Jehova siene Zeijen haben äare Websied aul fa 25 Joa em Internet jehaut. En dän Königreichsdienst von Nowamba 1997, met dän Tietel “Die gute Botschaft im Internet”, wort de niee Websied watchtower.org bekauntjemoakt. De Artikjel säd: “De Organisazion deit Sachen oppem Internet nopp, wua see opprechtich von äaren Gloowen räden un waut Jehova siene Zeijen doonen. . . . De Websied es nich toom niee Sachen rutjäwen, oba toom de Informazion fa aulem ellektroonisch bekauntmoaken.”

Von dan aun kunnen jieda eena sikj von dise watchtower.org Websied veschiedne Zeichnisbläda, Hefta un Artikjels von dän Woaktorm un Woat waka! raufloden. De watchtower.org Websied wort dän 15. Jaunewoa 1997 opjemoakt. Dan aune 1999 wort de jw-media.org Websied em Internet opjemoakt. Opp dise Websied wort veschiednet nieet bekauntjemoakt äwa Jehova siene Zeijen, veschiednet äwa de Organisazion un Jesazessachen.

Aune 2005 wort de Websied jw.org opjemoakt. Doa kunn eena met de Tiet dan veschiednet toom läsen un oppjeschnaktet raufloden.

En August 2012 worden dise dree Websieden dan toopjeschmäten un to eene niee Websied jemoakt, jw.org. De Königreichsdienst von Dezamba 2012 säd äwa dit: “Ojjefäa een Dreddel von aule Menschen oppe Welt haben Internet. Dua kjrieen dee de mieeschte Informazion häa; besonda de junge Menschen. . . . Dit haft daut fa väl Menschen mäajlich jemoakt, de goode Norecht to hieren, besonda fa dee en soone Lenda, waut meist nich de Mäajlichkjeit doatoo hauden.”

Opp JW.ORG kjeem emma mea jeschräwnet, oppjeschnaktet un Videos nopp. Un emma mea Menschen brukten dise Websied. Aus de niee Websied jw.org aune 2012 opjemoakt wort, jeef et doa Bieekja un aundret opp 411 Sproaken toom raufloden. Dan bloos säwen Joa lota wia daut de ieeschte Websied, waut et opp 1 000 Sproaken jeef un doa mank wieren 100 Finjasproaken.

Aus daut met de COVID-19-Krankheit aunfunk, wort JW.ORG noch väl wieetvolla. Wäajen daut dan nich mea mäajlich wia, onse Toopkomes perseenlich to haben un daut sea schwoa wort, Bieekja un aundret to drekjen un to veschekjen, brukten väl mea dise Websied. Dän 7. Aprell 2020, dän Dach von daut Owentmol, wort dise Websied äwa 7 Million Mol opjemoakt. Daut wia soo väl aun eenen Dach, aus noch kjeenmol ea. En daut gaunze Joa 2019 wort dise Websied, jw.org, rom 800 Million Mol opjemoakt. Un aune 2020 wieren daut äwa 1 000 Million Mol. Von Jaunewoa 2022 aun wort dise Websied em Derchschnett rom 3 Million Mol dän Dach opjemoakt.

Daut de Informazion opp de Websied jw.org soo krakjt es, haft metjeholpen, daut väle nich soo schlajcht äwa Jehova siene Zeijen denkjen. Een Biespel es Tenesha Gordon. See sajcht: “Ekj jleich daut, woo leicht eena opp dise Websied waut finjt. Biejlikj wäa Jehova siene Zeijen sent, waut dee jleewen un opp waut dee äaren Gloowen stetten. Dit haft mie jeholpen, aundasch äwa dee to denkjen.”

Tenesha leet sikj aune 2017 deepen. See deent nu aus Betelhelpa en Jamaika.

Brooda Clive Martin, de Oppsechta äwa de Aufdeelunk fa de Websied, sajcht: “Daut moakt eenen sea tofräd, to seenen, woo Jehova de Websied jw.org brukt, om soo väl veschiedne Sorten Menschen de goode Norecht von Gott sien Kjennichrikj oppe gaunze Welt bekaunttomoaken.”

Wie sent soo dankboa fa dise Websied. Daut es soone groote Help fa ons en daut Prädichtwoakj. Derch dee kjenn wie weeten, woo daut met de Organisazion wiedajeit, un dee helt ons aus Breeda uk oppe gaunze Welt veeent. Doaderch woat Jehova jeieet (Psalm 145:1-2).