قائن پہلے انسانی جوڑے آدم تے حوا دا پہلوٹھا پُتر سی جنہے اپنی کسے بھین یاں کسے نیڑے دی رشتے‌دار نال ویاہ کیتا سی۔ ایس بارے آؤ کجھ گلاں تے غور کرئیے:‏

قائن تے اوہدے گھر والیاں بارے کجھ گلاں

•   سارے انسان آدم تے حوا دی اولاد نیں۔‏ خدا نے اِک آدمی یعنی آدم دے ذریعے ساریاں قوماں نُوں پیدا کیتا تاکہ اوہ زمین تے رہن۔ (‏اعمال 17:‏26‏)‏ پاک کلام چ ایہہ وی لکھیا اے کہ حوا سارے انساناں دی ماں اے۔ (‏پیدایش 3:‏20‏)‏ ایس توں ظاہر ہوندا اے کہ قائن نے یقیناً آدم تے حوا دی اولاد وچوں ای کسے عورت نال ویاہ کیتا ہوئے گا۔‏

•   آدم تے حوا دے بوہت سارے بچیاں وچوں قائن تے ہابل سب توں وڈے سن۔‏ (‏پیدایش 4:‏1، 2‏)‏ جدوں قائن نُوں اپنے بھرا نُوں قتل کرن دی وجہ توں اپنے علاقے چوں کڈھ دِتا گیا تے اوہنے آکھیا کہ جیہڑا وی مینوں ویکھے گا اوہ مینوں قتل کر دَوے گا۔ (‏پیدایش 4:‏14‏)‏ قائن نُوں کدے ہتھوں قتل ہون دا ڈر سی؟ پاک کلام چ آدم بارے دَسیا گیا اے کہ اوہدے پُتر تے دِھیاں پیدا ہوئیاں۔ (‏پیدایش 5:‏4‏)‏ ایہدے توں ظاہر ہوندا اے کہ قائن نُوں آدم دی باقی اولاد وچوں ای کسے دے ہتھوں قتل ہون دا خطرہ سی۔‏

•   انسانی تریخ دے شروع چ قریبی رشتے‌داراں نال شادی کرنا عام سی۔‏ مثال دے طور تے خدا دے بندے ابراہام نے اپنی متریئی بھین نال شادی کیتی سی۔ (‏پیدایش 20:‏12‏)‏ کسے قریبی رشتے‌دار نال ویاہ نہ کرن دا حکم پہلی واری موسیٰ دی شریعت چ دِتا گیا سی تے ایہہ شریعت قائن دے صدیاں بعد دِتی گئی سی۔ (‏احبار 18:‏9،‏ 12، 13‏)‏ اوس زمانے چ قریبی رشتے‌داراں نال شادی توں پیدا ہون والی اولاد چ پیدائشی طور تے کوئی نُقص ہون دا ایناں خطرہ نئیں سی ہوندا جِنّاں کہ اَج کل ہوندا اے۔‏

•   بائبل چ آدم،‏ حوا تے اوہناں دی اولاد بارے تریخی لحاظ نال بالکل درست معلومات دِتیاں گئیاں نیں۔‏ آدم دے نسب‌نامے نُوں نہ صرف موسیٰ نے پیدایش دی کتاب چ تفصیل نال لکھیا اے سگوں تریخ‌دان عزرا تے لُوقا نے وی اپنی اپنی کتاب چ ایہنوں لکھیا اے۔ (‏پیدایش 5:‏3-‏5؛‏ 1-‏تواریخ 1:‏1-‏4؛‏ لُوقا 3:‏38‏)‏ پاک کلام لکھن والیاں نے قائن دے واقعے دا حوالہ اِک تریخی واقعے دے طور تے دِتا اے۔—‏عبرانیوں 11:‏4؛‏ 1-‏یوحنا 3:‏12؛‏ یہوداہ 11‏۔‏