Doonen Jehova siene Zeijen aundre bemotten, äaren Gloowen to endren?

AUFSPÄLEN

Nä, wie doonen daut nich. En onse wichtichste Tietschreft, em Woaktorm, woat jesajcht: “Daut es orrajcht, aundre Menschen to bemotten, daut see äaren Gloowen endren.” a Wuarom tal wie daut fa orrajcht?

Jesus deed de Menschen kjeenmol bemotten, siene Lieren auntonämen. Hee wist, doa wudden nich väle no am horchen (Matäus 7:13-14). Aus eenje von de Jinja sikj aun waut stieeden, waut hee lieed, leet hee dee wajchgonen. Hee bemust dee nich, bie am to bliewen (Johanes 6:60-62, 66-68).
Jesus lieed siene Jinja nich, daut see aundre beräden sullen, äaren Gloowen to endren. Dee sullen nich proowen, de Menschen to bemotten, de goode Norecht vom Kjennichrikj auntonämen. Enne Städ daut sullen see no soone sieekjen, waut dee hieren wullen (Matäus 10:7, 11-14).
Daut halpt nuscht, aundre to bemotten, äaren Gloowen to endren. Gott nemt onse Aunbädunk mau dan aun, wan wie am von Hoaten deenen (5. Mose 6:4-5; Matäus 22:37-38).

Proow jie, aundre to beräden, daut dee bie junt biegonen?

Nä, wie moaken eefach de biblische Norecht “äwa de gaunze Welt” bekaunt. Soo aus de Schreft daut sajcht, doo wie daut von Hus to Hus un wua wie sest Menschen finjen (Aposteljeschicht 1:8, De Plautdietsche Bibel; 10:42; 20:20). Un soo aus de ieeschte Christen woaren Jehova siene Zeijen eenjemol beschulcht, daut see sikj nich aun daut Jesaz hoolen un aundre beräden wellen, bie an bietogonen (Aposteljeschicht 18:12-13). Oba daut es nich soo. Wie proowen nich, aundre to bemotten, daut see daut jleewen sellen, waut wie. Wie wellen dee bloos halpen, daut dee goot om de Schreft omweeten, soo daut see dan selfst entscheiden kjennen, waut see jleewen wellen.

Wie bemotten de Menschen nich, äaren Gloowen to endren, wie menjen ons nich en de Politikj nenn un wie vespräakjen uk kjeenem Jelt ooda sestwaut, daut dee bie ons biejeit. Eenje, waut sikj Christen nanen, haben soont jedonen, un haben doaderch Schaund opp Christus sienen Nomen jebrocht. b

Es daut orrajcht, eenen aundren Gloowen auntonämen?

De Profeet Abraham bleef nich bie dän Gloowen von sien Frintschoft

No de Schreft no es daut nich orrajcht. De Schreft rät von väle, waut nich bie dän Gloowen bleewen, waut äa Frintschoft haud, un waut sikj eenich worden, dän woaren Gott auntobäden. Mank dee sent biejlikj Abraham, Rut, eenje Menschen von Ateen, de Apostel Paulus un aundre (Josua 24:2; Rut 1:14-16; Aposteljeschicht 17:22, 30-34; Galata 1:14, 23). De Schreft wiest uk, daut eena mau rajcht de Frieheit haft, sikj schlajcht to entscheiden un dän Gloowen to veloten, waut Gott fa rajcht talt (1. Johanes 2:19).

En de Allgemeine Erklärung der Menschenrechte, opp dee sikj no de Veeende Nazionen (UNO) no “de internazionale Menschenrajchtsjesazen stetten”, woat jesajcht, daut jieda eena “daut Rajcht haft, sienen Gloowen ooda siene Meenunk to endren”. Doa es uk met en, “sikj eene Sach to unjastonen, mea doaräwa ruttofinjen un daut, waut eena rutjefungen haft ooda jleeft, aun aundre wiedatojäwen”. Glooweslieren sent doa uk met en. c Oba wan eena de Frieheit haben well, selfst to entscheiden, mott eena aundre Menschen uk de Frieheit loten, daut see äaren Gloowen hoolen un dee Lieren aufsajen, waut see nich aunnämen wellen.

Brinjt eena Schaund opp de Famielje, wan eena eenem sienen Gloowen endat?

Nich onbedinjt. De Schreft sajcht, wie sellen aule Menschen Respakjt jäwen, endoont waut fa eenen Gloowen dee haben (1. Petrus 2:17). Un Jehova siene Zeijen hoolen sikj uk aun daut biblische Jeboot, de Elren to ieren. Daut doonen dee soogoa dan, wan de Elren nich dänselwjen Gloowen haben (Efeesa 6:2-3).

Oba nich aule denkjen soo. Eene Fru, waut en Sambia oppwoss, vetalt: “De Menschen en miene Omjäajent meenen, wan eena eenem sienen Gloowen endat, es eena nich tru un deit de Famielje un de Menschen doa fa nuscht achten.” Aus dise Fru ieescht jrata wia, funk see aun, met Jehova siene Zeijen toop de Bibel to studieren un wort sikj eenich, äaren Gloowen to endren. See sajcht: “Miene Elren säden mie emma wada, daut see met mie sea ontofräd wieren un daut see sikj aun mie sea aunjeschmäat hauden. Daut wia sea schwoa fa mie, wäajen ekj wenscht mie, daut dee met mie tofräd wieren ... Wan eena Jehova well tru sennen enne Städ no Menschenjebooten to gonen, bediet daut doawäajen nich, daut eena siene Famielje nich tru es.” d

a See doatoo dän Wachtturm vom 1. Jaunewoa 2002, Sied 12, Varsch 15.

b Biejlikj muak de Kjennich Karl de Groota ojjefäa aune 785 e.o.T. een Jesaz, daut en Sachsen aul dee, waut sikj nich aus Christ deepen leeten, sullen omjebrocht woaren. Un en daut Heilje Reemische Rikj wort aune 1555 e.o.T. een Jesaz unjaschräwen, waut Augsburger Religionsfrieden heet. Doa säd daut, de Väaschta von eene Jäajent must entwäda katoolsch ooda lutherisch sennen un aule Menschen doa musten krakjt dänselwjen Gloowen haben ooda doa fuattrakjen.

c Biejlikj soont sajcht daut uk en de Afrikanische Charta der Menschenrechte und Rechte der Völker, en de Amerikanische Deklaration der Rechte und Pflichten des Menschen, en de Arabische Charta der Menschenrechte von 2004, en de ASEAN-Erklärung der Menschenrechte (Verband Südostasiatischer Nationen), en de Europäische Menschenrechtskonvention un en dän Internationalen Pakt über bürgerliche und politische Rechte. Oba nich aule Lenda, waut vesproaken haben, dise Jesazen notokomen, hoolen sikj äwareen aun dee.

d Jehova es no de Schreft no dän woaren Gott sien Nomen.