کسے انسان نے خدا نُوں کدی نئیں ویکھیا۔ (‏خروج 33:‏20؛‏ یوحنا 1:‏18؛‏ 1-‏یوحنا 4:‏12‏)‏ پاک کلام چ لکھیا اے کہ خدا روح اے تے انسان روح نُوں ویکھ نئیں سکدے۔—‏یوحنا 4:‏24؛‏ 1-‏تیمُتھیُس 1:‏17‏۔‏

 پر فرشتے خدا نُوں ویکھ سکدے نیں کیونکہ اوہ آپ وی روحواں نیں۔ (‏متی 18:‏10‏)‏ ایہدے علاوہ کجھ انساناں نُوں روح دے طور تے اسمان تے زندہ کیتا جاندا اے تے فیر اوہ وی خدا نُوں ویکھ سکدے نیں۔—‏فِلپّیوں 3:‏20، 21؛‏ 1-‏یوحنا 3:‏2‏۔‏

 بائبل چ لفظ ویکھنا بوہت واری کسے گل نُوں سمجھن دے معنیاں چ استمال ہویا اے۔ (‏یسعیاہ 6:‏10؛‏ یرمیاہ 5:‏21؛‏ یوحنا 9:‏39-‏41‏)‏ سو اِک بندہ اپنے دل دِیاں اَکھاں نال خدا نُوں ویکھ سکدا اے یعنی اوہ اپنے ایمان دی وجہ توں خدا نُوں تے اوہدیاں خوبیاں نُوں جان سکدا اے۔ (‏اِفسیوں 1:‏18‏)‏ پاک کلام چ دَسیا گیا اے کہ اپنے اندر ایہو جیہا ایمان پیدا کرن لئی اَسی کیہہ کر سکنے آں؟‏

•   اَسی خدا دِیاں بنائیاں ہوئیاں چیزاں توں اوہدیاں خوبیاں بارے سکھ سکنے آں جیویں کہ اوہدی محبت، مہربانی، دانش‌مندی تے طاقت۔ (‏رومیوں 1:‏20‏)‏ جدوں خدا دے وفادار بندے ایوب دی توجہ خدا دِیاں بنائیاں ہوئیاں چیزاں تے دَوائی گئی تے اوہنوں محسوس ہویا کہ اوہ خدا نُوں اپنیاں اَکھاں نال ویکھ رہیا اے۔—‏ایوب 42:‏5‏۔‏

•   اَسی بائبل نُوں پڑھ کے خدا بارے سکھ سکنے آں۔ ایہدے چ لکھیا اے:‏ جے تُوں خدا نُوں لبھیں گا تے اوہ تینوں مل جائے گا۔—‏1-‏تواریخ 28:‏9؛‏ زبور 119:‏2؛‏ یوحنا 17:‏3‏۔‏

•   اَسی یسوع مسیح دی زندگی تے غور کرن نال خدا نُوں جان سکنے آں۔ یسوع مسیح نے اپنے اسمانی باپ یہوواہ دِیاں خوبیاں نُوں مکمل طور تے ظاہر کیتا جیس کر کے اوہ ایہہ کیہہ سکدا سی:‏ جنہے مینوں ویکھیا، اوہنے باپ نُوں ویکھیا اے۔—‏یوحنا 14:‏9‏۔‏

•   اَسی ایہو جہے طریقے نال زندگی گزار سکنے آں جدے توں خدا خوش ہووے۔ اَسی ایس گل تے وی غور کر سکنے آں کہ خدا کیہڑے کیہڑے طریقیاں نال ساڈی مدد کر رہیا اے۔ یسوع مسیح نے کہیا:‏ اوہ لوک خوش رہندے نیں جیہڑے پاک دل نیں کیونکہ اوہ خدا نُوں ویکھن گے۔—‏متی 5:‏8؛‏ زبور 11:‏7‏۔‏

 بائبل دِیاں کجھ ایتاں توں ایہو جیہا اشارہ مِلدا اے کہ انساناں نے اپنیاں اَکھاں نال خدا نُوں ویکھیا۔ پر جدوں اَسی پورا بیان پڑھنے آں تے سانوں پتہ چلدا اے کہ اوہناں نے خدا نُوں نئیں سگوں اوہدے کسے فرشتے نُوں ویکھیا سی جنہوں خدا دے نمائندے دے طور تے اوہناں کول گھلیا گیا سی یاں فیر اوہناں نے کسے رُویا چ خدا نُوں ویکھیا سی۔‏

 فرشتے۔‏

پرانے زمانے چ خدا نے فرشتیاں نُوں اپنے نمائندیاں تے طور تے انساناں کول گھلیا تاکہ اوہ اوہدے پیغام نُوں اوہناں تک پونچان۔ (‏زبور 103:‏20‏)‏ مثال دے طور تے اِک واری خدا نے بلدَی جھاڑی چوں موسیٰ نال گل کیتی۔ پاک کلام چ لکھیا اے کہ موسیٰ نے اپنا موُنہہ چھپایا کیونکہ اوہ خدا نُوں ویکھن توں ڈردا سی۔ (‏خروج 3:‏4،‏ 6‏)‏ پر جدوں اَسی پورا بیان پڑھنے آں تے سانوں پتہ چلدا اے کہ اصل چ موسیٰ نے خدا نُوں نئیں سگوں اوہدے اِک فرشتے نُوں ویکھیا سی۔—‏خروج 3:‏2‏۔‏

 ایسے طرحاں جدوں خدا دے کلام چ ایہہ کہیا گیا کہ خدا نے رُوبُرو یعنی آمنے سامنے ہو کے موسیٰ نال گلاں کیتیاں تے ایہدا مطلب ایہہ سی کہ خدا نے اِک قریبی دوست وانگوں موسیٰ نال گلاں کیتیاں۔ (‏خروج 4:‏10، 11؛‏ 33:‏11‏)‏ اصل چ موسیٰ نے خدا دا چہرہ نئیں ویکھیا سی۔ اوہنوں جیہڑی معلومات ملی، اوہ خدا دے فرشتیاں دے ذریعے ملی۔ (‏گلتیوں 3:‏19؛‏ اعمال 7:‏53‏)‏ پر خدا تے موسیٰ دا ایمان ایناں مضبوط سی کہ بائبل چ اوہدے بارے دَسیا گیا اے کہ اوہنے نظر نہ آن والے خدا نُوں ویکھیا۔—‏عبرانیوں 11:‏27‏۔‏

 جیس طرحاں خدا نے موسیٰ نال فرشتیاں دے ذریعے گل کیتی سی اوسے طرحاں اوہنے ابراہام نال وی فرشتیاں دے ذریعے گل کیتی۔ ایہہ گل سچ اے کہ بائبل دِیاں کجھ ایتاں نُوں سرسری طور تے پڑھن نال اِنج لگ سکدا اے کہ ابراہام نے خدا نُوں اپنیاں اَکھاں نال ویکھیا سی۔ (‏پیدایش 18:‏1،‏ 33‏)‏ پر ایس واقعے دا پورا بیان پڑھن نال پتہ چلدا اے کہ ابراہام کول جیہڑے تِن بندے آئے سن، اوہ اصل چ فرشتے سن جنہاں نُوں خدا نے گھلیا سی۔ ابراہام سمجھ گیا سی کہ اوہ خدا دے نمائندے نیں ایس لئی اوہنے اوہناں نال اِنج گل کیتی جیویں اوہ خدا نال گل کر رہیا اے۔—‏پیدایش 18:‏2، 3،‏ 22،‏ 32؛‏ 19:‏1‏۔‏

 رُویا۔‏

خدا رُویا دے ذریعے وی انساناں نُوں نظر آیا۔ مثال دے طور تے بائبل دِیاں کجھ ایتاں دے مطابق خدا دے نبیاں یسعیاہ ، دانی‌ایل تے عاموس نے خدا نُوں ویکھیا۔ (‏یسعیاہ 6:‏1؛‏ دانی‌ایل 7:‏9؛‏ عاموس 9:‏1‏)‏ پر جدوں اَسی پورا بیان پڑھنے آں تے سانوں پتہ چلدا اے کہ ہر موقعے تے اوہناں نے خدا نُوں براہِ‌راست اپنیاں اَکھاں نال نئیں سگوں رُویا چ ویکھیا سی۔—‏یسعیاہ1:‏1؛ دانی‌ایل 7:‏2‏؛ عاموس1:‏1۔‏