اِصطلا‌ح ”‎خدا دا کلام“‏ عام طور تے اوس پیغام وَل اشارہ کردی اے جیہڑا خدا وَلّوں ہووے۔ (‏لُوقا 11:‏28‏)‏ کجھ ایتاں چ اِصطلا‌ح ”‏خدا دا کلام“‏ یاں صرف ”‏کلام“‏ اِک خطاب دے طور وی استمال ہوئی اے۔—‏مکاشفہ 19:‏13 ؛‏ یوحنا 1:‏14‏۔‏

 خدا وَلّوں پیغام‏۔ نبیاں نے اکثر کہیا کہ جیہڑا پیغام اوہ دے رہے نیں، اوہ خدا دا کلام اے۔ مثال دے طور تے یرمیاہ نبی نے لوکاں نُوں پیغام سنان توں پہلے کہیا:‏ یہوواہ دا کلام میرے تے نازل ہویا۔ (‏یرمیاہ 1:‏4،‏ 11،‏ 13؛‏ 2:‏1‏)‏ ایہدے علاوہ سموئیل نبی نے ساؤل نُوں ایہہ دَسن توں پہلاں کہ خدا نے اوہنوں بادشاہ دے طور تے چُنیا اے، اوہنوں آکھیا:‏ تُوں حالے کھلوتا رہ کہ مَیں خدا دا کلام تینوں سناواں۔—‏1-‏سموئیل 9:‏27‏۔‏

 اِک خطاب۔‏ پاک صحیفیاں توں پتہ چلدا اے کہ اِصطلا‌ح ”‏کلام“‏ یسوع مسیح دے اِک خطاب دے طور تے وی استمال ہوئی اے۔ اوہدے لئی ایہہ خطاب اسمان تے اِک روحانی ہستی دے طور تے وی استمال ہویا اے تے زمین تے اِک انسان دے طور تے وی۔ اَسی ایہہ کیوں کہہ سکنے آں؟ آؤ ایس بارے کجھ گلاں تے غور کریئے:‏

•   کلام باقی ساری مخلوق توں پہلاں موجود سی۔بائبل چ دَسیا گیا اے کہ شروع چ کلام سی۔ اوہ شروع چ خدا دے نال سی۔ (‏یوحنا 1:‏1، 2‏)‏ یسوع نُوں ساریاں شیواں بنان توں پہلاں بنایا گیا سی۔ اوہ ساریاں چیزاں توں پہلے موجود سی۔—‏کُلسّیوں 1:‏13-‏15،‏ 17‏۔‏

•   کلام اِک انسان دے طور تے زمین تے آیا۔ پاک صحیفیاں چ دَسیا گیا اے کہ کلام انسان بن کے ساڈے وچکار رہیا۔ (‏یوحنا 1:‏14‏)‏ یسوع مسیح نے سب کجھ چھڈ دِتا تے غلام وانگوں بن گیا، جی ہاں، اِک انسان بن گیا۔—‏فِلپّیوں 2:‏5-‏7‏۔‏

•   کلام خدا دا پُتر اے۔ ایہہ کہن دے بعد کہ کلام انسان بنیا، یوحنا رسول نے آکھیا:‏ اَسی اوہدی ایہو جہی شان ویکھی جیویں باپ دے اکلوتے پُتر دی ہوندی اے۔ (‏یوحنا 1:‏14‏)‏ یوحنا نے ایہہ وی کہیا:‏ یسوع خدا دے پُتر نیں۔—‏1-‏یوحنا 4:‏15‏۔‏

•   کلام چ خدا ورگیاں خوبیاں نیں۔ کلام اِک خدا سی۔ (‏یوحنا 1:‏1‏)‏ یسوع خدا دی شان دا عکس اے تے ہو بہو اوہدے وانگوں اے۔—‏عبرانیوں 1:‏2، 3‏۔‏

•   کلام اِک بادشاہ دے طور تے حکمرانی کردا اے۔ پاک صحیفیاں چ دَسیا گیا اے کہ کلام دے سر اُتے بوہت سارے تاج نیں۔ (‏مکاشفہ 19:‏12، 13‏)‏ کلام بادشاہواں دا بادشاہ تے مالکاں دا مالک اے۔ (‏مکاشفہ 19:‏16‏)‏ یسوع مسیح بارے ایہہ آکھیا گیا کہ اوہ بادشاہواں دا بادشاہ تے مالکاں دا مالک اے۔—‏1-‏تیمُتھیُس 6:‏14، 15‏۔‏

•   کلام خدا دا نمائندہ اے۔ جیس ہستی نُوں ”‏کلام“‏ کہیا گیا اے اوہدے ذریعے خدا معلومات تے ہدیتاں دیندا اے۔ ایہی گل یسوع مسیح نے اپنے بارے آکھی سی کہ میرا باپ جنہے مینوں گھلیا اے اوہنے مینوں حکم دِتا اے کہ مَیں کیہہ بولنا اے تے کیہہ کہنا اے۔ ایس لئی مَیں جو کجھ کہنا واں بالکل اونویں ای کہنا واں جیویں باپ نے مینوں دَسیا اے۔—‏یوحنا 12:‏49، 50‏۔‏