پاک کلام چ اپنے جسم تے کجھ بنوان دا ذکر صرف احبار 19:‏28 چ مِلدا اے جِتھے لکھیا اے کہ تُوں اپنے جسم اُتے کجھ نہ بنوائیں۔ یہوواہ خدا نے ایہہ حکم بنی‌اِسرائیل نُوں دِتا سی تاکہ اوہ اوہناں قوماں توں فرق نظر آن جیہڑیاں اپنے جسم اُتے اپنے دیوتاواں دے ناں لکھواندیاں سن۔ (‏استثنا 14:‏2‏)‏ ایہہ سچ اے کہ اَج مسیحی اوس شریعت دے تابع نئیں جیہڑی اِسرائیلیاں نُوں دِتی گئی سی پر سانوں اوس اصول تے غور کر نا چاہی دا اے جیہڑا ایس حکم چ پایا جاندا اے۔‏

کیہہ مسیحیاں نُوں اپنے جسم تے ٹیٹو بنوانے چاہی دے نیں؟‏

 ایس بارے پاک کلام دِیاں کجھ ایتاں تے غور کرو:‏

•   عورتاں حیاداری نال اپنے آپ نُوں سنوارن۔ (‏1-‏تیمُتھیُس 2:‏9‏)‏ ایس ایت چ جیس یونانی لفظ دا ترجمہ ”‏حیاداری“‏ کیتا گیا اے اوہدا مطلب اے دُوجیاں دی سوچ تے جذباتاں دا خیال رکھنا یعنی اَسی کوئی ایہو جیہا کم نہ کریئے جدی وجہ توں دُوجے ساڈے بارے کجھ غلط سوچن لگ پین۔ پاک کلام دا ایہہ اصول مرداں تے عورتاں دونواں لئی اے۔ سانوں دُوجیاں دی سوچ تے جذباتاں دا خیال رکھنا چاہی دا اے تے دُوجیاں دا دھیان اپنے وَل کھچن دی کوشش نئیں کرنی چاہی دی۔‏

•   کجھ لوک دُوجیاں توں بالکل الگ نظر آن لئی ٹیٹو بنواندے نیں۔ تے کجھ ایہہ ثابت کرن لئی ٹیٹو بنواندے نیں کہ اوہ اپنے جسم نال جو چاہن کر سکدے نیں۔ پر پاک کلام چ کہیا گیا اے کہ مسیحی اپنا جسم اِک ایہو جہی قربانی دے طور تے پیش کرن جیہڑی زندہ، پاک تے خدا نُوں پسند اے یعنی اپنی سوچن سمجھن دی صلاحیت نُوں استمال کر کے مُقدس خدمت کرن۔ (‏رومیوں 12:‏1‏)‏ ایس لئی اپنی سوچن سمجھن دی صلاحیت نُوں استمال کردے ہوئیاں اندازہ لاؤ کہ تُسی ٹیٹو کیوں بنوانا چاہندے او۔ کیہہ ایس لئی تاکہ تُسی کسے گروپ دے ممبر لگو یاں فیر صرف فیشن لئی؟ جے ایہہ گل اے تے یاد رکھو کہ وقت دے نال نال تواڈی سوچ بدل جائے گی پر ٹیٹو نئیں مٹے گا۔ ایس لئی اپنی سوچ دی جانچ کرو تاکہ تُسی صحی فیصلہ کر سکو۔—‏امثال 4:‏7‏۔‏

•   ہر جلدباز بندے دا انجام محتاجی اے۔ (‏امثال 21:‏5‏)‏ بوہت سارے لوک جلدبازی چ ٹیٹو بنوان دا فیصلہ کردے نیں۔ پر ایہدا اثر اوہناں دی نوکری تے دُوجیاں نال تعلقات تے ہمیشاں لئی ہو سکدا اے۔ ایہدے علاوہ ٹیٹو نُوں مٹوان لئی بڑے خرچے تے تکلیف چوں وی لنگھنا پے سکدا اے۔ تحقیق توں پتہ چلیا اے کہ ٹیٹو بنوان والے بوہت سارے لوک بعد چ پچھتاندے نیں تے سوچدے نیں کہ کاش اوہناں نے ٹیٹو نہ بنوایا ہوندا۔‏