بائبل چ دَسیا گیا اے کہ خدا چاہندا اے کہ اوہدے بندے حرام‌کاری توں بچن۔ (‏1-‏تھسلُنیکیوں 4:‏3‏)‏ حرام‌کاری دا مطلب اے اپنے شادی‌شُدہ ساتھی دے علاوہ کسے ہور نال جنسی ملاپ کرنا یاں کسے مرد تے عورت دا بغیر شادی کیتے کٹھے رہنا۔ ایہدے علاوہ ایہدے چ مرد دا مرد نال تے عورت دا عورت نال جنسی تعلق قائم کرنا وی شامل اے۔‏

•  خدا ایہہ کیوں چاہندا اے کہ جے اِک مرد تے عورت کٹھے رہنا چاہندے نیں تے اوہ شادی کرن؟‏

•  کیہہ اِک دُوجے نُوں سمجھن لئی شادی توں پہلاں کٹھے رہنا صحی اے؟‏

•  شادی دے بندھن نُوں مضبوط کرن لئی کیہہ کرنا ضروری اے؟‏

•   شادی دا اِنتظام خدا نے شروع کیتا اے۔‏ سب توں پہلی شادی یہوواہ نے ای کرائی سی۔ (‏پیدایش 2:‏22-‏24‏)‏ خدا ایہہ نئیں چاہندا سی کہ مرد تے عورت شادی دے بغیر کٹھے رہن۔‏

•   خدا انساناں دی بھلائی چاہندا اے۔‏ خدا چاہندا سی کہ شادی دا بندھن عمر بھر دا بندھن ہووے تاکہ میاں بیوی تے بچے ہمیشاں تک خوشی نال کٹھے رہن۔ ذرا اِک مثال تے غور کرو۔ فرنیچر بنان والیاں کمپنیاں اکثر فرنیچر دے نال اِک کتاب گھلدیاں نیں جدے چ دَسیا ہوندا اے کہ فرنیچر نُوں جوڑنا کیویں اے۔ ایسے طرحاں خدا نے وی اپنے کلام چ دَسیا اے کہ شادی دے بندھن نُوں کیویں جوڑ کے رکھنا اے۔ جیہڑے لوک خدا دے اصولاں تے معیاراں مطابق چلدے نیں اوہناں دا شادی دا بندھن مضبوط رہندا اے۔—‏یسعیاہ 48:‏17، 18‏۔‏

•   ناجائز جنسی تعلقات دا انجام بوہت بھیڑا ہو سکدا اے۔‏ مثال لئی، ایہدی وجہ توں بیماریاں لگ جاندیاں نیں، نہ چاہندے ہویاں وی عورتاں حاملہ ہو جاندیاں نیں تے کئی لوکاں نُوں محسوس ہوندا اے کہ اوہ اپنیاں نظراں چ ڈِگ گئے نیں۔‏ a

•   خدا نے انساناں نُوں اولاد پیدا کرن دی صلاحیت دِتی اے۔‏ خدا زندگی نُوں پاک خیال کردا اے تے اولاد پیدا کرن دی صلاحیت اوہدے وَلّوں اِک نعمت اے۔ خدا چاہندا اے کہ اَسی شادی دے بندوبست دی عزت کر کے ایس نعمت لئی قدر وکھائیے۔—‏عبرانیوں 13:‏4‏۔‏

 کامیاب شادی لئی ایہہ ضروری نئیں کہ کُڑی منڈا شادی توں پہلاں کٹھے رہ کے ویکھن۔ اِنج تے اوہناں دونواں وچوں کوئی وی جدوں چاہوے چھڈ کے جا سکدا اے۔ شادی اوہدوں کامیاب ہوندی اے جدوں دونویں جی اِک دُوجے دے وفادار رہن تے مِل کے مشکلاں دا سامنا کرن۔‏ b شادی دی وجہ توں میاں بیوی اِک مُٹھ رہندے نیں۔—‏متی 19:‏6‏۔‏

 اَسی ایہہ توقع نئیں کر سکدے کہ شادی دے بعد کوئی مسئلہ نئیں ہوئے گا۔ پر جے میاں بیوی بائبل چ دِتے گئے مشوریاں تے عمل کرن گے تے اوہ اپنی شادی نُوں خوش‌گوار بنا سکدے نیں۔ ذرا کجھ مشوریاں تے غور کرو:‏

•   اپنے نالوں بوہتا اپنے جیویں ساتھی دا خیال رکھو۔—‏1-‏کُرنتھیوں 7:‏3-‏5؛‏ فِلپّیوں 2:‏3، 4‏۔‏

•   اِک دُوجے نال پیار کرو تے اِک دُوجے دی عزت کرو۔—‏اِفسیوں 5:‏25،‏ 33‏۔‏

•   اپنی زبان تے قابو رکھنا سکھو۔—‏امثال 12:‏18‏۔‏

•   صبر نال کم لوو تے معاف کرن لئی تیار رہوو۔—‏کُلسّیوں 3:‏13، 14‏۔‏