جی ہاں کیونکہ خدا سب توں ودھیا طریقے نال ساڈی مدد کر سکدا اے۔ پاک کلام چ دَسیا گیا اے:‏ خدا دُکھی لوکاں نُوں تسلی، حوصلہ، تازگی تے خوشی دیندا اے۔—‏2-‏کُرنتھیوں 7:‏6‏۔‏

•   ہمت تے طاقت دے کے۔‏ خدا ساڈیاں ساریاں مشکلاں نُوں ختم نئیں کردا پر اوہ ساڈیاں دُعاواں دا جواب دے کے سانوں تازگی،خوشی تے مشکلاں دا سامنا کرن لئی طاقت دیندا اے۔ (‏فِلپّیوں 4:‏13‏)‏ تُسی پورا یقین رکھ سکدے او کہ خدا تواڈی گل سنن لئی ہمیشاں تیار اے کیونکہ پاک کلام چ لکھیا اے:‏ یہوواہ شکستہ دل لوکاں دے نیڑے وے تے دُکھی لوکاں نُوں بچاندا اے۔ (‏زبور 34:‏18‏)‏ اوہ تے اوس ویلے وی تواڈی فریاد سن سکدا اے جدوں تُسی اپنے جذباتاں نُوں اپنے لفظاں چ بیان نئیں کر سکدے۔—‏رومیوں 8:‏26، 27‏۔‏

•   چنگیاں مثالاں دے ذریعے۔‏ خدا دے اِک بندے نے اوہدے کولوں دُعا کیتی:‏ اَے رب، مَیں تینوں گہرائیاں توں پکارنا واں۔ جدوں ایہہ زبور لکھن والے نے ایس گل تے سوچ وچار کیتا کہ خدا ساڈے گُناہواں نُوں معاف کر دیندا اے تے اوہدے دُکھی دل نُوں تسلی ملی۔ ایس لئی اوہنے کہیا:‏ اَے رب، جے تُوں ساڈے گُناہواں دا حساب رکھدا تے کون قائم رہندا؟ کوئی وی نئیں۔ پر تُو سانوں معاف کرنا ایں تاکہ اَسی تیرا خوف منیے۔—‏زبور 130:‏1،‏ 3، 4‏۔‏

•   امید دے کے۔‏ خدا سانوں صرف ہُن تسلی نئیں دیندا سگوں اوہنے وعدہ کیتا اے کہ اوہ اوہناں سارے مسئلیاں نُوں وی ختم کر دَوے گا جنہاں دی وجہ توں لوک ڈپریشن دا شکار ہوندے نیں۔ جدوں اوہدا ایہہ وعدہ پورا ہوئے گا تے پہلیاں چیزاں دا [‏جدے چ ڈپریشن وی شامل اے]‏ فیر ذکر نئیں ہووے گا تے اوہ خیال چ وی نہ آن گیاں۔—‏یسعیاہ 65:‏17‏۔‏

 نوٹ:‏ بھانویں کہ یہوواہ دے گواہواں نُوں پتہ اے کہ خدا بیماری دا سامنا کرن چ اوہناں دی مدد کردا اے پر اوہ ڈپریشن تے دُوجیاں بیماریاں دا علاج وی کراندے نیں۔ (‏مرقس 2:‏17‏)‏ اَسی کسے خاص علاج بارے مشورہ نئیں دیندے۔ اَسی ایہہ مننے آں کہ ایہو جہے معاملیاں چ ہر بندے نُوں آپ فیصلہ کرنا چاہی دا اے۔‏