheit wajch dreien” (2. Timotäus 4:3-4, PB).

Wuarom es de Woarheit wichtich?

 Eena kaun bloos opp aundre vetruen, wan dee de Woarheit sajen. Menschen kjennen nich fein toopschaufen un goode Frind sennen, wan dee sikj nich vetruen. De Schreft sajcht, daut Gott well, daut sikj ons Deenst fa am opp de Woarheit stett. Daut sajcht: “Dee, waut am aunbäden, motten am met Jeist un Woarheit aunbäden” (Johanes 4:24). Toom mea doaräwa lieren, woo de Woarheit die halpen kaun, de faulsche Lieren to kjanen un doavon loostokomen, läs de Rieej Artikjels met daut Teema “Läajes äwa eenen leeftoljen Gott”.

Wuarom well Gott, daut du de Woarheit kjanen lieescht?

 Gott well, daut du jerat woascht. Doatoo motst du de Woarheit äwa am lieren (1. Timotäus 2:4). Wan du lieescht, waut Gott fa rajcht un orrajcht talt un doano läwen deist, dan woascht du goode Frind met am woaren (Psalm 15:1-2). Gott haft Jesus no de Ieed jeschekjt toom ons halpen, de Woarheit to lieren. Gott well, daut wie no Jesus siene Lieren horchen (Matäus 17:5; Johanes 18:37).

Woat Gott noch mol een Enj moaken met lieejen?

 Jo. Gott haust daut, wan Menschen lieejen un aundre doaderch utnutzen. Hee vesprakjt, daut hee woat met aul dee Menschen een Enj moaken, waut nich wellen opphieren met lieejen (Psalm 5:7). Wan Gott daut ieescht deit, dan woat sikj daut erfellen, waut en Spricha 12:19 (PB) steit: “Opprechtje Leppen bestonen opp emma”.