خدا نے سانوں اپنی مرضی نال فیصلے کرن دا حق دِتا اے۔ اوہنے پہلاں توں ای ایہہ طے نئیں کیتا ہویا کہ اَسی کیہہ کراں گے تے کیہہ نئیں۔ غور کرو کہ خدا دے کلام توں ایہہ گل کیویں پتہ چلدی اے۔‏

•   خدا نے جانوراں نُوں اِنج بنایا اے کہ اوہ بس اپنی فطرت دے مطابق کم کردے نیں۔ پر خدا نے سانوں اپنی صورت تے بنایا اے۔ (‏پیدایش 1:‏26‏)‏ اَسی خدا ورگیاں خوبیاں ظاہر کر سکنے آں جیویں کہ محبت تے انصاف۔ اوہنے سانوں اپنی مرضی نال فیصلے کرن دی صلاحیت دِتی اے۔‏

•   کافی حد تک اَسی اپنے مستقبل دا فیصلہ آپ کر سکنے آں۔ خدا اپنے کلام چ کہندا اے کہ اَسی اوہدے حکماں تے عمل کر کے زندگی نُوں چُن لیئے۔ (‏اِستثنا 30:‏19، 20‏)‏ اوہ سانوں اِنج کرن لئی کدی نہ کہندا جے سانوں اپنی مرضی نال فیصلے کرن دی آزادی نہ ہوندی۔ خدا سانوں اپنی مرضی تے چلن لئی مجبور نئیں کردا۔ ایہدی بجائے اوہ بڑے پیار نال کہندا اے:‏ جے تُوں میرے حکماں نُوں سنیں گا تے تیری سلامتی نہر وانگوں ہوئے گی۔—‏یسعیاہ 48:‏18‏۔‏

•   ساڈی کامیابی یاں ناکامی دا تعلق ساڈی قسمت نال نئیں اے۔ جے اَسی کسے کم چ کامیاب ہونا چاہنے آں تے سانوں سخت محنت کرنی پئے گی۔ پاک کلام چ لکھیا اے:‏ جیہڑا کم تیرے ہتھ لگدا اے اوہنوں پُورا زور لا کے کر لے۔ (‏واعظ 9:‏10‏)‏ ایہدے چ ایہہ وی دَسیا گیا اے کہ محنتی شخص دے منصوبے کامیاب ہوندے نیں۔—‏امثال 21:‏5‏۔‏

 ایہہ خدا دی نعمت اے کہ اَسی اپنی مرضی نال فیصلے کر سکنے آں۔ اِنج اوہنے سانوں موقع دِتا اے کہ اَسی ایہہ ظاہر کر سکئے کہ اَسی اوہنوں کِنّاں پیار کرنے آں۔—‏متی 22:‏37‏۔‏

 پاک کلام چ دَسیا گیا اے کہ خدا قادرِمطلق اے۔ ایہدا مطلب ایہہ وے کہ اوہدی طاقت دی کوئی حد نئیں۔ (‏ایوب 37:‏23؛‏ یسعیاہ 40:‏26‏)‏ پر اوہ ایس طاقت نُوں سب کجھ اپنے ہتھ چ رکھن لئی استمال نئیں کردا۔ مثال دے طور تے پاک کلام چ دَسیا گیا اے کہ بابل دے لوک خدا دے لوکاں دے دُشمن سن پر فیر وی خدا نے اوہناں نُوں فوراً ختم نئیں کیتا سگوں صبر نال کم لیا۔ (‏یسعیاہ 42:‏14‏)‏ ایسے طرحاں اوہ اَج وی اوہناں لوکاں نال صبر نال پیش آیا رہیا اے جیہڑے اپنی مرضی نال فیصلے کرن دی آزادی دا غلط استمال کر کے دُوجیاں نُوں نقصان پونچا رہے نیں۔ پر اوہ وقت آ رہیا اے جدوں خدا ایہناں لوکاں نُوں ختم کر دَوے گا۔—‏زبور 37:‏10، 11‏۔‏